முகநூல் ஊடாக அறிமுகமான பெண் ஒருவரின் எட்டரை லட்சம் ரூபா பணத்தை மோசடி செய்ததாக குற்றம் சுமத்தப்பட்டுள்ள நைஜீரிய பிரஜை ஒருவரை விளக்க மறியலில் வைக்குமாறு கம்பஹா நீதவான் டி.ஏ.ருவான் பத்திரண உத்தரவிட்டுள்ளார்.

எதிர்வரும் பெப்ரவரி மாதம் 3ம் திகதி வரையில் குறித்த நைஜீரிய பிரஜையை விளக்க மறியலில் வைக்குமாறு உத்தரவிட்டுள்ளார்.

முகநூல் ஊடாக நட்பை ஏற்படுத்திக் கொண்டு நைஜீரியாவிலிருந்து நத்தார் பண்டிகைக்கு அனுப்பி வைக்கப்பட்ட பரிசுப் பொருட்களை பெற்றுக் கொள்ள வரி செலுத்த வேண்டுமெனக் கூறி> குறித்த பெண்ணிடம் எட்டரை லட்சம் ரூபா பணம் பெற்றுக் கொண்டுள்ளார்.

குறித்த நைஜீரிய பிரஜையின் இலங்கையில் காணப்படும் மூன்று வங்கிக் கிளைகளுக்கு அந்தப் பெண் பணத்தை வைப்புச் செய்துள்ளார்.

தடுத்து வைக்கப்பட்டுள்ள நைஜீரிய பிரஜையிடம் வாக்கு மூலமொன்றை பெற்றுக்கொள்ள வெளிவிவகார அமைச்சின் அதிகாரி ஒருவரை மொழி பெயர்ப்பாளராக பயன்படுத்திக் கொள்ள புலனாய்வுப் பிரிவினர் விடுத்த கோரிக்கையை நீதிமன்றம் ஏற்றுக் கொண்டுள்ளது.

ஒரு வார காலத்திற்குள் வாக்கு மூலத்தைப் பெற்றுக் கொள்ளுமாறு நீதவான் உத்தரவிட்டுள்ளார்.

பியோஸ் இந்திராஸி என்ற என்ற சந்தேக நபரே இவ்வாறு கைது செய்யப்பட்டு விளக்க மறியலில் வைக்கப்பட்டுள்ளார்.

வீசா இன்றி நாட்டில் தங்கியிருந்த காரணத்திற்காக கொள்ளுப்பிட்டி பொலிஸார் சந்தேக நபரை கைது செய்துள்ளனர்.

கம்ஹா டிக்மன்ஸ் வீதியில் அமைந்துள்ள 29 வயதுடைய திருமணமான பெண் ஒருவரிடம் இவ்வாறு பணம் மோசடி செய்யப்பட்டுள்ளது.

865000 ரூபா பணம் மோசடி செய்யப்பட்டுள்ளதாக நீதிமன்றில் அறிவிக்கப்பட்டுள்ளது.

இலங்கையின் வரலாற்றில் முதன்முறையாக முஸ்லிம் சிறுவன் ஒருவர் பௌத்த பிக்குவாக மாறியுள்ளார்.

இந்த நிகழ்வு, திம்புலாகல வன மடாலயத்தில் இடம்பெற்றுள்ளதாக மடாலயத்தின் தலைமைக்குரு தெரிவித்துள்ளார்.

குறித்த சிறுவனின் தாயார் வெளிநாடு சென்றுள்ளநிலையில் தந்தையாரான ஹமீட் இஸ்மாயில் என்பவர் சிறுவனை மடாலயத்தில் சேர்த்ததாக தலைமை பௌத்த பிக்கு குறிப்பிட்டுள்ளார்.

குறித்த மடாலயத்தில் சிங்கள, தமிழ் மற்றும் வேடுவ இனத்தை சேர்ந்தவர்கள் பௌத்த மதத்தை தழுவியுள்ளனர்.

 
உலகின் அழகான ரயில் புகைப்படங்களுக்குள் இலங்கை ரயில் வீதி புகைப்படமும் இணைக்கப்பட்டுள்ளது.

தேமோதரை, பாலத்தின் ஊடாக புகையிரம் ஒன்று பயணித்த போது எடுக்கப்பட்ட புகைப்படமே குறித்த பட்டியலில் இணைந்துள்ளது.

குறித்த புகைப்படம் ஜுலியன் பொபொவ் என்ற புகைப்பட கலைஞரினால் புகைப்படம் எடுக்கப்பட்டுள்ளதாக தெரிவிக்கப்படுகின்றது.

அதற்கமைய குறித்த புகைப்பட பட்டியலுக்குள் இணைக்கப்பட்டுள்ள புகைப்படங்களும் வெளியிடப்பட்டுள்ளது.

பாம்பு கடித்து இறப்பவர்களை விட, குதிரை தாக்கிக் கொல்லப்படுபவர்களே அதிகம் என அவுஸ்திரேலியாவில் மேற்கொள்ளப்பட்ட ஆய்வொன்றில் தெரியவந்துள்ளது.

அவுஸ்திரேலியாவின் மெல்போர்ன் பல்கலைக்கழகத்தைச் சேர்ந்த ஆய்வாளர் ரொனெல்லே வெல்டன், தொடர்ச்சியாக 13 ஆண்டுகள் வைத்தியசாலையில் பதிவான உயிரிழப்பு சம்பவங்களை ஆராய்ந்து குறித்த அறிவித்தலை விடுத்துள்ளார்.

குறித்த ஆய்வறிக்கையின் பிரகாரம் 13 ஆண்டுகளில் குதிரைகளால் 74 பேர் உயிரிழந்துள்ளனர். விஷப் பூச்சி கடிக்குள்ளாகி 27 பேரும், பாம்புகளினால் 27 பேரும் இருந்துள்ளதாக தெரிவிக்கப்பட்டுள்ளது.

மேலும் அவுஸ்திரேலியாவில் விஷப் பூச்சிகளாலும் பாம்புகளாலும் அதிகமானோர் உயிரிழக்கிறார்கள் என கூறப்பட்ட நிலையில் குறித்த ஆய்வு முடிவுகள் அதிர்ச்சி தருவதாக அமைந்துள்ளதாக ரொனெல்லே வெல்டன் குறிப்பிட்டுள்ளார்.

கைத்தொலைபேசி வாங்குவதற்காகச் சென்ற 17 வயது இளைஞனை கடந்த மூன்று நாட்களாக காணவில்லை என கல்முனைப் பொலிஸாரிடம் முறைப்பாடொன்று பதிவாகியுள்ளது.

கல்முனை முதலாம் பிரிவு கொஸ்தாபல் வீதியைச் சேர்ந்த ஜெயந்திரன் டிலான் எனும் இளைஞனே காணாமல் போயுள்ளதாக முறைப்பாடு பதிவாகியுள்ளது.

கடந்த சனிக்கிழமை காலை வீட்டிலிருந்து சென்றவர் இன்னும் வீடு திரும்பவில்லையெனவும், உறவினர் வீடுகளில் தேடியபோதும் இன்னும் கிடைக்கவில்லை எனவும் குடும்பத்தார் தெரிவித்துள்ளனர்.

குறித்த இளைஞன் க.பொ.த சா.த பரீட்சைக்குத் தோற்றியிருந்தமை குறிப்பிடத்தக்கது.

கைத்தொலைபேசி வாங்க வேண்டும் என்ற விடாபிடியுடன், கைச்செயினை விற்றாவது கைத்தொலைபேசி வாங்கவேண்டும் என குறித்த இளைஞர் நண்பர்களிடம் தெரிவித்திருந்ததாக கூறப்படுகிறது.

இலங்கையில் நிலவிய போர்ச் சூழலில் காணாமல்போன பெண் சுமார் 26 வருடங்களின் பின் திரும்பி வந்துள்ள நிலையில் அவர் குறித்து மேலும் ஒரு விடயம் தெரியவந்துள்ளது.

திருமணமாகி மூன்றே மாதங்களில் கணவரை இழந்து வீட்டில் தனித்து இருந்த நிலையில் நாவலப்பிட்டியிலுள்ள கணவரின் உறவினர் வீட்டுக்கு சென்ற பெண்ணை கொழும்புக்கு அழைத்துச் சென்று வீடொன்றில் ஒப்படைத்தனர். அப்போது குறித்த பெண்ணுக்கு 18 வயது மாத்திரமே.

கொழும்பில் குறித்த பெண்ணை வீட்டுச்சிறையில் வைத்துள்ளார்கள். இது குறித்து கடந்த நான்கு நாட்களுக்கு முன்னர் விரிவான செய்திகளை வழங்கியிருந்தோம். இந்த நிலையில் தற்போது மேலும் ஒரு தகவலை குறித்த பெண் தெரிவித்துள்ளார்.

இவர் அந்த வீட்டில் சிறை வைக்கப்பட்டிருந்த காலப்பகுதியில் அங்குள்ள ஆண்களின் உடைகளை கழுவும் சந்தர்ப்பங்களில் அதற்குள் தவறி விடப்படும் பணத்தை இரகசியமாக சேமித்து வைத்துள்ளார்.

அவ்வாறு சேமித்து வைத்த பணத்தில்தான் குறித்த பெண் தப்பி வந்து தனது செலவுகளுக்காகவும், வீட்டிற்கு செல்வதற்கான பயண செலவையும் கவனித்துள்ளார்.

43 வயதாகும் பத்மகுமாரி என்பவரே இவ்வாறு 26 வருடங்களின் பின் பல இன்னல்களுக்கு முகம் கொடுத்து திரும்பி வந்துள்ளார்.

பத்மா குமாரி காணாமல் போயிருந்த காலப்பகுதியில் இவரின் உறவினர்களால் இவருக்கு ஆத்ம சாந்தி கிரியைகள் செய்யப்பட்டுள்ளதுடன் கங்கஹியல கோரல பிரதேசசெயலகத்தின் ஊடாக காணாமல் போனோருக்கான நிவாரணமும் பெறப்பட்டுள்ளதோடு நாவலப்பிட்டி பொலிஸ் நிலையத்திலும் முறைப்பாடொன்று பதிவு செய்யப்பட்டுள்ளமையும் குறிப்பிடத்தக்கது.