யூடியூப்பில் ஆபாச வீடியோக்கள் மற்றும் திரைப்படங்களை கசியவிடுபவர்களின் விபரங்களை உடனடியாக கண்டுபிடித்து தருமாறு கூகுள் நிறுவனத்திற்கு சென்னை உயர் நீதிமன்றம் அதிரடியாக உத்தரவிட்டுள்ளது.

சென்னை உயர்நீதிமன்றத்தில் தனியார் நிறுவனம் ஒன்று கூகுள் நிறுவனத்தின் கீழ் செயல்படும் யூடியூப்பில் எங்கள் நிறுவனத்தை அவதூறு செய்யும் வகையில் வீடியோ பதிவேற்றம் செய்யப்பட்டுள்ளது. உடனடியாக அந்த வீடியோவை தடை செய்ய வேண்டும் என மனு தாக்கல் செய்திருந்தது.

இதை விசாரித்த சென்னை உயர்நீதிமன்றம் அதை தடை செய்வதோடு மட்டுமில்லாமல், பதிவேற்றம் செய்தவர்களின் விபரங்களையும் அளிக்குமாறு உத்திரவிட்டது.

இதற்கு கூகுள் நிறுவனம் சார்பில், இந்தியாவில் பதிவேற்றம் செய்யப்பட்ட வீடியோக்களுக்கு தான் தடை செய்ய இந்த நீதி மன்றத்துக்கு அதிகாரம் உள்ளது. பிற நாடுகளில் பதிவேற்றம் செய்யப்பட்ட வீடியோக்களை தடை செய்வதற்கு இந்த நீதிமன்றத்திற்கு அதிகாரம் இல்லை, அது அந்நாட்டை சேர்ந்த நீதிமன்றத்துக்குத்தான் அதிகாரம் உள்ளது. அதன் காரணமாக இந்த வீடியோவை தடை விதிக்கமுடியாது என தெரிவித்தது.

இதைத் தொடர்ந்து நீதிமன்றம் பிறப்பித்த உத்தரவில், பாதிக்கப்பட்டவர்கள் கோரினால் கூகுள் நிறுவனம், நிறுவனக் கொள்கையை காரணம் காட்டி விபரங்களை தர மறுப்பதை ஏற்க முடியாது. தவறான வீடியோ பதிவேற்றம் செய்தவர்கள், வெளிநாடுகளில் இருந்தாலும் முழுமையாக தகவல் தர வேண்டும் என உத்தரவிட்டுள்ளது.

இதன் மூலம் யூடியூப்பில் திரைப்படங்களை திருட்டுத்தனமாக கசியவிடுவது, பெண்கள் பற்றிய ஆபாச வீடியோக்களை பதிவேற்றம் செய்பவர்களின் விவரங்களை கேட்டறியும் வகையில் உயர்நீதிமன்றத்தின் தீர்ப்பு உள்ளது.

இதனால் தேவையற்ற வீடியோக்கள் மற்றும் பெண்களின் ஆபாச வீடியோக்களை பதிவேற்றம் செய்பவர்கள் மீது உரிய நடவடிக்கை எடுக்க இது சுலபமாக இருக்கும் என கூறப்படுகிறது.

கடந்த 2011 ஆம் ஆண்டு நடந்த சட்டசபை தேர்தல் தருணத்தில் என் மீது தொடுக்கப்பட்ட பொய் வழக்கை சட்ட ரீதியாக சந்திக்க தயாராக இருக்கிறேன் என முன்னால் மத்திய அமைச்சரும், நடிகருமான நெப்போலியன் கூறியுள்ளார்.

கடலூர் மாவட்டம் பண்ருட்டியில் கடந்த 2011 ஆம் ஆண்டு நடத்தப்பட்ட சட்டசபை தேர்தலின் போது பிரச்சாரத்தில் விதிமுறைகளை மீறியதாக பா.ம.க. தலைவர் ராமதாஸ், விடுதலை சிறுத்தை கட்சி தலைவர் திருமாவளவன், முன்னாள் மத்திய அமைச்சர் நெப்போலியன், தமிழக வாழ்வுரிமை கட்சி நிறுவனர் வேல்முருகன் மற்றும் முன்னாள் எம்.பி அழகிரி ஆகியோர் மீது தனித்தனியாக வழக்குகள் பதிவு செய்யப்பட்டன.

இந்த வழக்கு நேற்று பண்ருட்டியில் உள்ள குற்றவியல் நடுவர் நீதிமன்றத்தில் நேற்று விசாரணைக்கு வந்த போது, பா.ம.க., நிறுவனர் ராமதாஸ், முன்னாள் மத்திய அமைச்சர் நெப்போலியன், முன்னாள் எம்.பி அழகிரி, நெய்வேலி தொகுதி எம்.எல்.ஏ சபா ராஜேந்திரன் உள்ளிட்டோர் நேரில் ஆஜராகினர்.

இது குறித்து, முன்னாள் மத்திய அமைச்சர் நெப்போலியன் கூறியதாவது, கடந்த 2011 ஆம் ஆண்டு நடந்த சட்டசபை தேர்தலுக்காக நான் தமிழகம் முழுவதும் பிரச்சாரத்தினை மேற்கொண்டேன். ஆனால் பொலிசார் அறிவித்த இடத்தை விட்டு வேறு இடத்தில் பிரச்சாரம் செய்ததாக என் மீது பொய் வழக்கு போட்டுள்ளனர். இந்த வழக்கினை நான் சட்ட ரீதியாக சந்திப்பேன் என தெரிவித்துள்ளார்.

உத்திர பிரதேசத்தில் 18 வயது மாணவி ஒருவர், இஸ்லாமிய சிறுவர்களுக்கு குரான் கற்றுத்தருவது அனைவரையும் ஆச்சரியத்தில் ஆழ்த்தியுள்ளது.

உத்திர பிரதேசத்தின் ஆக்ரா பகுதியில் உள்ள சஞ்சை பகுதியை சேர்ந்தவர் பூஜா குஷ்வாகா(18). இவர் 12 ஆம் வகுப்பு படித்து வருகிறார்.

மாலை நேரத்தில் இவரிடம் 35 க்கும் மேற்பட்ட இஸ்லாமிய குழந்தைகள் குரான் பயின்று வருகின்றனர். இதற்கு அக்குழந்தைகளின் பெற்றோர்களும் இந்து மதத்தை சேர்ந்தவர் என்று பார்க்காமல், தங்கள் குழந்தைகளை மகிழ்ச்சியாக அனுப்பி வைக்கின்றனர்.

இது குறித்து குஷ்வாகா கூறுகையில், இஸ்லாமியர் ஒருவர் இந்து பெண்ணை திருமணம் செய்து கொண்டார். அவர்களுக்கு பிறந்த பெண் தான் சங்கீதா பேகம். இவர் இந்த பகுதியில் குரான் வகுப்புக்களை பயிற்றுவித்து வந்தார். அவரிடம் தானும் சென்று குரான் படித்தேன்.

குரான் படிக்க வேண்டும் என்ற ஆர்வம் இருந்ததால் விரைவாக கற்றுத் தெரிந்து கொண்டேன். தற்போது சங்கீதா பேகத்தால் குரான் வகுப்புகளை சில பிரச்னைகளால் நடத்த முடியவில்லை.

அதனால் தற்போது அதை நான் செய்து வருகிறேன். இங்கு பெரும்பாலான சிறுவர்கள் ஏழை குடும்பத்தைச் சார்ந்த சிறுவர்கள் என்பதால் அவர்களால் பணம் செலுத்த இயலாது, அவ்வாறு அவர்கள் கொடுத்தாலும் தான் பணம் பெறுவது இல்லை என கூறினார்.

தற்போது சிறுவர்களுக்கு சிறப்பாக குரான்களை கற்றுத் தருகிறேன். அவர்களும் மிகுந்த ஆர்வத்துடன் கற்று வருகிறார்கள் எனவும் கூறினார்.

கரூர் தான்தோணிமலையில் உள்ள ஒரு கோவிலில் கடந்த மாதம் சாமி கும்பிட்டு விட்டு வந்த இரு பெண்களின் கூந்தலை மர்ம ஆசாமி ஒருவன் அறுத்து எடுத்து கொண்டு தப்பி சென்றான்.

அதிர்ச்சியடைந்த அந்த பெண்கள் கதறி அழுதனர். இதுபற்றி தகவல் அறிந்த கரூர் டவுன் பொலிசார் ரகசிய விசாரணை நடத்தி வந்தனர். கரூர் ஈஸ்வரன் கோவிலிலும் இதுபோன்ற சம்பவங்கள் சில ஆண்டுகளுக்கு முன்பு நடந்தது.

இதையடுத்து விநாயகர் சதுர்த்தியை முன்னிட்டு இன்ஸ்பெக்டர் ஞானசேகரன் மற்றும் பொலிசார் சம்பந்தபட்ட நபரை பிடிக்க ஈஸ்வரன் கோவில் பகுதியில் வலை விரித்தனர்.

அப்போது பெண்கள் இருக்கும் பகுதியில் சந்தேகப்படும்படியாக மர்ம மனிதர் நின்று கொண்டிருப்பதை கவனித்தனர். உடனே பொலிசார் விரைந்து சென்று அவனை மடக்கி பிடித்தனர். கையில் வைத்திருந்த பையை சோதனை செய்தனர். அதில் கத்தரிக்கோல் இருந்தது.

இதைத்தொடர்ந்து அவரை பொலிஸ் நிலையத்திற்கு அழைத்து வந்து விசாரித்தபோது, அவர் கரூர் வழுக்கு பாறையை சேர்ந்த அம்புரோஸ் (வயது 35) என்றும் கோவிலுக்கு வரும் பெண்களின் கூந்தலை வெட்டி செல்வதும் உறுதியானது.

கைதான அம்புரோஸ் கடந்த 2013 ஆம் ஆண்டு ஒரு பெண்ணை திருமணம் செய்துள்ளார். ஆனால் ஒரு வருடத்திலேய கருத்து வேறுபாடு காரணமாக அவரது மனைவி பிரிந்து சென்று விட்டார். இதனால் ஏற்பட்ட ஆத்திரத்தில் பெண்களின் கூந்தலை அவர் அறுக்க தொடங்கியுள்ளார்.

துண்டிக்கப்படும் கூந்தலை அவர் ரூ. 400, 500-க்கு விற்பனை செய்ததாக பொலிசில் வாக்கு மூலம் அளித்துள்ளார். மனைவி பிரிந்த நிலையில் பெண்களின் கூந்தலை துண்டித்து விற்ற அம்புரோஸ் இடையில் அதனை நிறுத்தியுள்ளார். மீண்டும் கூந்தலை அறுக்க தொடங்கிய நிலையில் போலீசில் சிக்கியுள்ளார்.

இதுவரை 50-க்கும் மேற்பட்ட பெண்களின் கூந்தலை அவர் அறுத்திருக்கலாம் என தெரிகிறது. ஆனால் சில பெண்களே பொலிசில் புகார் செய்துள்ளனர். கூந்தல் திருடன் மாட்டிக் கொண்டதால் பெண்கள் சற்று நிம்மதி அடைந்துள்ளனர்.