சுகாதாரத் தொண்டர்களுக்கு நியமனம் வழங்க நடவடிக்கை மேற்கொள்ளவேண்டும் என தமிழ்த் தே சியக் கூட்டமைப்பின் நாடாளுமன்ற உறுப்பினர் சிவசக்தி ஆனந்தன் தெரிவித்தார்.

வவுனியாவில் கடந்த 9 நாட்களாக தொடர் கவனயீர்ப்புப் போராட்டத்தினை மேற்கொண்டு வரும் சுகாதார தொண்டர்களின் போராட்ட களத்திற்கு இன்று (12.05.2017) காலை சென்ற தமிழ்த் தேசிய கூட்டமைப்பின் வன்னி மாவட்ட நாடாளுமன்ற உறுப்பினர் சிவசக்தி ஆனந்தன் சுகாதார தொண்டர்களின் நிலைமைகளை கேட்டறிந்ததுடன் இது தொடர்பாக அவர் கருத்துத் தெரிவிக்கையில்,

வவுனியாவில் சுகாதாரத் தொண்டர்கள் 9 நாட்களாக தமக்கு நிரந்தர நியமனம் வழங்கவேண்டும் என்று தெரிவித்து தொடர் போராட்டம் ஒன்றினை மேற்கொண்டு வருகின்றனர். இவர்களின் கோரிக்கை நியாயமானது. இவர்கள் கடந்த 1994 ஆம் ஆண்டிலிருந்து எவ்வித ஊதியமும் இன்றி இந்தப்பணியினை மேற்கொண்டுள்ளனர். கடந்த 2009ம் ஆம் ஆண்டு யுத்தம் நிறைவடைந்த பின்னர் இறுதிக்கட்ட யுத்தத்தின்போது பல ஆயிரக்கணக்கான மக்கள் வவுனியா வைத்தியசாலையை நாடி வந்துள்ளார்கள்

காயப்பட்டவர்கள் உட்பட விஷேட தேவைக்குட்பட்டவர்கள் போன்ற பலரிற்கு சுகாதார தொண்டர்கள் மிக நெருக்கடியான ஒரு காலகட்டத்தில் வவுனியா மாவட்டத்தில் இவர்களுடைய பணி என்பது மிகப்பெரிய ஒரு பணியாக இருக்கின்றது.

ஆகவே 10 வருடங்கள் கடந்தும் இந்த சுகாதார தொண்டர்களுக்கு இது வரையில் நிரந்தர நியமனம் வழங்கப்படவில்லை. இவர்களைப் போன்று வடக்கு மாகாணங்களில் இருக்கக்கூடிய ஏனைய மாவட்டங்களைச் சேர்ந்தவர்களும் உட்பட 800ற்கும் மேற்பட்ட சுகாதாரத் தொண்டர்களுக்கு 10 வருட காலத்திற்கு மேற்பட்ட காலப்பகுதியில் இந்தப்பணியினை ஆற்றியிருக்கின்றார்கள்.

இவர்களுக்கு வடமாகாண சுகாதார அமைச்சு மற்றும் மத்திய சகாதார அமைச்சு இணைந்து இவர்களுடைய கடந்த கால சேவைகளை மனிதாபிமான அடிப்படையில் இவர்களுடைய தேவையை எடுத்து இவர்களுக்கு நிரந்தர நியமனம் வழங்கவேண்டும் என்று மேலும் தெரிவித்தார்.

 
வவுனியா செட்டிகுளம் பிரதேச செயலகத்துக்குட்பட்ட ஆண்டியா புளியங்குளம் கிராமத்தில் தனது இரண்டு கண்களின் பார்வையையும் இழந்து மிகவும் வறிய நிலையில் வாழ்ந்து வந்த குடும்பத்தை நேரில் சந்தித்து அவர்களுக்கான உதவிகளை வன்னி மாவட்ட பாராளுமன்ற உறுப்பினரும் மாவட்ட அபிவிருத்திக் குழுவின் இணைத்தலைவருமான கே.காதர் மஸ்தான் வழங்கிவைத்தார்.

குறித்த குடும்பம் தொடர்பாக சமூக ஊடகங்களில் வெளியான செய்திகளை உறுதிப்படுத்திக்கொண்ட மஸ்தான் எம்.பி அவர்களை சந்தித்து அந்த குடும்பத்தின் முக்கிய தேவைகளாக காணப்பட்ட குடிநீருக்கான கிணறு மற்றும் வீட்டின் மின்சார வசதிகள் என்பவற்றுடன் மாதாந்தம் 5000 ரூபாய் வீதம் உதவித்தொகை வழங்குதலுடன் குறித்த பிள்ளைகளின் கல்விக்கான உதவிகளையும் சுய தொழிலாக மந்தை வளர்ப்புக்கான உதவிகளையும் வழங்க நடவடிக்கைகளை எடுத்துள்ளார்.

இந்த சம்பவம் தொடர்பில் மஸ்தான் எம்.பி கருத்து தெரிவிக்கையில், இந்த குடும்பம் கடந்த நான்கு வருடங்களாக சொல்லணாத்துயரங்களை அன்பவித்து வந்துள்ளமை வேதனை அளிக்கிறது. அத்துடன் தனது பள்ளி செல்லும் குழந்தையின் உதவியுடன் கடைகளியில் தர்மம் கேட்டு தமது காலத்தை கடத்துகின்றமை மிகவும் வேதனையான ஒரு விடயமாகும்.

இந்த சம்பவத்தை சமூக ஊடகங்களூடாகவே நான் அறிந்துகொண்டேன். எனவே சமூக ஊடகங்களை பயன்படுத்துவோர் இவ்வாறான தேவைகளுக்கு பயன்படுத்தினால் சமூகத்திற்கும் தேவை உடையவர்களுக்கும் சேவைகள் சரியாக சென்றடையும்பொழுது அதில் உங்களுக்கும் பங்குண்டு என்பதை மறந்துவிடாதீர்கள்.

அத்துடன் இந்த உதவிகளை என்னுடன் இணைந்து வழங்குவதற்கு முன்வந்த நிறுவனங்களுக்கும் நான் நன்றியை தெரிவித்துக்கொள்வதுடன், நாங்கள் உதவி செய்துவிட்டோம் என்பதற்காக உதவி செய்வதற்கு எண்ணியுள்ளவர்கள் நின்றுவிடாமல் தங்களாலான உதவிகளை செய்யுமாறும் கேட்டுக்கொள்கிறேன் என அவர் மேலும் தெரிவித்தார்.

 
வவுனியா பிராந்திய சுகாதார வைத்திய அதிகாரி பணிமனையில் கடந்த 1994ம் ஆண்டிலிருந்து கடமையாற்றி வந்த 51 சுகாதார தொண்டர்கள் கடந்த 04.05.2017 பிராந்திய வைத்திய அதிகாரியின் அலுவலகத்திற்கு முன்பாக கவனயீர்ப்பு போராட்டத்தினை ஆரம்பித்து இன்று (12.05.2017) ஒன்பதாவது நாளாகவும் தொடர்ச்சியாக மேற்கொண்டுவருகின்றனர்.

யுத்தத்தினால் பாதிக்கப்பட்ட பகுதிகளில் நாம் கடமையாற்றி பல உயிர்களை காப்பாற்றிய எங்களுக்கு நியமனம் இல்லையா?, நீண்ட காலமாக சேவையாற்றிய எங்களுக்கு நிரந்தர நியமனம் இல்லையா?, வெயில் மழை பாராமல் ஊதியம் இல்லாமல் கடமையாற்றிய எங்களுக்கு நிரந்தர நியமனம் இல்லையா?, வவுனியாவில் டெங்கு நோயை கட்டுப்படுத்திய எங்களுக்கு நிரந்தர நியமனம் இல்லையா? என பல்வேறு பதாதைகளை தாங்கியபடி கவனயீர்ப்பு போராட்டத்தில் ஈடுபட்டனர்.

நிரந்தர நியமனம் கிடைக்கும் வரை போராட்டத்தினை தொடரவுள்ளதாகவும் தெரிவித்தனர்.

 
வவுனியாவில் கடந்த 78 நாட்களாக தமது போராட்டத்தினை மேற்கொண்டு வரும் கையளிக்கப்பட்டு காணாமல் ஆக்கப்பட்டோரின் உறவினர்கள் தொடர்ந்தும் சுழற்சி முறையில் இன்று (12.05.2017) 78வது நாளாக தமது போராட்டத்தினை முன்னெடுத்து வருகின்றனர்.

கையளிக்கப்பட்ட தமது உறவினர்களை விடுவிக்கக்கோரியும் அரசியல் கைதிகளை விடுதலை செய்யக்கோரியும் அவசரகாலச்சட்டத்தினை நீக்குமாறு கோரி தமது போராட்டத்தினை முன்னெடுத்து வருகின்றனர்.

தீர்வு கிடைக்கும் வரை சுழற்சி முறையிலான உண்ணாவிரதப் போராட்டம் தொடரும் என போராட்டத்தில் ஈடுபட்டுள்ள காணாமல் ஆக்கப்பட்ட உறவினர்கள் தெரிவித்துள்ளனர்.