நடிகை கவீஷா அயேஷானியின் விபத்து தொடர்பாக பஸ் வண்டியின் சாரதி கைது செய்யப்பட்டுள்ளார். விபத்துக்குள்ளான பஸ் வண்டி நடைபாதையில் நிறுத்தி வைக்கப்பட்டிருந்ததாக பொலிஸார் தெரிவித்துள்ளனர்.

மிரிஹான பொலிஸ் பிரிவுக்கு உட்பட்ட ஸ்டென்லி திலக்கரட்ன மாவத்தைக்கு எதிரில் ஜூப்ளி கணுவ பகுதியில் இருந்து நிரோமி சந்தியை நோக்கி சென்ற கார், எதிர் திசையில் நடைபாதையில் நிறுத்தப்பட்டிருந்த பஸ்சில் மோதியதில் இந்த விபத்து ஏற்பட்டுள்ளதாக கூறப்படுகின்றது.

மேலும், சம்பவத்தில் காரை ஓட்டிச் சென்ற நடிகை கவீஷா அயேஷானி களுபோவில வைத்தியசாலையில் அனுமதிக்கப்பட்ட போதே உயிரிழந்துள்ளார்.

சடலம் களுபோவில வைத்தியசாலையின் பிரேத அறையில் வைக்கப்பட்டுள்ளதுடன், மரணத்திற்கு பின்னரான பிரேத பரிசோதனைகள் இன்று நடைபெறவுள்ளது.

இதேவேளை, சம்பவம் தொடர்பாக கைது செய்யப்பட்ட பஸ் சாரதி கைது செய்யப்பட்டுள்ளதுடன் மிரிஹான பொலிஸார் மேலதிக விசாரணைகளை நடத்தி வருவதாக பொலிஸ் தலைமையகம் விடுத்துள்ள அறிக்கையில் தெரிவிக்கப்பட்டுள்ளது.

கடந்த சில மாதங்களாக இலங்கையில் நிலவி வரும் கடும் வறட்சி காரணமாக மக்கள் பெரிதும் பாதிக்கப்பட்டுள்ளார்கள்.

இந்நிலையில் நாட்டின் பல பிரதேசங்களில் கடும் மழை பெய்து வருவதாக வளிமண்டலவியல் திணைக்களம் அறிவித்துள்ளது.

நேற்று மாலை வேளையிலிருந்து நாட்டின் பெரும்பாலான பிரதேசங்களில் மழை பெய்ததாக திணைக்களம் அறிவித்துள்ளது.

கொழும்பு மற்றும் அதனை அண்டியுள்ள பிரதேசங்களிலும் கண்டி, பொலநறுவை, கதிர்காமம், கம்பஹா போன்ற இடங்களிலும் மழை பெய்து வருகிறது.

எதிர்வரும் நாட்களில் நாட்டின் பெரும்பாலான பிரதேசங்களில் மழையை எதிர்பார்க்கலாம் என வளிமண்டலவியல் திணைக்களம் தெரிவித்துள்ளது. சில இடங்களில் 50 முதல் 100 மில்லி மீற்றர் வரையான மழை வீழ்ச்சி எதிர்பார்க்கப்படுகின்றது.

திருகோணமலை முத்துநகர் ரயிலில் மோதி குடும்பஸ்தர் ஒருவர் நேற்று(15) உயிரிழந்துள்ளதாக சீனக் குடா பொலிஸார் தெரிவித்துள்ளார்கள்.

திருகோணமலையில் இருந்து கல்லோயாவுக்கு நோக்கிச் சென்றுகொண்டிருந்த சரக்கு ரயிலில் மோதியே குடும்பஸ்தர் உயிரிழந்துள்ளார்.
குறித்த நபர் இராமநாதபுரம் பகுதியைச் சேர்ந்த ஒரு பிள்ளையின் தந்தையான நிரோசன் மதுசங்க (24 வயது) என்பவர் என ஆரம்பக்கட்ட விசாரணைகள் மூலம் தெரியவந்துள்ளது.

மேலும், இந்த நபரின் சடலம் திருகோணமலை பொது வைத்தியசாலையில் வைக்கப்பட்டுள்ளதாகவும் இது தொடர்பான மேலதிக விசாரணைகள் பொலிஸாரினால் மேற்கொள்ளப்பட்டு வருவதாகவும் கூறப்படுகின்றது.

அனுராதபுரம் விளக்கமறியல் சிறையில் தடுத்து வைக்கப்பட்டிருந்த கைதி ஒருவர் கழுத்தில் சுருக்கிட்டு தற்கொலை செய்துக்கொண்டுள்ளார்.

கொலை குற்றச்சாட்டில் கைது செய்யப்பட்டு நீதிமன்ற உத்தரவின் பேரில் விளக்கமறியலில் வைக்கப்பட்டிருந்த இந்த நபர், சிறையறையில் தற்கொலை செய்து கொண்டுள்ளதாக சிறைச்சாலைகள் திணைக்கள பேச்சாளர் துஷார உபுல்தெனிய தெரிவித்துள்ளார்.

தான் உடுத்தியிருந்த உடையை பயன்படுத்தி தற்கொலை செய்துக் கொண்டுள்ள இந்த நபரை சிறைச்சாலை அதிகாரிகள் அனுராதபுரம் வைத்தியசாலைக்கு கொண்டு சென்றனர். எனினும் அவர் ஏற்கனவே உயிரிழந்து விட்டதாக மருத்துவர்கள் தெரிவித்துள்ளனர்.

மரதன்கடவல பிரதேசத்தை சேர்ந்த 46 வயதான இந்த நபர் மனநோயினால் பாதிக்கப்பட்டிருந்தாக தெரியவருகிறது. சம்பவம் குறித்து அனுராதபுரம் பொலிஸார் விசாரணைகளை மேற்கொண்டு வருகின்றனர்.

இதேவேளை சிரமதான பணிக்காக கண்டி தும்பர போகம்பர சிறையில் இருந்து அழைத்துச் செல்லப்பட்ட இரண்டு கைதிகள் சிரமதான பணியில் ஈடுபட்டிருந்த நிலையில் அங்கிருந்து தப்பிச் சென்றுள்ளனர்.

கட்டுகஸ்தோட்டை மற்றும் கோஹாகொட பிரதேசங்களை சேர்ந்த இந்த கைதிகள் போதைப் பொருளை தம்வசம் வைத்திருந்த குற்றத்திற்காக விளக்கமறியலில் வைக்கப்பட்டிருந்தனர்.

தப்பியோடி இந்த கைதிகள் இன்னும் சிறிது காலத்தில் விடுதலை செய்யப்படவிருந்தனர்.

தப்பியோடிய கைதிகளை தேடும் நடவடிக்கைகளில் சிறைச்சாலை அதிகாரிகளும், கண்டி பொலிஸாரும் ஈடுபட்டுள்ளனர்.

மட்டக்களப்பு றாணமடு மாதிரிக் கிராமத்தில் இளைஞர் ஒருவர் நேற்று(15) தூக்கிட்டு தற்கொலை செய்து கொண்டுள்ளார்.

மேற்படி சம்பவம் தொடர்பாக தெரிய வருவதாவது, குறித்த நபர் மாதிரி கிராம பாலர் பாடசாலையின் உள்ளே வளையில் சாறியினால் சுருக்கிட்டு இறந்துள்ளதை அறிய முடிகிறது.

மேற்படி தற்கொலை செய்த நபர் கோவிந்தன் என அடையாளம் காணப்பட்டுள்ளது.

சம்பவம் தொடர்பான மேலதிக விசாரணைகளை வெல்லாவெளி பொலிசார் மேற்கொண்டு வருகின்றனர்.

அண்மைக் காலமாக தூக்கிட்டு தற்கொலை செய்து கொள்ளும் சம்பவங்களின் எண்ணிக்கை அதிகரித்துச் செல்வதனை காணக் கூடியதாக உள்ளது.

இலங்கையில் தயாரிக்கப்படும் அனைத்து வகையான படகுகளுக்கு ஐரோப்பாவில் அதிக அளவிலான கோரிக்கை உள்ளதாக கடற்றொழில் மற்றும் நீரியல் வள அபிவிருத்தி அமைச்சர் மஹிந்த அமரவீர தெரிவித்துள்ளார்.

நாட்டில் தயாரிக்கப்படும் படகுகள் மிகவும் தரமான நிலையில் உள்ளமையினால் கடந்த வருடத்தில் மாத்திரம் படகு உற்பத்தி மூலம் 80 மில்லியன் டொலருக்கும் அதிகமான வருமானம் கிடைத்துள்ளதாக அமைச்சர் சுட்டிக்காட்டியுள்ளார்.

அமெரிக்கா, பிரித்தானியா, நோர்வே மற்றும் அவுஸ்திரேலியா போன்ற ஐரோப்பிய நாடுகளிலும், இந்தியா, பங்களாதேஷ், மாலைத்தீவு போன்ற ஆசிய நாடுகளிலும் இந்த படகிற்கான கோரிக்கை அதிகமாக காணப்படுகின்றது.

இலங்கையில் தயாரிக்கப்பட்ட படகுகளில் தாக்குதல் படகுகள், சுற்றுலா பயணங்களுக்காக பயன்படுத்தப்படும் படகுகள், பாதுகாப்பு படகுகள் மற்றும் கடற்பாதுகாப்பு படகளுக்கே அதிக கோரிக்கை உள்ளது.

அத்துடன் இந்த வருட இறுதியில் படகு உற்பத்தியின் மூலம் 100 மில்லியன் டொலர் வருமானம் கிடைக்கும் என எதிர்பார்ப்பதாக அமைச்சர் மேலும் குறிப்பிட்டுள்ளார்.

பிரபல சிங்கள நடிகை கவீஷா அயேஷானி வாகன விபத்தில் உயிரிழந்துள்ளதாக கொழும்பு ஊடகங்கள் தகவல் வெளியிட்டுள்ளன.

நுகேகொட பிரதேசத்தில் நேற்று இடம்பெற்ற வாகன விபத்தொன்றிலேயே அவர் உயிரிழந்துள்ளதாக கூறப்படுகின்றது.

அவரது சடலம் தற்போது களுபோவில வைத்தியசாலைக்கு கொண்டுள்ள செல்லப்பட்டுள்ளதாக மீரிஹான போக்குவரத்து பிரிவு அதிகாரி தெரிவித்துள்ளார்.

விபத்து இடம்பெற்ற சந்தர்ப்பத்தில் கவீஷா அயேஷானி மோட்டார் வாகனம் ஓட்டிச் சென்றுள்ளதாகவும், அது அவருக்கு சொந்தமான மோட்டார் வாகனம் என தெரிவிக்கப்படுகின்றது.

அவர் தொலைக்காட்சி நாடகம் மற்றும் திரைப்பட நடிகையாக இலங்கை மக்கள் மத்தியில் மிகவும் பிரபல்யமடைந்த ஒருவராகும்.

அண்மையில் இவரது பிறந்தநாள் வெகு விமர்சையாக கொண்டாடப்பட்டுள்ள நிலையில், பிறந்த நாள் விழாவில் பிரதி அமைச்சர் ரஞ்சன் ராமநாயக்க உட்பட பல நடிகர் நடிகைகள் கலந்துக் கொண்டிருந்தமை குறிப்பிடத்தக்கது.