கடந்த சில தினங்களுக்கு முன்னர் மீதொட்டமுல்ல குப்பை மேடு சரிந்து வீழ்ந்தமையால் ஏற்பட்ட அனர்த்தம் இலங்கை மக்களை சோகத்தில் ஆழ்த்தியுள்ளது.

மீட்பு நடவடிக்கைகள் தீவிரமடைந்துள்ள நிலையில், அங்குள்ள உண்மை நிலவரங்களை அறிந்து கொள்ளவும் ஊடகவியலாளர்கள் அங்கு குழுமியுள்ளனர்.

இந்நிலையில் அனர்த்தம் இடம்பெற்ற பகுதியில் நிகழ்ந்த மனிதாபிமான செயற்பாடு தொடர்பில் சமூக வலைத்தளங்களில் செய்தி வெளியாகி உள்ளன.

அனர்த்த நிலைமையிலும் பூனை ஒன்றின் உயிரை காப்பாற்ற ஊடகவியலாளர் ஒருவர் மேற்கொண்ட முயற்சி பரவலாக பேசப்பட்டு வருகிறது.

மீதொட்டமுல்ல குப்பை மேட்டினை புகைப்படம் எடுப்பதற்கு சென்றிருந்த ஊடகவியலாளர் ஒருவரின் செயற்பாடே இவ்வாறு கமராவில் பதிவாகியுள்ளது.

ஆங்கில ஊடகமொன்றில் பணியாற்றும் வருண வன்னிஆராச்சி என்ற ஊடகவியலாளரின் இந்த செயல் பல்வேறு தரப்பினர்களால் பாராட்டப்பட்டு வருகின்றமை குறிப்பிடத்தக்கது.

புத்தாண்டு காலத்தில் இலங்கை போக்குவரத்துச் சபை சாதனை வருமானத்தை ஈட்டியுள்ளதாக இலங்கை போக்குவரத்துச் சபையின் பிரதான கட்டுப்பாட்டு முகாமையாளர் பீ.எச்.ஆர்.ரீ. சந்திரசிறி தெரிவித்துள்ளார்.

இதற்கு முன்னை ஆண்டுகளை விடவும் இந்த ஆண்டு புத்தாண்டு காலத்தில் இலங்கை போக்குவரத்துச் சபை கூடுதல் வருமானம் ஈட்டியுள்ளது. கடந்த 6ம் திகதி முதல் 16ம் திகதி முற்பகல் வரையிலான காலப் பகுதியில் இலங்கை போக்குவரத்துச் சபை 72 கோடி ரூபா வருமானத்தை கிடைத்துள்ளது.

கடந்த 8ம் திகதி மட்டும் 86.4 மில்லியன் ரூபா வருமானம் கிடைத்துள்ளது. ஊவா, வடமேல், சபரகமுவ ஆகிய மாகாணங்களில் கூடுதல் வருமானம் ஈட்டப்பட்டுள்ளது.

இதேவேளை, எதிர்வரும் 25ம் திகதி வரையில் புத்தாண்டு காலத்திற்கான விசேட பஸ்கள் சேவையில் ஈடுபடுத்தப்பட உள்ளதாகத் தெரிவிக்கப்படுகிறது.

மீதொட்டமுல்ல குப்பை மேட்டில் மீண்டும் அனர்த்தங்கள் ஏற்படக் கூடிய ஆபத்து உள்ளதாக எச்சரிக்கப்பட்டுள்ளது.

எதிர்வரும் காலங்களில் மழை பெய்தால் மீதொட்டமுல்ல குப்பை மேட்டில் மீண்டும் சரிவு ஏற்படும் என தேசிய கட்டட ஆராய்ச்சி அமைப்பு தெரிவித்துள்ளது.

சிங்கள ஊடகம் ஒன்றுக்கு கருத்து வெளியிட்ட அமைப்பின் மண் சரிவு ஆய்வு மற்றும் ஆபத்து தொடர்பில் ஆய்வு மேற்கொள்ளும் இயக்குனர் ஆர்.டிம்.எஸ்.பண்டார தெரிவித்துள்ளார்

உண்மையில் குப்பை மேடு சரியவில்லை, குப்பை மேட்டின் பாரத்திற்கு மண் மேடு உடைந்து விழுந்துள்ளது.

இங்கு குப்பை மேட்டை சுற்றியுள்ள வீடுகள் ஒரு பக்கம் தள்ளப்பட்டுள்ளதுடன், மேல் பக்கமாக உயர்ந்துள்ளது. இந்த நிலைமையை நாங்கள் மண் சரிவு அனர்த்தமாகவே கருதுவோம்.

இவ்வாறான சம்பவம் ஒன்று இலங்கையில் இடம்பெற்ற முதல் சந்தர்ப்பம் இதுவாகும். தற்போதைக்கு குப்பை மேட்டில் குப்பை போடாமையினால் ஆபத்துக்கள் இல்லை.

எனினும் எதிர்வரும் நாட்களில் மழை பெய்தால் குப்பை மேட்டில் மற்றுமொரு அனர்த்தம் ஏற்பட கூடும். இதனால் குப்பை மேட்டியை சுற்றி ஆபத்தான எல்லையாக குறிப்பிடப்பட்டுள்ள நிலையில் அங்கு வசிப்பவர்களை அங்கிருந்து செல்லுமாறு ஆலோசனை வழங்கப்பட்டுள்ளது.

இந்த ஆபத்தான பகுதியில் கிட்டத்தட்ட 130 வீடுகள் உள்ளதாக அவர் மேலும் தெரிவித்துள்ளார்.

தற்போது இந்தியா, இலங்கை உட்பட அனைத்து நாடுகளிலும் அதிகளவிலான வெப்பநிலை காணப்படுகின்றது. இந்த நிலையில், கடந்த 137 ஆண்டுகளிலேயே அதிக வெப்பம் நிலவிய இரண்டாவது மாதமாக மார்ச் மாதம் காணப்படுகின்றது.

6 ஆயிரத்து 300 நாடுகளில் மேற்கொள்ளப்பட்ட புள்ளிவிபரங்களின் அடிப்படையிலேயே இந்த அறிக்கையினை அமெரிக்க வானவியல் ஆராய்ச்சி மையமான நாசா வெளியிட்டுள்ளது. ‌

அந்த புள்ளி விபரங்களின் படி கடந்த 137 ஆண்டுகளில் வெப்பம் மிகுந்த 2 ஆவது மாதமாக 2017ஆம் ஆண்டின் மார்ச் மாதம் அறிவிக்கப்பட்டுள்ளது.

கடந்த 2016 ஆம் ஆண்டு மார்ச் மாதம் பதிவாகியிருந்த வெப்பநிலையை விட 0.15 டிகிரி வெப்பம் குறைவாக காணப்படுவதாக நாசா மேலும் தெரிவித்த்துள்ளது.

 
மீதொட்டமுல்ல பகுதியில் குப்பை மேடு சரிந்து விழுந்ததில் சிலர் தங்களின் உறவுகளை அடையாளம் கண்டுள்ள போதிலும் சிலர் தங்கள் உறவுகளை தொடர்ந்தும் தேடிக் கொண்டிருக்கின்றனர்.

அந்த வகையில், தனது உறவுகளை இழந்த கணவர் ஒருவரின் கதறல் குறித்து கொழும்பு ஊடகம் ஒன்று செய்தி வெளியிட்டுள்ளது.

அனர்த்தத்தில் பலியான மனைவி மற்றும் மகனின் சடலங்கள் கிடைக்கப் பெற்றுள்ளதாக அந்த நபர் தெரிவித்துள்ளார். இருப்பினும், தனது இளைய மகளை இது வரையில் கண்டுப்பிடிக்கவில்லை என மகளின் தந்தை கதறலுடன் தெரிவித்துள்ளார்.

மீதொட்டமுல்ல பகுதியை சேர்ந்த சிவகுமாரன் என்ற நபரே இவ்வாறு கொழும்பு ஊடகம் ஒன்றுக்கு இந்த செய்தியை வெளியிட்டுள்ளார்.

பிரனீதா என்ற தன் இளவயது மகளே காணாமல் போயுள்ளார்.அவரை தேடும் நடவடிக்கைகள் தொடர்ந்தும் மேற்கொள்ளப்பட்டு வருவதாகவும் அந்த சிறுமியின் தந்தை கூறியுள்ளார்.

தற்போது வரையில் மேற்கொள்ளப்பட்ட மீட்கும் நடவடிக்கைகளில் 28 பேரின் சடலங்கள் மீட்கப்பட்டுள்ளன.அவர்களுள் 30 பேர் காணாமல் போயுள்ளனர்.

மாவட்டத்தினுடைய வளர்ச்சிக்காகவும் , ஏற்படும் பிரச்சனைகளை சுமூகமாக தீர்ப்பதற்குமாக மாவட்ட அபிவிருத்திக்குழு இரண்டு மாதங்களுக்கு ஒருமுறையாவது மாவட்ட அபிவிருத்திக்குழு கூட்டத்தை கூட்ட முடியவில்லை என்பதில் நான் வெட்கப்படுகிறேன் என வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இணைத்தலைவருமான கே.காதர் மஸ்தான் தெரிவித்துள்ளார்.

மன்னார் சிலாவத்துறையில் நேற்றுமுன்தினம் இடம்பெற்ற மீள்குடியேற்ற செயலணியின் அபிவிருத்தி தொடர்பான மக்கள் சந்திப்பில் கலந்துகொண்டு உரையாற்றும்போதே அவர் இவ்வாறு தெரிவித்தார். குறித்த சந்திப்பில் மஸ்தான் எம்.பி மேலும் உரையாற்றுகையில்..

மன்னார் மாவட்டத்தினுடைய அபிவிருத்தியையும் இங்கு ஏற்படும் பிரச்சனைகளையும் பேசுவதற்கு மாவட்ட அபிவிருத்திக்குழு போடப்பட்டும் இக்கூட்டத்தை கூட்டுவதற்கு சில இணைத்தலைவர்களுக்கு நேரமில்லை என்பதால் நான் அபிவிருத்திக்குழு இணைத்தலைவர் என்றுசொல்ல வெட்கப்படுகிறேன்.

மக்களால் தெரிவுசெய்யப்பட்ட மக்கள் பிரதிநிதிகளுக்கு மக்களுடைய பிரச்சனைகளை பேசுவதற்கு நேரமில்லை என்றால் அந்த இடத்திற்கு பொருத்தமான ஒருவருக்கு அப்பொறுப்பை வழங்கிவிட்டு ஒதுங்கிக்கொள்ளவதே சாலச்சிறந்ததாகும்.

வெறுமனே தங்கள் பெயருடன் இணைத்து பதவிகளை போட்டுக்கொள்வதற்காக இருந்தால் அதற்கவர்கள் வீட்டிலே இருந்திருக்கலாம். இதற்கு மேலும் நான் யார் என்பதை பெயர்குறிப்பிடத்தேவையில்லை என்றாலும் இனியாவது அபிவிருத்திக்குழு கூட்டம் கூட்டப்பட்டு மன்னார் மாவட்ட மக்களுடைய பிரச்சினைகளுக்காக ஒரு நாளையாவது செலவழிக்க வேண்டும் என்பதே எனது எதிர்பார்ப்பாகும்.

மேலும் மக்களுக்கு நிர்வாகம் சார்ந்த தெளிவுகள் போதாமையால் அவர்களை சிலர் ஏமாற்ற நினைக்கலாம் ஆனாலும் மக்களால் தெரிவுசெய்யப்பட்ட நான் அவர்களுக்கு கிடைக்கப்பெறவேண்டியதை அவ்வாறே கிடைக்க செய்வதுதான் என்னுடைய வேலையாக இருக்கும் என அவர் தெரிவித்துள்ளார்.

மட்டக்களப்பு – ஏறாவூர் பொலிஸ் பிரிவிலுள்ள வந்தாறுமூலை கிராமத்தில் உயிரிழந்த பெண்ணின் சடலத்தை உடற்கூற்றுப் பரிசோதனைக்கு உட்படுத்தியபோது அந்த பெண்ணின் வயிற்றில் 4 மாத பெண் சிசு ஒன்று உயிரிழந்த நிலையில் காணப்பட்டதாக மரண விசாரணை அதிகாரி எம்.எஸ்.எம். நஸீர் தெரிவித்துள்ளார்.

குறித்த பெண்ணின் கணவர் கடந்த 18 மாதங்களாக மத்திய கிழக்கு நாட்டில் தொழில் புரிந்து வரும் நிலையிலேயே இந்த பெண் வயிற்றில் குழந்தையுடன் உயிரிழந்துள்ளார். இந்த சம்பவம் குறித்து மேலும் தெரியவருவதாவது,

வந்தாறுமூலை கிராமத்தில் திடீரென மரணமடைந்த இரண்டு பிள்ளைகளின் தாயான 28 வயது பெண்ணொருவரின் உடற்கூற்றுப் பரிசோதனை இன்று இடம்பெற்றது.

மட்டக்களப்பு போதனா வைத்தியசாலையில் மேற்கொள்ளப்பட்ட உடற் கூற்றுப் பரிசோதனையில் பெண்ணின் வயிற்றில் 4 மாதங்களேயான பெண் சிசு இறந்த நிலையில் இருப்பது தெரிய வந்துள்ளது. மேலும், பெண்ணுக்கு அதிக இரத்தப் போக்கு ஏற்பட்டிருப்பதும் கண்டறியப்பட்டுள்ளது.

குறித்த பெண்ணின் உறவினர்கள் அளித்த வாக்குமூலத்திலும் முன்னுக்குப்பின் முரண்பாடுகள் காணப்பட்டதால் தடயவியல் நிபுணர்களின் அறிக்கையைப் பெறவும் இறந்த பெண்ணின் உடல் மாதிரிகளை இரசாயனப் பகுப்பாய்வுக்கு உட்படுத்தவும் உத்தரவிடப்பட்டுள்ளதாக பிரதேச திடீர் மரண விசாரணை அதிகாரி தெரிவித்தார்.

மரணமடைந்த பெண்ணின் உடற் கூற்றுப் பரிசோதனையின் பின்னர் சடலம் உறவினர்களிடம் ஒப்படைக்கப்பட்டுள்ளதாக தெரிவிக்கப்படுகின்றது.