அமெரிக்காவின் மேரி லேண்ட் மாநிலத்தின் ஆளுநர் பதவிக்காக போட்டியிடும், இலங்கையின் கிரிஷாந்தி விக்ணராஜா பிரசார நடவடிக்கை ஈடுபட்டுள்ளார்.

இவர் அமெரிக்காவின் முன்னாள் ஜனாதிபதியின் பாரியார் மிச்செல் ஒபாமாவின் கொள்கை வகுப்பாளராக கடமையாற்றியிருந்தமை சிறப்பம்சமாகும்.

யேல் மற்றும் ஒக்ஸ்போர்ட் பல்கலைக்கழகங்களில் பட்டப்படிப்பை நிறைவு செய்த கிரிஷாந்தி விக்ணராஜா, இம்முறை மேரிலாண்ட் ஆளுனர் பதவிக்கு போட்டியிடும் ஒரேயொரு பெண் வேட்பாளராவார்.

இலங்கையில் இடம்பெற்ற யுத்தம் காரணமாக நாட்டைவிட்டு வௌியேறிய கிரிஷாந்தியின் பெற்றோர் ஆசிரியர்களாவர்.

9 மாத குழந்தையாக அமெரிக்காவிற்குச் சென்ற கிரிஷாந்தியின் தற்போதைய வயது 37.

ஜனநாயகக் கட்சியைப் பிரதிநிதித்துவப்படுத்தி ஆளுனர் பதவிக்குப் போட்டியிடும் கிரிஷாந்தி தமது பிரசார நடவடிக்கைகளை முன்னெடுத்து வருகின்றார்.

250,000 தனியார் வேலைவாய்ப்பு, அதிவேக இணைய வசதி, வருடமொன்றுக்கு கல்விக்காக 2.9 பில்லியன் அமெரிக்க டொலர் ஒதுக்கீடு போன்ற வாக்குறுதிகளை அவர் முன்வைத்துள்ளார்.

அத்துடன், குழந்தை பெற்றவுடன் பெற்றோருக்கு மூன்று மாத விடுமுறை வழங்கப்படும் என கிரிஷாந்தி தமது விஞ்ஞாபனத்தில் குறிப்பிட்டுள்ளமை விசேட அம்சமாகும்.

 
மன்னார் – யாழ் பிரதான வீதி, மாந்தை சந்தியில் இன்று மாலை இடம்பெற்ற விபத்தில் 19 வயது இளைஞரொருவர் உயிரிழந்துள்ளதாக பொலிஸார் தெரிவித்துள்ளனர்.

இந்த விபத்தில் யாழ். ஆத்திமோட்டை பகுதியைச் சேர்ந்த சன்முகப்பிள்ளை இதுசன் என்ற இளைஞன் சம்பவ இடத்திலேயே உயிரிழந்துள்ளதாக தெரிவிக்கப்படுகிறது.

சம்பவம் தொர்பில் மேலும் தெரியவருவதாவது, திருக்கேதீஸ்வரத்தில் இருந்து 4 இளைஞர்கள் முச்சக்கர வண்டியில் பயணித்த நிலையில், அவர்கள் பயணித்த முச்சக்கர வண்டி பிரதான வீதியை கடக்க முற்பட்டுள்ளது.

இந்த நிலையில் மன்னாரில் இருந்து யாழ்ப்பாணம் நோக்கி பயணித்த லொறியுடன் குறித்த முச்சக்கர வண்டி மோதி விபத்திற்கு உள்ளாகியுள்ளது.

அதில் ஒரு இளைஞன் உயிரிழந்த நிலையில், திருக்கேதீஸ்வரத்தை சேர்ந்த சதுகரன் (வயது-19), கூறாய் மேற்கைச் சேர்ந்த சதீஸ்குமார் (வயது-20), கைதடியைச் சேர்ந்த எஸ்.தமிழ் வானன் (வயது-18) ஆகிய மூன்று இளைஞர்களும் படுகாயமடைந்துள்ளனர்.

அத்துடன், படுகாயமடைந்த மூன்று இளைஞர்களும் உடனடியாக மன்னார் பொது வைத்தியசாலையில் அனுமதிக்கப்பட்டுள்ளனர்.

சம்பவ இடத்திற்கு வந்த மன்னார் வீதி போக்குவரத்து பொலிஸார் சடலத்தை மீட்டுள்ளதுடன், லொறியின் சாரதியை கைது செய்துள்ளனர்.

உயிரிழந்த இளைஞனின் சடலம் மன்னார் பொது வைத்தியசாலையில் ஒப்படைக்கப்பட்டுள்ளதுடன், விபத்து தொடர்பிலான மேலதிக விசாரணைகளை மன்னார் பொலிஸார் மேற்கொண்டு வருகின்றனர்.

 
இலங்கையில் உலக சாதனைக்காக செய்யப்பட்ட திருமணம் சர்வதேச ரீதியாக பெரும் சர்ச்சையை ஏற்படுத்தியுள்ளது.

கண்டி, கண்ணொருவ பிரதேசத்தில் இடம்பெற்ற திருமண நிகழ்வில் மணப்பெண்ணின் ஒசரி புடவையை பிடிப்பதற்கு சீருடையிலுள்ள பாடசாலை மாணவர்கள் ஈடுபடுத்தப்பட்டமை சர்ச்சையான விடயமாக மாறியுள்ளது.

இந்த சம்பவம் தேசிய சிறுவர் பாதுகாப்பு அதிகார சபையினால் விசாரணை செய்யும் அளவுக்கு பல்வேறு மட்டங்கள் பிரச்சினையை ஏற்படுத்தியுள்ளது.

அலவத்துகொட சரத் ஏக்கநாயக்க பாடசாலையின் 2500 மாணவர்கள் புடவையை ஏந்திப் பிடிக்க ஈடுபடுத்தப்பட்டனர். இது தொடர்பில் கிடைத்த முறைப்பாடுகளுக்கமைய விசாரணை ஆரம்பிக்கப்பட்டுள்ளதாக சிறுவர் பாதுகாப்பு அதிகார சபை தெரிவித்துள்ளது.

எப்படியிருப்பினும் கின்னஸ் சாதனை நடத்தும், நோக்கில் மேற்கொள்ளப்பட்ட இந்த முயற்சியினால் இலங்கைக்கு சர்வதேசத்தினால் பாராட்டு கிடைக்கும் என எதிர்பார்த்த போதிலும் கடுமையான அதிருப்தி வெளியிடப்பட்டுள்ளது.

உலக புகழ்பெற்ற டெலிகிராப் போன்ற பிரபல செய்தி சேவைகளினால், இலங்கையில் உலக சாதனைக்காக செய்யப்பட்ட திருமணத்தில், சிறுவர்கள் குழந்தை தொழிலாளிகளாக ஈடுபடுத்தப்பட்டுள்ளதாக குற்றம் சாட்டப்பட்டுள்ளது.

இதற்கு மேலதிகமாக கார்டியன், பிரான்ஸ் செய்தி சேவைகள் உட்பட சர்வதேச ஊடகங்களும் இவ்வாறே செய்தி வெளியிட்டுள்ளன.

ஐக்கிய நாடுகளின் சிறுவர்கள் தொடர்பான கொள்கைகளுக்கமைய, பல வருடங்களுக்கு முன்னரே குழந்தை தொழிலாளி சேவை முழுமையாக தடை செய்யப்பட்டுள்ளது.

இந்த கொள்கை குறித்து கருத்திற்கொள்ளாமல் இலங்கையில் இன்னமும் குழந்தை தொழிலாளி சேவை முன்னெடுக்கப்படுவதாக கடந்த காலங்களில் சர்வதேச ஊடகங்கள் செய்தி வெளியிட்டிருந்தன.

இந்நிலையில் கண்டி திருமண நிகழ்வு சர்வதேச மட்டத்தில் இலங்கைக்கு மேலும் அவமதிப்பை ஏற்படுத்தியுள்ளதாக மனித உரிமை நிபுணர்கள் சுட்டிக்காட்டியுள்ளனர்.

அனுராதபுரம் மாநகர சபையினால் பாரமரிக்கப்படும் ரிவர் பார்க் மற்றும் நேச்சர் பார்க் பூங்காக்களில் விசேட தேடுதலை நடத்திய பொலிஸார், 104 இளம் காதல் ஜோடிகளை பிடித்து அனுராதபுரம் பொலிஸ் தலைமையகத்திற்கு அழைத்து சென்றுள்ளனர்.

இவர்கள், அனைவரும் பகுதி நேர வகுப்பு செல்வதாக பெற்றோரிடம் கூறிவிட்டு, அனுராதபுரம் நகருக்கு வந்த பாடசாலை மாணவர்கள் என பொலிஸார் கூறியுள்ளனர்.

இரண்டு பேருந்துகளில் பொலிஸ் தலைமையகத்திற்கு அழைத்துச் செல்லப்பட்ட காதல் ஜோடியினர் எச்சரிக்கப்பட்டு பின்னர் விடுவிக்கப்பட்டுள்ளனர்.

இந்த நடவடிக்கையில் 45 பொலிஸார் ஈடுபடுத்தப்பட்டனர். இந்த பூங்காக்கள் ஜயஸ்ரீ மஹாபோதி புனித வெள்ளரசு மரம் அமைந்துள்ள வீதிக்கு எதிரில் அமைந்துள்ளன.

வழிபாட்டு தலத்திற்கு செல்லும் பாதைக்கு அருகில் இப்படியான பூங்காக்கள் இருக்கக் கூடாது என அனுராதபுரம் தலைமையக பொலிஸ் பரிசோதகர் சஞ்ஜீவ மஹாநாம, மாநகர ஆணையாளருக்கு தெரியப்படுத்தியுள்ளார்.

இன்று காலை குறித்த பகுதியில் சடலம் ஒன்று காணப்படுவது தொடர்பில் பொலிஸாருக்கு கிடைத்த தகவலிற்கமைய சம்பவ இடத்திற்கு சென்ற பொலிஸார் விசாரணைகளை ஆரம்பித்துள்ளனர்.

குறித்த நபர் உயிரிழந்தமை தொடர்பிலான விசாரணைகளை கிளிநொச்சி பொலிஸார் ஆரம்பித்துள்ளனர்.

சடலம் தற்போது கிளிநொச்சி வைத்தியசாலைக்கு எடுத்து செல்லப்பட்டு மருத்துவ பரிசோதனைகள் இடம்பெறவுள்ளதாக பொலிஸார் தெரிவிக்கின்றனர்.

உயிரிழந்த நபர் தொடர்பில் அடையாளம் காணும் நடவடிக்கைகள் பொலிஸார் முன்னெடுத்துள்ளனர். இவரது தகவல் தெரிந்தவர்கள் கிளிநொச்சி பொலிஸ் நிலையத்தில் தகவல் வழங்குமாறும் கேட்டுக்கொள்கின்றனர்.

கொழும்பில், கொள்ளுப்பிட்டி மற்றும் மருதானை பகுதிகளில் இரு விபசார விடுதிகள் பொலிஸாரால் முற்றுகையிடப்பட்டதுடன் 12 பேர் கைது செய்யப்பட்டுள்ளனர்.

இதன்போது, கொள்ளுப்பிட்டியில் ஆயுர்வேத நிலையம் என்ற போர்வையில் இயங்கிய விபசார விடுதியின் உரிமையாளர் மற்றும் மூன்று பெண்களை பொலிஸார் கைது செய்துள்ளனர்.

பொலிஸாருக்கு கிடைக்கப் பெற்ற தகவல்களை அடுத்து குறித்த விபச்சார விடுதிகள் நேற்று சுற்றி வளைக்கப்பட்டுள்ளது.

இதேவேளை, மருதானை சங்கராஜ மாவத்தையில் மற்றுமொரு விபசார விடுதி முற்றுகையிடப்பட்டுள்ளது. அதனை நடத்திச் சென்றதாகக் கூறப்படும் பெண்ணொருவரும் மேலும் 7 பெண்களும் பொலிஸாரால் கைது செய்யப்பட்டுள்ளனர்.

கைது செய்யப்பட்டுள்ள பெண்கள் 24 வயது முதல் 48 வரையானவர்கள் என தெரிவிக்கப்பட்டுள்ளது.

இவர்கள் அனைவரையும் இன்றைய தினம் மாலிகாகந்த நீதவான் நீதிமன்றில் ஆஜர்படுத்த நடவடிக்கைகள் மேற்கொள்ளப்பட்டுள்ளன.