பிரபல சிங்கள நடிகர் தசுன் நிஷான் டி சில்வா தூக்கிட்டு தற்கொலை செய்துக்கொண்டுள்ளார். சிங்கள தொலைக்காட்சி நாடகங்களில் நடித்துள்ள தசுன், பல இசை காணொளிகளிலும் நடித்துள்ளார்.

பிரபல கலைஞரான தசுன் தனிப்பட்ட காரணத்திற்காக இன்று தூக்கிட்டு தற்கொலை செய்துக் கொண்டுள்ளார் என தெரியவந்துள்ளது.

பல பாத்திரங்களில் நடித்துள்ள இவர் மக்கள் மத்தியில் ஆதரவு பெற்ற கலைஞராவார். பன்னிப்பிட்டிய பிரதேசத்தில் நடித்து வந்த தசுன் தான் தங்கியிருந்த அறையில் இவ்வாறு தற்கொலை செய்துக்கொண்டுள்ளார்.

இலங்கையில் வேகமாக நிர்மாணிக்கப்பட்டு வரும் தாமரை கோபுரம் அடுத்த வருடம் மார்ச் மாதம் திறக்கப்படவுள்ளதாக அறிவிக்கப்படவுள்ளது.

350 மீற்றர் உயரமான இந்த கோபுரம், தொலைக்காட்சி மற்றும் வானொலிகளுக்கு முதன்மை பரிமாற்று கோபுரமாக அமையவுள்ளது.

தாமரை கோபுரத்தில் இருந்து காலநிலை சீரான நாட்களில் சிவனொளிபாத மலையை கூட பார்வையிடலாம் என தெரிவிக்கப்படுகின்றது.

இந்த கோபுர திறப்பின் மூலம் பெருமளவு வெளிநாட்டு சுற்றுலா பயணிகளை கவர முடியுமென எதிர்பார்க்கப்படுகிறது.

பல்வேறு சர்ச்சைகளுக்கு மத்தியிலும் நிர்மாணிப்பு பணிகள் திட்டமிட்ட வகையில் முன்னெடுக்கப்பட்டு வருவதாக தாமரை கோபுர திட்ட முகாமையாளரான Cai XIaofeng தெரிவித்துள்ளார்.

D.R. விஜேவர்தன மாவத்தை, கொழும்பு 10 இல் நிர்மாணிக்கப்பட்டு வருகின்ற இந்த திட்டத்திற்கு 104 மில்லியன் டொலர் செலவிடப்படுகிறது.

50 தொலைக்காட்சி சேவைகள் மற்றும் 35 வானொலி நிலையங்கள் ஆகியவற்றிற்கான சமிக்ஞைகளை இந்த கோபுரத்தின் மூலம் எளிதாக பெற்றுக்கொள்ள முடியும்.

சீனாவின் எக்ஸ்சிம் வங்கியினால் 104.3 மில்லியன் டொலர் நிதியளிக்கப்பட்ட திட்டம் 2012ஆம் ஆண்டு ஜனவரி மாதம் 20ஆம் திகதி ஆரம்பிக்கப்பட்டது. ஆரம்பத் திட்டத்தின்படி 912 நாட்களுக்குள் இந்த திட்டம் நிறைவு செய்யப்படும் என எதிர்பார்க்கப்பட்டது.

இந்த திட்டம் தொலைத்தொடர்பு கோபுரத்தின் முக்கிய செயல்பாடாக இருந்தாலும், அது பல செயல்பாட்டு கட்டடங்களாக வடிவமைக்கப்படும்.

தாமரை கோபுர தளம் பல்வேறு வர்த்தக மையங்கள், உணவகங்களை கொண்டுள்ளதுடன், அருங்காட்சியகம் ஒன்றை நிர்மாணிப்பதற்கும் எதிர்பார்க்கப்படுகின்றது.

இந்த கோபுரத்தில் விருந்து அரங்கு உள்ளதுடன், எட்டாவது மாடியில் ஒரு கண்காணிப்பு தளமும் உள்ளடக்கப்பட்டுள்ளதாக தெரிவிக்கப்படுகின்றது.

புத்தளம் – வணதவில்லு பகுதியில் 15 வயது சிறுமி ஒருவரை பாலியல் துஷ்பிரயோகம் செய்த குற்றச்சாட்டுக்காக இராணுவ சிப்பாய் ஒருவர் நேற்று கைது செய்யப்பட்டுள்ளார்.

இதில் மிஹிந்தலை இராணுவ முகாமில் இருக்கும் 40 வயதுடைய சிப்பாயை வணதவில்லு பொலிஸார் சந்தேகத்தின் பேரில் கைது செய்துள்ளனர்.

கடந்த 18ஆம் திகதி விடுமுறையை கழிப்பதற்காக வீட்டிற்கு வந்திருந்த குறித்த நபர், பக்கத்து வீட்டில் இருக்கும் 15 வயது சிறுமியை பாலியல் துஷ்பிரயோகப்படுத்தி உள்ளதாக முறைப்பாடு செய்யப்பட்டுள்ளது.

குறித்த சிறுமி வைத்திய பரிசோதனைக்கு உட்படுத்தப்பட்டுள்ளதுடன், சம்பவம் குறித்து பொலிஸார் மேலதிக விசாரணைகளை முன்னெடுத்து வருகின்றனர்.

வருடத்தின் இதுவரையான காலப்பகுதியில் இடம்பெற்ற விபத்துக்களின் 1789 பேர் உயிரிழந்துள்ளனர்.

இந்த வருடத்தின் ஜனவரி முதலாம் திகதியிலிருந்து ஜூலை மாதம் 31 ஆம் திகதி வரை இடம்பெற்ற விபத்துக்களில் 533 பாதசாரிகள் உயிரிழந்துள்ளதாக தேசிய வீதி போக்குவரத்து அதிகார சபை தெரிவித்துள்ளது.

மோட்டார் சைக்கிள் சாரதிகள் 588 பேர் உயிரிழந்துள்ளதுடன் மோட்டார் சைக்கிளில் பின்னால் அமர்ந்து பயணித்து விபத்திற்குள்ளாகியதில் 106 பேர் உயிரிழந்துள்ளனர்.

ஜனவரி முதலாம் திகதியிலிருந்து ஜூன் மாதம் 31 ஆம் திகதி வரையான காலப்பகுதியில் வாகன விபத்துக்களில் 142 சாரதிகள் உயிரிழந்துள்ளதுடன் 256 பயணிகள் காயமடைந்துள்ளனர்.

இதுதவிர இந்த காலப்பகுதியில் 164 பாதசாரிகள் உயிரிழந்துள்ளதாக தேசிய வீதி போக்குவரத்திற்கான அதிகார சபை தெரிவித்துள்ளது.

வடக்கு மார்க்கத்திலான ரயில் சேவை வழமைக்குத் திரும்பியுள்ளது. தம்புத்தேகம பகுதியில் ரயிலொன்று தடம் புரண்டமையால் வடக்கு மார்க்கத்திலான ரயில் சேவை நேற்று (24.09) மாலை முதல் தடைப்பட்டது.

நேற்றிரவு 9.45 அளவில் தடம்புரண்ட ரயில் மீண்டும் தண்டவாளத்தில் நிறுத்தப்பட்டதாக ரயில்வே கட்டுப்பாட்டு நிலையம் தெரிவித்துள்ளது.

வடக்கு ரயில் மார்க்கத்திலான ரயில் சேவையை வழமைக்கு கொண்டுவந்துள்ள போதிலும், ரயில் தடம்புரண்ட பகுதியில் போக்குவரத்திற்கு தாமதம் ஏற்பட்டுள்ளதாகவும் குறிப்பிடப்பட்டுள்ளது.

குறித்த பகுதியில் தண்டவாளங்களை சீரமைக்கும் பணிகள் தொடர்ந்தும் முன்னெடுக்கப்பட்டுள்ளதாக ரயில்வே கட்டுப்பாட்டு நிலையம் சுட்டிக்காட்டியுள்ளது.

கொழும்பிலிருந்து காங்கேசன் துறை நோக்கி பயணித்த அஞ்சல் ரயிலில் அநுராதபுரம், யாழ்ப்பாணம் பிரதான வீதியில் யாழ்ப்பாண சந்திக்கருகிலுள்ள ரயில் கடவையில் லொறி ஒன்று மோதி விபத்துக்குள்ளானதில் ஒருவர் படுகாயமடைந்து வைத்தியசாலையில் அனுமதிக்கப்பட்டுள்ளார்.

குறித்த விபத்தில் வவுனியாவிலிருந்து தம்புத்தேகம பொருளாதார மத்திய நிலையத்திற்கு பழங்களை ஏற்றிச் சென்ற லொறியின் சாரதியே படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார்.