இந்திய பொதுத்துறை வங்கிகளில் 9,000 கோடி ரூபாய் கடன்களை வாங்கிவிட்டு அதை திருப்பி செலுத்தாமல் நாட்டை விட்டு தப்பி ஓடி தலைமறைவான தொழிலதிபர் விஜய் மல்லையா இங்கிலாந்தில் கைது செய்யப்பட்டுள்ளார்.

விஜய் மல்லையாவை ஸ்கொ ட்லார்ந்து யாட் பொலிசார் கைது செய்துள்ளனர்.

இந்தியாவின் முன்னணி தொழிலதிபர்களில் ஒருவராக திகழ்ந்தவர் விஜய் மல்லையா. மதுபான தொழில் மற்றும் விமான சேவைகளில் விஜய் மல்லையா நிறுவனங்கள் ஈடுபட்டு வந்தன.

தங்களது நிறுவனங்கள் பெயரால் இந்தியாவின் பொதுத்துறை வங்கிகளில் 9,000 கோடி கடன்களைப் பெற்றார். வங்கிகளும் மல்லையாவுக்கு சளைக்காமல் கடன்களைக் கொடுத்தன. ஆனால் மல்லையா வாங்கிய கடன்களைத் திருப்பிச் செலுத்தாமல் இந்தியாவை விட்டு தப்பி ஓடிவிட்டார்.

இந்தியாவை விட்டு தப்பி ஓடி இங்கிலாந்தில் சொகுசு வாழ்க்கை வந்தார் மல்லையா. இதனிடையே இந்திய பொதுத்துறை நிறுவனங்கள் மல்லையாவுக்கு எதிரான நீதிமன்ற கதவுகளைத் தட்டின.

இதையடுத்து மல்லையாவை கைது செய்யும் முயற்சிகள் தீவிரமாக்கப்பட்டன. தற்போது இந்திய அரசின் வேண்டுகோளை ஏற்று இங்கிலாந்தில் தலைமறைவாக இருந்த மல்லையா கைது செய்யப்பட்டுள்ளார். லண்டன் நீதிமன்றத்தில் அவர் ஆஜர்படுத்தப்பட்டு பின்னர் இந்தியாவுக்கு நாடு கடத்தப்படுவார்.

தமிழ்நாட்டில் கலப்பு திருமணம் செய்த சொந்த மகளை அவர் பெற்றோரே அடித்து கொலை செய்திருப்பது அதிர்ச்சியை ஏற்படுத்தியுள்ளது.

தமிழ்நாட்டின் அரியலூர் மாவட்டத்தை சேர்ந்தவர் சர்மிளா, இவர் அந்த பகுதியை சேர்ந்த இளைஞர் ஒருவரை காதலித்து வந்துள்ளார்.

பின்னர் பெற்றோர் எதிர்ப்பை மீறி சர்மிளா அவரை திருமணம் செய்து கொண்டார். திருமணத்துக்கு பின்னர் சர்மிளா கர்ப்பாமாகியுள்ளார், அவர் ஏழு மாத கர்ப்பமாகியிருந்த நிலையில் அவரின் கர்ப்பத்தை கலைக்க அவர் பெற்றோர் வற்புறுத்தியுள்ளனர்.

ஆனால் இதனை சர்மிளா ஏற்க மறுத்துள்ளார், இதனால் கோபமடைந்த அவர் பெற்றோர் அவரை அடித்து கொலை செய்துள்ளனர்.

இந்த சம்பவம் குறித்து பொலிசார் விசாரணை நடத்தி வருகிறார்கள்.

இந்தியாவில் விமானங்கள் புறப்படுவதற்கு காலதாமதம் ஏற்படுத்தும் பயணிகளுக்கு 15 லட்சம் வரை அபராதம் விதிக்க ஏர் இந்தியா விமானம் முடிவு செய்துள்ளதாக தகவல்கள் வெளியாகியுள்ளன.

இந்தியாவை சேர்ந்த ஏர் இந்தியா விமான நிறுவனம் தான் இந்த அதிரடி விதிமுறையை அறிமுகப்படுத்த உள்ளதாக தகவல்கள் வெளியாகியுள்ளன.

சமீப காலமாக விமானங்களில் சரியான நேரத்தில் பயணிக்கும் நபர்களின் எண்ணிக்கை மிகவும் குறைந்து வருகிறது.

அதாவது, விமானம் புறப்பட வேண்டிய நேரமானது சில பயணிகளால் காலதாமதம் ஏற்படுகிறது. இதனை தவிர்ப்பதற்காக விமானப்பயணத்தை ஒரு மணி நேரம் தாமதிக்க வைக்கும் பயணிக்கு 5 லட்சம் அபாரதம் விதிக்கப்பட இருக்கிறது.

மேலும். ஒன்று முதல் இரண்டு மணி நேரம் வரை தாமதம் ஏற்படுத்தினால் 10 லட்சம் அபராதமும், 2 மணிக்கு மேல் தாமதப்படுத்தினால் 15 லட்சம் வரை அபராதம் விதிக்கப்படும் புதிய கட்டுப்பாட்டை ஏர் இந்தியா நிறுவனம் அறிமுகப்படுத்த உள்ளதாக தகவல்கள் வெளியாகியுள்ளன.

எனினும், இந்த புதிய கட்டுப்பாடுகள் எப்போது நடைமுறைப்படுத்தப்படும் என்ற தகவலகள் எதுவும் வெளியாகவில்லை.

 
சுற்றிலும் கண்ணாடி பொருத்தப்பட்டுள்ள புதிய வகை ரயில் பெட்டியை இந்திய ரயில்வே அறிமுகப்படுத்தியுள்ளது.

இந்த கண்ணாடி ரயில் பெட்டியானது, விசாகப்பட்டினம்-கிரண்டூர் பயணிகள் ரயிலில் தற்போது இணைக்கப்பட்டுள்ளது. இந்த புதிய வசதியை கடந்த ஞாயிற்றுக்கிழமை, ஒடிசா மாநில தலைநகர் புவனேஸ்வரில் இருந்து இந்திய ரயில்வே அமைச்சர் சுரேஷ் பிரபு காணொலி மூலம் கொடியசைத்து துவக்கி வைத்துள்ளார்.

இந்த ரயில் பெட்டியில் 360 டிகிரி அளவுக்கு சுற்றும் 40 இருக்கைகள், கண்ணாடி மேற்கூரை, ஏ.சி , ஜி.பி.எஸ், தானியங்கி கதவுகள், எல்.ஈ.டி விளக்குகள் ஆகியவை அமைந்துள்ளன.

விசாகப்பட்டினம்-கிரண்டூர் ரயில் பாதையில், அரக்கு மலைப்பகுதி அமைந்துள்ளது. எனவே இந்த கண்ணாடி பெட்டி மூலம் அந்த மலைப்பகுதியின் அழகை பயணிகள் ரயிலில் அமர்ந்தவாரே கண்டு ரசிக்க முடியும்.

இந்த பெட்டியை உருவாக்க இந்திய மதிப்பில் சுமார் 3.38 கோடி ரூபாய் செலவாகியுள்ளது. சுற்றுலா தலங்களை இணைக்கக் கூடிய ரயில் சேவைகளில், இது போன்ற கண்ணாடி பெட்டிகளை இணைப்பது குறித்து ரயில்வே அமைச்சகம் பரிசீலித்து வருவதாக தகவல் வெளியாகியுள்ளது.

தமிழகத்தின் சென்னை மெரீனா கடற்கரையில் திமுக நிர்வாகிகளுடன் அக்கட்சியின் செயல் தலைவர் மு.க.ஸ்டாலின் நேற்றிரவு திடீர் ஆலோசனை நடத்தியிருப்பது தமிழக அரசியலில் பரபரப்பை ஏற்படுத்தியுள்ளது.

சென்னையில் அமைச்சர் தங்கமணி வீட்டில் அ.தி.மு.க அமைச்சர்கள் திடீர் ஆலோசனை நடத்தினர். அப்போது அமைச்சர் ஜெயக்குமார் அதிமுக-வின் இரு அணிகளும் இணைவது பற்றி ஆலோசனை நடத்தியதாக கூறினார்.

இணைந்து செயல்படுவோம் என ஓ.பன்னீர்செல்வம் கூறிய கருத்தை வரவேற்பதாகவும் அவர் தெரிவித்தார். இந்நிலையில் திமுக செயல்தலைவர் மு.க.ஸ்டாலின் நேற்றிரவு மெரீனா கடற்கரைக்கு சென்றதாக கூறப்படுகிறது.

அங்கு அவர் கட்சி நிர்வாகிகளுடன் திடீர் ஆலோசனை நடத்தியுள்ளார். ஆனால் இதில் கட்சியின் மூத்த தலைவர்கள் யாரும் கலந்து கொள்ளவில்லை என்று தகவல்கள் வெளியாகியுள்ளது.

மதுக்கடையை எதிர்த்து போராடிய பெண்ணை மர்ம கும்பல் ஒன்று மது போத்தலால் குத்தியுள்ள சம்பவம் அதிர்ச்சியை ஏற்படுத்தியுள்ளது.

தமிழகத்தின் சிவகங்கை மாவட்டம் பணக்காடி கிராமத்தில் உள்ள மதுக்கடையை அகற்றகோரி மனு எழுதிய அப்பகுதி சமூக ஆர்வலர் செல்வி, மனுவில் ஊரார் பலரிடம் கையெழுத்து வாங்கினார். இதை நேற்று நடைபெறும் மனு நாள் கூட்டத்தில் ஆட்சியரிடம் அளிக்க திட்டமிட்டிருந்ததாக கூறப்படுகிறது.

இதையறிந்த விஜய் என்பவர் மற்றும் அவரது நண்பர்கள் செல்வியிடம் தகராறில் ஈடுபட்டுள்ளனர். இதனால் செல்வி இது தொடர்பாக பொலிசாருக்கு தகவல் கொடுத்துள்ளார். இதைத் தொடர்ந்து பொலிசாரும் இரு தரப்பினரையும் காவல் நிலையத்திற்கு வரச்சொல்லி சென்றுவிட்டனர்.

பொலிசார் சென்ற அடுத்த சிறிது நேரத்தில், செல்வியை வழிமறித்த மர்ம நபர்கள், அவரை தாக்க முற்பட்டனர். தப்பியோடிய செல்வியின் முதுகில் மது போத்தலை உடைத்து குத்தினர்.

பலத்த காயமடைந்த செல்வி, அருகில் உள்ள மருத்துவமனையில் அனுமதிக்கப்பட்டு சிகிச்சை மேற்கொண்டு வருகிறார்.