மன்னார் திருக்கேதீஸ்வரத்தில் கண்டுபிடிக்கப்பட்டுள்ள மாபெரும் மனிதப் புதைகுழியை சர்வதேசப் போர்க்குற்ற விவகாரங்களைக் கையாளும் அமெரிக்காவின் விசேட தூதுவர் ஸ்ரீபன் ஜே.ராப்பின் கவனத்திற்கு தமிழ்த் தேசியக் கூட்டமைப்பு இன்று கொண்டு வரவுள்ளது.

மன்னார், திருக்கேதீஸ்வரம் மனிதப் புதைகுழியிலிருந்து நேற்று வரை 26 எலும்புக் கூடுகள் முழுமையாகவும், சில எலும்புக்கூடுகள் துண்டு துண்டாகவும் மீட்கப்பட்டுள்ள நிலையில், நேற்று இலங்கை வந்தடைந்த சர்வதேச போர்க்குற்ற விவகாரங்களைக் கையாளும் அமெரிக்காவின் விசேட தூதுவரை இன்று கொழும்பில் தமிழ்த் தேசியக் கூட்டமைப்பு சந்தித்துக் கலந்துரையாடவுள்ளது.

இதன்போது மன்னார் புதைகுழி விவகாரத்தை ஸ்ரீபன் ஜே.ராப்பின் கவனத்திற்குத் தாம் கொண்டு வருவோம் என்று கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் நேற்று தெரிவித்தார்.

மன்னார் ஆயர் மற்றும் தமிழ்த் தேசியக் கூட்டமைப்பின் வேண்டுகோளுக்கிணங்க குறித்த மனிதப் புதைகுழி தொடர்பில் சர்வதேச விசாரணை உடன் தேவை என்று சர்வதேச போர்க்குற்ற விவகாரங்களைக் கையாளும் அமெரிக்காவின் விசேட தூதுவரிடம் தாம் இன்று வலியுறுத்தவுள்ளோம் என்றும் நாடாளுமன்ற உறுப்பினர் எம்.ஏ.சுமந்திரன் குறிப்பிட்டார்.

மன்னாரில் கண்டுபிடிக்கப்பட்டுள்ள மனிதப் புதைகுழியை அமெரிக்காவின் உயர் குழுவினர் நேரில் சென்று பார்வையிடவேண்டும் என்றும் அவரிடம் தாம் வேண்டுகோள் விடுக்கவுள்ளதாகவும் அவர் மேலும் தெரிவித்தார்.

மன்னார் மனிதப் புதைகுழி, மாபெரும் மனிதப் புதைகுழியாக, இனப்படுகொலையின் சான்றாக இருக்கின்றது. எனவே, அதிலிருந்து மீட்கப்படும் எலும்புக்கூடுகளை ஆய்வு செய்வதற்கு சர்வதேச நிபுணர் குழுவை இலங்கை அரசு உடன் அழைக்க வேண்டும்.

அப்போதுதான் உண்மைகள் கண்டறியப்படும். உள்நாட்டு நிபுணர் குழுவில் எமக்கு நம்பிக்கை இல்லை என்று தமிழ்த் தேசியக் கூட்டமைப்பின் வடக்கு, கிழக்கு நாடாளுமன்ற உறுப்பினர்கள் ஏற்கனவே தெரிவித்திருந்தமை குறிப்பிடத்தக்கது.

வடக்கில் இயங்கி வந்த பாரியளவிலான பாதாள உலகக் குழு ஒன்றை பொலிஸார் கைது செய்துள்ளனர். “ஹவா குரூப்” என்ற பாதாள உலகக் குழுவினரே இவ்வாறு கைது செய்யப்பட்டுள்ளனர்.

குறித்த கும்பலிடமிருந்து கைக்குண்டுகள், போதைப் பொருள், வாள்கள், வேறும் ஆயுதங்கள் மற்றும் மோட்டார் சைக்கிள்கள் போன்றன மீட்கப்பட்டுள்ளன.

தென் இந்திய திரைப்படங்களில் காண்பிக்கப்படும் தாதாக்களைப் போன்று இவர்கள் வடக்கில் செயற்பட்டுள்ளனர். இந்தக் கும்பலைச் சேர்ந்த ஏழு பேரை பொலிஸார் கைது செய்துள்ளனர்.

குமரேசன் வினோதன் என்ற இளைஞரே இந்தக் கும்பலுக்கு தலைமை வகிக்கின்றார். இள வயதுடைய 20 தமிழர்கள் இந்த பாதாள குழுவில் அங்கம் வகிக்கின்றனர். மோட்டார் சைக்கிளில் சென்று குற்றச் செயல்களில் ஈடுபட்டு வருவதாக சிங்களப் பத்திரிகையொன்று செய்தி வெளியிட்டுள்ளது.

சில மாதங்களுக்கு முன்னர் கோப்பாய் பிரதேசத்தில் பொலிஸ் கான்ஸ்டபிள் ஒருவரின் கைகளை வெட்டி காயப்படுத்தியவர்கள் இந்தக் கும்பலைச் சேர்ந்தவர்கள் என்பது விசாரணைகளின் மூலம் தெரியவந்துள்ளது. ஓராண்டுக்கு மேல் இந்த பாதாள கும்பல் இயங்கி வருவதாகத் தெரிவிக்கப்படுகிறது.

திருகோணமலைக்கு கிழக்கு கடற்பரப்பில் உருவாகியிருந்த தாழமுக்க நிலையினால் தேசிய அனர்த்த முகாமைத்துவ பிரிவு பாதுகாப்பு எச்சரிக்கை விடுத்திருந்தது. இந்நிலையில் யாழ்ப்பாணம், முல்லைத்தீவு மாவட்டங்களின் கரையோரப் பகுதிகளில் நேற்று முன்தினம் உருவாகியிருந்த பதற்றமான சூழல் இரண்டாவது நாளாகவும் நீடித்துள்ளது.

யாழ்.குடாநாட்டின் பெருங்கடல் பிரதேசங்கள் குறிப்பாக வடமராட்சி கிழக்கு மற்றும் பருத்தித்துறை பிரதேசங்களில் கரையோர கிராமங்களுக்கு கிராமசேவகர்கள் மூலம் புயல் எச்சரிக்கை விடுக்கப்பட்டிருந்தது.

இதனையடுத்து கடலில் விடப்பட்டிருந்த படகுகள் அனைத்தும் கரைக்கு ஏற்றப்பட்டதுடன் மீனவர்கள் எவரும் கடலுக்குச் செல்லவில்லை.

மேலும் கடல் நேற்றும் மிகவும் கொந்தளிப்புடன் காணப்பட்டது. இதனால் கரையை நோக்கி கடல்நீர் பெருமளவுக்கு உள்நுழைந்திருந்ததுடன், உயரமான அலைகளும் ஏற்பட்டிருந்தது.

இதேபோன்றே முல்லைத்தீவு மாவட்டத்திலும் கடல் மிக கொந்தளிப்பாக காணப்பட்ட நிலையில் படகுகள் மற்றும் கடற்றொழில் உபகரணங்கள் பாதுகாப்பான இடத்திற்கு மாற்றப்பட்டது.

இங்கேயும் கடல் கரையை நோக்கி பெருமளவு உள்வாங்கியிருந்ததாக பிரதேச செய்திகள் தெரிவிக்கின்றன. எனினும் இரு மாவட்டங்களிலும் ஏற்பட்ட சேதங்கள் பற்றிய தகவல்கள் எவையும் கிடைக்கப் பெறவில்லை.

மேலும் யாழ்.மாவட்டத்தில் இடப்பெயர்வுகள் எவையும் இடம்பெற்றிருக்காத நிலையில் முல்லைத்தீவு மாவட்டத்தில் 15குடும்பங்கள் இடம்பெயர்ந்து, கள்ளப்பாடு கிராமத்திலுள்ள பாடசாலையொன்றில் தஞ்சம் பெற்றிருப்பதாக செய்திகள் தெரிவிக்கின்றன.

மேலும் அவர்களுக்கு மாவட்டச் செயலகம் ஊடாக உலர் உணவுகள் வழங்கப்பட்டுள்ளதாகவும் அந்தச் செய்திகள் மேலும் தெரிவித்திருக்கின்றன.

எனினும் அனர்த்த முகாமைத்துவ பிரிவினால் விடுக்கப்பட்ட பாதுகாப்பு எச்சரிக்கை, இன்னமும் விலக்கிக் கொள்ளப்படாத நிலையில் தொடர்ச்சியான மழை வடமாகாணத்தில் பெய்து வருகின்றமை இங்கே குறிப்பிடத்தக்கது.

தங்கக் கடத்தலில் ஈடுபட்ட இலங்கைப் பிரஜைகள் 6 பேர் சென்னை விமான நிலையத்தில் சுங்க அதிகாரிகளால் கைது செய்யப்பட்டுள்ளனர்.

அவர்களிடம் இருந்து 2 கிலோ 100 கிராம் எடையுள்ள 65 லட்சம் மதிப்புள்ள தங்க கட்டிகள் அதிகாரிகளால் பறிமுதல் செய்யப்பட்டன.

நேற்று முன்தினம் சென்னை விமான நிலையத்தில் சுங்க அதிகாரிகள், இலங்கை, சிங்கப்பூர், துபாய், மலேசியாவில் இருந்து வந்த அனைத்து விமான பயணிகளிடமும் தீவிர சோதனை நடத்தினர்.

அப்போது கொழும்பு, சிங்கப்பூரில் இருந்து வந்த 4 விமானங்களில் வந்த 6 பயணிகள் மீது சுங்க அதிகாரிகளுக்கு சந்தேகம் ஏற்பட்டது. அவர்கள் 6 பேருமே இலங்கையை சேர்ந்தவர்கள். சுற்றுலா பயணிகளாக சென்னை வந்திருந்தனர்.

கொழும்பை சேர்ந்த ஹைதரூஸ் (34), 3 பட்டரிகள் பயன்படுத்தும் பெரிய டொர்ச் லைட்டில் பட்டரிகளுக்கு பதிலாக 400 கிராம் தங்க கட்டி வைத்திருந்ததை கண்டுபிடித்தனர். அதை அதிகாரிகள் பறிமுதல் செய்தனர். அதே விமானத்தில் வந்த கொழும்பை சேர்ந்த காசிம் முகமது (30), மிக்சியின் அடிப்பகுதியில் 500 கிராம் தங்கக்கட்டியை வைத்திருந்தது தெரியவந்தது. அதையும் பறிமுதல் செய்தனர்.

கொழும்பில் இருந்து வந்த மற்றொரு விமானத்தில் கொழும்பை சேர்ந்த ஹயாத் அலி (29), என்பவரிடம் சோதனை நடத்தியதில் எதுவும் சிக்கவில்லை. அவரை எக்ஸ்ரே எடுத்து பார்த்தபோது வயிற்றுக்குள் மாத்திரை வடிவத்தில் தங்கம் இருந்தது தெரிந்தது. மருத்துவ குழுவினர் உதவியுடன் எனிமா கொடுத்து அந்த தங்க மாத்திரைகளை வெளியில் எடுத்தனர்.

மொத்தம் 15 தங்க மாத்திரைகள் இருந்தன. ஒன்றின் எடை 20 கிராம் என மொத்தம் 300 கிராம் தங்க மாத்திரைகளை பறிமுதல் செய்தனர். சிங்கப்பூரில் இருந்து வந்த விமானத்தில் யாழ்ப்பாணத்தை சேர்ந்த சசிதரன் (38), ஆசனவாயில் மறைத்து வந்த 300 கிராம் தங்கத்தை பறிமுதல் செய்தனர்.

கொழும்பில் இருந்து வந்த மற்றொரு விமானத்தில் கண்டி பகுதியை சேர்ந்த முகமது (40), ஹமீது (27) ஆகியோரது சூட்கேசில் தலா 300 கிராம் தங்க பிஸ்கட்டுகள் சிக்கின. அவற்றுக்கு கருப்பு பெயின்ட் அடிக்கப்பட்டிருந்தது. அவற்றையும் பறிமுதல் செய்தனர்.

6 பேரிடம் இருந்தும் 65 லட்சம் மதிப்புடைய 2 கிலோ 100 கிராம் தங்கம் பறிமுதல் செய்யப்பட்டுள்ளது. விசாரணையில் இவர்கள் 6 பேரும் தங்க கடத்தல் கும்பலிடம் குருவியாக செயல்பட்டது தெரியவந்துள்ளதாக அதிகாரிகள் தெரிவித்தனர்.