கம்பஹா – வெலிவேரிய பியரத்ன மாவத்த பிரதேசத்தில் கூரிய ஆயுதத்தினால் தாக்கப்பட்டு வர்த்தகர் ஒருவர் கொலை செய்யப்பட்டுள்ளார்.நேற்று மதியம் அவரது வீட்டில் வைத்து குறித்த நபர் கொலை செய்யப்பட்டுள்ளதாக பொலிஸார் தெரிவித்துள்ளனர்.

இதேவேளை, கொலை செய்த நபர் யார் என்பது இதுவரையில் அறியப்படவில்லை என குறிப்பிடப்பட்டுள்ளது.இந்த கொலை சம்பவம் தொடர்பில் வெலிவேரியா பொலிஸார் மேலதிக விசாரணைகளை முன்னெடுத்து வருகின்றமை குறிப்பிடத்தக்கது.

கதிர்காமம் யாத்திரை செல்வோருக்கு நாய் இறைச்சி விற்பனை செய்யப்படுவதாக எச்சரிக்கை விடுக்கப்பட்டுள்ளது.

வேட்டையாடப்பட்ட மான், மரை போன்ற விலங்குகளின் இறைச்சி என்ற போர்வையில் யாத்திரீகர்களுக்கு நாய் இறைச்சி விற்பனை செய்யப்படுவதாக “அஹிங்சா ஸ்ரீலங்கா” என்ற அமைப்பு தெரிவித்துள்ளது.

விலங்குகளின் உரிமைகளுக்காக குரல் கொடுக்கும் ஓர் அமைப்பாக இந்த அமைப்பு திகழ்கின்றது.

கதிர்கால எசல யாத்திரை காலத்தில் அங்கு செல்லும் யாத்திரீகர்கள் வேட்டையாடப்பட்ட இறைச்சிகளை கொள்வனவு செய்வதில் ஆர்வம் காட்டி வருகின்றனர்.

அவ்வாறான நபர்களை இலக்கு வைத்து நாய் இறைச்சி விற்பனை மேற்கொள்ளப்படுவதாக அஹிங்சா ஸ்ரீலங்கா அமைப்பு தெரிவித்துள்ளது.

கடந்த காலங்களிலும் அவ்வப்போது இவ்வாறு நாய்கள் இறைச்சிக்காக வெட்டப்பட்டு விற்பனை செய்யப்பட்ட போதிலும், இம்முறை திட்டமிட்ட அடிப்படையில் நாய் இறைச்சி விற்பனை செய்யப்படுவதாக எச்சரிக்கை விடுக்கப்பட்டுள்ளது.

செல்லக் கதிர்காமத்திற்கு அருகாமையில் ஒர் இடத்தில் நாய்கள் பிடித்துச் செல்லப்பட்டு கட்டி வைக்கப்பட்டுள்ளதாகவும், யாத்திரீகர்கள் வேட்டையாடப்பட்ட மிருகங்களின் இறைச்சி வேண்டுமெனக் கோரினால் இந்த நாய்கள் வெட்டப்பட்டு விற்பனை செய்யப்படுவதாகத் தெரிவிக்கப்படுகிறது.

குறித்த பகுதியில் நாய்களின் தலைகளைக்கொண்ட பைகள் அண்மையில் மீட்கப்பட்டிருந்தமை குறிப்பிடத்தக்கது.

ஏற்கனவே, மிருக வேட்டைக்காக விசம் கலந்த நீரைப் பயன்படுத்தி விலங்குகள் கொல்லப்பட்டு இறைச்சிக்காக விற்பனை செய்யப்படுவதாக தகவல்கள் வெளியாகியிருந்தமை குறிப்பிடத்தக்கது.

 
பிறந்த குழந்தையை கொலை செய்து கழிவறைக் குழிக்குள் வீசி பெண்ணொருவரை பொலிஸார் கைது செய்துள்ளனர். பேராதனை பிரதேசத்தில் இன்று மதியம் இந்த பெண் கைது செய்யப்பட்டுள்ளார்.

கைது செய்யப்பட்ட பெண்ணுக்கு ஏற்கனவே 12 மற்றும் 8 வயதான இரண்டு பிள்ளைகள் இருப்பதாக பொலிஸார் கூறியுள்ளனர்.
தனக்கு குழந்தை உண்டாகி இருப்பதை இந்த பெண் தன் கணவனுக்கு மட்டுமல்லாமல் குடும்ப சுகாதார தாதியிடம் மறைத்துள்ளார்.

பஸ் உரிமையாளரான இந்த பெண்ணின் கணவர் யாழ்ப்பாணத்திற்கு பயணம் ஒன்றை மேற்கொண்டிருந்த போது, கடந்த 11 ஆம் திகதி இந்த பெண் வீட்டில் குழந்தையை பிரசவித்து, அதனை கழிவறை குழியில் போட்டுள்ளதாக தெரியவந்துள்ளது.

தனக்கு ஏற்பட்ட அதிக இரத்த போக்கு காரணமாக பெண் வைத்தியசாலைக்கு சென்றுள்ளார். பிரசவத்தின் போது குழந்தை இறந்து விட்டதாகவும் தான் அதனை கழிவறை குழியில் போட்டு விட்டதாகவும் பெண் கூறியுள்ளார்.

இதேவேளை குறித்த பெண் தவறான உறவின் மூலம் இக்குழந்தையை பிரசவித்து அதனை கொன்றிருக்கலாம் என பொலிஸார் சந்தேகம் வெளியிட்டுள்ளனர்.

மேலும், இந்த குழந்தையின் பிரேத பரிசோதனைகள் இன்று நடைபெறவுள்ளதாகவும் தெரிவிக்கப்பட்டுள்ளது.

திருமணம் செய்து கொண்ட மனைவியை வீட்டில் இருந்து விரட்டி விட்டு கள்ள காதலியுடன் குடும்பம் நடத்திக்கொண்டு மற்றுமொரு யுவதியை திருமணம் செய்த இளைஞன் கொலை செய்யப்பட்டுள்ளார்.

மூன்றாவதாக திருமணம் செய்த யுவதியின் தந்தை கத்தியால் குத்தியதன் காரணமாக இந்த மரணம் சம்பவித்துள்ளதாக தெரிவிக்கப்பட்டுள்ளது.

உயிரிழந்த இளைஞன் கள்ள காதலியுடன் குடும்பம் நடத்தியதில் அவருக்கு ஒரு பிள்ளை இருப்பதாக பொலிஸார் தெரிவித்துள்ளனர்.
பதுளை எல்ல உடஹராவ பிரதேசத்தில் இந்த சம்பவம் நடந்துள்ளது.

மூன்றாவதாக திருமணம் செய்து கொண்ட யுவதியின் தந்தை, இந்த இளைஞனை தேடி அவர்களின் வீட்டுக்கு சென்றுள்ளார்.

வீட்டுக்கு சென்று சுமூகமாக உரையாடிக்கொண்டிருந்த யுவதியின் தந்தை திடீரென தான் கொண்டு வந்திருந்த ரம்போ கத்தியால், இளைஞரை குத்தியுள்ளார்.

இதில் படுகாயமடைந்த இளைஞன் பண்டாரவளை மற்றும் தியத்தலாவ வைத்தியசாலைகளில் சிகிச்சைக்காக அனுமதிக்கப்பட்டு பின்னர் தேசிய வைத்தியசாலைக்கு மாற்றப்பட்டு சிகிச்சை பலனின்றி நான்கு நாட்களில் உயிரிழந்துள்ளார்.

23 வயதான இளைஞனே இவ்வாறு உயிரிழந்துள்ளார். கத்தியால் குத்திய யுவதியின் தந்தை ஒரு அரச ஊழியர் எனவும் அவர் கைது செய்யப்பட்டுள்ளதுடன் எதிர்வரும் 23ஆம் திகதி வரை விளக்கமறியலில் வைக்கப்பட்டுள்ளதாகவும் எல்ல பொலிஸார் தெரிவித்துள்ளனர்.

கனடா நாட்டில் கடந்த சில ஆண்டுகளாக பல்வேறு கொள்ளை சம்பவங்களில் ஈடுப்பட்டு வந்த இலங்கை தமிழர் உட்பட இருவரை அந்நாட்டு பொலிசார் கைது செய்துள்ளதாக தகவல்கள் வெளியாகியுள்ளன.

ஓண்டாரியோ மாகாணத்தை நிரஞ்சன் கலைச்செல்வம்(32), ஷாகிலே ஹென்றி(20) மற்றும் ரஷீட் அஹம்த்(25) ஆகிய மூவர் தான் இந்த கொள்ளை சம்பவங்களில் ஈடுப்பட்டு வந்துள்ளனர். இவர்களில் நிரஞ்சன் கலைச்செல்வம் இலங்கை தமிழர் என கூறப்படுகிறது.

கடந்த அக்டோபர் 2014 முதல் டிசம்பர் 2015ம் ஆண்டு வரை மூவரும் பல்வேறு கொள்ளை சம்பவங்களில் ஈடுப்பட்டு வந்துள்ளனர்.

குறிப்பாக, நகை கடைக்காரர்களின் வீட்டு முகவரியை தெரிந்துக்கொண்டு அவர்களது வீட்டில் நுழைந்து துப்பாக்கி முனையில் கொள்ளை சம்பவங்களை அரங்கேற்றியுள்ளனர்.

பொலிசாரின் கண்களில் மண்ணை தூவுவதற்காக, இவர்கள் மூவரும் போலியான பிளாஸ்டிக் முகமூடிகளை அணிந்த பின்னரே கொள்ளையில் ஈடுப்பட்டுள்ளனர்.

நகைக்கடைக்காரர்களை அடையாளம் கண்டு அவர்களது கார்களில் GPS கருவியை பொருத்தி அவர்களை பின் தொடர்ந்து நூதனை முறையில் கொள்ளைகளை செய்துள்ளனர்.

இதுபோன்ற பல்வேறு சம்பவங்களில் பெரியவர்கள், குழந்தைகள் என பலர் இவர்களின் தாக்குதலுக்கு உள்ளாகியுள்ளனர்.

கொள்ளையர்களில் ஒருவரான நிரஞ்சன் கலைச்செல்வம் கடந்த 2007ம் ஆண்டில் துப்பாக்கி முனையில் நிகழ்த்தப்பட்ட கொள்ளைகளிலும் கைது செய்யப்பட்டுள்ளார்.

இவர்கள் மூவரும் Brampton நகரை சேர்ந்தவர்கள் என தெரியவந்துள்ள நிலையில், மூவரில் நிரஞ்சன் கலைச்செல்வம் மற்றும் ஷாகிலே ஹென்றி ஆகிய இருவரை தற்போது பீல் நகர பொலிசார் அதிரடியாக கைது செய்துள்ளனர்.

மூவரில் ஒருவரான ரஷீத் அஹமத் தலைமறைவாக உள்ளதால் அவரை பொலிசார் தீவிரமாக தேடி வருகின்றனர்.

பல்வேறு கொள்ளைகளில் ஈடுப்பட்டு வந்த மூவரில் இருவர் கைது செய்யப்பட்டுள்ளது Ontario மாகாண பொதுமக்களிடையே வரவேற்பை பெற்று வருகிறது என்பது குறிப்பிடத்தக்கது.

கத்திக்குத்துக்கு இலக்காகிய பெண் ஒருவர் வைத்தியசாலையில் அனுமதிக்கப்பட்ட நிலையில் உயிரிழந்துள்ளார்.

இந்த சம்பவம் திருகோணமலை சேனையூர் பகுதியில் இன்று இடம்பெற்றுள்ளது. சம்பவத்தில் அதே பகுதியை சேர்ந்த 41 வயதான இளங்குமார் சாந்தமலர் என்பவரே இவ்வாறு உயிரிழந்துள்ளார்.

சம்பவம் தொடர்பில் மேலும் தெரியவருவதாவது, சம்பவத்தில் உயிரிழந்த பெண் கடந்த இரண்டு ஆண்டுகளுக்கு முன்னர் அயல் வீட்டாருக்கு வட்டிக்குக் பணம் பெற்றுக்கொடுத்துள்ளார்.

எனினும், குறித்த பணத்தை மீள பெற்றுக்கொள்ள முடியாத அந்த பெண் பொலிஸில் முறைப்பாடு செய்துள்ளார்.

இவ்வாறு முறைப்பாடு செய்யப்பட்ட நாள் முதல் அயல் வீட்டுப்பெண்ணுக்கும், உயிரிழந்த பெண்ணுக்கும் இடையில் முறன்பாடு தோன்றியுள்ளது.

இந்த முறன்பாடு இன்று கைகலப்பாக மாறிய நிலையில், இந்த கத்திக்குத்து சம்பவம் இடம்பெற்றுள்ளதாக பொலிஸார் தெரிவித்துள்ளனர்.

இந்நிலையில், சடலம் பிரேத பரிசோதனைகளுக்காக தற்போது திருகோணமலை பொது வைத்தியசாலையில் வைக்கப்பட்டுள்ளது.

இதேவேளை, சம்பவம் தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.

சிலாபம் முந்தல் பகுதியில் உள்ள பாடசாலை ஒன்றின் ஆசிரியர் ஒருவர் மாணவன் ஒருவனை பூட்டினால் தாக்கிய நிலையில் குறித்த மாணவன் சிலாபம் வைத்தியசாலையில் அனுமதிக்கப்பட்டுள்ளார்.

சம்பவத்தில் காயமடைந்த மாணவன் முந்தல் வைத்தியசாலையில் அனுமதிக்கப்பட்டதன் பின்னர் மேலதிக சிகிச்சைக்காக சிலாபம் வைத்தியசாலைக்கு மாற்றப்பட்டுள்ளதாக எமது பிராந்திய செய்தியாளர் தெரிவித்துள்ளார்.

பாடசாலை நேரத்தில் நாடக பயிற்சியில் ஈடுபட்டமைக்காவே ஆசிரியர் தன்னை தாக்கியதாக மாணவன் தெரிவித்துள்ளார்.

நேற்று மாலை குறித்த சம்பவம் இடம்பெற்றுள்ளதுடன் தாக்குதலில் மாணவனின் தலையில் காயம் ஏற்பட்டுள்ளதாக தாயார் தெரிவித்துள்ளார்.

குறித்த பாடசாலையில் தரம் 9இல் கல்வி கற்கும் மாணவனே இவ்வாறு தாக்குதலுக்குள்ளாகியுள்ளார்.