நீர்கொழும்பு கொச்சிக்கடை பகுதியில் நேற்று காலை இடம்பெற்ற விபத்தில் நபர் ஒருவர் உயிரிழந்துள்ளார்.

நேற்று அதிகாலை 4.30 அளவில் இடம்பெற்ற இவ்விபத்தில் 50 வயதான நபர் ஒருவரே உயிரிழந்துள்ளாக பொலிஸார் குறிப்பிட்டனர்.

வீதியோரமாக உறங்கிக் கொண்டிருந்த குறித்த நபர் மீது கொழும்பிலிருந்து பயணம் செய்த கன்டெய்னர் வாகனம் மோதியுள்ளது.

சம்பவ இடத்திலேயே குறித்த நபர் உயிரிழந்துள்ளார். சடலம் நீர்கொழும்பு வைத்தியசாலையில் வைக்கப்பட்டுள்ளது.

மேலும் இவ்விபத்தில் கொச்சிக்கடை நகரில் அமைந்திருந்த இரு கடைகளுக்கும் சேதம் ஏற்பட்டுள்ளதாக பொலிஸார் குறிப்பிட்டனர்

விபத்துடன் தொடர்புடைய வாகன சாரதி கைது செய்யப்பட்டுள்ளார். கொச்சிக்கடை பொலிஸார் மேலதிக விசாரணைகளை முன்னெடுத்து வருகின்றனர்.

ஐயனார் இளைஞர் கழகத்தின் முன்னாள் உறுப்பினரும், துடிப்புள்ள இளைஞருமான மறைந்த ப.கிசோக் ஞாபகார்த்த இரத்ததான முகாம் நேற்று இடம்பெற்றது.

யாழ். போதனா வைத்தியசாலை இரத்த வங்கிப் பிரிவினரின் அனுசரணையில் இரத்ததான முகாம் நடைபெற்றது. நிகழ்வினை யாழ். சுன்னாகம் ஐயனார் இளைஞர் கழகம் ஏற்பாடு செய்திருந்தது.

ஐயனார் இளைஞர் சனசமூக நிலைய மண்டபத்தில், ஐயனார் இளைஞர் கழகத் தலைவர் ரவிச்சந்திரன் காமராஜ் தலைமையில் இடம்பெற்ற இந்த இரத்ததான முகாமைச் சுன்னாகம் பொலிஸ் நிலையப் பொறுப்பதிகாரி எஸ்.செல்வக்குமார் முதன்மை விருந்தினராகக் கலந்து கொண்டு சம்பிரதாயபூர்வமாக ஆரம்பித்து வைத்தார்.

இந்த நிகழ்வில் வடமாகாண சபை உறுப்பினர் பாலச்சந்திரன் கஜதீபன், உடுவில் பிரதேச இளைஞர் சேவை உத்தியோகத்தர் எஸ். அனுசன் ஆகியோர் சிறப்பு விருந்தினர்களாகக் கலந்து கொண்டனர்.

இந்த நிகழ்வில் 28 வரையான இளைஞர்கள் ஆர்வத்துடன் கலந்து கொண்டு இரத்ததானம் வழங்கினர்.

இரத்த தானம் வழங்கிய இளைஞர்கள் அனைவருக்கும் பயன்தரு மரங்கள் வழங்கப்பட்டுள்ளன.

சக நண்பனை நினைவு கூர்ந்து இளைஞர்கள் முன்வந்து இரத்ததானம் வழங்கியுள்ளமையைப் பலரும் பாராட்டியுள்ளனர்.

இணையத்தளத்தை பயன்படுத்த இதுவரை அறவிடப்பட்டு வந்த 10 வீத தொலைத் தொடர்பு வரி இன்று முதல் நீக்கப்படுவதாக நிதியமைச்சர் மங்கள சமரவீர தெரிவித்துள்ளார்.

இணையத்தள சேவைகளை வழங்கி வரும் நிறுவனங்களுக்கு இது குறித்து ஏற்கனவே தெளிவுபடுத்தியுள்ளதாகவும் அவர் கூறியுள்ளார்.

அத்துடன், இணையத்தள சேவைகளுக்கு மேலதிகமாக 10 வீத டேட்டாக்களை அதிகரித்து வழங்கவும் நிறுவனங்கள் இணங்கியுள்ளன.

இதன் மூலம் குறைந்த செலவில் இணையத்தளத்தை பயன்படுத்த முடியும் எனவும் அமைச்சர் மேலும் குறிப்பிட்டுள்ளார்.

 
தேசிய மட்டத்தில் கோல் ஊன்றி பாய்தலில் யாழ்ப்பாணத்தை சேர்ந்த வீராங்கனை மீண்டும் சாதனை படைத்துள்ளார். அவரால் முதலில் ஏற்படுத்திய சாதனையை ஜே.அனித்தா இன்று மீண்டும் புதுப்பித்துள்ளார்.

தியகம மஹிந்த ராஜபக்ச மைதானத்தில் இடம்பெற்ற 95வது தேசிய தடகள போட்டியிலேயே அவர் இந்த சாதனையை புரிந்துள்ளார்.

கடந்த வருடம் யாழ்ப்பாணத்தில் இடம்பெற்ற 42வது தேசிய விளையாட்டு விழா பெண்களுக்கான கோல் ஊன்றி பாய்தல் போட்டியில் அனித்தா சாதனை படைத்தார். இந்நிலையில் இன்று மீண்டும் அவர் தனது சாதனையை முறியடித்துள்ளார்.

இன்று இடம்பெற்ற பெண்களுக்கான கோல் ஊன்றி பாய்தல் போட்டியில் யாழ்ப்பாணத்தை சேர்ந்த வீராங்கனைகள் முதல் மற்றும் மூன்றாமிடங்களை பெற்றுள்ளனர்.

01.ஜே.அனித்தா – யாழ்ப்பாணம் – 3.47 m

02.எஸ்.பீ.ரணசிங்க – விமானப்படை – 3.20 m

03.சீ.ஹெரினா – யாழ்ப்பாணம் – 3.00 m

இந்தப் போட்டிகள் முன்னாள் ஜனாதிபதி மஹிந்த ராஜபக்சவின் கோட்டையான அம்பாந்தோட்டையில் நடைபெற்று வருகின்றமை குறிப்பிடத்தக்கது.

 
மூன்றாம் உலகின் சிறந்த இளம் விஞ்ஞானியாக இலங்கையை சேர்ந்த பேராசிரியர் ஒருவர் தெரிவு செய்யப்பட்டுள்ளார்.

பேராசிரியர் ரங்கிக உமேஷ் ஹல்வத்துர (Rangika Umesh Halvathura) என்பவருக்கு இந்த விருது வழங்கி கௌரவிக்கப்பட்டுள்ளது.

சூழலுக்கு நெருக்கமான பல கண்டுபிடிப்புகளை கண்டுபிடித்து ரங்கிக உமேஷ், இந்த வருடத்திற்கான “மிகச் சிறந்த இலங்கையர்” என்ற விருதை பெற்றுள்ளார்.

இத்தாலியை தலைமையகமாக கொண்ட உலக அறிவியல் அகாடமியினால் (TWAS – The World Academy of Science) இந்த உயரிய விருது வழங்கப்பட்டுள்ளது.

தேசிய அறிவியல் அறக்கட்டளையினாலேயே அவரது பெயர் The World Academy of Science இன் விருதிற்காக பரிந்துரை செய்யப்பட்டது.

கடந்த வருடம் உயிரியல், வேதியியல், பொறியியல், இயற்பியல் மற்றும் பிற துறைகளில் இளம் விஞ்ஞானிகள் வழங்கியுள்ள பங்களிப்பு, அவற்றின் ஆராய்ச்சிகள் பிற துறைகளில் மேற்கொண்ட சாதனைகள் போன்றவற்றை அடிப்படையாக கொண்டே இந்த விருது வழங்கப்படுகின்றது.

இது குறித்து ஊடகங்களுக்கு கருத்து வெளியிட்ட பேராசிரியர் ரங்கிக உமேஷ் ஹல்வத்துர, தனது கண்டுபிடிப்பினால் கிடைக்கும் சர்வதேச விருதை விடவும், தனது கல்விக்கான செலவுகளை வழங்கிய இலங்கையர்களுக்காக சேவை செய்ய வாய்ப்பு கிடைத்தமை மகிழச்சி ஆகும்.

உண்மையாகவே மிகவும் மகிழ்ச்சியாக உள்ளது. சிறிய இடம் ஒன்றில் இருந்த வந்த நபர் நான். நான் பிரபல பாடசாலைகளில் கல்வி கற்றவன் அல்ல.

களுத்துறையில் உள்ள சிறிய பாடசாலை ஒன்றில் கல்வி கற்று, மொரட்டுவை பல்கலைக்கழகத்திற்கு சென்று இவ்வாறான ஒரு இடத்திற்கு வந்தமை மிகவும் மகிழ்ச்சியாக உள்ளது.

இந்த விருதை விடவும், நான் இந்த இடத்திற்கு வருவதற்கு உதவிய ஏழை மக்களுக்கு ஏதாவது ஒன்றை செய்வதற்கு கிடைத்த சந்தர்ப்பம் குறித்தே நான் மகிழ்ச்சியடைகின்றேன். அந்த மக்களின் கடனை செலுத்த தற்போது எனக்கு சந்தர்ப்பம் கிடைத்துள்ளது என மேலும் தெரிவித்துள்ளார்.

இலங்கையில் முன்னெடுக்கப்படும் ஆயுர்வேத வைத்தியம் சர்வதேச ரீதியில் பிரபல்யம் அடைந்துள்ளது. பல்வேறு நாடுகளைச் சேர்ந்த வெளிநாட்டவர்கள், இலங்கையில் ஆயுர்வேத சிகிச்சைகளை எடுத்து வருகின்றனர்.

இந்நிலையில் ஆயுர்வேத மருத்துவத்தை திறம்பட மேற்கொள்ளும் இலங்கை வைத்தியர் ஒருவர், வெளிநாட்டவர்கள் மத்தியில் பிரபல்யம் அடைந்துள்ளார்.

நாட்பட்ட நோய்களை குணப்படுத்தும் ஆயுர்வேத வைத்தியரான தெதெதுரு ஷாந்த செனவிரத்ன என்பவரே இவ்வாறு பிரபலமடைந்துள்ளார்.

அவரது வீட்டில் தங்கியிருந்து பல்வேறு நாட்டு வெளிநாட்டவர்கள் சிகிச்சை பெற்று வருகின்றனர்.

கை மருத்துகள் ஊடாக பல தொற்று நோய்களையும் இவர் குணப்படுத்துவதனாலேயே இவ்வாறு வெளிநாட்டவர்களிடம் இவர் பிரபலமடைந்துள்ளார்.

எலும்பு முறிவுகள், நரம்புகள் தொடர்பான பல்வேறு பிரச்சினைகளுக்கு அவர் மருந்து கண்டுபிடித்துள்ளார்.