நுவரெலியா பகுதியில் உள்ள குளத்தில் இருந்து சிறுமி ஒருவரின் சடலம் மீட்கப்பட்டுள்ளதாக தெரிவிக்கப்படுகின்றது.

இவ்வாறு சடலமாக மீட்கப்பட்ட சிறுமி 16 வயதுடைய பாடசாலை மாணவி என பொலிஸார் தெரிவித்துள்ளனர்.

பொலிஸாருக்கு கிடைக்கப்பெற்ற தகவலின் அடிப்படையிலேயே குறித்த சிறுமியின் சடலத்தை பொலிஸார் மீட்டுள்ளனர்.

இந்த சிறுமி நேற்றைய தினம் காணாமல் போயிருந்தார் என பொலிஸ் நிலையத்தில் முறைப்பாடு ஒன்றும் பதிவு செய்யப்பட்டுள்ளது.

இந்த சம்பவம் தொடர்பில் நுவரெலியா பொலிஸார் மேலதிக விசாரணைகளை முன்னெடுத்து வருகின்றனர்.

 
இலங்கையின் முதலாவது ஸ்மார்ட் பேருந்து நிலையம் கொழும்பு டவுன்ஹோலில் நேற்று திறந்து வைக்கப்பட்டுள்ளது.

உலகில் பயன்படுத்தப்படும் இணைய தொடர்புகளுடனான “ஸ்மார்ட் நகரம்” என்ற தொழில்நுட்பத்தை பயன்படுத்தி தேசிய தொலைப்பேசி வலையமைப்பான மொபிடெல் கண்டுபிடிப்பு பிரிவினால் இந்த பேருந்து நிலையம் திறந்து வைக்கப்பட்டுள்ளது.

எந்தவொரு இடத்தில் இருந்தும் எந்தவொரு சந்தர்ப்பத்திலும், எந்தவொரு உபகரணத்தையும் பயன்படுத்தி இணையத்துடன் இணைய கூடிய Internet of Things என்ற தொழில்நுட்பத்தின் கீழ் இந்த நிலையம் அமைக்கப்பட்டுள்ளது.

கொழும்பு நகரத்தை ஸ்மார்ட் நகரமாக்கும் நோக்கில் மொபிடெல் நிறுவனத்தினால் ஆரம்பிக்கப்பட்ட முதலாவது நடவடிக்கை இதுவாகும்.

இந்த ஸ்மார்ட் பேருந்து நிலையத்தில் அதிவேக இணையத்தள வசதிகள் வழங்கப்படுகின்றது. நிலையத்திலுள்ள பொருள் வழங்கும் இயந்திரத்தின் ஊடாக பண பயன்பாடின்றி குளிர் பானங்களை பெற்றுக் கொள்ள முடியும்.

அதன் முதற்கட்ட நடவடிக்கையாக நீர் தேவைப்பட்டால், பேருந்து நிலையத்தில் குறிப்பிடப்பட்டுள்ள இலக்கத்திற்கு ‘water’என குறுந்தகவல் ஒன்றை அனுப்பி வைத்து, அதற்கு பதிலாக கிடைக்கும் இலக்கத்தை இயந்திரத்தில் உள்ளடக்கினால் அந்த இயந்திரம் தனது சேவையை வழங்கும்.

இதற்கு மேலதிகமாக அருகில் உள்ள ஏ.டி.ம் இயந்திரங்கள், பேருந்துகள், ரயில் நிலையங்கள் தொடர்பான தகவல்களையும் இங்கு பெற்றக் கொள்ள முடியும்.

இதேபோன்று பல ஸ்மார்ட் பேருந்து நிலையங்களை இலங்கை முழுவதும் ஆரம்பிக்க நடவடிக்கை மேற்கொள்ளப்படவுள்ளதாக தெரிவிக்கப்படுகின்றது.

கையடக்க தொலைபேசிக்கு வந்த தவறான அழைப்பினால் இலங்கையைச் சேர்ந்த இளம் பெண் ஒருவரின் வாழ்க்கை கேள்விக் குறியாகி உள்ளது.

குறித்த இளம் பெண்ணின் தொலைபேசிக்கு தவறாக வந்த அழைப்பினால் ஏற்பட்ட நட்பு, திருமணத்தில் முடிந்துள்ளது.
இதனால்,ஆசை வார்த்தைகள் காட்டி, குறித்த இலங்கைப் பெண்ணை ஆண் ஒருவர் ஏமாற்றி திருமணம் செய்து கொண்டுள்ளார்.

ஆறு மாதங்களாக நீடித்த தொலைபேசி மூலமான நட்பு திருமணத்தில் முடிந்ததும், இருவரும் குவைத் நோக்கி சென்றுள்ளனர். இவ்வாறு குவைத் சென்ற இலங்கைப் பெண்ணுக்கு பெரும் அதிர்ச்சி காத்திருந்துள்ளது.

குறித்த ஆணுக்கு குவைத்தில் ஏற்கனவே திருமணம் முடிந்து ஒரு குழந்தையும் இருப்பதை பார்த்து அதிர்ச்சி அடைந்துள்ளார்.

எனினும் திருமணம் செய்து தன்னை ஏமாற்றிய ஆணிடம் குறித்த பெண் நீதியை கேட்டுள்ளார்.

ஆனால் அந்த ஆண் விடுத்த கொலை அச்சுறுத்தல் காரணமாக, இந்த விடயங்களை வெளியில் சொல்லாமல் அந்த இலங்கைப்பெண் மூடி மறைத்து வந்துள்ளமை குறிப்பிடத்தக்கது.

தற்போது பெரும் சர்ச்சைகளை ஏற்படுத்தியுள்ள விடயமாக ரஜினிகாந்தின் யாழ்ப்பாணத்திற்கான விஜயம் காணப்படுகின்றது.

அரசியல் தரப்பில் பல விமர்சனங்களை ஏற்படுத்தியுள்ள குறித்த பயணத்திற்கு சூப்பர் ஸ்டார் ரஜினிகாந்த் “நான் யாழ்ப்பாணம் செல்லப்போவதில்லை” என தனது திட்டவட்டமான முடிவை வெளியிட்டுள்ளார்.

இது குறித்து ரஜினிகாந்த் உத்தியோகப்பூர்வ அறிக்கை ஒன்றையும் வெளியிட்டுள்ளார்.

யாழ்ப்பாணத்தில் நிர்மாணிக்கப்பட்டுள்ள 150 வீடுகளை மக்களிடம் கையளிப்பதற்காக லைக்கா நிறுவனம் ரஜினிகாந்திற்கு அழைப்பு விடுத்திருந்தது.

இதற்கு ரஜினியும் சம்மதம் வெளியிட்டிருந்த நிலையில், பல தரப்பிலிருந்தும் எதிர்ப்புகள் வெளிவந்திருந்தன.

குறிப்பாக திருமாவளவன், வைகோ ராமதாஸ், வேல்முருகன் உள்ளிட்டோர் இதற்கு எதிர்ப்பு தெரிவித்திருந்ததுடன், இலங்கை தரப்பிலிருந்தும் சில எதிர்ப்புகள் வெளிவந்திருந்தன.

இந்த நிலையின் ரஜினிகாந்த் தனது முடிவை மாற்றிக்கொண்டு இலங்கை விஜயத்தை ரத்து செய்துள்ளார்.

இலங்கை சென்று பூமிக்குள் புதைந்திருக்கும் மாவீர மண்ணை வணங்கி, மாவீரர்கள் நடமாடிய இடங்களை பார்வையிட்டு, அவர்கள் சுவாசித்த காற்றையும் சுவாசிக்க வேண்டும் என்று ஆவலாக இருந்தேன்.

ஆனால் இவை அனைத்தும் கனவாகி விட்டன. அரசியல் காரணிகள் இதை பெரிதுபடுத்தி விட்டதால் இதை நான் தவிர்த்து விட்டேன் என குறிப்பிட்டுள்ளார்.

மேலும், இனிவரும் காலங்களில் இவ்வாறானதொரு சந்தர்ப்பம் ஏற்படுமானால் தயவு செய்து அதையும் தடுத்து விடாதீர்கள் எனவும் ரஜினிகாந்த் தனது அறிக்கையில் தெரிவித்துள்ளார்.

தமிழ்நாடு லால்குடி அருகே திருமணத்தின்போது மனைவி வீட்டில் கொடுத்த நகை, பணத்தை தங்கைக்கு செலவு செய்தது தொடர்பாக கணவன்- மனைவி இடையே ஏற்பட்ட பிரச்சினையில் மனைவியின் காதை கடித்து துப்பிய கணவரை பொலிஸார் கைது செய்தனர்.

லால்குடியை அடுத்த பச்சாம்பேட்டை முத்தியூர் பகுதியைச் சேர்ந்த பூமிபாலன் என்பவரே இவ்வாறு கைது செய்யப்பட்டுள்ளார். இவர் கடந்த 4 ஆண்டுகளுக்கு முன்பு நவமணி என்ற பெண்ணை திருமணம் செய்தார். இவர்களுக்கு குழந்தை இல்லை.

திருமணத்தின்போது நவமணிக்கு, அவருடைய வீட்டில் கொடுத்த நகை மற்றும் பணத்தை பூமிபாலன் அவருடைய சகோதரியின் திருமணத்துக்கு செலவு செய்துவிட்டாராம். இதுதொடர்பாக கணவன்- மனைவி இடையே அடிக்கடி தகராறு ஏற்பட்டது.

இந்த நிலையில் வியாழக்கிழமை இரவு கணவன்- மனைவி இடையே மீண்டும் வாய்த் தர்க்கம் ஏற்பட்டுள்ளது. அப்போது பூமிபாலன் நவமணியை தாக்கியதோடு, அவரது காதையும் கடித்து துப்பியுள்ளார்.

இது தொடர்பாக மேல்சிகிச்சைக்காக திருச்சி அரசு மருத்துவமனையில் சேர்க்கப்பட்டு சிகிச்சை பெற்று வருகிறார்.

புகாரின் அடிப்படையில் லால்குடி பொலிஸார் வழக்கு பதிவு செய்து பூமிபாலனையும், அவருக்கு ஆதரவாக செயல்பட்டதாக அவருடைய தாயார் செண்பகவள்ளியையும் (65) பொலிஸார் கைது செய்தனர்.

பெண் ஒருவரின், 38 ஆயிரம் ரூபா பணத்துடன் காணாமல் போன, பணப் பையை கண்டெடுத்து பொலிஸ் நிலையத்தில், பொலிஸ் உத்தியோகத்தர் சுபியான் ஒப்படைத்துள்ள சம்பவம் ஒன்று மட்டக்களப்பில் பதிவாகியுள்ளது.

கடந்த 17ம் திகதி மட்டக்களப்பு பிரதான வீதியில் குறித்த பணத்தொகை, கல்லடி பொலிஸ் பயிற்சிக் கல்லூரியின் பொலிஸ் உத்தியோகத்தர் ஏ.ரீ.எம்.சுபியானினால் வங்கி ஏ.டி.எம். பண வரவு அட்டை என்பவற்றுடன் கண்டெடுக்கப்பட்டுள்ளது.

இந்நிலையில் குறித்த பணப் பை யாருடையது என்பதை கண்டுபிடித்து ஒப்படைப்பதற்கு எந்த தகவலும் பணப் பையில் கிடைக்காத காரணத்தால் பணப் பையில் இருந்த வங்கி ஏ.டி.எம். பண வரவு அட்டையை வங்கியில் கொடுத்து பணப் பை உரிமையாளர் தொடர்பிலான தகவலை அறிந்துள்ளனர்.

இதனை தொடர்ந்து மட்டக்களப்பு, முறக்கொட்டாஞ்சேனை, தேவபுரம் பிரதேசத்தைச் சேர்ந்த கணேசன் சுகந்தினி என்ற பெண்ணின் தகவலைப் பெற்று அப் பெண்ணுக்கு அறிவிக்கப்பட்டிருந்தது.

இதையடுத்து பணப் பை உரிமையாளரான அவர் கல்லடி பொலிஸ் பயிற்சிக் கல்லூரிக்கு வருகை தந்து 38 ஆயிரம் ரூபா பணம், வங்கி ஏ.டி.எம். பண வரவு அட்டை என்பவற்றுடன் தனது பணப் பையை சந்தோஷமாக எடுத்து சென்றிருந்தமை குறிப்பிடத்தக்கது.