யாழ்ப்பாணம் – ஏழாலை பகுதியிலுள்ள பிரபல பாடசாலை ஒன்றின் மாணவர்கள் சுமார் ​25 பேர் திடீர் சுகயீனம் காரணமாக வைத்தியசாலையில் அனுமதிக்கப்பட்டுள்ளனர். கிணற்று நீர் விஷமானதாலேயே இவர்கள் இவ்வாறு சுகயீனமடைந்துள்ளதாக தெரியவந்துள்ளது.

பாதிக்கப்பட்ட மாணவர்கள் தற்போது யாழ் போதனா வைத்தியசாலையில் அனுமதிக்கப்பட்டுள்ளனர்.

இதேவேளை பாடசாலைக் கிணற்றில் இனந்தெரியாத சிலர் கிருமிநாசினியைக் கலந்துள்ளமையே இந்த சம்பவத்துக்கு காரணம் என, குறித்த பாடசாலை அதிபரால் பொலிஸாரிடம் முறைப்பாடு செய்யப்பட்டுள்ளதாக தெரிவிக்கப்படுகின்றது.

இன்று காலை மாணவர்கள் வழமைபோல் பாடசாலைக்குச் சென்று நீர் அருந்தியுள்ளதோடு, அதில் உயர்தர மாணவன் ஒருவர், அதிபரிடம் சென்று நீரில் கிரிமிநாசினி வாசனை வருவதாக முறைப்பாடு செய்ததாகவும் தெரிவிக்கப்படுகின்றது.

இதன் பின்னரே பாடசாலை தரப்பினரால் விரைந்து மாணவர்கள் வைத்தியசாலையில் அனுமதிக்கப்பட்டுள்ளதாக தெரிகிறது.

தமிழ் மொழியில் தேசிய கீதத்தைப் பாடலாம் என ஜனாதிபதி உறுதியளித்திருப்பதாக வௌியான தகவலை தமிழ் தேசிய கூட்டமைப்பு வரவேற்றுள்ளது.

அரசியலமைப்பில் வழங்கப்பட்ட உரிமைகளை நடைமுறைப்படுத்துவதற்கு புதிய ஜனாதிபதி நடவடிக்கை எடுப்பதற்கு முன்வந்துள்ளமை நல்லதொரு காரியம் என கூட்டமைப்பின் பேச்சாளரும், பாராளுமன்ற உறுப்பினருமான சுரேஸ் பிரேமச்சந்திரன் தெரிவித்துள்ளார் என பிபிசி கூறியுள்ளது.

“ஶ்ரீ லங்கா மாதா..” என்ற சுதந்திர இலங்கையின் தேசிய கீதத்தை சிங்கள மொழியில் ஆனந்த சமரக்கோன் இயற்றி இருந்தார். “பின்னர் ஶ்ரீ லங்கா தாயே..” என இதனை இலங்கைக் கவிஞர் எம்.நல்லதம்பி தமிழில் மொழி பெயர்த்தார்.

பாடசாலைகள் மற்றும் அனைத்து நிறுவனங்களிலும் 1951ம் ஆண்டு காலப்பகுதியில் இருந்து இலங்கையின் தேசிய கீதம் தமிழிலும் இசைக்கப்பட்டு வந்தது.

பல தசாப்தங்களாக இலங்கையின் தேசிய கீதம் இரு மொழிகளிலும் பயன்படுத்தப்பட்டு வந்தமை குறிப்பிடத்தக்கது. இந்தநிலையில் 2009ம் ஆண்டு இலங்கையில் நிலவிய யுத்தம் முடிவுக்கு கொண்டுவரப்பட்டதாக அறிவிக்கப்பட்ட பின்னர், ஜாதிக ஹெல உறுமய போன்ற, தேசிய சுதந்திர முன்னணி போன்ற சிங்களக் கட்சிகள் தமிழில் தேசிய கீதம் பாடுவதை தடைசெய்ய வலியுறுத்தின.

இதன்படி 2010ம் ஆண்டு டிசம்பர் 12ம் திகதி மஹிந்த ராஜபக்ஷ ஆட்சிக் காலத்தில் உள்விவகார அமைச்சராக இருந்த ஜோன் செனவிரத்ன தமிழில் தேசிய கீதத்தைப் பாட அனுமதிக்க முடியாது என்ற வகையில், அமைச்சரவைப் பத்திரம் ஒன்றைத் தாக்கல் செய்தார்.

இதன் பின்னர் தமிழில் தேசிய கீதத்தை இசைப்பதில் பல்வேறு சர்ச்சைகள் ஏற்பட்டு வந்தன.

அத்துடன் தமிழர் தரப்பில் தென்னாபிரிக்கா, கனடா போன்ற நாடுகளில் பல்வேறு மொழிகளில் தேசிய கீதம் இசைப்பதை மேற்கோள் காட்டி பல்வேறு வாதங்கள் முன்வைக்கப்பட்டும் வந்தன.

இந்தநிலையில் இலங்கையின் தேசிய கீதம் சிங்கள மொழியில் மாத்திரமே பாடப்பட வேண்டும் என்று முன்னைய அரசாங்கத்தினால் விதிக்கப்பட்டிருந்த கட்டுப்பாட்டை நீக்குவதற்குப் புதிய ஜனாதிபதி மைத்திரிபால சிறிசேன உறுதியளித்துள்ளதாக ஜனநாயக மக்கள் முன்னணியின் தலைவர் மனோ கணேசன் தெரிவித்துள்ளார்.

செவ்வாய்க்கிழமை நடைபெற்ற தேசிய நிறைவேற்று குழு கூட்டத்தில் இந்த விடயத்தை, தான் ஜனாதிபதியின் கவனத்திற்குக் கொண்டு வந்ததையடுத்தே இந்த உறுதி மொழி வழங்கப்பட்டுள்ளதாக அவர் கூறியுள்ளார்.

2014ம் ஆண்டுக்கான கல்விப் பொதுத்தராதர சாதாரண தரப் பரீட்சை முடிவுகள் அடுத்த மாத ஆரம்பத்தில் வௌியிடப்படும் என பரீட்சைகள் திணைக்களம் தெரிவித்துள்ளது.

இதன்படி ஏப்ரல் மாதம் 07ம் திகதி அல்லது அதற்கு முன்னர் பரீட்சை முடிவுகளை வௌியிட எதிர்பார்த்துள்ளதாக பரீட்சைகள் ஆணையாளர் நாயகம் டப்ளியூ.எம்.என்.ஜே.புஸ்பகுமார குறிப்பிட்டுள்ளார்.

கடந்த வருடம் டிசம்பர் 09ம் திகதி முதல் 18ம் திகதி வரை க.பொ.த சாதாரண தரப் பரீட்சைகள் நடைபெற்றன என்பது குறிப்பிடத்தக்கது.

கிளிநொச்சியின் முழங்காவில் பகுதியில் இடம்பெற்ற வாள்வெட்டு சம்பவத்தில் இரு இளைஞர்கள் படுகாயமடைந்து வைத்தியசாலையில் அனுமதிக்கப்பட்டுள்ளனர் புதன்கிழமை இரவு 9.30 மணியளவில் இந்தச் சம்பவம் இடம்பெற்றுள்ளது. இந்தச் சம்பவம் தொடர்பாக மேலும் தெரியவருவது,

சிட்னியில் நேற்று நடைபெற்ற உலகக்கிண்ண காலிறுதிப் போட்டியில் இலங்கை அணி தோல்வி அடைந்தது. இந்த நிலையில், கிளிநொச்சியில் தென்னாபிரிக்க ரசிகர்கள் இலங்கை அணி ரசிகர்களை கேலி செய்துள்ளனர்.

இதனையடுத்து, இரு அணிகளின் ரசிகர்களுக்கும் இடையே வாள்வெட்டு இடம்பெற்றது. வாள்வெட்டுச் சம்பவத்தில் ரஜினிகாந், விஜயகாந்த் ஆகிய இளைஞர்கள் படுகாயமடைந்தனர்.

முழங்காவில் வைத்தியசாலையில் சேர்க்கப்பட்ட இவர்கள் மேலதிக சிகிச்சைக்காக கிளிநொச்சி வைத்தியசாலைக்கு மாற்றப்பட்டனர். மேலதிக விசாரணைகளை முழங்காவில் பொலிஸார் மேற்கொண்டு வருகின்றனர்.

இலங்­கை­யினால் தடைவிதிக்­கப்­பட்­டுள்ள 16 அமைப்­புக்கள் மற்றும் 424 நபர்கள் மீதான தடை குறித்து அர­சாங்கம் மீளாய்வு செய்­ய­வுள்­ள­தாக வெளிவி­வ­கார அமைச்சர் மங்­கள சம­ர­வீர நேற்று பாரா­ளு­மன்­றத்தில் தெரிவித்தார்.

மேலும் கடந்த ஆட்சிக்காலத்தில் இலங்கையுடன் முரண்பட்டிருந்த ஐ.நா மற்றும் சர்வதேச நாடுகள் இன்று ஜனாதிபதி மைத்திரிபால சிறிசேன தலைமையிலான அரசுக்கு முழுமையான ஆதரவை வழங்க முன்வந்துள்ளன. இது எமக்கு கிடைத்த வெற்றியாகும் எனவும் மங்கள சமரவீர சபையில் தெரிவித்தார்.

எதிர்வரும் ஜுன் மாதம் ஐ.நா மனித உரிமை ஆணைக்குழுவினர் இலங்கை வரவுள்ளார். இது எமது குற்றமற்றத் தன்மையை வெளிப்படுத்துவதற்கான சிறந்த சந்தர்ப்பமாகுமென்றும் அவர் குறிப்பிட்டார்.

பாராளுமன்றத்தில் நேற்று புதன்கிழமை இடம்பெற்ற ஐக்கிய நாடுகள் சபை சட்டத்தின் ஒழுங்கு விதிகள் பிரேரணையை முன்வைத்து உரையாற்றும் போதே வெளிவிவகார அமைச்சர் மங்கள சமரவீர இதனைத் தெரிவித்தார்.

சபையில் அமைச்சர் தொடர்ந்து உரையாற்றுகையில் சர்வதேச பயங்கரவாதத்தை ஒழிப்பது, அதற்கு பணம் வழங்குவதை நிறுத்துவது, கறுப்புப் பணப் பரிமாற்றம் மற்றும் அதனோடு தொடர்புடைய தரப்புக்களை தடுப்பதற்கான சட்டவிதிமுறைகள் 2012 ஆம் ஆண்டு ஐ.நா பிரகடனத்தில் குறிப்பிடப்பட்டுள்ளது.

தலிபான் அறிக்கை அமைப்புகளுடன் தொடர்புடைய அமைப்புக்களை தடுப்பதற்கான சட்ட விதிமுறைகளும் இதில் உள்ளடக்கப்பட்டுள்ளன. அத்தோடு ஆயுதங்கள் கொள்வனவு, பணம் வழங்கல்கள் தொடர்பாகவும் கவனம் செலுத்தப்பட்டுள்ளது.

அதற்கேற்றவாறு ஐ.நா மற்றும் ஜனநாயக சரத்துக்களுக்கு இலங்கை அங்கீகாரத்தை வழங்கியுள்ளது.ஆசிய பசுபிக் குழு கறுப்புப் பணம் பறிமுதல் மற்றும் காணாமல் போனோர் தொடர்பாகவும் டிசம்பர் பிரகடனம் 1267 மற்றும் 1373 இன் கீழ் பாதுகாப்பு சபையில் தீர்மானம் சட்டமாக்கப்பட்டுள்ளது.

இது தொடர்பில் சட்டமா அதிபர் திணைக்களம் இலங்கையின் மத்திய வங்கியிலும் சட்டங்கள் மாற்றப்பட்டுள்ளன.பணம் கொடுக்கல் வாங்கல் திருத்தங்கள் தொடர்பில்
இலங்கையின் சட்டவரைவுக்குள் சர்வதேச நிதி மற்றும் பயங்கரவாத தடைக்கு ஏற்றவாறு மேற்கொள்ளப்பட்டுள்ளது.

எமது நாட்டிலும் நீண்ட காலமாக பிரச்சினை தலைதூக்கியிருந்தது. இதனை இன நெருக்கடி என்ற அடிப்படையிலேயே நோக்க வேண்டும்.
ஐ.நா சபை 60 ஆண்டுகளை பூர்த்தி செய்கின்றது. நாம் அவ் அமைப்பில் 1955 ஆம் ஆண்டு தொடக்கம் உறுப்புரிமை பெற்று வருகிறோம். அத்தோடு ஐ.நா சட்டங்களை மதித்து எமது சட்ட வரையறைக்குள் நாம் நடவடிக்கைகளை முன்னெடுத்து வருகின்றோம்.

கடந்த கால ஆட்சியாளர்கள் ஐ.நாவுடன் மட்டும் அல்லாது சர்வதேச நாடுகளுடனும் முரண்பாடுகளை ஏற்படுத்திக் கொண்டு நெருக்கடியில் நாட்டை தள்ளிவிட்டிருந்தது.
சர்வதேச ரீதியில் நட்புறவுகள் பேணப்படவில்லை. எனவே ராஜதந்திர உறவுகள் விரிசலடைந்திருக்கின்றது.

அந்த நாடுகள் நெருக்கடியான சந்தர்ப்பங்களில் எமக்கு ஆதரவு வழங்கவில்லை.அபிவிருத்திக்கும் ஒத்துழைப்புக்களை வழங்கவில்லை.ஆனால் இன்று ஜனாதிபதி மைத்திரிபால சிரிசேனவின் அரசாங்கத்தில் ஐ.நா உட்பட சர்வதேச நாடுகளுடன் நட்புறவுகளை மேம்படுத்திக் கொண்டுள்ளோம்.

ராஜாந்திர உறவுகள் மேம்பட்டுள்ள எமது அபிவிருத்திற்கு உதவி வழங்க அந்நாடுகள் முன்வந்துள்ளன.கடந்த ஆட்சியாளர்கள் இவ்வாறான நட்புறவுகளை முன்வராத காரணத்தினால் தான் எமக்கெதிராக ஐ.நா வில் தொடர்ச்சியாக பிரேரணைகள் கொண்டு வரப்பட்டன.

இன்று இறையாண்மை கொண்ட எமது தனித்துவத்தை பாதுகாத்துக்கொண்டு சர்வதேசத்துடன் நட்புறவுகள் பேணப்பட்டு வருகின்றது.ரோமர் பிரகடனத்தில் நாம் கையெழுத்திடவில்லை.

எனவே மனித உரிமைகள் தொடர்பான பிரச்சினைகளை எமது நாட்டு சட்டப்பிரகாரமே கையாள்கிறோம்.அதற்காக எமது நாட்டுக்குள்ளேயே பொறிமுறைகளை ஏற்படுத்திக் கொண்டுள்ளோம். உள்ளகப் பொறிமுறை ஊடாக எமது நாட்டின் பெயரை பாதுகாத்து வருகின்றோம். நாம் சர்வதேச ரீதியிலான அழுத்தங்களுக்கு உட்படவில்லை. மாநாடு எமது மக்களின் கோரிக்கைகளை ஏற்றே விசாரணைகளை நடத்துகின்றோம்.

எமது இராணுவத்தினர் ஒழுக்கமுள்ளவர்கள், சட்டத்தை மதிப்பவர்கள் எனவே இன்று ஐ.நா சமாதானப் படையிலும் அங்கம் வகிக்கின்றது. கடந்த தேர்தல் காலத்தில் அரசியல் தேவைக்காக விடுதலைபுலிகள் தொடர்பான புரளி கிளப்பப்பட்டது. புலம்பெயர் தமிழர்கள் தொடர்பாகவும் பீதி கிளப்பட்டது.எதிர்வரும் ஜுன் மாதத்தில் ஐ.நா மனித உரிமை ஆணைக்குழுவின் ஆணையாளர் நாயகம் இலங்கை வரவுள்ளார்.

அவ் விஜயம் எமது நாட்டின் குற்றமற்றத் தன்மையை வெளிப்படுத்த சிறந்த சந்தர்ப்பமாக அமையும்.அல்கைதா மற்றும் தலிபான் அமைப்புக்களுக்கு எதிராக ஐ.நா நிறைவேற்றிய இரு தீர்மானங்களையும் அமுல்படுத்தும்.

கொழும்பில் இருந்து மட்டக்களப்பு நோக்கிவந்த புகையிரதத்தில் மோதுண்டு ஆறு மாடுகள் இறந்துள்ளதுடன் ஐந்து மாடுகள் பலி காயமடைந்துள்ள சம்பவம் புதன்கிழமை அதிகாலை வாழைச்சேனை பொலிஸ் பிரிவில் குகநேசபுரம் பகுதியில் இடம் பெற்றுள்ளது.

செவ்வாய்க்கிழமை இரவு கொழும்பில் இருந்து 07.15 மட்டக்களப்பு நோக்கி வந்த “மீனகயா” கடுகதி புகையிரதத்திலயே புனானை புகையிரத நிலையத்திற்கும் வாழைச்சேனை காகித நகர் புகையிரதத்திற்கும் இடையில் புதன்கிழமை அதிகாலை 03.00 மணியளவில் 310ம் மைல் கல்லுக்கு அருகில் இவ் விபத்துச் சம்பவம் இடம் பெற்றுள்ளது.

இச் சம்பவம் தொடர்பாக வாழைச்சேனை புகையிரத திணைக்கள அதிகாரிகள் விசாரணைகளை மேற்கொண்டு வருகின்றனர்.

வடமாகாண முதல்வர் தலைமையிலான குழுவினர் வளலாயில் இராணுவத்தினரிடம் இருந்து விடுவிக்கப்பட்ட பகுதிக்கு நேற்று சென்று, மீள்குடியேறுவதில் உள்ள பிரச்சினைகள் தொடர்பாக அம்மக்களிடம் கேட்டறிந்து கொண்டனர்.

இராணுவத்தால் முகாம்களை அமைப்பதற்கு எனவும், உயர்பாதுகாப்பு வலயங்களை உருவாக்குவதற்கெனவும் கையகப்படுத்தப்பட்ட தமது நிலங்களை விடுவிக்கக் கோரி இடம்பெயர்ந்த மக்கள் பல தொடர்ச்சியான போராட்டங்களை முன்னெடுத்து வருகின்றனர்.

இதன் விளைவாக வலி.கிழக்கு பிரதேச செயலக எல்லைக்கு உட்பட்ட 250 ஏக்கர் பரப்பளவிலான காணி வளலாயில் கடந்த வெள்ளிக்கிழமை விடுவிக்கப்பட்டது.

25 வருடங்களுக்கும் மேலாக இடம்பெயர்ந்து வாழும் வளலாய் மக்கள் விடுவிக்கப்பட்ட தங்கள் காணிகளைப் பார்வையிடச் சென்றபோது பலத்த அதிர்ச்சிக்கு உள்ளாகியுள்ளனர்.

இராணுவத்தினர் தங்களது தேவைகளுக்கெனப் பயன்படுத்திய ஒரு சில வீடுகளைத் தவிர ஏனையவை யாவும் இருந்த இடம் தெரியாமல் இடித்து நிர்மூலமாக்கப்பட்டுள்ளன. உரிமையாளர்கள் அடையாளம் காணமுடியாத அளவுக்குக் காணிகள் பற்றைகளால் மூடிக் காணப்படுகிறது.

தங்கள் காணிகள் விடுவிக்கப்பட்டபோதும் அவற்றில் உடனடியாகக் குடியேறுவதில் பல்வேறு சிரமங்களை எதிர்நோக்கும் வளலாய் மக்கள் இதுதொடர்பாக வடக்கு மாகாணசபையினரிடம் தெரிவித்திருந்தனர்.

இதையடுத்து வடமாகாண முதல்வர் க.வி.விக்னேஸ்வரன் தலைமையிலான குழுவினர் வளலாய் பகுதிக்கு நேரில் சென்று மக்களைச் சந்தித்து அவர்கள் எதிர்நோக்கும் பிரச்சினைகள் தொடர்பாகக் கேட்டறிந்துகொண்டுள்ளனர்.

மக்களின் முறைப்பாடுளைக் கேட்டறிந்துகொண்ட முதல்வர், சம்பந்தப்பட்ட அமைச்சுகளுக்கு ஊடாக உரிய நடவடிக்கைகளை உடனடியாக மேற்கொள்வதற்கு ஆவனம் செய்வதாகத் தெரிவித்துள்ளார்.

வளலாய்க்குச் சென்றிருந்த குழுவில் வடமாகாணசபையின் அவைத்தலைவர் சீ.வீ.கே.சிவஞானம், விவசாய அமைச்சர் பொ.ஐங்கரநேசன், சுகாதார அமைச்சர் ப.சத்தியலிங்கம், மீன்பிடி அமைச்சர் பா.டெனீஸ்வரன் மற்றும் வடமாகாணசபை உறுப்பினர்கள் பா.கஜதீபன், ச.சுகிர்தன் ஆகியோர் இடம்பெற்றிருந்தார்கள் என்பது குறிப்பிடத்தக்கது.