வடமத்திய மாகாண பாடசாலைகளின் கல்வி நடவடிக்கைகள் நண்பகல் 12 மணி வரை மட்டுப்படுத்தப்பட்டுள்ளது.

வடமத்திய மாகாணத்தின் தேசிய பாடசாலைகள் தவிர்ந்த அனைத்து பாடசாலைகளும் இன்று (02.05) முதல், மீள் அறிவித்தல் வழங்கப்படும் வரை நண்பகல் 12 மணி வரை மாத்திரம் கல்வி நடவடிக்கைகள் மட்டுப்படுத்தப்பட்டுள்ளது.

நிலவும் அதிக வெப்பம் காரணமாக வட மத்திய மாகாணத்தின் தேசிய பாடசாலைகள் தவிர்ந்த அனைத்து பாடசாலைகளினதும் கல்வி நடவடிக்கைகளை 12 மணியுடன் நிறைவு செய்வதற்கு தீர்மானிக்கப்பட்டுள்ளதாக வட மத்திய மாகாண கல்வி அமைச்சின் செயலாளர் டபிள்யூ.டி.ஏ. மானெல் நியூஸ்பெஸ்ட்டுக்கு தெரிவித்தார்.

தற்போது நிலவும் அதிக வெப்பம் காரணமக மாணவர்களுக்கு நோய்த்தாக்கம் ஏற்படக்கூடிய சாத்தியக்கூறுகள் இருப்பதாக அவர் குறிப்பிட்டார்.

பாடசாலை நேரத்தில் அதிக வெப்பம் காரணமாக வகுப்பறைகளிலும், வெளியிலும் நடமாட முடியாமையாலும், பாடசாலைகளை மூடுமாறு பொலன்னறுவை மாவட்ட இடர்முகாமைத்துவத்தும் மற்றும் பாடசாலை நிர்வாகத்தினால் மாகாண கல்வியமைச்சிடம் வேண்டுகோள் விடுக்கப்பட்டது.

அதன் பிரகாராம் இந்த தீர்மானம் எடுக்கப்பட்டுள்ளதாகவும் வட மத்திய மாகாண கல்வி அமைச்சின் செயலாளர் டபிள்யூ.டி.ஏ. மானெல் சுட்டிக்காட்டினார்.

சிகிரியாவுக்கு சென்ற 23 பேர் குளவிக் கொட்டுக்கு இலக்காகி வைத்தியசாலையில் அனுமதிக்கப்பட்டுள்ளனர்.

இவர்களில் வௌிநாட்டுப் பிரஜைகள் உட்பட ஆறு பெண்கள், 13 ஆண்கள் மற்றும் 03 சிறுவர்களும் அடங்குவதாக தெரியவந்துள்ளது.

வட மாகாண சபையின் அலுவலக உதவியாளர் பதவிகளுக்காக விண்ணப்பம் செய்தவர்களில் 250 விண்ணப்பதாரிகள் பட்டதாரிகள் எனத் தெரிவிக்கப்படுகிறது.

வட மாகாண சபையில் அலுவலக உதவியாளர் பதவிக்காக 40 வெற்றிடங்கள் நிரப்பப்படவுள்ளன. இதற்கான விண்ணப்பங்கள் அண்மையில் கோரப்பட்டிருந்தது.

மொத்தமாக இந்தப் பதவிக்காக 8460 பேர் நாற்பது பதவிகளுக்காக விண்ணப்பம் செய்துள்ளனர். இந்த விண்ணப்பதாரிகளில் 250 பேர் பட்டதாரிகள் எனவும் அதில் ஒருவர் வியாபார முகாமைத்துவ விசேட பட்டம் பெற்றுக் கொண்டவர் எனவும் அவர் அலுவலக உதவியாளர் பதவிக்காக தெரிவு செய்யப்பட்டுள்ளதாகவும் தெரிவிக்கப்படுகிறது.

இலங்கையின் மத்திய வங்கியின் அறிக்கையின் படி கடந்த ஆண்டில் வேலையற்றோர் தொகை கடந்த ஆண்டில் 4.3 வீதமாக காணப்பட்டதுடன் இந்த ஆண்டு அந்த தொகை 4.6 வீதமாக உயர்வடைந்துள்ளது.

நாளைய தினத்தை பொது விடுமுறையாக அறிவிக்குமாறு இலங்கைத் தொழில் மற்றும் தொழில் உறவுகள் அமைச்சு கோரிக்கை விடுத்துள்ளது. தொழில் அமைச்சின் கடிதத் தலைப்பில் வெளியிப்பட்டுள்ள ஊடக அறிக்கையில் இந்தக் கோரிக்கை விடுக்கப்பட்டுள்ளது.

தொழில் மற்றும் தொழில் உறவுகள் அமைச்சர் ஜோன் செனவிரட்ன இந்தக் கோரிக்கையை அரசாங்கத்திடம் முன்வைத்துள்ளார்.

தனியார் துறையைச் சேர்ந்த அனைத்து ஊழியர்களுக்கும் (அத்தியாவசிய சேவைகள் தவிர்ந்த) பொது விடுமுறை வழங்குமாறு கோரியுள்ளார்.

தொழிலாளர் தினம் ஞாயிற்றுக்கிழமை அனுஸ்டிக்கப்படுவதனால் இவ்வாறு பொது விடுமுறை வழங்குமாறு கோரியுள்ளார்.

விடுமுறை வழங்குமாறு தொழிற் சங்கங்களும் தொழிலாளர்களும் தம்மிடம் கோரிக்கை விடுத்திருந்தனர் என அறிக்கையில் மேலும் குறிப்பிட்டுள்ளார்.

இதேவேளை, நாளை பொது விடுமுறை கிடையாது என உள்விவகார அமைச்சர் வஜிர அபேவர்தன தெரிவித்துள்ளார்.

தொழிலாளர் தினம் ஞாயிற்றுக்கிழமை அனுடிக்கப்பட்டாலும் நாளை பொதுவிடுமுறை வழங்கப்படாது என அவர் குறிப்பிட்டுள்ளார்.

புத்தாண்டு மற்றும் வெசாக் பௌர்ணமி தினத்தின் போது இவ்வாறு விசேட விடுமுறைகள் வழங்கப்பட்ட போதிலும் மே தினத்திற்காக இவ்வாறு விடுமுறை வழங்கப்படாது என அவர் கொழும்பு ஊடகங்களுக்கு தெரிவித்துள்ளார்.

யாழ் குடாநாட்டில் கட்டுக்கடங்காமல் ரவுடிகளின் அடாவடித்தனம் தொடர்ந்து செல்வதாக பொது மக்களினால் விசனம் வெளியிடப்படுகிறது.

இது தொடர்பாக நேற்று முன்தினம் வெள்ளிக்கிழமை மாலை வேளையில் வடமராட்சிகிழக்கு, நாகர்கோவில் பகுதியில் நடந்தேறியுள்ள சம்பவம் குறித்து இங்கு தெரிவிக்கப்படுகிறது.

பருத்தித்துறையில் இருந்து ஆழியவளை நோக்கிச் சென்ற தனியார் பேருந்தை நாகர்கோவில் சந்தியில் மறித்த ரவுடிக்கும்பல் நடத்துனரை இழுத்து விழுத்தி தாக்கியதுடன், தட்டிக் கேட்ட இளைஞனையும் கொட்டன்களால் தாக்கியுள்ளது.

வெள்ளிக்கிழமை மாலை 6 மணியளவில் இடம்பெற்ற இச் சம்பவம் தொடர்பில் மேலும் தெரிய வருவதாவது.

பருத்தித்துறையிலிருந்து ஆழியவளை நோக்கிச் சென்று கொண்டிருந்த தனியார் பேருந்து மாலை 6 மணியளவில் நாகர்கோவில் சந்தியை நெருங்கிய போது சந்தியில் 20-25 வரையிலான இளைஞர் குழு ஒன்று வீதியை மறித்து படுத்திருந்தது.

சாரதி பேருந்தை நிறுத்திய போது கையில் கொட்டன்களுடன் பேருந்தின் இரு கதவுகள் ஊடாகவும் சடுதியாக ஏறிய இளைஞர் குழுவினர், உடுத்துறையைச் சேர்ந்தவர்கள் யாராவது இருந்தால் கீழே இறங்குமாறு உரத்த குரலில் சத்தமிட்டனர்.

அதன்போது, அவர்களை ஏன் இறங்கச் சொல்கிறீர்கள் எனக் கேட்ட நடத்துனரை பிடித்து இழுத்து வீழ்த்தி சேட்டைக் கிழித்ததுடன், தொலைபேசியையும் பறித்து எறிந்து அவரின் தங்கச் சங்கிலியையும் அறுத்து அடாவடித்தனம் புரிந்தனர்.

இதனை பேருந்துக்குள் இருந்து அவதானித்துக் கொண்டிருந்த இளைஞர் ஒருவர், நடத்துனரை ஏன் அடிக்கிறீர்கள் எனக் கேட்ட போது, குறித்த இளைஞரின் தலையிலும் அவர்கள் கொட்டன்களால் தாக்கினர்.

இதனால் தலையில் அடிபட்ட அந்த இளைஞரும் மயங்கி விழுந்தார். வீழ்ந்தவரையும் சரமாரியாகத் தாக்கியதாக தெரிவிக்கப்படுகிறது.

இதனையடுத்து அங்கிருந்து புறப்பட்ட பேருந்தின் சாரதி, பேருந்தை மருதங்கேணி பொலிஸ் நிலையத்தில் கொண்டு சென்று நிறுத்தி பொலிஸாருக்கு விடயத்தைக் கூறியதுடன், காயமடைந்தவரை மருதங்கேணி வைத்தியசாலையில் அனுமதித்தனர்.

அங்கிருந்து அவர் மேலதிக சிகிச்சைக்காக பருத்தித்துறை ஆதார வைத்தியசாலைக்கு கொண்டு செல்லப்பட்டு, தற்போது அந்த இளைஞர் யாழ்.போதனா வைத்தியசாலைக்கு மாற்றப்பட்டதாகவும் தெரிவிக்கப்படுகிறது.

எனினும் மருதங்கேணி பொலிஸாரிடம் முறைப்பாடு செய்தும், பொலிஸார் எதுவித நடவடிக்கையும் எடுக்கவில்லை எனக் குற்றம் சுமத்தப்பட்டுள்ளது.

இதனையடுத்து நேற்று சனிக்கிழமை காலையில் இருந்து வடமராட்சி கிழக்கிற்கான சேவையில் ஈடுபடும் தனியார் பேருந்துகள் தமது சேவையினை பகிஷ்கரிப்புச் செய்தன.

தமக்கும் பேருந்துப் பயணிகளுக்கும் பாதுகாப்பில்லை என்பதால் பேருந்து சேவையில் ஈடுபட முடியாது என அவர்கள் கூறி பேருந்து சேவையை முற்றாக பகிஷ்கரித்தனர்.

இது விடயம் புலனாய்வுப் பிரிவு மூலம் மேலிடத்திற்கு தெரியவரவே பொலிஸார் உடனடியாக தலையிட்டதாக தெரிவிக்கப்படுகிறது.

உடனடியாக காயமடைந்த நபரை பருத்தித்துறை ஆதார வைத்தியசாலைக்குச் சென்று பொலிஸார் பார்வையிட்டதுடன், தனியார் பேருந்து சங்கத்தினருடனும் கலந்துரையாடினர்.

இக்கலந்துரையாடலின் போது வடமராட்சி கிழக்கு பிரதேச செயலர் திரு க.கனகேஸ்வரன் மற்றும் பொலிஸார் இணைந்து பேருந்து சாரதி, நடத்துனர் மற்றும் பயணிகளுக்கு எவ்வித இடையூறும் ஏற்படாது என உறுதி மொழி வழங்கப்பட்டதாக தனியார் சங்கத்தினர் தெரிவித்துள்ளனர்.

இதனையடுத்து நேற்று சனிக்கிழமை நண்பகலிலிருந்து பேருந்து சேவையில் ஈடுபடப்போவதாக தெரிவித்த அவர்கள் ஏதேனும் இடை யூறுகள் ஏற்பட்டால் பொலிஸாரும், பிரதேச செயலருமே பொறுப்பேற்க வேண்டும் எனவும் கூறினர்.

அதேவேளை இச்சம்பவம் பற்றி வினவிய போது உடுத்துறைப் பகுதியில் விளையாட்டு நிகழ்வு ஒன்று நடைபெற்றதாகவும், அங்கு நடந்த விளையாட்டுப் போட்டியில் நாகர்கோவில் கிழக்கு பகுதியை சேர்ந்த குறித்த இளைஞர் குழுவினர் தோல்வியடைந்ததாகவும், அதனைப் பொறுக்கமாட்டாத குழுவினரே இந்த அடாவடித்தனம் புரிந்துள்ளதாகவும் அங்கிருந்து கிடைக்கும் தகவல்கள் தெரிவிக்கின்றன.

இந்தநிலையில் நாகர்கோவில் பகுதியில் தேடுதல் நடத்திய பொலிஸார் சந்தேகத்தின் பேரில் சிலரைக் கைது செய்துள்ளதாகவும், ஏனையோர்கள் தப்பியோடி விட்டதாகவும் தெரிவிக்கப்படுகிறது.

அனைத்து தனியார் துறை ஊழியர்களுக்கும் நாளை விடுமுறை அளிக்குமாறு, அமைச்சர் டப்ளியூ.டீ.ஜே.செனவிரத்ன கோரிக்கை விடுத்துள்ளார்.

இவ் வருடம் மே தினம் ஞாயிற்றுக்கிழமை வந்துள்ளதால் இதன்பொருட்டு நாளை விடுமுறை வழங்க நடவடிக்கை எடுக்குமாறு அவர் வேண்டுகோள் விடுத்துள்ளார்.

இதேவேளை, நாளை விடுமுறை வழங்க நடவடிக்கை எடுக்குமாறு தொழிற்சங்கங்கள் மற்றும் பெரும்பாலான மக்கள் தம்மிடம் கோரியுள்ளதாகவும் டப்ளியூ.டீ.ஜே.செனவிரத்ன சுட்டிக்காட்டியுள்ளார்.

எதுஎவ்வாறு இருப்பினும் நாளை அரசாங்க விடுமுறை தினமாக அறிவிக்கப்படவில்லை என, சுதேச விவகார அமைச்சு கூறியுள்ளமை குறிப்பிடத்தக்கது.

லிந்துலை பொலிஸ் பிரிவிற்குட்பட்ட நாகசேனை பம்பரக்கலை தோட்டத்தில் நேற்று (30.04.2016) மாலை இடம்பெற்ற பிறந்தநாள் வைபவம் ஒன்றில் உறவினர்களுக்கு இடையில் ஏற்பட்ட கைகலப்பில் பலத்த காயங்களுக்குள்ளான ஒருவர் லிந்துலை வைத்தியசாலையில் அனுமதிக்கப்பட்டுள்ளார். இச்சம்பவம் தொடர்பாக மேலும் தெரியவருவதாவது,

பம்பரக்கலை தோட்டத்தில் பிறந்தநாள் வைபவம் ஒன்றில் இடம்பெற்ற வீட்டில் மது அருந்திவிட்டு உறவின பெண் ஒருவருடன் தகாத உறவில் ஈடுப்பட முயன்ற நபர் ஒருவரை அப்பெண்ணின் கணவர் தாக்கியதன் மூலம் பலத்த காயங்களுக்குள்ளான நிலையில் வைத்தியசாலையில் சேர்க்கப்பட்டுள்ளார்.

இச்சம்பவத்தில் நபரை தாக்கியவர் உட்பட மேலும் இருவர் லிந்துலை பொலிஸாரால் கைது செய்யப்பட்டிருப்பதாக விசாரணைகளை மேற்கொண்டு வரும் லிந்துலை பொலிஸார் தெரிவித்தனர்.

குறித்த பிறந்தநாள் வைபவத்தில் மது அருந்திய நிலையில் ஆட்டம், பாடல்களுடன் சந்தோஷகளிப்பில் இருந்த வேளையில் நபர் ஒருவர் தனிமையில் இருந்த திருமணம் முடித்த பெண் ஒருவரிடம் தகாத உறவை மேற்கொள்ள முயற்சித்திருப்பதாகவும், இது தொடர்பாக அப்பெண் கணவரிடம் முறையிட்டதன் பின்னர் இந்த கைகலப்பு சம்பவம் இடம்பெற்றதாக விசாரணைகளை மேற்கொண்டு வரும் லிந்துலை பொலிஸார் மேலும் தெரிவித்தனர்.

5 வயதுக்கும் 16 வயதுக்கும் இடைப்பட்ட பிள்ளைகளை பாடசாலைகளுக்கு அனுப்பாத பெற்றோர் மீது சட்டநடவடிக்கை எடுக்கப்படவுள்ளது.

1977ஆம் ஆண்டு சட்டப்படி 5 வயது முதல் 14 வயது வரையிலான பிள்ளைகள் பாடசாலைக்கு கட்டாயம் சமுகமளிக்க வேண்டும் என்று குறிப்பிடப்பட்டுள்ளது. எனினும் அதனை 16 வயது வரையில் அதிகரிக்க தற்போது தீர்மானிக்கப்பட்டுள்ளது.

இதனைத்தவிர பிள்ளைகளின் பாடசாலை வரவுகள் தொடர்பில் கண்காணிக்கும், பொறுப்பு வலய கல்வி அதிகாரிகளை கொண்ட குழுவுக்கு நியமிக்கப்படவுள்ளது. இவர்கள் பாடசாலை இடைவிலகல்களை தடுத்து நிறுத்த நடவடிக்கைகள் எடுப்பார்கள்.

இந்தக் குழு, பிள்ளைகளை பாடசாலைகளுக்கு அனுப்பாத பெற்றோருக்கு எதிராகவும் சட்ட நடவடிக்கை எடுக்கும் அதிகாரத்தை கொண்டிருக்கும் என்று தெரிவிக்கப்படுகின்றது.

இந்த நடைமுறை இன்னும் இரண்டு மாதங்களுக்குள் நடைமுறைக்கு வரவுள்ளதாக தெரிவிக்கப்பட்டுள்ளது.