கல்விப் பொதுத் தராதர உயர்தரப் பரீட்சை விடைத்தாள் திருத்தும் பணிகள் எதிர்வரும் 29 ஆம் திகதி ஆரம்பமாகவுள்ளதாக, பரீட்சைகள் திணைக்களம் தெரிவித்துள்ளது.

இதன்படி குறித்த நடவடிக்கைகள் செப்டம்பர் மாதம் 11 ஆம் திகதி வரை மேற்கொள்ளப்படவுள்ளதாக தெரிவிக்கப்படுகின்றது.

மேலும், பரீட்சை விடைத்தாள் திருத்தும் பணிகளுக்காக 27 பாடசாலைகள் பயன்படுத்தப்படவுள்ளதாகவும், அதில் 6 பாடசாலைகள் முழுமையாகவும் 21 பாடசாலைகள் பகுதியளவிலும் மூடப்படவுள்ளதாக தெரியவந்துள்ளது.

யாழ்ப்பாணம் இந்து மகளீர் கல்லூரி, கொழும்பு இராஜகிரிய வித்தியாலயம், நாலந்தா வித்தியாலயம், கண்டி விஹாரமஹாதேவி பெண்கள் மகா வித்தியாலயம், கண்டி சுவர்ணமாலி பெண்கள் பாடசாலை, கண்டி சீதாதேவி பெண்கள் பாடசாலை ஆகியனவே முழுமையாக மூடப்படவுள்ளன.

இந்நிலையில் மூன்றாம் தவனைக்காக குறித்த பாடசாலைகள் அடுத்த மாதம் 13 ஆம் திகதி மீளத் திறக்கப்படவுள்ளதாக, பரீட்சைகள் திணைக்களம் சுட்டிக்காட்டியுள்ளது.

இதேவேளை பகுதியளவில் மூடப்படவுள்ள 21 பாடசாலைகள் மூன்றாம் தவணைக்காக இம் மாதம் 31 ஆம் திகதி மீள ஆரம்பிக்கப்படுமென தெரிவிக்கப்படுகின்றது.

மேலும், இம்முறை ஐந்தாம் தரப் புலமைப் பரிசில் பரீட்சை விடைத்தாள் திருத்தும் பணிகள் இம் மாதம் 29 ஆம் திகதி ஆரம்பமாகவுள்ளதோடு, எதிர்வரும் மாதம் 3 ஆம் திகதி வரை முன்னெடுக்கப்படவுள்ளது.

இதன் நிமித்தம் 39 பாடசாலைகள் பயன்படுத்தப்படவுள்ளன.

இவற்றில் 35 பாடசாலைகள் முழுமையாக மூடப்படவுள்ளதோடு, இவை மூன்றாம் தவணைக்காக எதிர்வரும் 5 ஆம் திகதி திறக்கப்படும்.

பகுதியளவில் மூடப்படும் ஏனைய நான்கு பாடசாலைகளும், இம் மாதம் 31 ஆம் திகதி மூன்றாம் தவணைக்காக திறக்கப்படும் என பரீட்சைகள் திணைக்களம் தெரிவித்துள்ளது.

இலங்கையர்களில் 80 சதவீதமானோர் ‘நேரமில்லை” என்ற போலியான காரணத்தை சுட்டிக்காட்டி தங்களது இலக்குகளை தட்டிக்கழிப்பதாக புள்ளிவிபரமொன்று குறிப்பிடுகின்றது. மேலும் இதில் 45 வீதமானோர் அச்சம் காரணமாகவே தங்களது இலக்குகளிலிருந்து பின்வாங்குவதாகவும் புள்ளிவிபரத்தில் குறிப்பிடப்பட்டுள்ளது.

இலங்கை சந்தை ஆராய்ச்சி பணியகத்தினால் அண்மையில் மேற்கொள்ளப்பட்ட மதிப்பீட்டிலேயே இத்தகவல்கள் தெரிவிக்கப்பட்டுள்ளது.

ஜெய்க் ஹில்டன் ஹொட்டலில் நேற்று நற்குண முன்னேற்ற அமைப்பு ஏற்பாடு செய்திருந்த விசேட கலந்துரையாடலின் போது குறித்த அமைப்பின் ஸ்தாபகர் குஷில் குணசேகர உரையாற்றும்போதே மேற்கண்டவாறு தெரிவித்தார். அவர் மேலும் கருத்து தெரிவிக்கையில்,

இலங்கையர்களாகிய நாம் நாளாந்தம் தமது இலக்குகளை வெற்றிக்கொள்ளாமைக்கு சராசரியாக நான்கு வெவ்வேறு காரணங்களை முன்வைக்கின்றோம்.

இதில் இலங்கை சந்தை ஆராய்ச்சி பணியகத்தின் ஆய்வின்படி 80 சதவீதமானோர் ‘நேரம் இல்லை” என்ற காரணத்தையும், 45 சதவீதமானோர்’தோற்றுவிடுவோம் என்ற பயம்” என்ற காரணத்தையும், 38 சதவீதமானவர்கள் ‘முயற்சி செய்வதில் பயனில்லை” என்ற காரணத்தினை முன்வைப்பதோடு, 28 சதவீதமானவர்கள் ‘எவ்வாறு அதனை செய்வது என எனக்கு தெரியாது” எனவும் பதிலளித்துள்ளனர்.

குறித்த ஆய்வின் மூலம் நாம் தெரிந்துக்கொள்ள வேண்டிய விடயம் என்னவெனில், இவ்வாறான போலியான காரணங்களைக் கொண்டு நாம் நமது இலக்குகளை தவறவிடுகின்றோம். நாடு என்ற அடிப்படையில் நாம் அனைவரும் தங்களது இலக்குகளை வெற்றிக்கொள்ள வேண்டிய கட்டாயத்தில் இருக்கின்றோம். எனவே இலங்கையர்கள் எனும் அடிப்படையில் நாம் ஒன்றுபட்டு செயற்படுவதால் மாத்திரமே எமது இலக்குகளை அடைய முடியும் என குறித்த ஆய்வின் மூலம் தெரியவருகின்றது.

இதேவேளை குறித்த நற்குண முன்னேற்ற அமைப்பின் கலந்துரையாடலில் பங்குகொண்ட சிறப்பு விருந்தினரான எவரெஸ்ட் சிகரத்தின் உச்சியை அடைந்த முதல் இலங்கையர் என்ற பெருமைக்குரிய ஜயந்தி குரு உதும்பலா தெரிவிக்கையில், இலக்குகளை நோக்கி பயணிக்கும் எமக்கு வெறும் சாக்குபோக்குகள் தடையாக அமைந்தவிடக்கூடாது.

நாம் நினைக்கின்ற இலக்குகளை அடைவதற்கான திறனை எமக்குள் வளர்த்துக்கொள்ள வேண்டும். அவ்வாறு திறனை வளர்த்துக்கொள்ளும் பட்சத்தில் சாக்கு போக்குகளை சொல்லிக்கொள்ள வேண்டிய அவசியம் ஏற்படாது. இலக்குகளை அடைய நம்முன் காணப்படுகின்ற தடைகளை தகர்த்துவிட வேண்டும்.

இயலாமை என்ற ஒன்றை எம்மிடத்தில் இருந்து நீக்கி, இலக்குகளுக்கான பாதையை அமைத்துக்கொண்டு அதில் வெற்றிபெற வேண்டும். அதை விடுத்து சாக்குபோக்குகள் சொல்லி, நமது இலக்குகளை நாமே தவறவிடுவதனை நாம் நிறுத்திக்கொள்ள வேண்டும் என்றார்.

தங்கல்ல ரன்ன கோடயிம்புரவ்ததை பகுதியிலுள்ள வீட்டு தோட்டத்தில் இருந்து சிசுவின் சடலம் கண்டெடுக்கப்பட்டுள்ளது. பிரதேசவாசி பொலிஸாருக்கு வழங்கிய தகவலுக்கு அமையவே பொலிஸார் இந்த சடலத்தை கண்டெடுத்துள்ளனர்.

நேற்று காலை குறித்த சிசு பிறந்திருக்கலாம் என பொலிஸார் சந்தேகிக்கின்றனர்.

குழந்தையை பிரசுவித்துள்ளதாக சந்தேகிக்கப்படும் 21 வயதுடைய யுவதி பொலிஸ் பாதுகாப்பின் கீழ் ஹம்பாந்தோட்டை வைத்தியசாலையில் அனுமதிக்ப்பட்டுள்ளார்.

பொலிஸார் சம்பவம் தொடர்பில் மேலதிக விசாரணைகளை மேற்கொண்டு வருகின்றனர்.

சட்ட விரோத சிறுநீரக வியாபாரம் தொடர்பாக கைது செய்யப்பட்டு தடுத்து வைக்கப்பட்டுள்ள இந்திய பிரஜைகளின் உடல் நிலை பாதிக்கப்பட்டுள்ளதாக, அவர்களது வழக்கறிஞர் நேற்று கொழும்பு மஜிஸ்ட்ரேட் நீதிமன்றத்தில் தெரிவித்தார்.

இது தொடர்பான வழக்கு, நேற்று அழைக்கபட்ட போது கருத்தக்களை தெரிவித்த சந்தேக நபர்கள் சார்பில் ஆஜராகும் வழக்கறிஞர் அஜந்தா லக்மால் தடுத்து வைக்கப்பட்டுள்ள ஆறு இந்திய பிரஜைகளின் சிறுநீரகங்கள் நீக்கப்பட்டுள்ளதாக அறிவித்தார்.

சிறைச்சாலைக்குள் அவர்களுக்கு தேவையான உணவு மற்றும் குடிநீர் வசதிகளை பெற்றுக்கொள்ள முடியாத நிலை ஏற்பட்டுள்ளதாக கூறிய வழக்கறிஞர், அவர்களை உடனடியாக மிரிஹானையில் அமைந்துள்ள முகாமிற்கு மாற்றும்படி வேண்டுகோள் விடுத்தார்.

இந்த வேண்டுகோள் அடுத்த வழக்கு தினத்தில் ஆராயப்படுமென்று கூறிய நீதிபதி, சந்தேக நபர்களை வரும் 30ம் திகதி வரை விளக்க மறியலில் வைக்குமாறு உத்தரவிட்டார்.

இந்தியாவிற்கும், இலங்கைக்கும் இடையில் மேற்கொள்ளப்பட்டு வரும் சட்ட விரோத சிறுநீரக வியாபாரம் தொடர்பாக சில மாதங்களுக்கு முன்னர் இந்த சந்தேக நபர்கள் கொழும்பில் வைத்து கைது செய்யப்பட்டது குறிப்பிடத்தக்கது.

-பிபிசி-

சுவிட்சர்லாந்து நாட்டில் இந்துக் கடவுளான சிவன் சிலைக்கு முன்னால் நரபலி கொடுப்பது போன்று வெளியாகியுள்ள வீடியோ அதிர்ச்சியை ஏற்படுத்தியுள்ளது.

சுவிஸில் உள்ள ஜெனிவா நகரில் அணு ஆராய்ச்சிக்கான ஐரோப்பிய அமைப்பின் (CERN) அலுவலகம் ஒன்று அமைந்துள்ளது. இந்த கட்டிடத்திற்கு அருகில் அமைந்துள்ள சிவன் சிலை முன்னால் தான் இந்த காட்சிகள் இடம் பெற்றுள்ளன.

சில தினங்களுக்கு முன்னால் யூடியூபில் பதிவேற்றப்பட்ட வீடியோ ஒன்றில் இந்த பயங்கர காட்சிகள் பதிவாகியுள்ளன.

சிவன் சிலைக்கு முன்னால் சிலர் கருப்பு உடை அணிந்துக்கொண்டு சுற்றி வருகின்றனர். இவர்களில் மத்தியில் ஒரு பெண்ணும் வருகிறார். சில நிமிடங்களுக்கு பிறகு அப்பெண் கீழே படுக்கிறார்.

அப்போது, நபர்களில் ஒருவர் கத்தியை ஓங்கி கீழே படுத்திருக்கும் பெண்ணை வெட்டுவது போல் காட்சிகள் இடம் பெற்றுள்ளன.
இக்காட்சியை தூரத்தில் இருந்து ஒருவர் கைப்பேசியில் படம் பிடித்தாக தெரிகிறது.

இந்த வீடியோ வெளியாக பெரும் பரபரப்பை ஏற்படுத்திய நிலையில், CERN துறை அதிகாரிகள் இதனை முற்றிலுமாக மறுத்துள்ளனர்.

இது குறித்து பத்திரிகை ஒன்றிற்கு அவர்கள் பேட்டியளித்தபோது, இந்த அலுவலகத்திற்கு மாணவர்கள் அடிக்கடி வந்து செல்வது வழக்கம்.

மேலும், மாணவர்கள் நகைச்சுவைக்காக இதுபோன்ற நாடகங்களில் ஈடுபடுகின்றார்கள். மாணவர்களின் இச்செயலை வன்மையாக கண்டிக்கிறோம்.

சிவன் சிலைக்கு முன்னால் யாரும் நரபலி கொடுக்கவில்லை. பொதுமக்கள் மத்தியில் பீதியை ஏற்படுத்தும் வகையில் செயல்படும் மாணவர்கள் மீது உரிய நடவடிக்கை எடுக்கப்படும் என CERN அதிகாரிகள் தெரிவித்துள்ளனர்.

சட்டவிரோதமாக படகு மூலம் அவுஸ்ரோலியா சென்ற 6 பேர், இன்று இலங்கைக்கு மீளவும் திருப்பி அனுப்பப்பட்டுள்ளனர்.

இவ்வாறு திருப்பியனுப்பப்பட்டவர்கள் குடிவரவு – குடியகல்வு சட்டத்தை மீறிய குற்றச்சாட்டின் பேரில் கைது செய்யப்பட்டுள்ளதாக தெரிவிக்கப்படுகின்றது.

வாழைச்சேனை பிரதேசத்தைச் சேர்ந்த 6 கடற்தொழிலாளர்கள் கடந்த ஜூலை மாதம் 21ஆம் திகதி, கடல் வழியாக படகு ஒன்றின் மூலம் அவுஸ்ரேலியாவுக்கு பயணித்துள்ளனர்.

தொடர்ந்து 12 நாட்கள் படகில் பயணித்த இவர்கள், அவுஸ்ரோலியா கடற்பரப்புக்குள் செல்லும்போது, படகு பழுதடைந்து 4 நாட்களாக கடலில் தத்தளித்துள்ளனர்.

இதையடுத்து, அவுஸ்திரேலியா கடற்படையினர் இவர்களை மீட்டு கைது செய்ததுடன், அவர்கள் பயணித்த படகையும் மீட்டுள்ளனர்.

கைது செய்யப்பட்டவர்களிடம் மேற்கொள்ளப்பட்ட விசாரணையின் பின்னர், அவர்கள் அங்கிருந்து உடனடியாக விஷேட விமானம் மூலமாக இலங்கைக்கு நாடு கடத்தப்பட்டுள்ளனர்.

குறித்த ஆறு பேரும் இன்று காலை 8.15 மணிக்கு கட்டுநாயக்கா விமான நிலையத்தை வந்தடைந்துள்ளனர் என தெரிவிக்கப்படுகின்றது.

இதையடுத்து இவர்களை கைது செய்த விமான நிலையப் பொலிஸார், அவர்களை நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாகவும் தெரிவித்துள்ளனர்.

பாடசாலைகளில் சேவைபுரியும் கல்விசாரா ஊழியர்களில் நூறில் பத்து வீதமானோர்பாடசாலை அதிபர்கள் மற்றும் வலய கல்வி பணிப்பாளர்களாலோ பாலியல்துன்புறுத்தல்களுக்கு உள்ளாக்கப்படுவதாக கல்வி சாரா ஊழியர் சங்கம் தெரிவித்துள்ளது.

நாடளாவிய ரீதியில் 15,000 கல்விசாரா ஊழியர்கள் கடமை புரிவதாகவும் கல்விசாராஊழியர் சங்கத்தின் பிரதான செயலாளர் அஜித்.கே.திலகரத்ன தெரிவித்துள்ளார்.

கல்விசாரா ஊழியர்கள் குறித்த சம்பவங்கள் தொடர்பில் முறையிட்டால் அவர்களதுசம்பளங்கள் குறைக்கப்படுவதோடு, அவர்கள் தூர இடங்களுக்கு மாற்றலாகிஅனுப்பப்படுவதாகவும் அவர் மேலும் குறிப்பிட்டுள்ளார்.

இன்று மருதானையில் இடம்பெற்ற ஊடகசந்திப்பிலேயே அவர் இதனைத் தெரிவித்துள்ளார்.

இந்த சம்பவங்கள் வடமேல் மாகாணம் வெளிஓய, மொனராகல, பதுளை ஆகிய பிரதேசங்களில்அதிகம் இடம்பெறுவதாகவும் அவர் சுட்டிக்காட்டியுள்ளார்.