சசிகலாவையோ அவரது உறவினர் ஒருவரையோ வாரிசாக ஒரு போதும் எனது அத்தை ஜெயலலிதா ஏற்று கொண்டதில்லை என்று அண்ணன் மகள் தீபா கூறினார்.

ஜெயலலிதாவின் அண்ணன் ஜெயக்குமார் மகள் தீபா நிருபர்களுக்கு அளித்த பேட்டியில் கூறியிருப்பதாவது:-

இன்றைய சூழ்நிலையில் நான் அரசியலுக்கு வரும் வாய்ப்பு ஏற்பட்டால் அது தவறாக இருக்காது என்றே கருதுகிறேன். இந்த வி‌ஷயத்தை பொறுத்த வரை ஜனநாயக ரீதியாக மக்கள் முன் விடுகிறேன். அவர்கள் முடிவு சொல்லட்டும்.

மக்களின் முடிவை கட்சி ஏற்க வேண்டும். மக்களின் மனநிலைக்கு ஏற்றார்போல்கட்சி எதிர்காலத்தை வகுத்து கொள்ள வேண்டும்.

சசிகலாவையோ அவரது உறவினர் ஒருவரையோ வாரிசாக ஒரு போதும் எனது அத்தை ஜெயலலிதா ஏற்று கொண்டதில்லை. அவர்களை அரசியலுக்கு அப்பால்தான் நிறுத்தி வைத்திருந்தார்.

நான் ஜெயலலிதாவை சார்ந்தவள். எல்லா வி‌ஷயங்களும் எனக்கு தெரியும். இது சம்பந்தமாக பல முறை விவாதம் நடந்ததும் தெரியும். அத்தை ஜெயலலிதாவுக்கு நானே உண்மையான வாரிசு.

சசிகலாவை அ.தி.மு.க. பொதுச்செயலாளராக பதவி ஏற்று கொள்ளும்படி அ.தி.மு.க. நிர்வாகிகள் கூறுவது மிகவும் துரதிருஷ்டவசமானது.

இந்த வி‌ஷயத்தில் கட்சி தொண்டர்கள் என்ன நினைக்கிறார்கள் என்பதை என்னால் உறுதியாக சொல்ல முடியாது. ஆனால், மக்கள் நிச்சயம் ஏற்றுக்கொள்ள மாட்டார்கள். இது ஒரு மனக்கசப்பான சூழ்நிலையை ஏற்படுத்தும்

எனது அத்தை ஜெயலலிதாவுக்கு தெரியாமல் பல வி‌ஷயங்கள் நடந்துள்ளன. இவை எல்லாம் எங்கள் அத்தைக்கு கடும் கோபத்தை ஏற்படுத்தியது. இந்த வி‌ஷயங்கள் பெரும்பாலானவை கட்சி தொண்டர்களுக்கு தெரியாது.

சசிகலாவை தனது வாரிசாக எனது அத்தை ஜெயலலிதா அறிவிக்க நினைத்து இருந்தால் எப்போதோ அதை செய்து இருப்பார். ஏன் அதை செய்யவில்லை? இதுபற்றி அவர்கள் விளக்குவார்களா?

எனது அத்தையின் இறுதி சடங்குகள் முறையாக நடத்தப்படவில்லை. இது ஒரு சோகமான நிகழ்வு. உறவினர்களான எங்களுக்கு எந்த தகவலும் சொல்லப்படவில்லை. எங்களை கலந்து கொள்ளவும் அழைக்கவில்லை. எனது அத்தையின் இறுதி சடங்குகள், சம்பிரதாயங்கள் உரிய முறையில் பின்பற்றப்படவில்லை, இவ்வாறு அவர் கூறினார்.

ஜெயலலிதா மறைவுக்கு பிறகு அதிமுகவின் பொதுசெயலாளராக சசிகலா பதவியேற்று கொள்ள வேண்டும் என அமைச்சர்கள், கழக நிர்வாகிகள் உள்ளிட்டோர் கோரிக்கை விடுத்துள்ளனர்.

அடிமட்ட தொண்டர்கள் மத்தியில் இதற்கு கடும் எதிர்ப்பு எழுந்தாலும் ஓபிஎஸ், மூத்த அமைச்சர்கள், தம்பிதுரை உள்ளிட்டோர் சசிகலா தான் கழகத்தையும் மக்களையும் காக்க வேண்டியவர் என பத்திரிக்கைகளிடம் கூறி வருகின்றனர்.

தமிழக முதல்வர் செல்வி ஜெ.ஜெயலலிதா, கடந்த 5 ம் திகதி உடல்நலக் குறைவால், அப்போலோ வைத்தியசாலையில் காலமானார்.

அப்போதே, கட்சியின் முக்கிய நிர்வாகிகளிடம் பொது செயலாளர் பதவி, கட்சியில் அங்கீகாரம் போன்றவற்றை மையப்படுத்தி சில பேப்பரில் கையெழுத்து வாங்கியதாக தகவல்கள் வெளியாகின.

கடந்த 28 ஆண்டுகளாக, அதிமுகவின் பொது செயலாளராக இருந்தவர் செல்வி ஜெ ஜெயலலிதா. எந்தவித போட்டியோ, சிக்கலோ இல்லாமல், ஒரு மனதாக 5 ஆண்டுகளுக்கு ஒரு முறை, பொது செயலாளராக தேர்ந்தெடுக்கப்படுவார் ஜெயலலிதா. அதே போல், சசிகலாவும் போட்டியின்றி தேர்வாவதையே விரும்புகிறார் என்கின்றனர் அதிமுக வட்டாரங்கள். அதற்கேற்றாற் போல், காய்களை நகர்த்தி வருகிறார்கள் மன்னார்குடி குடும்பத்தினர்.

இந்நிலையில் சென்னையில் சசிகலாவுக்கு ஆதரவாக போஸ்டர்களும் பேனர்களும் வைக்கப்பட்டுள்ளன.

“போற்றி வளர்த்த இந்த இயக்கத்தை அம்மா வழியில் தலைமையேற்க வாருங்கள் எங்க சின்னம்மாவே”

“அம்மாவுக்கே தாயை தந்தையாய் சகோதரியாய் யாதுமாகி நின்று தாயை காத்திட்ட எங்களின் இளைய தாயே.. கழகத்தை காத்தருள வேண்டும்”

ஒரு பொழுதும் உண்ணாமல் ஒரு நொடியும் உறங்காமல் புரட்சி தலைவி அம்மாவிற்கு அரணாய் உறுதுணையாய் இருந்து தியாகம் செய்த சின்னம்மாவே வருக” என்று பல்லாயிரகணக்கான போஸ்டர்கள் சென்னை முழுவதும் ஒட்டப்பட்டுள்ளன.

இதற்கெல்லாம் முத்தாய்ப்பாக கழகத்தின் பொது செயலாளராக தலைமை ஏற்க தலைமகளே வாரீர் வாரீர் என மிகபெரிய பேனர் ஒன்று வைக்கப்பட்டுள்ளது சென்னையில் மிகுந்த பரபரப்பை ஏற்படுத்தியுள்ளது.

தமிழகத்தில் தம்பிக்கு மயக்கமருந்து கொடுத்து அண்ணனே கொலை செய்த சம்பவம் அதிர்ச்சியை ஏற்படுத்தியுள்ளது.

தமிழ்நாட்டின் தேனி மாவட்டத்தைச் சேர்ந்தவர் பாண்டியராஜ் (29). டிரைவரான இவர் தம்பி தனபாண்டியனிடம் பணம் கேட்டு தகராறு செய்து அரிவாளால் வெட்டியுள்ளார்.

இதனால் ஆத்திரமடைந்த 2 வது தம்பியான சுந்தரபாண்டியன், 27, அவரை கண்டிப்பதற்காக கடந்த டிசம்பர் மாதம் 6 ஆம் திகதி அவர் வீட்டிற்கு சென்றுள்ளார்.

அப்போது அங்கு இருவருக்கு நடந்த வாக்குவாதம் முற்ற இருவரும் ஒருவரை ஒருவர் தாக்கியுள்ளனர். அப்போது சுந்தரபாண்டியன், அவருடைய மனைவியை கண்மூடித்தனமாக கடித்துள்ளார்.

இதனால் கோபத்தின் உச்சிக்கு சென்ற பாண்டியராஜ், கயிற்றால் அவரின் கை,கால்களை கட்டி அறையில் பூட்டியுள்ளார். சுந்தரபாண்டியன் தொடர்ந்து சத்தம் போட அவருக்கு, உணவில் மயக்க மருந்து கலந்து கொடுத்துள்ளனர்.

சாப்பிட்ட அவர் சிறிது நேரத்திலே மயக்கமடைந்துள்ளார். பின்னர் பாண்டியராஜ், அவரின் கழுத்தை கயிறால் இறுக்கி கொலை செய்துள்ளார்.

அதன்பின்னர் அவர் வீட்டில் துாக்கிட்டு தற்கொலை செய்து கொண்டது போல் பாண்டியராஜ் நாடகமாடியுள்ளார். அதைத் தொடர்ந்து அவரது உடலை புதைத்துள்ளனர்.

அவருடைய தாயார் ராஜாமணி கேட்ட போது, தகராறில் கொலை செய்து புதைத்து விட்டதாக தெரிவித்துள்ளார்.

இதனால் பதற்றமடைந்த அவரின் தாயார் காவல்நிலையத்தில் சென்று புகார் தெரிவித்துள்ளார். இதைத் தொடர்ந்து பொலிசார் நடத்திய விசாரணையில் புதைத்த இடத்தில் அவரது உடல் தோண்டி எடுக்கப்பட்டுள்ளது.

மேலும் இச்சம்பவம் தொடர்பாக பொலிசார் அவரிடம் தொடர்ந்து விசாரணை மேற்கொண்டு வருகின்றனர்.