நுங்கம்பாக்கம் ரயில் நிலையத்தில் ஜூன் 24-ம் தேதி இன்ஜினீயர் சுவாதி படுகொலை செய்யப்பட்ட வழக்கில் ராம்குமாரை போலீஸார் கைதுசெய்தனர்.

புழல் சிறையில் அடைக்கப்பட்ட அவரை மூன்று நாட்கள் போலீஸ் காவலில் எடுத்து விசாரித்தது தனிப்படை போலீஸ். அப்போது அவர், சுவாதியை எப்படிக் கொலை செய்தேன் என்ற தகவலை விரிவாகச் சொன்னதாக போலீஸ் சொல்கிறது.

அவருடைய வாக்குமூலத்தை போலீஸ் தரப்பில் இருந்து சேகரித்தோம். அதில்,பி.இ படிப்பில் தேர்ச்சி பெறாத பாடங்களுக்கு கோச்சிங் கிளாஸுக்காக சென்னை வந்தேன். என் உறவினர் மதன் உட்பட செங்கோட்டையைச் சேர்ந்த 7 பேர் சூளைமேட்டில் உள்ள ஏ.எஸ் மேன்ஷனில் தங்கியதால், நானும் அங்கு தங்கினேன்.

அந்த வழியாகச் சென்ற சுவாதியைப் பார்த்தேன். அவரைப் பின்தொடர்ந்து நுங்கம்பாக்கத்தில் இருந்து பரனூர் வரை ரயிலில் மூன்று முறை சென்றேன். அப்போது, சுவாதி வேலை பார்த்த இடத்தைக் கண்டுபிடித்தேன்.

சுவாதி தினமும் அவரது வீட்டின் அருகே உள்ள பெருமாள் கோயிலுக்குச் செல்வார். சுவாதிக்காக அந்தக் கோயிலுக்கு நானும் செல்வேன். ஒருநாள் அவரிடம் என் காதலைச் சொன்னேன்.

அவர் என்னை, ‘தேவாங்கு’ என்று திட்டியதோடு கன்னத்தில் ஓங்கி அடித்தார். அது எனக்குக் கடும் ஆத்திரத்தை ஏற்படுத்தியது.

சமீபத்தில் ஊருக்குச் சென்றபோது அரிவாளை எடுத்து வந்தேன். சுவாதியை கொலை செய்வதற்கு முன்புகூட அவரிடம் என் காதலை வெளிப்படுத்தினேன். அப்போதும் அவர், என்னை அசிங்கமாகத் திட்டினார்.

இதனால் பையில் மறைத்து வைத்திருந்த அரிவாளை எடுத்து வாயிலேயே ஆத்திரம் தீர வெட்டினேன் என்று போலீஸில் சொல்லி இருக்கிறார் ராம்குமார்.

போலீஸ் உயர் அதிகாரி ஒருவரிடம் பேசினோம். போலீஸ் காவலில் ராம்குமார் சொன்ன தகவல்கள் அனைத்தையும் வீடியோவாகப் பதிவு செய்துள்ளோம். அவரின் வாக்குமூலத்தை நீதிமன்றத்தில் தாக்கல் செய்துள்ளோம்.

இந்த வழக்கில் சுவாதியின் தந்தை சந்தான கோபாலகிருஷ்ணன், முகமது பிலால் சித்திக், காவலாளி கோபால், பிளாட்பார வியாபாரி சிவக்குமார், சுவாதியின் நண்பர்கள் 5 பேர் என 60 பேர் சாட்சிகளாகச் சேர்க்கப்பட்டு உள்ளனர்.

ராம்குமார் வழக்கில் அடுத்த மாதத்துக்குள் குற்றப்பத்திரிகையை தாக்கல்செய்ய உள்ளோம். ராம்குமார், சுவாதிக்கு வட்ஸ் அப் மூலம் மெசேஜ் அனுப்பி இருக்கிறார். அதை ரெக்கவரி சாஃப்ட்வேர் மூலம் எடுக்க உள்ளோம்.

அடுத்து, ராம்குமாரின் செல்போனில் சுவாதியின் புகைப்படங்கள் உள்ளன.ராம்குமாரை கைதுசெய்வதற்கு முன்பு சுவாதியின் நெருங்கிய நண்பர் முகமது பிலால் சித்திக்கிடம் விசாரணை நடத்தினோம்.

அப்போது, பிலாலுக்கு ஏதாவது தீவிரவாத அமைப்புகளுடன் தொடர்பு இருக்கிறதா என்ற கோணத்தில் அந்த விசாரணை நடந்தது. இதற்குக் காரணம், சுவாதியின் குடும்பத்தினருக்கும் மத அமைப்புக்கும் நெருங்கியத் தொடர்பு இருக்கிறது.

அண்ணா பல்கலைக்கழகத்தில் ஒரு கோச்சிங் வகுப்பில்தான் முதன்முதலில் சுவாதியும், பிலாலும் சந்தித்து உள்ளனர். நெருங்கிப் பழகி உள்ளனர்.

ராம்குமாரின் பின்னணியில் ஏதாவது மத அமைப்புகளின் பங்கு இருக்கலாம் என்ற கோணத்தில் உளவுத்துறை இரகசியமாக விசாரணை மேற்கொண்டு வருகிறது.

மூன்று மாதங்கள் மட்டுமே ராம்குமார் மேன்ஷனில் தங்கியிருந்ததாகச் சொல்லப்படுவது உண்மையல்ல. ஏற்கெனவே அவர், அதே மேன்ஷனில் 10-8-2015 முதல் நான்கு மாதங்கள் தங்கியிருந்ததற்கான ஆதாரங்கள் எங்களிடம் உள்ளன.

எட்டு மாதங்களுக்கு முன்பே அந்த மேன்ஷனில் தங்கியிருந்தபோது சுவாதியுடன் பழக்கம் ஏற்பட்டதா என்ற கோணத்திலும் விசாரணை நடத்தியுள்ளோம் என்றார்.

ராம்குமாரின் வழக்கறிஞர் ராம்ராஜிடம் பேசினோம். இந்தக் கொலை வழக்குக்கும் ராம்குமாருக்கும் எந்தவிதச் சம்பந்தமும் இல்லை. இந்தக் கொலைக்குப் பின்னணியில் சில அமைப்புகள் உள்ளன.

ஆனால், அதன் விவரம் சுவாதியின் குடும்பத்துக்கும் போலீஸுக்கும் தெரியும். தமிழக போலீஸ் விசாரணை மீது எங்களுக்கு நம்பிக்கை இல்லை. இதனால், சி.பி.ஐ விசாரணை கேட்க உள்ளோம்.

சுவாதியின் லேப்டாப்பில் உள்ள தகவல்களை ஏன் போலீஸார் மறைக்க வேண்டும்?

போலீஸ் காவலில் ராம்குமாரை சித்திரவதை செய்துள்ளனர். ராம்குமாரின் தந்தை பரமசிவன், தன் மகனின் கழுத்தை தென்காசி போலீஸ் இன்ஸ்பெக்டர் பாலமுருகன் தலைமையிலான போலீஸார் அறுத்ததாக செங்கோட்டை போலீஸில் புகார் கொடுத்துள்ளார் என்றார்.

சுவாதியின் பிரேதப் பரிசோதனை அறிக்கை குறித்து பேசிய டாக்டர் ஒருவர், சுவாதியின் உடலில் நான்கு இடங்களில் வெட்டுக்காயங்கள் இருந்தன. பின்பக்கத்தில் இருந்தே அவரை வெட்டியிருக்க வாய்ப்பு உள்ளது.

கழுத்துப் பகுதியில் உள்ள கார்னியல் பிளேட் குழாய் அறுக்கக்கப்பட்டு இரத்தம் அதிகம் வெளியேறியதால் சுவாதி மரணம் அடைந்துள்ளார்.

கார்னியல் பிளேட் குழாய் அறுக்கப்பட்டால் மூன்று நிமிடங்களிலேயே மரணம் ஏற்படும். மருத்துவரீதியான இந்தத் தகவலைத் தெரிந்து கொண்டு சுவாதியைக் கொலை செய்திருக்கலாம் என்ற சந்தேகம் உள்ளது என்றார்.

-விகடன்-

தன் தந்தைக்கு ஆறாயிரம் கோடி ரூபாய் அளவுக்கு சொத்து இருந்தும் பேக்கரி ஒன்றில் கூலிவேலை செய்து, நெகிழ வைத்துள்ளார் இளைஞர் ஒருவர். சமூக வலைத்தளங்களில் அவருக்குப் பாராட்டுக்கள் குவிந்து வருகின்றன.

குஜராத் மாநிலத்தின் முன்னணி வைர வியாபாரி சாவ்ஜி தொலாக்கியா. 54 வயதான சாவ்ஜி, ஹரே கிருஷ்ணா என்ற பெயரில் வைரம் மற்றும் ஆபரணப் பொருட்கள் ஏற்றுமதி நிறுவனம் நடத்தி வருகிறார். சூரத் நகரில் பெரிய கம்பெனி வைத்து நிர்வகித்து வரும் சாவ்ஜி, உலகின் 71 நாடுகளில் வைர வியாபாரம் செய்து குஜராத் மாநிலத்தின் முன்னணி செல்வந்தராக வளம் வருகிறார். கடந்த 2011ம் ஆண்டு சிறந்த ஏற்றுமதியாளர் என்ற வகையில் அதற்கான குஜராத் மாநில அரசின் விருதையும் பெற்றுள்ளார். இவரது சொத்து மதிப்பு 6 ஆயிரம் கோடி.

இந்நிலையில் இவரின் மகன் ட்ராவ்யா தொலாக்கியா அமெரிக்காவில் எம்.பி.ஏ. படித்துவிட்டு சொந்த ஊர் திரும்பியுள்ளார். 21 வயதே நிரம்பிய ட்ராவ்யா தொலாக்கியாவுக்கு பணம் மற்றும் சமூக அந்தஸ்து, எல்லாவற்றுக்கும் மேலாக உழைப்பின் அருமையைப் புரிய வைக்கவேண்டும் என்று சாவ்ஜி விரும்பியுள்ளார். இதனை மகனிடமும் கூறியுள்ளார். அவரும் தந்தைப் பேச்சிற்கு மதிப்புக்குக் கொடுத்து தந்தையின் சொல்படி நடந்து கொண்டுள்ளார்.

இது குறித்து சாவ்ஜி தொலாக்கியா கூறுகையில், “என்மகனிடம் நான் சொன்னது ஒன்றுதான். வேலை தேடுவதும் அந்த வேலையைத் தக்கவைத்துக் கொள்ள படும் சிரமங்களையும், சம்பாதிக்கும் பணத்தின் முக்கியத்துவத்தையும் உணர வேண்டும். அதனால் நமது மாநிலம் அல்லாத ஊருக்குச் சென்று உன்னுடைய திறனால் வேலை தேடி சம்பாதித்து ஒருமாதம் வாழ்ந்து காட்டு. எதற்கும் என்னுடைய பெயரை செல்வாக்கை எந்த இடத்திலும் பயன்படுத்தக் கூடாது என்றேன்.

அவரும் அதே போல வாழ்ந்து காட்டியுள்ளார்.” என்கிறார் நெகிழ்வாக.
தந்தையின் சவாலை வெற்றிகொண்ட ட்ராவ்யா தொலாக்கியா தெரிவிக்கையில், ‘அப்பாவின் சொல்படி வேலை தேட நான் தேர்ந்தெடுத்த மாநிலம் கேரளா. எனக்கு மலையாளம் தெரியாது. அங்கு அதிகம் இந்தி மொழி தெரிந்தவர்களும் இல்லை.ஆனாலும் பல இடங்களில் வேலை தேடினேன்.

கொச்சி முழுக்க 60 நிறுவனங்களில் வேலை தேடினேன். கிடைக்கவில்லை. ஆனாலும் மனம் தளரவில்லை. இறுதியாக பேக்கரி ஒன்றில் வேலை கிடைத்தது. அடுத்துஅழைப்பு மையம் ஒன்றிலும், மெக் டொனால்ட் கடையிலும் வேலை பார்த்தேன். எல்லாமே சிறு சிறு வேலைகள்தான். ஒரு மாதத்தில் 4000 மட்டுமே சம்பாதிக்க முடிந்தது. வேலை இல்லாமல் இருப்பதும் அதைத் தேடி அலைவதும் எவ்வளவு கொடுமையானது என்பதை உணர்ந்து கொண்டேன்.

இந்தச் சமயத்தில்தான், நான் வேலை செய்யும் பேக்கரிக்கு வந்த ஒருவர் எனது வேலையைப் பார்த்து இம்ப்ரஸ் ஆகியுள்ளார். அவர் தான் பணிபுரியும் தனியார் நிதி நிறுவனத்தில் வேலை வாங்கித் தருவதாகக் கூறி அழைத்தார். ஆனால் அப்போது அவருடன் இருந்த நபர்கள் ‘இவரைப் பற்றி ஒன்றும் தெரியாத நிலையில் அவருக்கு வேலை வாங்கித் தரவேண்டாம் என்று கூறினர். இருப்பினும் எனது வேலைத்திறன் அவருக்குப் பிடித்துப் போகவே புதிய வேலைக்குப் பரிந்துரைத்தார். இதற்கிடையே எனது தந்தை நிறுவனத்தில் இருந்து போன் அழைப்பு வந்துள்ளது.

என் மீது நம்பிக்கை வைத்து வேலைக்கு ஏற்பாடு செய்த அவருக்கு நன்றி தெரிவித்து, நான் யார் என்றும் என்ன நிலையில் வேலைக்கு வந்துள்ளேன் என்பதை அவரிடம் விளக்கிக் கூறியுள்ளார்கள். இதனால் இன்ப அதிர்ச்சிக்கு ஆளான அவர் என்னை மனமார வாழ்த்தினார்.

விரைவில் எனது சொந்த ஊருக்குச்  செல்கிறேன்.  தந்தையின் விருப்பத்தை நிறைவேற்றிய மனதோடு குஜராத் பயணமாகிறேன். இந்த இடைப்பட்ட காலத்தில் நான் கற்றுக் கொண்ட ஒரு முக்கிய விஷயம், சக மனிதனுடன் அன்பும் கரிசனமும் கொண்டு பழக வேண்டும் என்பதுதான்” என்றார் வாழ்வின் புரிதலோடு.