பெண் பொறியியலாளர் சுவாதியை கொன்ற கொலைகாரன் பற்றி சுவாதியின் தோழி பரபரப்பு தகவல்களை வெளியிட்டுள்ளார்.

சுவாதியை கொன்ற கொலைகாரன் 2 நாட்கள் பின்தொடர்ந்து வந்ததை நேரில் பார்த்ததாக அவர் திடுக்கிடும் தகவல்களை வெளியிட்டுள்ளார்.

சென்னை நுங்கம்பாக்கம் ரயில் நிலையத்தில் பெண் பொறியியலாளர் சுவாதி கொடூரமாக கொலை செய்யப்பட்ட சம்பவம் தமிழகத்தை உலுக்கியுள்ளது. சுவாதி கொல்லப்பட்ட சம்பவம் பற்றி தினம்தினம் திடுக்கிடும் தகவல்கள் வெளிவந்த வண்ணம் உள்ளது.

சுவாதியை கொன்ற கொலைகாரனின் கமரா உருவப் படத்தை பொலிஸார் வெளியிட்டுள்ளனர். பொலிஸார் வெளியிட்ட புகைப்படத்தில் இருக்கும் மர்மநபர்தான் சுவாதியை கொன்ற படுபாதக கொலையாளி என்று நுங்கம்பாக்கம் ரயில் நிலைய சிற்றுண்டிச்சாலை ஊழியரும், சுவாதியின் நெருங்கிய தோழியும் பொலிஸாரிடம் அடையாளம் காட்டியுள்ளனர்.

இதனால் புகைப்படத்தில் இருக்கும் மர்மநபர்தான் சுவாதியை கொன்ற கொலைகாரன் என்பது உறுதிபட தெரியவந்துள்ளது.

அந்த கொலைகாரன் பற்றி சுவாதியின் தோழி பரபரப்பு வாக்குமூலம் கொடுத்துள்ளார். அவரது வாக்குமூலம் விவரம் வருமாறு:-

நான் சுவாதி வேலைபார்க்கும் நிறுவனத்தில்தான் வேலை பார்க்கிறேன். சுவாதியை கொன்ற கொலைகாரனை நான் 2 நாட்கள் நேரில் பார்த்துள்ளேன்.

கடந்த 10ம் திகதியன்றும், 11ம் திகதியன்றும் நானும், சுவாதியோடு நுங்கம்பாக்கம் ரயில் நிலையத்துக்கு வந்தேன். அப்போது அந்த மர்மநபர் சுவாதியை பின்தொடர்ந்து வருவதை நான் பார்த்தேன்.

அந்த மர்ம நபர் என்னை பின்தொடர்ந்து வருகிறான். ஏன் என்று தெரியவில்லை. அவன் என்னிடம் என்னை உனக்கு தெரியவில்லையா என்று கேட்கிறான். ஆனால் உண்மையிலேயே அவனை எனக்கு யார் என்று தெரியவில்லை என்று சுவாதி என்னிடம் கூறினாள்.

இந்த விஷயத்தை லேசாக விடக்கூடாது அவனை கண்டிக்க வேண்டும் என்று நான் சுவாதியிடம் எச்சரித்தேன். அதைப் பார்த்துக் கொள்ளலாம் என்று சுவாதி என்னிடம் கூறினாள். ஆனால் அந்த படுபாவி சுவாதியை இந்த அளவுக்கு கொடூரமாக கொலை செய்வான் என்று நான் எதிர்பார்க்கவில்லை.

அந்த பாவியை கைது செய்து பொலிஸார் கடுமையான தண்டனை பெற்றுத் தரவேண்டும்.இவ்வாறு சுவாதியின் தோழி தனது வாக்குமூலத்தில் கூறியிருப்பதாக தெரிகிறது.

சுவாதியின் நண்பரிடம் பொலிஸார் நடத்திய விசாரணையில் அவரும் சில திடுக்கிடும் தகவலை வெளியிட்டார். பொலிஸாரிடம் அவர் கூறியதாவது..

நானும், சுவாதியும் ஒரே கல்லூரியில் படித்தோம். நல்ல நண்பர்களாக பழகிவந்தோம். திருவல்லிக்கேணியில் உள்ள எனது வீட்டிற்கு கூட சுவாதி வந்திருக்கிறாள்.

இரக்க சிந்தனையுள்ள சுவாதி நல்ல மனம் படைத்தவள். யாருக்கும் தீங்கு செய்ய நினைக்க மாட்டாள். கடந்த 18ம் தேதியன்று சுவாதி, என்னிடம் செல்போனில் பேசினாள். அதுதான் அவள் கடைசியாக என்னிடம் பேசிய பேச்சு.

மர்மநபர் ஒருவன் என்னை பின் தொடர்ந்து வருகிறான். கடந்த 10-ந் தேதியன்றும், 11-ந் தேதியன்றும் அவன் என்னை தொடர்ச்சியாக பின்தொடர்ந்து வந்தான் அவனை என்ன செய்வது என்று தெரியவில்லை என்று சுவாதி கூறினாள்.

அவனை யார் என்று அடையாளம் காட்டு நான் அவனை கண்டிக்கிறேன் என்று சுவாதியிடம் கூறினேன். அவன் அவ்வளவு பெரிய ஆளாக தெரியவில்லை. அவனை ஒன்றும் செய்யவேண்டாம். இந்த பிரச்சினையை விட்டுவிடு என்று சுவாதி அப்போது என்னிடம் கூறிவிட்டாள்.

நானும் அந்த பிரச்சினையை மறந்துவிட்டேன். சுவாதி கொலை செய்யப்படுவாள் என்று நான் கனவில் கூட நினைத்து பார்க்கவில்லை. சுவாதியை பின்தொடர்ந்த மர்ம நபர் இந்த அளவுக்கு கொடூரமாக கொலை செய்வான் என்றும் நினைக்கவில்லை.

அந்த படுபாவி கடுமையாக தண்டிக்கப்பட வேண்டும். இவ்வாறு சுவாதியின் நண்பர் பொலிஸ் விசாரணையில் தெரிவித்துள்ளார்.

தொடர்ந்து தனிப்படை பொலிஸார் கொலையாளியை கண்டுபிடித்து கைதுசெய்யும் முயற்சியில் இரவு, பகலாக ஈடுபட்டுள்ளனர்.

பொலிஸ் கமிஷனர் டி.கே.இராஜேந்திரன் நேற்றும் இதுதொடர்பாக உயர் அதிகாரிகளிடம் ஆலோசனை நடத்தினார்.

மும்மையில் கணவனை இழந்த பெண் ஒருவர் தனது ஆறு வயது மகனை கழுத்தை நெரித்து கொலை செய்துள்ள சம்பவம் அதிர்ச்சியை ஏற்படுத்தியுள்ளது.

Savitra Durnale(வயது 25) என்ற பெண் தனது ஆறு வயது ஆண் குழந்தையான தேவராஜ்க்கு உடல் நிலை சரியில்லை என கூறி மருத்துவமனைக்கு கொண்டு சென்றுள்ளார்.

அப்போது குழந்தையை பரிசோதித்த மருத்துவர்கள் ஏற்கனவே அவர் உயிரிழந்ததை அறிந்துள்ளனர். மேலும், குழந்தையின் உடம்பில் பல பகுதிகளில் காயங்கள் இருந்ததால் அவரின் மரணத்தில் மருத்துவர்களுக்கு சந்தேகம் ஏற்பட்டுள்ளது.

இதுதொடர்பாக மருத்துவர்கள் பொலிசில் புகார் அளித்துள்ளனர், பொலிசார் சந்தேகத்தின் அடிப்படையில் குழந்தையின் தாயிடம் விசாரணை நடத்தியுள்ளனர்.

அப்போது தாய் Savitra Durnale அளித்த வாக்கு மூலத்தில், தன் கணவன் இறந்த பிறகு, குழந்தையை வளர்க்க தன்னிடம் போதிய வசதி இல்லை எனவும், அதனால் தான் குழந்தையை கழுத்தை நெரித்து கொன்றுதாக தெரிவித்துள்ளார்.

இதனையடுத்து பொலிசார் அவரை கைது செய்ததுடன் அவர் மீது கொலை வழக்கு பதிவு செய்துள்ளனர்.

சமூக வலைத்தளங்களில் சுவாதி பற்றி கருத்துக்களை வெளியிடுவதற்கு பதில் அவள் ஆன்மா இறைவன் காலடியில் இளைப்பாற ஒவ்வொருவரும் பிரார்த்தனை செய்யும்படி சுவாதியின் சகோதரி வேண்டுகோள் விடுத்துள்ளார்.

கொலை செய்யப்பட்ட சுவாதியின் சகோதரி நித்யா இணையத்தள பக்கத்தில் ஒரு வேண்டுகோள் விடுத்துள்ளார். அதில் அவர் கூறியிருப்பதாவது..

எனது தங்கை சுவாதி பற்றி யூகத்தின் அடிப்படையில் பல்வேறு செய்திகள் சமூக வலைத்தளங்களில் வெளியிடப்படுகிறது. அவளது மூத்த சகோதரி என்ற முறையில் சுவாதி பற்றி சில உண்மைகளை உங்களுடன் பகிர்ந்து கொள்ள விரும்புகிறேன்.

அவள் மிகவும் குழந்தைத் தனமான குணம் கொண்டவள். மென்மையாகவே பேசுவாள். கடவுளுக்கு பயந்து நடந்தவள். சுந்தரகாண்டம், பஞ்சாங்கம் படிக்காமல் மற்றும் அர்ச்சதை தூவி கொள்ளாமல் அவள் ஒருநாள் கூட வீட்டை விட்டு வெளியில் காலடி எடுத்து வைத்ததில்லை.

தினமும் ரெயிலில் வேலைக்கு செல்லும் போது விஷ்ணு சகஸ்ரநாமம் உச்சரித்தபடியேதான் செல்வாள்.

அவள் வேலைக்கு செல்லும் வழியில் சிங்க பெருமாள் கோவில் இருப்பதால் தவறாமல் நரசிம்மர் ஆலயத்துக்கு செல்வதை வழக்கத்தில் வைத்திருந்தாள். அதுபோல திருமளிகையில் உள்ள ஆச்சாரியர் முதலியாண்டான் சுவாமிகள் ஆலயத்துக்கும் அவள் செல்வதுண்டு.

மாலை வேலை முடிந்து வீட்டுக்கு வரும் போது சூளைமேட்டில் உள்ள சீனிவாச பெருமாள் கோவிலுக்கு செல்லாமல் அவள் வருவதே கிடையாது. அந்த அளவுக்கு அவள் தெய்வ பக்தி நிறைந்தவள்.

ஸ்ரீரங்கத்தில் பிறந்து, சென்னையில் வளர்ந்த நாங்கள் பாரம்பரிய வழிபாடுகளில் மிகுந்த நம்பிக்கை உடையவர்கள். அடிக்கடி யாத்திரை சென்று நிறைய கோவில்களில் வழிபாடு செய்துள்ளோம்.

கடைசியாக நான் என் தங்கையுடன் மசினக்குடியில் உள்ள ஆலயத்திற்கு சென்று இருந்தோம். அங்குள்ள இயற்கை அழகை கண்டு என் தங்கை சுவாதி மிகவும் மகிழ்ச்சி அடைந்தாள். அவள் இயற்கையை மிகவும் விரும்புவாள். ஓரிரு தடவை மலையேற்றத்துக்கும் அவள் சென்று வந்துள்ளாள்.

சுவாதிக்கு என் குடும்பத்தில் உள்ள ஒவ்வொருவர் மீதும் அதிக பாசமுண்டு. அவளுக்கு நண்பர்கள் வட்டாரம் கிடையாது. சில நட்புகளே உண்டு. தேவையில்லாமல் அவள் எந்த பொழுதுபோக்குகளிலும் தன்னை ஈடுபடுத்திக் கொள்ள மாட்டாள்.

இத்தகைய பண்புடன் வளர்ந்த அவள் பற்றி யூகத்தின் படி பலரும் பலவிதமாக சமூக வலைத்தளங்களில் கருத்துக்களை வெளியிடுவது உண்மையிலேயே எங்களுக்கு மிகவும் அதிர்ச்சியாக உள்ளது.

எனவே அவள் பெயரில் சமூக வலைத்தளங்களில் யாரும் எந்தவித கருத்துக்களையும் வெளியிட வேண்டாம் என்று அனைவரையும் கேட்டுக் கொள்கிறோம்.

அப்படி வெளியிடப்படும் யூகத்தின் அடிப்படையிலான கருத்துக்கள் இந்த வழக்கில் குழப்பத்தை ஏற்படுத்திவிட வாய்ப்பு உள்ளது.

சமூக வலைத்தளங்களில் சுவாதி பற்றி கருத்துக்களை வெளியிடுவதற்கு பதில் அவள் ஆன்மா இறைவன் காலடியில் இளைப்பாற ஒவ்வொருவரும் பிரார்த்தனை செய்யும்படி கேட்டுக் கொள்கிறேன்.

எங்கள் அனைவரது வேண்டுகோளுமே, இத்தகைய சம்பவங்கள் எதிர்காலத்தில் நடைபெறாமல் தடுக்கப்பட வேண்டும் என்பதுதான்.

துரதிர்ஷ்டவசமாக கொலை செய்யப்பட்ட எனது தங்கையின் குணத்தையும், இமேஜையும் பாதிக்கும் வகையில் நாம் யாரும் தேவையில்லாமல் செயல்பட வேண்டாம். அது போல ஸ்பிரிட் ஆப் சென்னையையும் மடிய நாம் அனுமதிக்க கூடாது.

என்ன காரணத்தினாலோ சுவாதியை யாரும் காப்பாற்ற முன்வரவில்லை. அவற்றை இனி மறந்து விடுவோம். இனியாவது இத்தகைய கொடூரம் நடக்கும் போது அதை தடுத்து நிறுத்த நாம் அனைவரும் முன்வர வேண்டும் என்று ஒவ்வொருவரும் சபதம் எடுத்துக்கொள்வோம்.

மக்களை காக்க வேண்டிய பொறுப்பு அரசுக்கும், அதிகாரிகளுக்கும் மட்டுமல்ல பொதுமக்கள் ஒவ்வொருவருக்கும் உள்ளது என்பதை நான் நினைவுபடுத்த விரும்புகிறேன்.

நாம் ஒன்றிணைந்து செயல்பட்டால் நிறைய சாதிக்கலாம். சுவாதியின் கொலை சம்பவம் இந்த வி‌ஷயத்தில் நிறைய மாற்றங்களை ஏற்படுத்தும் என்ற நம்பிக்கை எனக்கு உள்ளது.

இவ்வாறு அதில் நித்யா கூறியுள்ளார்.

சேலம் மாவட்டத்தை சேர்ந்த வினுபிரியா தற்கொலை வழக்கில் ஒருவரை கைது செய்துள்ளதாக பொலிசார் தெரிவித்துள்ளனர். இதுகுறித்து சேலம் மாவட்ட எஸ்பி கூறியதாவது, வினுபிரியா தற்கொலை வழக்கில் விசைத்தறி தொழிலாளியான சுரேஷ் என்பவரை கைது செய்துள்ளதாக தெரிவித்துள்ளார்.

கைது செய்யப்பட்ட சுரேஷ் பொலிசில் அளித்துள்ள வாக்கு மூலத்தில், தான் வினுபிரயாவை ஒருதலையாக காதலித்து வந்ததாகவும். தனது காதலைப் அவர் புறக்கணித்தால், அவரை அவமானப்படுத்தவே புகைப்படத்தை ஆபாசமாக சித்திரித்து வெளியிட்டதாக கூறியுள்ளார்.

இது தொடர்பாக மேலும் சிலரிடம் விசாரணை நடைபெற்று வருவதாகக் கூறப்படுகிறது.

இதற்கிடையில் வினுப்ரியாவின் புகைப்படங்கள் சித்திரித்து வெளியிடப்பட்டது குறித்து புகார் அளித்த போது நடவடிக்கை எடுக்கவில்லை எனக்கூறப்படும் பொலிசார் இரு‌வருக்கு மெமோ அளிக்கப்பட்டுள்ளதாகவும். உரிய விளக்கம் அளிக்கவும் பொலிஸ் கண்காணிப்பாளர் உத்தரவிட்டுள்ளதாக கூறப்படுகிறது.