நிரந்தர நியமனம் வழங்குமாறு கோரி கடந்த 04.05.2017 பிராந்திய வைத்திய அதிகாரியின் அலுவலகத்திற்கு முன்பாக வவுனியா சுகாதார தொண்டர்கள் முன்னெடுத்துள்ள கவனயீர்ப்பு போராட்டம் 12வது நாளாக இன்றும் (15.05.2017) தொடர்கின்றது.

வடக்கில் கடந்த 15 வருடங்களுக்கு மேலாக பணியாற்றிய சுகாதார தொண்டர்களே இக் கவனயீர்ப்பு போராட்டத்தை முன்னெடுத்துள்ளனர்.

வவுனியா சுகாதார வைத்திய அதிகாரி பணிமனைக்கு முன்பாக போராட்டத்தில் ஈடுபட்டுள்ள சுகாதார தொண்டர்கள், தமக்கு நிரந்தர நியமனம் வழங்கப்படும் வரை போராட்டத்தை கைவிடப் போவதில்லையென குறிப்பிட்டுள்ளனர்.

கஷ்டப் பிரதேசங்களிலும், இக்கட்டான சூழ்நிலைகளிலும் சேவையாற்றிய தமது நியமனம் குறித்து இதற்கு முன்னர் பல போராட்டங்களை முன்னெடுத்திருந்த போது வழங்கப்பட்ட வாக்குறுதிகள் நிறைவேற்றப்படவில்லையென தெரிவிக்கும் சுகாதார தொண்டர்கள், இம்முறை தமக்கு உறுதியான தீர்மானம் வழங்கப்படும் வரை போராட்டம் தொடருமென குறிப்பிட்டுள்ளனர்.

சுகாதார தொண்டர்களின் போராட்டத்திற்கு சென்ற வன்னி மாவட்ட பாராளுமன்ற உறுப்பினர் காதர் மஸ்தான் போராட்டகாரர்களுடன் கலந்துரையாடி அவர்களின் பிரச்சினைகளை கேட்டறிந்ததுடன் தீர்வை பெற்று தருவதாகவும் உறுதிமொழி வழங்கியிருந்தார்.

 
வவுனியாவில் போராட்டத்தினை மேற்கொண்டு வரும் கையளிக்கப்பட்டு காணாமல் ஆக்கப்பட்டோரின் உறவினர்கள் தொடர்ந்தும் சுழற்சி முறையில் இன்று (15.05.2017) 81வது நாளாகவும் மழை, வெயில் என்பவற்றை பெருட்படுத்தாது தற்காலிக தகரக் கொட்டகைக்குள் தமது போராட்டத்தினை முன்னெடுத்து வருகின்றனர்.

கையளிக்கப்பட்ட தமது உறவினர்களை விடுவிக்கக்கோரியும், அரசியல் கைதிகளை விடுதலை செய்யக்கோரியும், பயங்கரவாதச் சட்டத்தினை நீக்குமாறு கோரியும் தமது போராட்டத்தினை முன்னெடுத்து வருகின்றனர்.

இப் போராட்டத்தில் ஈடுபட்டவர்களை வன்னி மாவட்ட பாராளுமன்ற உறுப்பினர் காதர் மஸ்தான் சென்று பார்வையிட்டதுடன் அவர்களுடன் கலந்துரையாடினர்.

இதன்போது தீர்வு கிடைக்கும் வரை இச் சுழற்சி முறையிலான உண்ணாவிரதப் போராட்டம் தொடரும் என போராட்டத்தில் ஈடுபட்டுள்ள காணாமல் ஆக்கப்பட்டோரின் உறவினர்கள் தெரிவித்தனர்.

 
கடந்த யுத்த காலத்தில் சுகாதார தொண்டர்களாக பணியாற்றியும் தமக்கான நிரந்தர நியமனங்கள் வழங்கப்படாததன் காரணமாக தமக்கான நிரந்தர நியமனம் கிடைக்கும் வரை வவுனியா சுகாதார வைத்திய அதிகாரியின் பிரதான அலுவலகத்திற்கு முன்பாக தொடர் ஈடுபட்டுள்ளவர்களை வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இனத்தலைவருமான கே.காதர் மஸ்தான் நேரில் சென்று சந்தித்து கலந்துரையாடினார்.

இதன்போது போராட்டத்தில் ஈடுபட்டுள்ளவர்களால் வட மாகாணத்தில் தொடர் போராட்டத்தில் ஈடுபட்டுள்ள 820 தொண்டர்களுக்கும் நிரந்தர நியமனத்தை பெற்றுத்தர உதவுமாறு கேட்டுக்கொண்டனர்.

அத்துடன் கடந்த யுத்த காலத்தில் பல வருடங்களாக பணியாற்றிய தமக்கு நியமனங்கள் வழங்கப்படாமல் பின்னர் பலருக்கு அரசியல் ரீதியாக வழங்கப்பட்டுள்ளதாகவும் தற்போதைய அரசாங்கத்தின் சுற்றறிக்கையின் அடிப்படையில் தாம் நிராகரிக்கப்பட்டுள்ளதாகவும் போராட்டத்தில் ஈடுபட்டுள்ளவர்கள் தெரிவித்தனர்.

மேலும் வடக்கில் இறுதியாக இடம்பெற்ற டெங்கு ஒழிப்பு வேலைத்திட்டத்தில் தாம் கலந்துகொண்டு பணியாற்றியதாகவும் குறித்த வேலைத்திட்டம் முடிந்த பின்னர் தாமும் கை விடப்பட்டுள்ளதாக அவர்கள் தெரிவித்தனர்.

இதனையடுத்து மஸ்தான் எம்.பி கருத்து தெரிவிக்கையில், உண்மையிலேயே யுத்த காலத்தில் வைத்திய, சுகாதார துறைகளில் பணியாற்றியவர்கள் போற்றப்படக்கூடியர்கள் கடந்த ஆட்சியில் தாம் விரும்பியவர்களுக்கு அரசியல்வாதிகளால் வேலைவாய்ப்புக்கள் பெற்றுக்கொடுக்கப்பட்டாலும் இந்த நால்லாட்சியில் தகுதி உடையவர்களுக்கு முன்னுரிமை வழங்கப்படுகின்றது.

எனினும் இந்த தொண்டர்கள் யுத்த காலத்தில் சேவையாற்றியவர்கள். ஒரு சிலர் 15 வருடங்களும் சேவையாற்றி இருக்கின்றனர் எனவே இவ்வாறானவர்களுக்கு தகமை அடிப்படையன்றி சேவை அடிப்படையிலாவது அவர்களுக்கான நியமனங்கள் வழங்கப்பட வேண்டும் என்பதே எனது எதிர்பார்ப்பாகும்.

மேலும் எமது நல்லாட்சியின் ஜனாதிபதி மைத்திரிபால சிறிசேன அவர்கள் ஜனாதிபதியாவதற்கு முன்னர் சுகாதார அமைச்சராகவே இருந்திருக்கின்றார் ஆகவே இந்த விடயம் தொடர்பில் அவரிடம் நேரடியாகவே கலந்துரையாடி இந்த தொண்டர்களின் நிலையினை உணர்த்தி அவர்களுக்கான வேலை வாய்ப்பினை பெற்றுக்கொடுக்க முயற்சிப்பேன் என அவர் மேலும் தெரிவித்தார்.

வவுனியா மாவட்ட அபிவிருத்தி குழுக் கூட்டம் இன்று (15.05.2017)இடம்பெற்ற நிலையில் ஊடகவியலாளர் ஒருவர் தாக்கப்பட்டுள்ளார்.

குறித்த கூட்டம் அமைச்சர் ரிசாட் பதியுதீன், முதலமைச்சர் சீ.வி.விக்னேஸ்வரன், பாராளுமன்ற உறுப்பினர்களான செல்வம் அடைக்கலநாதன், காதர் மஸ்தான் ஆகியோரின் தலைமையில் இடம்பெற்றது.

இந்நிலையில் குறித்த கூட்டத்தின் போது செய்தி சேகரிப்பு பணியில் ஈடுபட்டிருந்த ஊடகவியலாளர் ஒருவரை மாவட்ட செயலக அரச அதிகாரி ஒருவர் தாக்கி அங்கிருந்து வெளியேற்ற முற்பட்டதாக தெரிவிக்கப்படுகின்றது.

குறித்த சம்பவம் இடம்பெற்றபோது அங்கு நின்ற ஏனைய ஊடகவியலாளர்களும் எதிர்ப்பு தெரிவித்ததையடுத்து மாவட்ட செயலக அரச அதிகாரி அதிலிருந்து விலகிச் சென்றுள்ளார்.

 
வவுனியா மாவட்டத்திலுள்ள வர்த்தக சங்கம், கட்டிட நிர்மாணப்பொருள்கள் விற்பனையாளர்கள் சங்கம் என்பனவற்றிற்கு இடம் ஒதுக்கும்போது, முச்சக்கரவண்டி சங்கம் , ஊடகவியலாளர் சங்கம் என்பவற்றுக்கும் இடம் ஒதுக்குமாறு வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இணைத்தலைவருமான கே.காதர் மஸ்தான் தெரிவித்தார்.

மாவட்ட அரசாங்க அதிபர் ரோஹன புஷ்பகுமார தலைமையில் இன்று (15.05.2017) இடம்பெற்ற வவுனியா மாவட்டத்துக்கான மாவட்ட அபிவிருத்திக்குழு கூட்டத்தில் கலந்துகொண்டு உரையாற்றும்போதே அவர் இவ்வாறு தெரிவித்தார்.

வவுனியா மாவட்டத்தில் புதிதாக அமைக்கப்பட்ட பேரூந்து தரிப்பட மத்திய நிலையத்துக்கு அருகாமையில் முதலமைச்சர் அனுமதி வழங்கினால் வவுனியா வர்தக சங்கத்திற்கும் கட்டிட நிர்மாணப்பொருள்கள் விற்பனையாளர் சங்கம் என்பவற்றுக்கு இடம் ஒதுக்கும்பொழுது அவற்றுடன் ஊடகவியலாளர் சங்கத்திற்கும் முச்சக்கரவண்டி உரிமையாளர்கள் சங்கத்திற்கும் இடம் ஒதுக்கப்பட வேண்டும் என அவர் குறிப்பிட்டார்.

மேலும் குறித்த கலந்துரையாடலில் வவுனியா புதிய பேரூந்து பஸ் தரிப்பிட நிலையத்தை மீண்டும் பயன்படுத்துதல், வவுனியா மன்னார் பிரதான வீதியை விரைவில் காபட் வீதியாக மாற்றுதல், காணிகள் தொடர்பான பிரச்சினைகள், மற்றும் இந்த வருடத்தில் செயற்படுத்தப்பட்ட அபிவிருத்தி வேலைத் திட்டங்கள், எதிர்கால திட்டமிட்டல்கள் தொடர்பாக விரிவாக கலந்துரையாடப்பட்டன.

குறித்த மாவட்ட அபிவிருத்தி குழுக்கூட்டத்தில் வடமாகாண முதலமைச்சர் சி.வி.விக்னேஸ்வரன், அமைச்சர் றிசாட் பதியுதீன், பாராளுமன்ற உறுப்பினர்களான செல்வம் அடைக்கலநாதன், சிவசக்தி ஆனந்தன், சி.சிவமோகன், சாந்தி ஸ்ரீஸ்கந்தராஜா உட்பட மாகாண அமைச்சர்கள், உறுப்பினர்கள், நிர்வாகம் சார் உயரதிகாரிகள் எனப் பலரும் கலந்துகொண்டனர்.

 
வவுனியாவைச் சேர்ந்த இளைஞர்கள் குத்துச் சண்டையில் 7 தங்கப்பதக்கங்களையும் 2 வெள்ளிப்பதக்கங்களையும் பெற்று சாதனை படைத்துள்ளனர்.

அகில இலங்கை ரீதியில் கடந்த 12 மற்றும் 13.05.2017 திகதிகளில் இரண்டு நாட்கள் கண்டியில் நடைபெற்ற குத்துச்சண்டைப் போட்டியில் 9 பதக்கங்களை வெற்றி பெற்ற மாணவர்கள் இந்தியாவில் நடைபெறவுள்ள குத்துச்சண்டை போட்டிக்கு தெரிவாகியுள்ளனர்.

இக் குத்துச்சண்டைப் போட்டியில் இரண்டு பெண் வீராங்களைகள் மற்றும் 7 வீரர்கள் கலந்துகொண்டு வடமாகாணத்திற்கு பெருமை சேர்த்துள்ளனர்.

பி.கரிஸ்ணா, சி.சிறிதர்சன், ம.சுஜித், எம்,சப்னா, த.தர்சிகா விணோசினி,ப.சுஜிவலக்மால் ஆகியோர் தங்கப் பதக்கத்தையும், எஸ்.சங்கீதன், த.டினேஸ் வெள்ளிப்பதக்கங்களையும் தனதாக்கியுள்ளனர்.

இந்தியாவில் நடைபெறவுள்ள குத்துச்சண்டை போட்டிக்கு தெரிவாகியுள்ள குத்துச்சண்டை மாணவர்கள் தகுந்த பாதுகாப்பு உபகரணங்கள் இல்லாமல் வவுனியா நகரசபை மன்டபத்தில் பயிற்சியில் ஈடுபடுவதை காணக்கூடியதாக இருக்கிறது. இவர்களில் 5 பேர் பாடசாலை மாணவர்கள் என்பதும் குறிப்பிடத்தக்கது.

வவுனியா மாவட்டத்தின் குத்துச்சண்டை பயிற்றுவிப்பாளராகிய எஸ்.நந்தகுமார் இது தொடர்பாக கருத்து தெரிவிக்கையில்..
​
கடந்த காலங்களில் வடமாகாணத்தை பிரநிதித்துவப்படுத்தி வவுனியாவிலிருந்து குத்துச்சண்டை மாணவர்களை தயார்படுத்தி வெற்றிகளை பெற்று வந்துள்ளோம். எமது மாணவர்கள் குறைந்த வளங்களுடன் தொடர்ச்சியாக பயிற்சியில் ஈடுபட்டு வெற்றிபெற்று வருகிறார்கள்.

இது தொடர்பாக விளையாட்டுத்துறை அமைச்சு மற்றும் அதிகாரிகளுடன் தொடர்புகளை மேற்கொண்டு அறிவித்து வருகிறேன் எமது மாணவர்கள் மிகவும் வறுமைக் கோட்டுக்கு உட்பட்டவர்களாக இருக்கிறார்கள், அவர்களுக்கான சத்துணவு கொடுப்பனவுகள் வழங்கப்பட்டால் எமது மாணவர்கள் மென்மேலும் சாதனை படைப்பார்கள் என தெரிவித்தார்.

 
வவுனியா, புதூர் செல்லும் வீதியிலுள்ள புகையிரதக் கடவையில் இன்று (15.05) பிற்பகல் ரயிலுடன் உழவு இயந்திரம் மோதிய விபத்தில் இரு இளைஞர்கள் உயிரிழந்துள்ளனர்.
இச்சம்பவம் குறித்து மேலும் தெரியவருகையில்,

கொழும்பிலிருந்து இன்று பிற்பகல் 1.35 மணியளவில் யாழ்ப்பாணம் நோக்கிச் சென்ற ரயில் வவுனியா, புளியங்குளம் புதூர் ஆலயப்பகுதியிலிருந்து பிரதான கண்டி வீதிக்கு மணல் ஏற்றப்பட்ட உழவு இயந்திரம் சென்றபோது புதூர் பகுதியிலுள்ள பாதுகாப்பற்ற புகையிரதக்கடவையை உழவு இயந்திரம் கடக்கும்போது திடீரென வந்த ரயிலுடன் உழவு இயந்திரம் மோதியதில் உழவு இயந்திரத்தின் சாரதி, மற்றும் உதவியாளரான ஜெகநாதன் ரவீதரன் வயது 20, ரவீந்திரன் கீர்த்தீபன் 21வயது புதூர், மற்றும் புளியங்குளம் பகுதியைச் சேர்ந்த இருவரும் உயிரிழந்துள்ளனர் ​.​

இவ்விபத்து தொடர்பான மேலதிக விசாரணைகளை புளியங்குளம் பொலிசார் மேற்கொண்டு வருகின்றனர்.

 
வவுனியா நெளுக்குளத்தில் இன்று (15.05.2017) காலை 9.30 மணியளவில் தூக்கில் தொங்கிய நிலையில் இளம் குடும்பப் பெண் சடலமாக மீட்கப்பட்டுள்ளார். இச் சம்பவம் தொடர்பாக மேலும் தெரியவருகையில்,

வவுனியா நெளுக்குளம், புதையல்பிட்டியில் வசித்துவரும் ஆறு மாத கைக்குழந்தையின் தாயான சுதன் வாணி (வயது 24) என்ற இளம் குடும்பப் பெண்ணே இவ்வாறு தூக்கில் தொங்கிய நிலையில் சடலமாக மீட்கப்பட்டுள்ளார்.

நேற்றைய தினம் இவரது சொந்த இடமான கிளிநொச்சிக்கு அவரது வீட்டுக்கு காலை சென்று மீண்டும் மாலை வீடு திரும்பியுள்ளார். இன்று காலை எழுந்து வீட்டு வேலைகள் எல்லாம் முடித்து மாமனாருக்கு காலை உணவைத் தயார் செய்து அவருக்கு வழங்கியுள்ளார். மாமனார் கூலி வேலைக்கு சென்றுள்ளார்.

கணவன் கடைக்கு பொருட்கள் வாங்க சென்று வீட்டுக்கு திரும்பி வரும் போது ஆறு மாதக் கைக்குழந்தை தொட்டிலில் இருந்து அழுதுகொண்டிருந்துள்ளது. குறித்த பெண்ணின் கணவர் குழந்தையை தூக்கி கொண்டு தாயை தேடிய போது தூக்கில் தொங்கிய நிலையில் காணப்பட்டுள்ளார்.

இவரின் மரணத்திற்கான காரணம் என்ன என நெளுக்குள பொலிஸார் வவுனியா குற்றத்தடுப்பு பொலிசாருடன் இணைந்து தீவிர விசாரணைகளை மேற்கொண்டுவருகின்றனர்.