கடந்த வாரம் அதிவேக நெடுஞ்சாலைகளின் ஊடாக சுமார் ஐந்து இலட்சத்து 50 ஆயிரம் வாகனங்கள் பயணித்துள்ளதாக நெடுஞ்சாலை முகாமைத்துவ பிரிவு தெரிவித்துள்ளது.

கடந்த 7ம் திகதி முதல் 13ம் திகதி வரை இந்த வாகன போக்குவரத்து இடம்பெற்றுள்ளது. இதன்மூலம் 160 மில்லியன் ரூபா வருமானமாக கிடைக்கப் பெற்றுள்ளது.

இந்தக் காலப்பகுதியில் அதிவேக நெடுஞ்சாலைகளில் 12 சிறு வாகன விபத்துக்கள் இடம்பெற்றுள்ளன. இன்றும் நாளையும் அதிவேக நெடுஞ்சாலைகளில் பயணிக்கும் வாகனங்களின் எண்ணிக்கை அதிகரிக்கும் என வீதி அபிவிருத்தி அதிகார சபை தெரிவித்துள்ளது.

இதனை முன்னிட்டு கஹதுடுவ, கொட்டாவ, கொத்தலாவல மற்றும் கடுவெல ஆகிய நுழைவுப் பாதைகளில் கடமையில் அமர்த்தப்பட்டுள்ள உத்தியோகத்தர்களின் எண்ணிக்கை அதிகரிக்கப்படடுள்ளது.

இதேவேளை கடந்த வருடத்தில் இடம்பெற்ற விபத்துக்களுடன் ஒப்பிடுகையில், இந்த 3 தினங்களில் விபத்துக்கள் காரணமாக சிகிச்சை பெற்றவர்களின் எண்ணிக்கையில் குறைவு ஏற்பட்டுள்ளது.

இந்தக் காலப்பகுதியில் 2.4 சதவீதமான நோயாளர்கள் சிகிச்சை பெற்றுள்ளதாக கொழும்பு தேசிய வைத்தியசாலையின் பணிப்பாளர் விசேட வைத்தியர் அனில் ஜாசிங்ஹ தெரிவித்துள்ளார்.

வீடுகளில் ஏற்பட்ட விபத்துக்களின் எண்ணிக்கையும் குறைவடைந்துள்ளன. இவ்வருடத்தில் தொழில் ரீதியான விபத்துக்கள் 23 பதிவு செய்யப்பட்டுள்ளன. கடந்த வருடத்தில் இத்தொகை 20 ஆகும்.

விளையாட்டுக்களின் மூலம் ஏற்பட்ட விபத்துக்களின் எண்ணிக்கை பெருமளவில் குறைவடைந்துள்ளது. இருப்பினும் வீதி விபத்துக்களின் எண்ணிக்கை சிறிய அளவில் அதிகரித்துள்ளது. முச்சக்கர வண்டி விபத்துக்களின் காரணமாகவே இவை இடம்பெற்றன.

முச்சக்கர வண்டிகளை குறுகிய தூரத்திற்காக மாத்திரமே பயன்படுத்த வேண்டும். இருப்பினும் பெரும்பாலானோர் இதனை யாழ்ப்பாணம், கதிர்காமம் போன்ற நீண்ட தூர பயணங்களுக்கும் பயன்படுத்துகின்றனர்.

வீதிகளில் வாகன நெரிசலுக்கு முக்கிய காரணம் முச்சக்கர வண்டிகளாகும். வன்முறைகளால் ஏற்படும் அனர்த்தங்களின் எண்ணிக்கை இம்முறை குறிப்பிடத்தக்களவு குறைந்துள்ளன. 5 சதவீதமாக இவை குறைவடைந்துள்ளதாக அவர் மேலும் தெரிவித்துள்ளார்.

கண்டியில் திருமணமான இளம் பெண் ஒருவர் திடீரென உயிரிழந்ததாக கொழும்பு ஊடகங்கள் தகவல் வெளியிட்டுள்ளன.

அழகு கலை நிபுணரான லக்மினி என்ற பெண் ஒருவரே நேற்று முன்தினம் உயிரிழந்துள்ளார். அவர் தனது துறை மூலம் பலரது மனங்களை வென்றவர் என தெரிவிக்கப்படுகின்றது.

கடந்த மார்ச் மாதம் 13ம் திகதி லக்மினியின் திருமணம் நடந்துள்ளது. அவரது கணவர் புகைப்பட கலைஞராக செயற்பட்டு வருகின்றார்.

திருமணம் நடந்து ஒரு மாதத்திற்குள் திடீரென அவர் வைத்தியசாலையில் அனுமதிக்கப்பட்டுள்ளார். சளி அதிகரித்தமையினால் அவர் வைத்தியசாலையில் அனுமதிக்கப்பட்டுள்ளார். வைத்தியர்கள் சிகிச்சை மேற்கொண்ட போதிலும் அவரது நோய் தீவிரமடைந்துள்ளது.

அவரது நுரையீரலில் கிருமி நுழைந்துள்ளமையினாலே அவருக்கு இந்த நிலைமை ஏற்பட்டுள்ளதாக லக்மினியின் நண்பர் ஒருவர் தெரிவித்துள்ளார்.

கண்டி பிரபல பாடசாலை ஒன்றில் கல்வி கற்றவர். அவரது துறையில் மிகவும் பிரபலமான ஒருவராக செயற்பட்டுள்ளார் என ஊடகங்கள் சுட்டிக்காட்டியுள்ளன.

உலகில் முதன் முறையாக டெங்கு காய்ச்சலுக்கான தடுப்பூசி ஒன்றுக்கு உலக சுகாதார ஸ்தாபனம் அனுமதி வழங்கியுள்ளது.

டெங்கு வெக்சியா என அறிமுகப்படுத்தப்பட்டுள்ள இந்த தடுப்பூசி, இருபது வருடங்களாக மேற்கொள்ளப்பட்ட ஆய்வின் பயனாக கண்டுபிடிக்கப்பட்டுள்ளது.

டெங்கு காய்ச்சல் அதிகமாக பரவும் தென்கிழக்கு ஆசியா மற்றும் இலத்தீன் அமெரிக்காவில் ஆயிரக்கணக்கான சிறுவர்களிடம் மேற்கொள்ளப்பட்ட ஆய்வில் இந்த தடுப்பூசி 70 வீதம் வெற்றியளித்துள்ளதாக தகவல்கள் தெரிவிக்கின்றன.

மெக்சிக்கோ, பிறேசில், எல்சல்வடோர் மற்றும் பிலிப்பைன்ஸ் ஆகிய நாடுகளுக்கு இந்த தடுப்பூசியை பயன்படுத்த அனுமதி வழங்கப்பட்டுள்ளது.

ஒன்பது வயதைக்கடந்த ஒருவருக்கு வருடத்திற்கு மூன்று தடவைகள் இந்த தடுப்பூசியை ஏற்றமுடியும் என பரிந்துரை செய்யப்பட்டுள்ளது.

வைரஸில் காணப்படும் குழப்ப நிலை காரணமாக டெங்கு காய்ச்சலுக்கான உறுதியான தடுப்பூசியை கண்டுபிடிக்க மருத்துவ துறையினால் இதுவரை முடியவில்லை.

120 நாடுகளில் வருடாந்தம் 390 மில்லியன் மக்கள் டெங்கு காய்ச்சலால் பீடிக்கப்படுகின்றனர்.

இந்த வருடத்தின் கடந்த நான்கு மாதங்களில் மாத்திரம் இலங்கையில் டெங்கு காய்ச்சலால் 53 பேர் உயிரிழந்துள்ளடன், 29,000 இற்கும் அதிகமான டெங்கு நோயாளர்கள் பதிவாகியுள்ளனர்.

உலக சுகாதார ஸ்தாபனம் அனுமதி வழங்கியுள்ள தடுப்பூசியை இலங்கையில் பயன்டுத்துவதற்குள்ள இயலுமை தொடர்பில் ஆராய்ந்து வருவமாக சுகாதார அமைச்சின் செயலாளர் அநுர ஜயவிக்கிரம நியூஸ்பெஸ்டுக்கு கூறினார்.

பூநகரி – முட்கொம்பன் சந்தியில் இடம்பெற்ற விபத்தில் ஒருவர் பலியாகியதுடன் இருவர் காயமடைந்துள்ளனர்.

நேற்று மாலை யாழ்ப்பாணத்திலிருந்து பூநகரி ஊடாக பயணித்த வாகனம் ஒன்று, பூநகரி – பரந்தன் பாதையிலிருந்து முட்கொம்பன் நோக்கிச் செல்வதற்கு திருப்பிய போது, பின்னால் வந்த மோட்டார் சைக்கிளுடன் மோதி இந்த விபத்து ஏற்பட்டுள்ளது.

மேலும், இதன்போது காயமடைந்த இருவரும் கிளிநொச்சி வைத்தியசாலைக்கு கொண்டு செல்லப்பட்டனர். அதில் ஒருவர் மேலதிக சிகிச்சைகளுக்காக யாழ் போதனா வைத்தியசாலைக்கு மாற்றப்பட்டுள்ளார்.

பிரதான பாதையிலிருந்து முட்கொம்பன் வீதிக்கு திரும்ப முற்பட்ட வாகனத்தை முந்திச் செல்ல மோட்டார் சைக்கிள் சாரதி முற்பட்ட போதே விபத்து ஏற்பட்டுள்ளது என, ஆரம்ப கட்ட விசாரணைகளில் தெரியவந்துள்ளது.

இது குறித்த மேலதிக விசாரணைகளை பூநகரி பொலிஸார் மேற்கொண்டு வருகின்றனர்.

 
மன்னார் அடம்பன் பகுதியில் நேற்று இரவு இடம்பெற்ற விபத்தில் இளம் குடும்பஸ்தர் ஒருவர் உயிரிழந்துள்ளார்.

குறித்த விபத்தில் மாந்தை மேற்கு பிரதேசச்செயலக தொழில்நுட்ப உத்தியோகஸ்தரான 32 வயதுடைய துரைரெட்னம் ரட்னகுமார் என்பவரே உயிரிழந்துள்ளார்.
இது தொடர்பில் மேலும் தெரியவருவதாவது,

குறித்த இளம் குடும்பஸ்தரான தொழில்நுட்ப உத்தியோகஸ்தர் நேற்று இரவு அடம்பன் பகுதியில் இருந்து மன்னாரில் உள்ள தனது வீட்டிற்கு மோட்டார் சைக்கிளில் வந்து கொண்டிருந்த போதே அடம்பன் பகுதியில் மரம் ஒன்றுடன் மோதி குறித்த விபத்து நிகழ்ந்துள்ளது.

இதனைத் தொடர்ந்து இன்று காலை அப்பகுதியால் சென்றவர்கள் சடலத்தை கண்டு அடம்பன் பொலிஸாருக்கு தகவல் தெரிவித்துள்ளனர்.

இந்த நிலையில் சம்பவ இடத்திற்கு வந்த அடம்பன் பொலிஸார் சடலத்தை மீட்டுள்ளதுடன், சம்பவ இடத்திற்கு வந்து சடலத்தை பார்வையிட்ட பதில் நீதவான் சடலத்தை மன்னார் பொது வைத்தியசாலையில் ஒப்படைக்க பொலிஸாருக்கு உத்தரவிட்டுள்ளார்.

மேலும் சம்பவம் தொடர்பான விசாரணைகளை அடம்பன் பொலிஸார் மேற்கொண்டு வருகின்றமை குறிப்பிடத்தக்கது.