அண்மையில் நாட்டில் ஏற்பட்ட வெள்ளப்பெருக்கினால் கொழும்பு மாவட்டத்தில் மாத்திரம் 2500 டொன் குப்பைகள் சேகரிக்கப்பட்டுள்ளன.உள்ளுராட்சி மன்றங்கள் மற்றும் மாகாண சபைகள் அமைச்சு இதனை தெரிவித்துள்ளது. இவ்வாறு சேகரிக்கப்பட்டுள்ள குப்பைகள் கொலன்னாவ குப்பை பிரிவிடம் ஒப்படைக்கப்படவுள்ளதாக அந்த அமைச்சு குறிப்பிட்டுள்ளது.

500க்கும் அதிகமான உள்ளுராட்சி மன்றங்களின் அதிகாரிகளுடன் இணைந்து, இராணுவத்தினர், பொலிஸார் மற்றும் சிவில் பாதுகாப்பு படையினர் குப்பைகளை சேகரிக்கும் நடவடிக்கையில் ஈடுபட்டுள்ளனர்.கொலன்னாவ, மீதொட்டமுல்லை, கொட்டிகாவத்தை, முல்லேரியா, அங்கொடை, கொத்தட்டுவ, சேதவத்தை உள்ளிட்ட பகுதிகளிலிருந்து இவ்வாறு குப்பைகள் சேகரிக்கப்பட்டுள்ளதாக அந்த அமைச்சு மேலும் குறிப்பிட்டுள்ளது.

அனுமதியின்றி எவரேனும் யானைகளை வைத்திருப்பார் எனின் அது தொடர்பில் தமக்கு அறிவிக்குமாறு வலுவாதார அபிவிருத்திகள் மற்றும் வனஜீவராசிகள் அமைச்சர் காமினி ஜயவிக்ரம பெரேரா மக்களிடம் கோரிக்கை விடுத்துள்ளார்.

இவ்வாறு யானைகளை வைத்திருப்போருக்கு எதிராக நடவடிக்கை எடுக்கவுள்ளதாகவும் அவர் கூறியுள்ளார்.பொது மக்கள் தமது தகவல்களை தமது அமைச்சுக்கோ அல்லது இரகசிய பொலிஸாருக்கோ அல்லது சட்டத்தரணிக்கோ அறிவிக்க முடியும் என அமைச்சர் காமினி ஜயவிக்ரம பெரேரா மேலும் தெரிவித்துள்ளார்.

தற்போது வன ஜீவராசிகள் பொறுப்பில் உள்ள யானைகள் ஒரு போதும் விடுவிக்கப்பட மாட்டாது என சுட்டிக்காட்டியுள்ள அமைச்சர் விஹாரை உற்சவங்களுக்கும் யானைகள் வழங்கப்பட மாட்டாது எனவும் அவர் குறிப்பிட்டுள்ளார்.

புங்குடுதீவு மாணவி வித்தியாவின் தாயாரை அச்சுறுத்திய சந்தேகநபர்களின் உறவினர்களை எதிர்வரும் 16ஆம் திகதி வரை விளக்கமறியலில் வைக்க ஊர்காவல்துறை நீதவான் நீதிமன்ற பதில் நீதிபதி க.ஜீவராணி உத்தரவிட்டுள்ளார். ஊர்காவல்துறை நீதவான் நீதிமன்றில் குறித்த வழக்கு நேற்று விசாரனைக்கு எடுத்து கொள்ளப்பட்ட போது நீதிபதி இவ் உத்தரவை பிறப்பித்துள்ளார்.

வித்தியாவின் படுகொலை தொடர்பான வழக்கு விசாரனைகள் இடம்பெற்று வருகின்ற நிலையில், வித்தியாவின் தாயாரை சந்தேகநபர்களின் உறவினர்கள் அச்சுறுத்தியுள்ளனர். இந்நிலையில், கடந்த சில வழக்கு தவனைகளின் போது வித்தியாவின் தாயார் சட்டத்தரணி ஊடாக நீதிமன்றில் இது தொடர்பாக தெரிவித்திருந்தார்.அதன்படி இது தொடர்பாக விசாரனை செய்யுமாறு ஊர்காவல்துறை பொலிஸாருக்கு நீதிவான் உத்தரவிட்டிருந்தார்.

வௌ்ளவத்தை பகுதியில் வீடுகளுக்கு சென்று வீட்டில் உள்ள பெண்களை அச்சுறுத்தி நகைத் திருட்டில் ஈடுபட்டு வந்த பெண் ஒருவரை பொலிஸார் கைது செய்துள்ளனர்.

வீடுகளுக்கு சென்று கூரிய ஆயுதத்தை காட்டி பெண்களை அச்சுறுத்தி அவர்களின் தங்கச் சங்கிலிகளை அபகரித்து வந்த பெண் ஒருவரே கைது செய்யப்பட்டுள்ளதாக பொலிஸார் தெரிவித்தனர்.

இந்த பெண் தொடர்பில் தமக்கு மூன்று முறைப்பாடுகள் கிடைக்கப் பெற்றுள்ளதா பொலிஸார் கூறினர்.

மாளிகாவத்தையை வசிப்பிடமாகக் கொண்ட பெண் ஒருவரே பொலிஸாரினால் கைது செய்யப்பட்டுள்ளார்.

சகோதரிகளான சிறுமிகள் இருவருக்குச் சித்திரவதை செய்த முறைப்பாட்டின் அடிப்படையில் குறித்த சிறுமிகளின் சிறிய தாய் கைது செய்யப்பட்டுள்ளார்.

இந்த சம்பவம் நேற்று மாலை இடம்பெற்றுள்ளதாக ஏறாவூர் பொலிஸார் தெரிவித்துள்ளனர். சகோதரிகளான 8 வயது மற்றும் 10 வயதுடைய சிறுமிகள் இருவரே இவ்வாறு பாதிக்கப்பட்டுள்ளனர்.

சிறுவர் நன்நடத்தைப் பிரிவு அதிகாரிகளுக்கு பொதுமக்களிடமிருந்து கிடைக்கபெற்ற தகவலுக்கமைய இந்த கைது நடவடிக்கை மேற்கொள்ளப்பட்டுள்ளது.

ஏறாவூர் நகரிலுள்ள குறித்த வீட்டிற்குச் சென்ற அதிகாரிகள், சிறுமிகளைப் பரிசோதித்த போது அவர்கள் சித்திரவதை செய்யப்பட்மைக்கான தழும்புகளுடன் சிறுமிகளை மீட்டுள்ளனர்.

இந்நிலையில், மீட்கப்பட்ட சிறுமிகள் இருவரும் சிகிச்சைகளுக்காக மட்டக்களப்பு போதனா வைத்தியசாலையில் அனுமதிக்கப்பட்டுள்ளனர்.

இதனையடுத்து, சிறுமிகளின் பராமரிப்பாளராக இருந்துவந்த சிறிய தாய் மற்றும் அவரது உறவினர்களும் தொடர்ந்து சித்திரவதையை மேற்கொண்டு வந்தமை தொடர்பில் சிறுமிகள் வாக்குமூலம் வழங்கியுள்ளனர்.

அத்துடன், குறித்த சிறுமிகள் இருவரும் நீண்டகாலமாக பாடசாலைக்கு அனுப்பப்படவில்லை என்பதும் இதன் போது தெரியவந்துள்ளது.

சிறுமிகளின் தாய் மத்திய கிழக்கு நாடொன்றுக்கு பணிப்பெண்ணாகச் சென்றுள்ளார். அவர் செல்லும்போது சிறுமிகளை தனது தங்கையிடம் ஒப்படைத்துவிட்டுச் சென்றதாக சிறுமிகள் தெரிவித்துள்ளனர்.

இதேவேளை, குறித்த சம்பவம் தொடர்பில் ஏறாவூர் பொலிஸார் மேலதிக விசாரணைகளை முன்னெடுத்து வருகின்றனர்.

இந்து மதத்திலிருந்து கிறிஸ்தவ மதத்திற்கு மாறிய தனது மகளை அடித்து கொலை செய்த சம்பவம் ஒன்று அம்பாறை மத்தியமுகாம் பிரதேசத்தில் இடம்பெற்றுள்ளது.

இச்சம்பவத்தில் 21 வயதான செல்வநாயகம் ஜனனி என்பவரே இவ்வாறு அடித்து கொலை செய்யப்பட்டுள்ளதாக மத்தியமுகாம் பொலிஸார் தெரிவித்துள்ளனர்.

குறித்த சம்பவம் தொடர்பில் மேற்கொள்ளப்பட்ட விசாரணைகளின் பின்னர், குற்றத்தினை ஒப்புக்கொண்ட கொலை செய்யப்பட்டவரின் தாயார் இன்று மாலை கைது செய்யப்பட்டுள்ளார்.

சம்பவம் தொடர்பில் மேலும் தெரியவருவதாவது, கைது செய்யப்பட்டுள்ள சந்தேகநபரின் ஐந்தாவது பிள்ளையான செல்வநாயகம் ஜனனி திருமணம் முடித்து கணவன் வீட்டில் வாழ்ந்து வந்துள்ளார்.

தனது கணவன் வெளிநாடு சென்றுள்ள நிலையில் இந்து மதத்தினை தழுவி வந்த ஜனனி கிறிஸ்தவ மதத்திற்கு மாறியுள்ளார்.

இந்நிலையில் கடந்த 31ஆம் திகதி தனது தாயாரின் வீட்டிற்கு வந்த ஜனனிக்கும், தாய்க்கும் இடையில் மதம் மாறியமை தொடரிபில் வாய்தர்க்கம் ஏற்பட்டுள்ளது.

இதன் போது கட்டில் பலகையினை கொண்டு தாய் தாக்கியதையடுத்து ஜனனி சம்பவ இடத்திலேயே உயிரிழந்துள்ளார்.

இதனையடுத்து, உயிரிழந்த மகளின் உடலை தனது வீட்டிற்கு பின்பகுதியில் உள்ள நிலத்தில் புதைத்ததுடன், தனது மகளை காணவில்லை எனவும் தெரிவித்துள்ளார்.

இதனையடுத்து பொலிஸார் மேற்கொண்ட விசாரணைகளின் போது தனது குற்றத்தினை ஒத்துக்கொண்ட தாய், இச்சம்பவத்தினை பொலிஸாருக்கு வாக்குமூலமாகவும் வழங்கியுள்ளார்.

இந்நிலையில், குறித்த சந்தேகநபரை இன்று மாலை கைது செய்துள்ள பொலிஸார், சடலத்தினை தோண்டுவதற்காக நீதிமன்ற அனுமதியினை பெற்றுக்கொள்வதற்கான நடவடிக்கையினையும் மேற்கொண்டுள்ளனர்.

முன்னாள் ஜனாதிபதி மஹிந்த ராஜபக்சவிற்கு வழங்கப்பட்ட இராணுவப் பாதுகாப்பு இன்றுடன் முழுமையாக நீக்கப்படவுள்ளது.

முன்னாள் ஜனாதிபதி மஹிந்த ராஜபக்சவிற்கு வழங்கப்பட்டிருந்த இராணுவப் பாதுகாப்பின் ஒரு தொகுதி இதற்கு முன்னதாக நீக்கப்பட்டிருந்தது.

பாதுகாப்பு வழங்கி வந்த எஞ்சிய படை அதிகாரிகளும் இராணுவ உத்தியோகத்தர்களும் இன்று வாபஸ் பெற்றுக் கொள்ளப்படவுள்ளதாக இராணுவத் தலைமையகம் அறிவித்துள்ளது.

இந்த உத்தரவிற்கு அமைய முன்னாள் ஜனாதிபதி மஹிந்த ராஜபக்சவிற்கு பாதுகாப்பு வழங்கிய இராணுவ அதிகாரிகளும் உத்தியோகத்தர்களும் இன்று அல்லது நாளை அளவில் முழுமையாக வாபஸ் பெற்றுக் கொள்ளப்படவுள்ளனர்.

மஹிந்தவின் பாதுகாப்பு கடமையில் ஈடுபடுத்தப்பட்டிருந்த இராணுவ உத்தியோகத்தர்களின் ஒரு தொகுதியினர் மே மாதம் 2ம் திகதி நீக்கப்பட்டிருந்தனர்.

ஏனையவர்களை வாபஸ் பெற்றுக் கொள்ளுமாறு சில வாரங்களுக்கு முன்னதாக உத்தரவிட்ட போதிலும், பின்னர் அந்த உத்தரவு இடைநிறுத்தப்பட்டது.

இதேவேளை, மஹிந்தவின் இராணுவப் பாதுகாப்பை நீக்க வேண்டாம் என ஜனாதிபதி மைத்திரிபால சிறிசேனவிடம் நேற்று முன்தினம் பெவிதி ஹன்ட அமைப்பு கோரியிருந்தமை குறிப்பிடத்தக்கது.

விளையாட்டுத்துறை அமைச்சர் தயாசிறி ஜயசேகரவுக்கும், தனக்கும் இடையில் முரண்பாடுகள் ஏற்பட்டுள்ளதாக ஊடகங்கள் வெளியிட்டுள்ள கருத்தை இலங்கை அணியின் வீரரான திலகரட்ன டில்சான் மறுத்துள்ளார்.

மேலும் ஊடகங்களில் வெளிவந்த தகவல்கள் அனைத்தும் பொய்யானவையே என குறிப்பிட்டுள்ள டில்சான் தானும், அமைச்சரும் சந்தித்து ஏறக்குறைய 4 மாதங்கள் ஆவதாகவும் தெரிவித்துள்ளார்.

இறுதியாக அமைச்சர் தயாசிறியை பங்களாதேசில் இடம்பெற்ற ஆசிய கிண்ண கிரிக்கெட் போட்டியின் போதே சந்தித்ததாக டில்சான் மேலும் குறிப்பிட்டுள்ளார்.

அத்துடன் தனக்கும், விளையாட்டுத்துறை அமைச்சருக்கும் இடையில் பிரச்சினைகளை உருவாக்க மேற்கொள்ளப்படும் போலிப் பிரச்சாரம் என்றும் டில்சான் சுட்டிக்காட்டியுள்ளார்.

இந்தத் தகவல்களை டில்சான் தனது டுவிட்டர் வலைத்தளத்தில் பதிவிட்டுள்ளமை சுட்டிக்காட்டத்தக்கது.

இதேவேளை டில்சானின் கருத்துக்களை ஆமோதிக்கும் வகையில் நேற்றைய தினம் விளையாட்டுத்துறை அமைச்சரின் ஊடக செயலாளரும் செய்தி வெளியிட்டிருந்தமை குறிப்பிடத்தக்கது.

காட்டு யானை தாக்கியதில் முதலாம் ஆண்டில் கல்வி பயிலும் 6 வயது சிறுமி பரிதாபகரமான முறையில் பலியான சம்பவம் மட்டக்களப்பு வவுணதீவு பிரதேசத்தில் இடம் பெற்றுள்ளது.

6 வயதுடைய இராசையா ரோஜினி என்ற சிறுமியே காட்டு யானையின் தாக்குதலில் உயிரிழந்துள்ளார்.

சம்பவத்தில் சிறுமியின் தந்தை படுகாயமடைந்து மட்டக்களப்பு போதனா வைத்தியசாலையில் அனுமதிக்கப்பட்டுள்ளார்.

நேற்றிரவு 9.00 மணியளவில் வவுணதீவு கற்பகக்கேணி கிராமத்தில் குறித்த சம்பவம் இடம்பெற்றதாக தெரிய வருகின்றது.

பலியான சிறுமியின் சடலம் மட்டக்களப்பு போதனா வைத்தியசாலையில் வைக்கப்பட்டுள்ளது. வவுணதீவு பொலிசார் விசாரணைளை மேற்கொண்டு வருகின்றனர்.

குறித்த பகுதியில் காட்டு யானையின் தாக்குதலினால் பலர் உயிரிழந்துள்ளமை குறிப்பிடத்தக்கது.