பொலிஸ் திணைக்களத்தில் உள்ள அனைத்து விஷேட பிரிவுகளுக்கும் வழங்கப்பட்டு வந்த எரிபொருள் மானியமானது இந்த ஆண்டு 15 வீதத்தால் குறைக்கப்பட்டுள்ளதாக பொலிஸ் தலைமையக தகவல்கள் தெரிவிக்கின்றன.பொலிஸ் நிர்வாகத்துக்கு பொறுப்பான சிரேஷ்ட பொலிஸ் மா அதிபர் காமினி நவரட்ன ஊடாக இந்தத் தீர்மானமானது அனைத்து பொலிஸ் பிரிவுகளுக்கும் அறிவிக்கப்ப்ட்டுள்ளதாக அந்த தகவல்கள் கேசரியிடம் சுட்டிக்காட்டின.

2016 ஆம் அண்டுக்கான வரவு செலவு திட்டத்தில் எடுக்கப்பட்ட முடிவுகளுக்கு அமையவே இந்த எரிபொருள் மானியமானது 15 வீததால் குறைக்கப்ப்ட்டுள்ளது. பொலிஸ் திணைக்களத்தில் உள்ள சுமார் 43 பிரிவுகளில் கடமையாற்றும் சிரேஷ்ட பிரதிப் பொலிஸ் மா அதிபர்கள், பிரதிப் பொலிஸ் மா அதிபர்கள், சிரேஷ்ட பொலிஸ் அத்தியட்சர்கள், பொலிஸ் அத்தியட்சர்கள், உதவி பொலிஸ் அத்தியட்சர்கள் மற்றும் பிரதான பொலிஸ் பரிசோதகர்களின் கவனத்திற்கு இந்த எரிபொருள் மானிய குறைப்பு பட்டியல் அனுப்பட்டுள்ளது.

சிறுவர் காப்பகமொன்றிலிருந்து ஹபராதுவ கல்லூரியொன்றுக்கு வரும் தாய், தந்தையற்ற அநாதைச் சிறுவனொருவன் அக்கல்லூரி அதிபரின் கடும் தாக்குதலுக்குள்ளாகி நேற்று களுகல வைத்தியசாலையில் சேர்க்கப்பட்டிருப்பதாக ஹபராதுவ பொலிஸார் தெரிவித்தனர்.

கல்லூரி ஆசிரியை ஒருவரின் கைப்பையிலிருந்த 170 ரூபா பணத்தைத் திருடியதாக தரம் 5இல் கல்வி கற்கும் இந்த மாணவன் மீது குற்றஞ்சாட்டப்பட்டிருந்ததாகவும், அதன் காரணமாகவே அதிபர் அவரை பிரம்பால் விளாசியிருக்கிறார் எனவும் தெரியவந்துள்ளது.காயப்பட்ட சிறுவனை வைத்தியசாலையில் சேர்க்க எவரும் முன்வரவில்லை.

விடயத்தைக் கேள்விப்பட்ட சிறுவர் காப்பகத்தின் கட்டுப்பாட்டாளரான பெண்மணியும் பாடசாலைக்கு வந்து சிறுவனை பார்வையிட்டபோதும் அவரும் சிறுவனை வைத்தியசாலைக்கு கூட்டிச் செல்லவில்லை.பாடசாலை முடிந்ததும் சிறுவர் காப்பகத்துக்குச் சென்ற சிறுவன் இரவு உணவையும் உண்ணாமல் படுத்துவிட்டார்.

இந்த அவலநிலையை யாரோ ஒருவர் ஹபாராதுவ பொலிஸாருக்குத் தெரிவித்ததையடுத்து சிறுவர் காப்பகத்துக்கு இரவு 10 மணியளவில் சென்ற பொலிஸார் சிறுவனை உடனடியாக வைத்தியசாலையில் சேர்க்குமாறு காப்பகக் காப்பாள பெண்மணிக்கு உத்தரவிட்டபின் சிறுவன் களுகல வைத்தியசாலைக்குக் கொண்டு செல்லப்பட்டிருக்கிறார்.

இந்தக் காப்பகத்திலுள்ள எல்லா சிறுவர்களும் பெற்றோரை இழந்தவர்கள் அல்லது அவர்களால் கைவிடப்பட்டவர்கள் எனவும்,இவர்கள் அனைவரும் நீதிமன்ற உத்தரவின்பேரில் இந்தக் காப்பகத்தில் சேர்க்கப்பட்டவர்கள் எனவும், அவர்கள் அனைவருமே இந்தக் கல்லூரியிலேயே கல்வி கற்கிறார்கள் எனவும் பிரதேசவாசிகள் தெரிவித்தனர்.ஹபாராதுவ பொலிஸார் இச்சம்பவம் தொடர்பில் மேலதிக விசாரணைகளை நடத்திவருகின்றனர்.

மாணவர்களை வரிசையில் செல்லுமாறு எச்சரித்த ஆசிரியர் ஒருவர், மாணவன் ஒருவரின் கல் தாக்குதலில் காயமடைந்து சிலாபம் மாவட்ட வைத்தியசாலையில் நேற்று சேர்க்கப்பட்டுள்ளார் என சிலாபம் பொலிஸார் தெரிவித்தனர்.சிலாபம் ஆனந்த தேசிய பாடசாலையில் நடந்த இந்தச் சம்பவத்தில் கல்லால் தாக்கிய மாணவன் அதே பாடசாலையில் தரம் 12இல் கல்வி பயிலும் 17 வயது மாணவன் எனவும், அவர் வரிசையை விட்டு விலகி நடந்ததால் ஆசிரியர் எச்சரித்ததாகவும் அதனால் கோபமடைந்தவர் அங்கு கிடந்த கல்லை எடுத்து ஆசிரியர் மீது எறிந்தார் எனவும் விசாரணைகளின்போது தெரியவந்துள்ளது என்று பொலிஸார் தெரிவித்தனர்.

தாக்குதலை மேற்கொண்ட மாணவனின் தாய் அதே பிரதேசத்திலுள்ள வேறொரு பாடசாலையில் அதிபராக பணிபுரிபவர் எனவும் தெரியவந்துள்ளது.

படித்தவர்கள் மற்றும் புத்திஜீவிகளின் பொறுப்பு நாட்டை விட்டுச் செல்வதன்றி நாட்டை கட்டியெழுப்புவதற்காக ஒன்றுபடுவதே என்று ஜனாதிபதி மைத்திரிபால சிறிசேன கூறியுள்ளார்.தனிப்பட்ட நன்மைகள் போன்றே நாட்டின் தேசிய நலன்களையும் கருத்திற்கொண்டு செயற்படுவது அனைவரினதும் பொறுப்பாகும் என்றும் ஜனாதிபதி கூறியுள்ளார்.

கொழும்பு தும்முல்ல ஸ்ரீ சம்புத்த ஜயந்தி மாளிகையில் இன்று நடைபெற்ற அரச சேவை பொறியியலாளர்கள் சங்கத்தின் 39வது வருடாந்த மாநாட்டில் கலந்து கொண்டு ஜனாதிபதி மைத்திரிபால சிறிசேன இதனை கூறியுள்ளார்.

இலவசக் கல்வியைப் பெற்றுக்கொண்டு சுதந்திரமாக நாட்டை விட்டு செல்வதற்கு படித்த இலங்கையர்களுக்கு சந்தர்ப்பம் இருப்பதாக கூறிய ஜனாதிபதி உலகில் அபிவிருத்தியை நோக்கி பயணித்த எந்தவொரு நாட்டிலும் அவ்வாறில்லை என்று கூறினார். சம்பளப் பிரச்சினைகள் பொறியியல் துறையினருக்கு மாத்திரமல்லாமல் அனைத்து துறைகளிலும் காணப்படுவதாகவும் ஜனாதிபதி கூறியுள்ளார்.

கல்கிஸ்ஸ பகுதியில் ஹெரோயின் வைத்திருந்த இரண்டு பெண்களை கல்கிஸ்ஸ பொலிஸார் நேற்றைய தினம் கைதுசெய்துள்ளனர்.56 வயதான குறித்த பெண்ணிடம் இருந்து 3 கிராம் 570 மில்லிகிராம் ஹெரோயினை பொலிஸார் கைப்பற்றியுள்ளதாக தெரிவித்துள்ளனர். இதேவேளை கல்கிஸ்ஸ பெலக்கடே என்ற இடத்தைச் சேர்ந்த 33 வயது பெண் ஒருவரையும் ஹெரோயின் வைத்திருந்த குற்றச்சாட்டில் பொலிஸார் கைதுசெய்துள்ளனர்.

குறித்த பெண்ணிடம் இருந்து 2 கிராம் 100 மில்லிகிராம் ஹெரோயினை பொலிஸார் கைப்பற்றியுள்ளதுடன் இந்த சந்தேக நபர்கள் இருவரையும் இன்றைய தினம் கல்கிஸ்ஸ நீதவான் நீதிமன்றில் ஆஜர்படுத்துவுள்ளதாக கல்கிஸ்ஸ பொலிஸார் தெரிவித்துள்ளனர்.

முல்லைத்தீவு முத்தையன்கட்டை சேர்ந்த இளைஞன் ஒருவர் கொழும்பில் வேலை செய்துவிட்டு விடுமுறைக்கு வீடு சென்றபோது, புகையிரதத்தில் வைத்து அவருடைய பணப்பை கொள்ளையர்களினால் கொள்ளையடிக்கப்பட்டுள்ளது.

குறித்த சம்பவத்தினால் அவருடைய வாகன அனுமதிப் பத்திரம் அடையாள அட்டை வங்கிஅட்டை சிறு தொகைப்பணம் என்பன திருட்டுபோய்யுள்ள நிலையில்,

குறித்த இளைஞனின் வங்கி அட்டையை பயன்படுத்தி 42000 ருபாய் பெறுமதியான பொருட்களை திருடர்கள் கொள்வனவு செய்துள்ளதாக இளைஞன் குறிப்பிட்டுள்ளார்.

இதுதொடர்பான முறைப்பாட்டை நேற்றுமுன்தினம் ஒட்டுசுட்டான் பொலிஸ் நிலையத்திற்கு அறிவித்துள்ளாதாகவும் பொலிஸார் மேலதிக விசாரணைகளை மேற்கொண்டுள்ளதாக ஒட்டுசுட்டான் பொலிஸ் அதிகாரி ஒருவர் குறிப்பிட்டுள்ளார்.

கடந்த 10 வருடங்களில் மஞ்சள் கடவையில் இடம்பெற்ற விபத்துக்களில் 917 பேர் உயிரிழந்துள்ளதாக பொலிஸ் தலைமையகம் அறிவித்துள்ளது.

2006 ஆம் ஆண்டு தொடக்கம் 2015 ஆண்டு வரை இடம்பெற்ற விபத்துக்களிலே அதிகளவானோர் உயிரிழந்துள்ளதாக சுட்டிக்காட்டப்பட்டுள்ளது.

மேலும், இந்த காலப்பகுதியில் இடம்பெற்ற விபத்துக்களில் 2442 பேர் கடும் காயங்களுக்கு உள்ளாகியுள்ளதாகவும் தெரிவிக்கப்பட்டுள்ளது.
இனிவரும் காலங்களில் இவ்வாறான விபத்துக்களை தடுக்க விசேட ஏற்பாடுகள் செய்யப்படவுள்ளதாகவும் தெரிவிக்கப்பட்டுள்ளது.