கேரளாவில் அதிகரித்து வரும் பாலியல் கொடுமைகள் காரணமாக, அச்சம் அடைந்த பன்னிரெண்டு வயது பள்ளிச் சிறுமி ஒருவர், அம்மாநில முதல்வருக்குப் பாதுகாப்பு கோரி கடிதம் எழுதி இருக்கிறார்.

மிகவும் உருக்கமும் அச்சமும் நிறைந்த வரிகளில் எழுதப்பட்ட அந்தக் கடிதம், தற்போது வைரலாகப் பரவி வருகிறது.

கடவுளின் தேசம் என வர்ணிக்கப்படும் கேரளாவில் சமீப காலமாக பெண்கள் மற்றும் குழந்தைகளுக்கு எதிரான குற்றங்கள் அதிகரித்து வருகிறது.

கடந்த ஆண்டு இறுதியில், கேன்சரால் பாதிக்கப்பட்ட 90 வயது பெண்மணியைப் பக்கத்து வீட்டுக்காரர் பாலியல் கொடுமை செய்தது அதிர்வு அலையை உண்டாக்கியது.

கடந்த மாதம், திரைப்பட நடிகை பாவனாவை காரில் கடத்திச் சென்ற ஒரு கும்பல், பாலியல் தொந்தரவு செய்தது.

ராபின் வடக்கஞ்சேரி என்கிற பாதிரியார், பதினேழு வயது சிறுமியை பாலியல் வன்கொடுமை செய்து, ஒரு குழந்தைக்கு தாயாக்கிவிட்டார். அவரை போலீஸார் பிப்ரவரி இறுதியில் கைது செய்தனர்.

கடந்த இரு மாதங்களுக்கு முன்பு கொல்லம் மாவட்டத்தில் 14 வயது சிறுமி ஒருவர், வீட்டில் தூக்கில் தொங்கினார்.

அடுத்த சில வாரங்களில் அதே இடத்தில் அவரது ஒன்பது வயது சகோதரியும் தூக்கு மாட்டி தற்கொலை செய்துகொண்டார். இந்தச் சம்பவம் கேரள சட்டமன்றத்தில் எதிரொலித்தது.

எதிர்க்கட்சிகள் இந்த விவகாரத்தைக் கடுமையாக விமர்சித்தனர். இதையடுத்து, முதல்வர் பினராயி விஜயன், குற்றப் புலனாய்வு விசாரணைக்கு உத்தரவிட்டார்.

அதில், சகோதரிகள் இருவருமே பாலியல் வன்கொடுமைக்கு உள்ளாக்கப்பட்டு கொலை செய்யப்பட்டது கண்டுபிடிக்கப்பட்டது.

கடந்த ஜனவரி மாதத்தில், கொல்லம் மாவட்டம் குண்டாரா என்ற இடத்தில் பத்து வயது சிறுமி தற்கொலை செய்துகொண்டார்.

‘எனது சாவுக்கு யாரும் காரணம் இல்லை. வாழப் பிடிக்காததால் சாகிறேன்’ எனக் கடிதம் எழுதப்பட்டு இருந்தது. இதனால், அந்த வழக்கைத் தற்கொலை என போலீஸார் முடித்துவிட்டனர்.

ஆனால், அந்தச் சிறுமியின் உடலை ஆய்வுசெய்த மருத்துவர்கள், உடலில் இருபது காயங்கள் இருந்ததையும், சிறுமி இறப்பதற்கு முன்பு பாலியல் வன்கொடுமைக்கு உள்ளாக்கப்பட்டதையும் கண்டுபிடித்தனர்.

இந்த விவகாரம் கேரளாவில் சர்ச்சையைக் கிளப்பியது. உயர் அதிகாரிகள் தலையிட்டு விசாரித்தபோது, அந்த தற்கொலைக் கடிதம், சிறுமியின் பள்ளி நோட்டுப் புத்தகத்தில் இருந்த கையெழுத்துடன் ஒத்துப்போகவில்லை.

அதனால், இந்த விவகாரத்தில் கவனக்குறைவுடன் செயல்பட்டதற்காக சர்க்கிள் இன்ஸ்பெக்டர் மற்றும் சப் இன்ஸ்பெக்டர் ஆகியோர் பணியிடை நீக்கம் செய்யப்பட்டு, எஸ்.பி தலைமையில் தீவிர விசாரணை நடந்தது.

அதில், அந்தச் சிறுமியின் தாத்தாவே பாலியல் வன்கொடுமைக்கு உட்படுத்தி கொலை செய்தது கண்டுபிடிக்கப்பட்டது.

தொடர்ந்து நடந்த விசாரணையில், அந்தப் பகுதியில் உள்ள பல குழந்தைகளை பாலியல் கொடுமை செய்தது வெளியாகி அதிரவைத்தது.

அந்தக் கிழட்டு மிருகத்தையும் அவருக்குத் துணையாக இருந்த மனைவியையும் கைது செய்தனர்.

இப்படி நாள்தோறும் நடக்கும் சம்பவங்கள், கேரளாவில் பெண்களிடமும் சிறுமிகளிடமும் பீதியைக் கிளப்பி உள்ளது.

பள்ளி, கல்லூரிக்குச் சென்று வீடு திரும்பும் வரை பெண்ணைப் பெற்றவர்கள் பதைபதைத்துக் கிடக்கிறார்கள்.

பொது இடங்களுக்குச் செல்லவே சிறுமிகள் அஞ்சுகிறார்கள். இந்த நிலையில்தான் ஏழாம் வகுப்புப் படிக்கும் மாணவியான அனந்தரா, கேரள முதல்வர் பினராயி விஜயனுக்கு கடிதம் ஒன்றை எழுது உள்ளார்.

உணர்ச்சிக் கொந்தளிப்புடன் எழுதப்பட்ட அந்தக் கடிதம் சமூக வலைத்தளங்களில் வைரலாகப் பரவி வருகிறது. அந்தக் கடிதத்தில்…

‘கேரளாவில் தற்போது நடக்கும் சம்பவங்கள் எனக்கு மிகுந்த அச்சத்தை ஏற்படுத்தி இருக்கிறது.

என்னைச் சுற்றிலும் ஏதேதோ நடக்கிறது. அவை பீதியையும் வேதனையும் ஏற்படுத்துவதாகவே இருக்கிறது.

என்னால் நிம்மதியாக இருக்க முடியவில்லை. என்னைச் சுற்றிலும் இருக்கும் சமூகத்தில் நான் பய உணர்வுடனேயே வாழவேண்டிய நிலையில் இருக்கிறேன்.

எனது வயதுடைய சிறுமிகளுடன் நிம்மதியாக விளையாட முடியவில்லை. நான் வழக்கமாக விரும்பிச் செல்லும் இடங்களுக்குச் செல்ல முடியவில்லை.

பள்ளிக்குச் செல்வதிலும் நிம்மதி இருக்கவில்லை. பயத்துடனேயே செல்லும் மனநிலையில் இருக்கிறேன்.

இப்போது நிலவும் சூழல் காரணமாக, எனது குழந்தைமையை இந்தச் சமூகம் திருடிக்கொள்வதாகவே நான் நினைக்கிறேன்.

பல இரவுகளில் என்னால் நிம்மதியாகத் தூங்க முடியவில்லை. எப்போதும் மன அழுத்தத்துடனேயே வாழவேண்டிய நிலையில் இருக்கிறேன். எனது சுதந்திரம் முழுமையாகப் பறிபோய்விட்டதாகவே நினைக்கிறேன்.

கொல்லம் மாவட்டம், வாலையாறு பகுதியில் கீர்த்திகா, சரண்யா என்ற சகோதரிகள் தூக்கு மாட்டி தற்கொலை செய்துகொண்டனர். அதில் மூத்தவளான கீர்த்திகாவுக்கு எனது வயதுதான்.

என் வயதில் உள்ள ஒரு சிறுமிக்கு நேர்ந்த அவலத்தை நினைத்துப் பல இரவுகள் வேதனையில் தனிமையில் அழுது இருக்கிறேன்.

இப்படியான சோகத்துக்கு மத்தியில் என்னால் எப்படி நிம்மதியாகத் தூங்க முடியும்?

சம வயது உள்ள ஒரு சிறுமிக்கு நேர்ந்த கொடூரம், எனக்கும் நடக்காது என்பதற்கு என்ன உத்திரவாதம் இருக்கிறது? குண்டாராவில் ஒரு சிறுமிக்கு நேர்ந்த கொடுமை உங்களுக்குத் தெரியும்தானே?

ஒரு தாத்தாவால் தனது பேத்திக்கு இதுபோன்ற கொடுமையைச் செய்ய எப்படி மனம் வருகிறது? இப்படி ஒரு செய்தியைக் கேள்விப்பட்டதும் நம்பவே முடியவில்லை.

இப்படி எல்லாம்கூடவா நடக்கும் முதல்வர் அவர்களே? இந்தச் சமூகம் அந்த அளவுக்குக் கொடூரமானதாகவா மாறிவிட்டதா?

நான் உங்களிடம் வேண்டி விரும்பிக் கேட்பதெல்லாம், எனக்குச் சுதந்திரமாக இருக்கும் உரிமையைப் பெற்றுக்கொடுங்கள் என்பதுதான்.

நான் எப்போதும் போல சாதாரணமாக வாழ வேண்டும். பயந்துகொண்டே இருக்கக் கூடாது.

சக சிறுமிகளுடன் மகிழ்ச்சியாக விளையாடி, ஓய்வான நேரத்தைப் பிறருடன் சேர்ந்து சந்தோசமாக செலவிடும் வாய்ப்பு கிடைக்க வேண்டும்.

எனது வயதில் எனக்குக் கிடைக்க வேண்டிய சந்தோஷத்தை யாருக்காகவும் எதற்காகவும் இழக்கக் கூடாது.

அதற்கான உத்திரவாதம் கிடைக்க வேண்டுமானால், குழந்தைகளிடம் வரம்பு மீறிச் செயல்படுபவர்களுக்கு நீங்கள் மிகக் கடுமையான தண்டனைக் கொடுக்க வேண்டும்.

அதற்கு ஏற்ற வகையில் சட்டம் இயற்றுங்கள். அப்படிச் செய்தால் மட்டுமே, என்னைப் போன்ற சிறுமிகள் சுதந்திரத்துடன் எங்களின் வயதுக்கான மகிழ்ச்சியைப் பெறமுடியும்.

எங்களின் கனவுகள் நினைவாக்க முதல்வராகிய உங்களால் மட்டுமே முடியும்.

எங்கள் நலனைப் பாதுகாக்க நீங்கள் மனதுவைப்பீர்களா முதல்வர் சார்?’ என உருக்கமாகக் கடிதத்தை முடித்துள்ளார், சிறுமி அனந்தரா.

இது கேரளாவுக்கு மட்டுமல்ல,ஒட்டுமொத்த இந்தியாவுக்கும் எழுதப்பட்ட கடிதம் என்பதில் சந்தேகமில்லை.

-விகடன்-

நடுவானில் பறவை மோதியதால், நிலை தடுமாறிய விமானம் விபத்திலிருந்து தப்புவதற்காக அவசரமாக தரை இறக்கப்பட்ட சம்பவம் லண்டனில் இடம்பெற்றுள்ளது.

ஏர் இந்தியா நிறுவனத்திற்கு சொந்தமான விமானம், அகமதாபாத்திலிருந்து அமெரிக்கா பயணித்துள்ள நிலையில், நடுவானில் பறவை மோதியதால், அவசரமாக லண்டன் ஹத்ரோவ் விமான நிலையத்தில் தரையிறங்கியுள்ளது.

மேலும் குறித்த விமானமானது 230 பயணிகளுடன் லண்டன் வழியாகச் பயணித்துள்ள நிலையில், நடுவானில் விமானத்தின் முன்பகுதியில் பறவை தாக்கியதால், விமானத்தின் ராடார் செயலிழக்கவே, விமானம் விபத்துக்கள் எதுவுமின்றி பாதுகாப்பாக லண்டன் ஹத்ரோவ் விமான நிலையத்தில் தரையிறக்கப்பட்டுள்ளதாக சர்வதேச ஊடகங்கள் தகவல் பகிர்ந்துள்ளமை குறிப்பிடத்தக்கது.

பொது இடங்களில் எச்சில் துப்பியோ அல்லது குப்பைகள் கொட்டியோ அசுத்தம் செய்தால் ரூ.5000 அபதாரம் அல்லது 6 மாதம் சிறை தண்டனை வழங்கப்படும் என உத்திரகாண்ட் அரசாங்கம் எச்சரித்துள்ளது.

சமீபத்தில் நடந்து முடிந்த சட்டசபை தேர்தலில் உத்திரகாண்ட் மாநிலத்தில் பா.ஜ., வெற்றி பெற்று ஆட்சி அமைத்துள்ளது. மாநில முதல்வராக திரிவேந்திரசிங் ரவாத் பதவியேற்றுள்ளார்.

பிரதமர் மோடியின் தூய்மை இந்தியா திட்டத்தை வலியுறுத்தும் வகையில் தலைநகர் டேராடூனில் பொது இடங்களில் அசுத்தம் செய்பவர்களுக்கு அபதாரமாக ரூ 5000 அல்லது 6 மாதம் வரை சிறை தண்டனை வழங்கப்படும் என அந்த மாநில அரசு உத்தரவு பிறப்பித்துள்ளது.

இது குறித்து சுகாதாரத் துறை அதிகாரி ஒருவர் கூறியதாவது, சுகாதார ஆய்வாளர்கள் நகரின் பல்வேறு பகுதிகளில் தொடர்ந்து ஆய்வு செய்து கொண்டே இருப்பார்கள்.

யாராவது அசுத்தம் செய்பவர்கள் தென்பட்டால் அவர்களிடம் இருந்து அந்த இடத்திலேயே ரூ 5000 வரை வசூலிக்கப்படும் அல்லது சிறை தண்டனை வழங்கப்படும்.

தொடர்ந்து அசுத்தம் செய்பவர்கள் மீது கடுமையான நடவடிக்கை எடுக்கப்படும், இவ்வாறு அவர் தெரிவித்தார்.

ஜெயலலிதாவின் அண்ணன் மகள் ஜெ.தீபா ஆர்கே நகர் தொகுதியில் நேற்று வேட்புமனு தாக்கல் செய்தார். இந்த நிலையில் தனியார் தமிழ் தொலைக்காட்சி ஒன்று நடத்திய நேர்பட பேசு என்ற விவாத நிகழ்ச்சியில் நேற்று கலந்து கொண்டார். இதில் அதிமுக அம்மா அணியை சேர்ந்த செல்லூர் ராஜூவும் கலந்து கொண்டார்.

இந்த விவாதத்தில் கலந்து கொண்ட தீபா செல்லூர் ராஜூவின் தனிநபர் தாக்குதல் விமர்சனத்தால் பாதியிலேயே கோபித்துக்கொண்டு வெளியேறினார். ஜெ.தீபா தனது தி.நகர் வீட்டிலிருந்து நேரலையில் கலந்துகொண்டார்.

இந்த விவாதத்தின் போது தீபாவின் கணவர் மாதவன் அவருக்கு எதிராக திடீரென பேட்டியளித்து தனிக்கட்சி தொடங்கப்போவது குறித்து விவாதிக்கப்பட்டது.

இதற்கு பதில் அளித்த தீபா, தனது கணவர் மாதவனை சசிகலா அணியினர் பின்னால் இருந்து, அவரது மனதை மாற்றி இயக்குவதாக தெரிவித்தார்.

இதனை அதிமுக அம்மா அணியை சேர்ந்த செல்லூர் ராஜூ மறுத்தார். மேலும் தீபாவை தங்கச்சி முதல்ல வீட்டுக்காரரை திருத்திட்டுவாம்மா என கூறியதும் ஆவேசமடைந்த தீபா, தேவையில்லாத விமர்சனங்கள், வார்த்தைகள் வருவதால் நான் இத்துடன் விலகுகிறேன் என கோபித்துக்கொண்டு விவாதத்தில் இருந்து வெளியேறினார்.

நிகழ்ச்சியில் தீபா பேச ஆரம்பித்த தொடக்கத்தில் இருந்தே செல்லூர் ராஜூ அவரை பேசவிடாமல் குறுக்கீடு செய்து கொண்டே இருந்தார். நிகழ்ச்சி தொகுப்பாளர் குறுக்கீடு செய்ய வேண்டாம், அவரை பேச அனுமதிக்க வேண்டும், பின்னர் உங்கள் மறுப்பை தெரிவியுங்கள் என செல்லூர் ராஜுவை பலமுறை அறிவுறுத்தியும் அவர் தொடர்ந்து தீபாவை பேச விடாமல் குறுக்கீடு செய்துகொண்டே இருந்தார்.