பண்டாரநாயக்க சர்வதேச விமான நிலையத்தில், பணிபுரியும் விமான ஊழியர்களுக்கு பாதுகாப்பை ஏற்படுத்தும் நோக்குடன் ஜூன் மாதம் முதலாம் திகதி முதல் புதிய பாதுகாப்பு சட்டங்கள் நடைமுறைப்படுத்தப்படவுள்ளதாக அறிவிக்கப்பட்டுள்ளது.

கட்டுநாயக்க பண்டாரநாயக்க சர்வதேச விமான நிலையத்தினூடாக பயணம் செய்யும் பயணி ஒருவர் கைப் பையில் கொண்டுவரக்கூடிய திரவங்கள், ஸ்பிரே வகைகள், ஜெல் போன்ற பொருட்களின் அளவு மட்டுப்படுத்தப்படவுள்ளதாக விமான சேவைகள் நிறுவனத்தின் முகாமையாளர் எச்.எஸ்.ஹெட்டியாராச்சி தெரிவித்துள்ளார்.

மேலும் குறித்த விதிகளுக்கு அமைவாக அணைத்து பொருட்களும் ஒரு லீற்றருக்கு அதிகமாகக் கூடாது எனவும், அனைத்து திரவ கொள்கலன்களும், 20×20 என்ற அளவிலான வௌிப்படையாக தெரியும், திறந்து மீள மூடக்கூடிய வகையிலான பொலித்தின் பைகளில் போடப்பட்டிருக்க வேண்டுமென அவர் குறிப்பிட்டுள்ளார்.

அத்தோடு பயணி ஒருவர் ஒரு பையை மாத்திரமே இவ்வாறு கொண்டு செல்லலாம் எனவும், மேலதிகமாக கொண்டு செல்லும் பைகளை விமான சீட்டுகளை பரிசோதனை செய்யும் இடத்திலிருந்து கொண்டு செல்ல முடியுமெனவும், குறித்த விதிகளுக்குள் நீர், குடி பாணங்கள், சூப், ஜேம், சோஸ் வகைகள், நீராவி திரவ வகைகள், ஜெல் வகைகள், அறை வெப்பங்களை பராமரிக்கும் திரவங்கள் உள்ளிட்ட பொருட்களும் அடங்குமென நிறுவனத்தின் முகாமையாளர் தெரிவித்துள்ளார்.

குறித்த சட்ட விதிகள் யாவும் விமான நிலைய ஊழியர்கள் மற்றும் பயணிகளின் பாதுகாப்பை கருத்திற்கொண்டு ஜூன் முதலாம் திகதிமுதல் அமுல்படுத்தப்படவுள்ளதாக தெரிவித்துள்ளமை குறிப்பிடத்தக்கது.

மன்னார் பெரிய பலத்துக்கு அருகில் பாடசாலை மாணவியொருவர் ரயிலில் பாய்ந்து தற்கொலை செய்துக்கொண்டுள்ளார். குறித்த சம்பவம் நேற்று மாலை இடம்பெற்றுள்ளது.

கொழும்பிலிருந்து மன்னார் நோக்கி பயணித்த ரயில் ஒன்றில் பாய்ந்தே குறித்த மாணவி தற்கொலை செய்துக்கொண்டுள்ளார்.

உயிரிழந்த மாணவி 16 வயதானவர் எனவும், அவரது தாய் அவரை புறக்கணிப்பதாக கடிதெமொன்றில் மாணவி குறிப்பிட்டிருப்பதாகவும் பொலிஸார் தெரிவித்தனர்.

சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.

வவுனியா மாவட்டத்தில் சிறுநீரக நோயின் தாக்கம் அதிகமாக காணப்படுவது குறித்து விசேட செவ்வியொன்றுக்கு பதிலளிக்கையிலேயே வடக்கு மாகாண சுகாதார அமைச்சர் பா.சத்தியலிங்கம் மேற்கண்டவாறு தெரிவித்தார் தொடர்ந்து கருத்து தெரிவித்த அவர்.

வடக்கு மாகாணத்தில் இரண்டு மாவட்டங்கள் சிறுநீரக நோயினால் பாதிக்கப்பட்ட மாவட்டங்களாக இனங்காணப்பட்டுள்ளது. வவுனியா மற்றும் முல்லைத்தீவு மாவட்டங்களே இனங்காணப்பட்டுள்ளதுடன் வவுனியா தெற்கு பிரதேச செயலாளர் பிரிவும,; செட்டிக்குளம் பிரதேச செயலகத்திற்குட்பட்ட தட்டான்குளம் பகுதியில் கூடுதலான நோயளர்களும் இனங்காணப்பட்டுள்ளனர் இதே போன்றதொரு நிலைமைதான் முல்லைத்தீவ மாவட்டத்திலும் காணப்படுகிறது குறிப்பாக இரண்டு பிரதேச செயலாளர் பிரிவுகள் சிறுநீரக நோயால் பாதிக்கப்பட்டுள்ளது. துணுக்காய் மல்லாவி பிரதேசெயலாளர் பிரிவும் மற்றும் மணலாறு பிரதேச செயலாளர் பிரிவிலும் நாள்பட்ட சிறுநீரக நோயாளர்கள் இருக்கிறார்கள்.

இந்நோய்க்கு மக்கள் குடிநீராக பாவிக்கும் நீர் காரணமாக இருக்கலாம் என நம்பப்படுகிறது. அதனால் வடக்கு மாகாணத்தில் இரண்டு விதமான வேலைத்திட்டங்களை முன்னெடுத்துள்ளோம். ஒன்று சிறுநீரக நோய் வராமலிருப்பதற்கான வேலைத்திட்டமாக சுத்தமான குடிநீரை மடக்களுக்கு வழங்குவது மற்றையது ஏற்கனவே சிறுநீரக நோயினால் பாதிக்கப்பட்டவர்களுக்கு சிகிச்சை வழங்குவதற்காக வவுனியா மாவட்டம் முல்லைத்தீவு மாவட்டத்தில் 20 வயதுக்கு மேற்பட்டவர்களுக்கு இரத்தம் மற்றும் சிறு நீர்ப்பரிசோதனைகளை மேற்கொண்டு அவர்கள் சிறு நீரக நோயினால் பாதிக்கப்பட்டுள்ளார்களா? என ஆரம்ப கட்டத்திலேயே அறிந்து அவர்களுக்குரிய சிகிச்சைகளை வழங்குவதற்குரிய ஏற்பாடுகள் மேற்கொள்ளப்பட்டுள்ளது.

அரசாங்கத்தின் திட்டத்திற்கு அமைவாக 20 வயதிற்கு மேற்பட்டவர்கள் அனைவரும் மூன்று வருடங்களுக்கு ஒரு முறையாவது சிறு நீரக மருத்துவப்பருசோதனை மேற்கொள்ள வேண்டும். அத்திட்டத்தின் அடிப்படையில் கடந்த மூன்று வருடங்களளாக வவுனியா மற்றும் முல்லைத்தீவ பகுதிகளிலுள்ள கிராமங்களுக்கு நடமாடும் சேவைமூலம் பரிசோதனைகளை மேற்கொண்டிருந்தோம் அந்தவகையில் செட்டிக்குளம் பகுதியில் மூன்று வருடங்களுக்கு முன் மேற்கொண்ட பரிசோதனை நடவடிக்கையில் 9 சிறுநீரக நோயாளர்கள் இனங்காணப்பட்டிருந்தனர்.

அத்துடன் வவுனியா பொது வைத்தியசாலை மற்றும் செட்டிக்குளம் ஆதார வைத்தியசாலையில் சிறுநீரக நோய்க்கான தொடர் சிகிச்சைகளை பெற்றுக்கொள்வதற்கான வசதிகள் செய்யப்பட்டுள்ளது. வவுனியா வைத்தியசாலையில் சிறுநீரக இரத்த சுத்திகரிப்பு நிலையம் கடந்த ஒன்றரை வருடங்களாக இயங்கி வருவதுடன் இச்சேவையானது 24 மணித்தியாலங்கள் தொடர்சியாக இயங்கி வருகின்றது. எட்டு இயந்திரங்களின் உதவியுடன் 70 சிறுநீரக நோயாளர்கள் தொடர்ச்சியாக பராமரிக்கப்பட்டு வருகிறார்கள்.

வவுனியா சிறுநீரக சிகிச்சசைப்பிரிவிற்கு மன்னார், கிளிநோச்சி,முல்லைத்தீவு, பதவியா மற்றும் மதவாச்சி பிரதேசங்களிலிருந்து சிறுநீரக நோயாளர்கள் சிகிச்சைக்காக வருகிறார்கள். அதன் காரணமாக இப்போது இருக்கின்ற சிறு நீரக இரத்த சுத்திகரிப்பு இயந்திரங்களை வைத்து நோயாளர்களை பராமரிக்க முடியாத நிலைமையும் காணப்படுகின்றது.

அதனால் செட்டிக்குளத்தில் வெகு விரைவில் 25 மில்லியன் ரூபா செலவில் சிறுநீரக நோயை ஆரம்ப நிலையில் கண்டறியும் பிரிவையும், மாமடுவில் ஒரு சிறுநீரக மருத்துவப் பிரிவையும் உருவாக்கியிருக்கிறோம் அத்துடன் வவுனியா மாவட்டத்திற்கு ஒரு வைத்தியக் குழுவும் முல்லைத்தீவ மாவட்டத்திற்கு ஒரு வைத்தியக் குழுவும் உருவாக்கி செயல்ப்பட்டு வருகிறார்கள். அத்துடன் சிறுநீரக நோய் வராமல் தடுப்பதற்கான விழிப்புணர்வு நடவடிக்கைகளையும் மேற்கொண்டுள்ளோம் என தெரிவித்தார்.

 
பொலன்னறுவை பகுதியில் இன்று காலை உயிரிழந்த நிலையில் யானையொன்று மீட்கப்பட்டுள்ளதாக வனஜீவராசிகள் பாதுகாப்பு திணைக்களம் தெரிவித்துள்ளது.

30 வயது மதிக்கத்தக்க யானை ஒன்றே இவ்வாறு சடலமாக மீட்கப்பட்டுள்ளதாக வனஜீவராசிகள் பாதுகாப்பு திணைக்கள அதிகாரிகள் கூறியுள்ளனர்.

அகற்றப்படுவதற்காக சேமித்து வைக்கப்பட்டிருந்த பொலித்தீன் பைகளை உட்கொண்டமையாலேயே குறித்த யானை இறந்துள்ளது என அந்த பகுதி மக்கள் தெரிவித்துள்ளனர்.

இதனைத் தொடர்ந்து, உயிரிழந்த யானையின் வயிற்றில் இருந்து 25 கிலோகிராம் பொலித்தீன் மீட்கப்பட்டுள்ளதாக தெரிவிக்கப்பட்டுள்ளது.

இதேவேளை, குப்பைக் கழிவுகள் ஒழுங்கான முறையில் அகற்றப்படாத காரணத்தால், பொலித்தீன் பைகளை உட்கொண்டு இது வரையில் 11 யானைகள் உயிரிழந்துள்ளதாக சுற்றுச்சூழல் வல்லுநர்கள் சுட்டிக்காடியுள்ளனர்.

யாழ்ப்பாணம் – புங்குடுதீவு 12ஆம் வட்டாரத்தில் ஏழு பிள்ளைகளின் தாய் ஒருவர் விபத்தில் உயிரிழந்துள்ளார். தனது மகனின் மோட்டார் சைக்கிள் மூலம் ஏற்பட்ட விபத்திலேயே குறித்த தாய் உயிரிழந்துள்ளார். இந்த சம்பவம் நேற்று இடம்பெற்றுள்ளதாக பொலிஸார் குறிப்பிட்டுள்ளனர். இது தொடர்பில் மேலும் தெரியவருவதாவது,

யாழ்ப்பாணத்தில் உறவினர் ஒருவரின் இறப்பு வீட்டுக்குச் செல்வதற்காக குறித்த தாய் காலை 8 மணியளவில் பேருந்துக்காக நின்று கொண்டிருந்தார்.

இதன்போது குறித்த தாய் நின்ற இடத்திற்கு முன்னால் உள்ள பாதை வழியே புதிய மோட்டார் சைக்கிளின் மகன் வந்துள்ளார்.

இதன்போது பாதையின் எதிரில் வந்த முச்சக்கர வண்டி மோட்டார் சைக்கிளுடன் மோதி அருகில் நின்றிருந்த தாய் மீதும் மோதியுள்ளது.

இந்த விபத்தில் படுகாயமடைந்த குறித்த தாய் உடனடியாக புங்குடுதீவு வைத்தியசாலையில் சேர்க்கப்பட்டார். பின்னர் மேலதிக சிகிச்சைக்காக யாழ்ப்பாணம் போதனா வைத்தியசாலைக்கு கொண்டு செல்லப்பட்டார்.

எனினும் போதனா வைத்தியசாலையில் சேர்க்கப்பட்ட போது, அவர் உயிரிழந்துவிட்டார் என்று மருத்துவ சோதனையில் உறுதிப்படுத்தப்பபட்டது என்று இறப்பு விசாரணைகளில் தெரிவிக்கப்பட்டுள்ளது.

இந்த விபத்தில், புங்குடுதீவு 12ஆம் வட்டாரத்தைச் சேர்ந்த நாகேஸ்வரன் ரம்பை (வயது 51) என்ற 7 பிள்ளைகளின் தாயாரே உயிரிழந்துள்ளார்.

மேலும், உயிரிழந்த தாயின் மகனையும், முச்சக்கர வண்டி சாரதியையும் ஊர்காவற்துறை பொலிஸார், கைது செய்துள்ளனர்.

மஹரகம பகுதியிலுள்ள பாடசாலை மாணவிகள் மற்றும் பெண்களை வீடியோ எடுத்த இராணுவ சிப்பாய் கைது செய்யப்பட்டுள்ளார்.

அந்தப் பகுதியிலுள்ள பெண்கள் பாடசாலைகளுக்கு முன்னால் நின்று தனது கையடக்க தொலைபேசியில் பாடசாலை மாணவிகள் மற்றும் வீதியில் பயணித்த பெண்களை வீடியோ எடுத்துள்ளார்.

மாணவிகளின் பெற்றோரினால் மஹரகம பொலிஸாரிடம் செய்த முறைப்பாட்டினை அடுத்து குறித்த நபர் கைது செய்யப்பட்டுள்ளார்.

கட்டுநாயக்க விமான படையில் சேவை செய்யும் 28 வயதுடைய இராணுவ வீரர் ஒருவரே இவ்வாறு கைது செய்யப்பட்டுள்ளார்.

குறித்த நபர் கைது செய்து அவரது தொலைபேசியை பரிசோதித்து போது, அதில் பெண்கள் மற்றும் பாடசாலை மாணவிகளின் பல வீடியோ பதிவுகள் கிடைத்துள்ளன.

அம்பலன்கொட பகுதியை சேர்ந்த குறித்த இராணுவ சிப்பாய், மஹரகம, தாப்பவத்த பிரதேசத்தில் திருமணம் செய்யாமல் பெண் ஒரு வருடம் வாழ்ந்து வருவதாக தெரியவந்துள்ளது.

கைது செய்யப்பட்ட நபர் இன்றைய தினம் நுகேகொட நீதிமன்றத்தில் ஆஜர்படுத்தவுள்ளார் என தெரிவிக்கப்படுகின்றது.

தனது மகளை தொடர்ந்து சுமார் 10 வருடங்களாக துஷ்பிரயோகம் செய்துவந்த தந்தைக்கு கடுமையான வேலையுடன் கூடிய 45 வருட சிறைத்தண்டனை விதிக்கப்பட்டுள்ளது.

கொழும்பு மேல் நீதிமன்ற நீதவான் கிஹான் குலதுங்க இன்று இந்த தீர்ப்பை வழங்கியுள்ளார்.

மேலும், பாதிக்கப்பட்ட பெண்ணுக்கு மூன்று இலட்சம் ரூபா இழப்பீடு செலுத்த வேண்டும் எனவும், மன்றுக்கு 30 ஆயிரம் ரூபா அபராதம் செலுத்த வேண்டும் என்றும் குற்றவாளிக்கு உத்தரவிடப்பட்டுள்ளது.

குறித்த இழப்பீட்டுத் தொகையை செலுத்த தவறும் பட்சத்தில் அவரின் சிறைத் தண்டனையை மேலும் 6 வருடங்களுக்கு நீடிக்கவும் கொழும்பு மேல் நீதிமன்ற நீதவான் கிஹான் குலதுங்க உத்தரவிட்டுள்ளார்.

அண்மைக்காலமாக இலங்கையில் முச்சக்கர வண்டி சாரதிகளுக்கான சட்டம் தொடர்பில் பல்வேறு விடயங்கள் பேசப்பட்டு வந்தது.

இந்நிலையில் 35 வயதிற்கு அதிகமானவர்களுக்கு மாத்திரமே இனி வரும் காலங்களில் முச்சக்கர வண்டி ஓட்டுவதற்கான சாரதி அனுமதி பத்திரம் வழங்கப்படவுள்ளதாக போக்குவரத்து அமைச்சு தீர்மானித்துள்ளதாக தகவல் வெளியாகியுள்ளது.

தான் முன்வைத்த யோசனைகளை அடிப்படையாக கொண்டு இந்த தீர்மானத்திற்கு முன் வந்துள்ளதாக வீதி பாதுகாப்பு தொடர்பான தேசிய சபையின் தலைவர் சிசிர கோதாகொட தெரிவித்துள்ளார்.

கடந்த காலங்களில் முச்சக்கர வண்டிகளினால் ஏற்படுகின்ற விபத்துகளின் அதிகரிப்பு காரணமாகவே இந்த தீர்மானம் மேற்கொள்ளப்பட்டுள்ளதாக தெரிவிக்கப்படுகின்றது.

ஜனாதிபதி மைத்திரிபால சிறிசேன பயணித்த ஹெலிகப்டர் சீரற்ற காலநிலையினால் மீண்டும் திருப்பிய சம்பவம் ஒன்று பதிவாகியுள்ளது.

நுவரெலியாவில் நேற்று-முன்தினம் நடைபெற்ற சமய நிகழ்வொன்றில் கலந்து கொள்வதற்காக ஜனாதிபதி ஹெலிகப்டரில் சென்றுள்ளார்.

ஐனாதிபதியை ஏற்றி கொண்டு நுவரெலியா நோக்கி சென்ற ஹெலிகப்டர் சீரற்ற காலநிலை காரணமாக கொத்மலையில் இருந்து மீண்டும் கொழும்புக்கு திருப்பியுள்ளது.

இதனால் ஜனாதிபதியினால் நிகழ்வில் கலந்துக் கொள்ள முடியாத நிலை ஏற்பட்டுள்ளது.

ஜனாதிபதியுடன் அமைச்சர்களான விஜயதாஸ ராஜபக்ச, நவீன் திஸாநாயக்க, மத்திய மாகாண பிரதான அமைச்சர் சரத் ஏக்கநாயக்க உட்பட அமைச்சர் உறுப்பினர்கள் 8 பேர் குறித்த ஹெலிகப்டரில் பயணித்துள்ளனர்.

இதனால் நிகழ்வில் கலந்து கொள்ள முடியாமல் போய்விட்டதாக ஜனாதிபதி வழங்கிய தகவலை நிதி இராஜாங்க அமைச்சரினால் அறிவிக்கப்பட்டுள்ளது.