தெனியாய – பிட்டபெத்தர பிரதேசத்தில் 13 வயது சிறுமியை ஒரு மாதமாக துஸ்பிரயோகத்திற்கு உள்ளாக்கிய 30 நபர்களைத் தேடி பொலிஸார் வலைவிரித்துள்ளதாக தெரிவிக்கப்பட்டுள்ளது.

குறித்த சம்பவம் தொடர்பாக சந்தேகத்தின் பெயரில் ஒருவர் கைதுசெய்யப்பட்டுள்ளார்.

மேலும், கைது செய்யப்பட்ட நபர் வழங்கிய தகவலுக்கமைய பஸ் நடத்துநர்கள், சாரதிகள், வர்த்தகர்கள் உள்ளிட்ட சமூகத்தில் பல முக்கயஸ்தர்கள் இதனுடன் தொடர்புடையதாக தெரிவிக்கப்பட்டுள்ளது.

இதேவேளை கைதுசெய்யப்பட்ட நபர் இது தொடர்பில் பல அதிர்ச்சித் தகவல்களை பொலிஸாரிடம் வழங்கியுள்ளதாகவும் குறிப்பிடப்பட்டுள்ளது.

பாதுகாப்பற்ற கிணறு ஒன்றில் இருந்து இரண்டு வயது நிரம்பிய சிறுவனின் சடலம் இன்று காலை கிளிநொச்சி புதுமுறிப்பில் பகுதியில் மீட்கப்பட்டுள்ளது. விஜிமன் கனீஸ்ரன் என்ற சிறுவனே இவ்வாறு சடலமாக மீட்கப்பட்டுள்ளார்.

இன்று காலை காணியில் பெற்றோருடன் இருந்த குறித்த சிறுவன் எதிர்பாராத விதமாக பக்கத்து காணிக்குச் சென்றுள்ளதாகவும் அங்கிருந்த கிணற்றிலே வீழ்ந்து உயிரிழந்துள்ளதாகவும் தெரிவிக்கப்படுகின்றது.

சடலம் கிளிநொச்சி பொலிஸாரால் மீட்கப்பட்டு கிளிநொச்சி மாவட்ட பொது வைத்தியசாலையில் விசாரணைக்காக வைக்கப்பட்டுள்ளது.

இதேவேளை கடந்த வாரம் கல்மடு நகர் என்னும் இடத்தில் பாதுகாப்பற்ற கிணற்றில் இருந்து ஐந்து வயது சிறுவனின் சடலம் மீட்கப்பட்டிருந்ததுடன் அண்மைக்காலத்தில் கிளிநொச்சி மாவட்டத்தில் பாதுகாப்பற்ற கிணற்றிலும் நீர்நிலைகளிலும் தவறிவீழ்ந்து உயிரிழப்போரின் எண்ணிக்கை அதிகரித்து வருகின்றமை குறிப்பிடத்தக்கது.

மட்டக்களப்பு காக்காச்சிவட்டை பகுதியில் சடலமாக மீட்கப்பட்ட மூவரின் பிரேத பரிசோதனை அறிக்கை நிறைவடைந்துள்ளது

கடுமையான தாக்குதலினால் தலையில் ஏற்பட்ட காயங்களே மூவரின் மரணத்துக்கும் காரணமாய் அமைந்துள்ளமை பிரேத பரிசோதனை அறிக்கையில் வெளியாகியுள்ளதாக பொலிஸார் கூறினர்.

மட்டக்களப்பில் இடம்பெற்ற முக்கொலையில் உயிரிழந்தவர்களின் பிரேத பரிசோதனை நேற்று (25.07) மட்டக்களப்பு போதனா வைத்தியசாலையில் இடம்பெற்றது.

இதேவேளை முக்கொலை தொடர்பில் கைது செய்யப்பட்டுள்ள சந்தேகநபரை தடுத்து வைத்து விசாரிக்க களுவாஞ்சிக்குடி நீதவான் நீதிமன்றம் நேற்று அனுமதி வழங்கியது.

உயிரழந்த பெண்ணின் 24 வயதான கணவரே சந்தேகத்தின் பேரில் கைது செய்யப்பட்டுள்ளமை சுட்டிக்காட்டத்தக்கது.

ஒன்றரை வயது பெண் குழந்தை ,குழந்தையின் தாயான 24 வயதுடைய பெண் மற்றும் பெண்ணின் 55 வயதான தந்தை ஆகியோர் நேற்றுமுன்தினம் அதிகாலை கொலை செய்யப்பட்டிருந்தனர்.

ஒன்றரை வயது குழந்தை மற்றும் பெண் ஆகியோரது சடலங்கள் காக்காச்சிவட்டை பகுதியிலுள்ள வீட்டின் கிணற்றிலிருந்து மீட்கப்பட்டன.

கட்டுநாயக்கவிலுள்ள பண்டாரநாயக்க சர்வதேச விமான நிலையம் அடுத்த வருட ஜனவரி மாதம் முதல், தற்காலிகமாக மூடப்படவுள்ளது.

இதன்படி, எதிர்வரும் ஜனவரி 5ம் திகதி தொடக்கம் மூன்று மாதங்களுக்கு தினமும் காலை 08.30 முதல் மாலை 04.30 வரை, எட்டு மணித்தியாலங்கள், விமான நிலையம் இவ்வாறு மூடப்படவுள்ளதாக, அமைச்சர் சிமல் சிறிபாலடி சில்வா தெரிவித்துள்ளார்.

விமான ஓடுபாதையின் திருத்தப் பணிகள் காரணமாகவே இந்த நடவடிக்கை மேற்கொள்ளப்படவுள்ளது எனவும் அவர் சுட்டிக்காட்டியுள்ளார்.

கொழும்பில் இன்று இடம்பெற்ற ஊடகவியலாளர் சந்திப்பின் போதே அவர் மேற்கண்டவாறு கருத்து வௌியிட்டுள்ளார்.

இதேவேளை, ஆகஸ்ட் முதலாம் திகதி முதல் பஸ் கட்டணங்கள் அதிகரிக்கப்படவுள்ள நிலையில், ரயில் கட்டணங்களும் அதிகரிக்கப்படுமா என, இதன்போது ஊடகவியலாளர் ஒருவர் வினவியதற்கு “இதுவரை அவ்வாறு எந்தவொரு தீர்மானமும் எடுக்கப்படவில்லை” என அமைச்சர் நிமல் சிறிபாலடி சில்வா குறிப்பிட்டுள்ளார்.

கிளிநொச்சி பரந்தன் பகுதியில் இன்று காலை இடம்பெற்ற விபத்தில் முதியவர் ஒருவர் பரிதாபமாக பலியாகியுள்ளார்.பரந்தனை சேர்ந்த 64 வயதான சண்முகன் என்ற முதியவரே விபத்தில் பலியாகி உள்ளார்

புத்தளத்தில் இருந்து யாழ்ப்பாணம் நோக்கி சென்றுகொண்டிருந்த கார் ஒன்றுடன் துவிச்சக்கர வண்டியில் சென்று கொண்டிருந்த முதியவர் மோதியதால் விபத்து ஏற்பட்டுள்ளது.

விபத்துக்குள்ளான முதியவர் பலத்த காயங்களுடன் கிளிநொச்சி பொது வைத்தியசாலையில் அனுமதிக்கப்பட்ட போதும் சிகிச்சை பயனின்றி உயிரிழந்துள்ளார்.

காரை செலுத்திய சாரதிக்கு ஏற்பட்ட நித்திரையின் காரணமாக இந்த விபத்து ஏற்பட்டுள்ளதாக கிளிநொச்சி பொலிஸார் தெரிவித்துள்ளனர்.
காரின் சாரதியை கிளிநொச்சி பொலிஸார் கைது செய்து மேலதிக விசாரனைகளை மேற்கொண்டு வருகின்றனர்.