அமெரிக்காவுக்கான இந்திய துணைத் தூதர் தேவ்யானி கடந்த வாரம் கைது செய்யப்பட்டார். அவர் மீது அமெரிக்காவில் பதிவு செய்துள்ள விசா முறைகேட்டு வழக்கை ரத்து செய்ய வேண்டும் என்றும் மேலும் மிகவும் மோசமான முறையில் அவர் நடத்தப்பட்டதற்கு அமெரிக்கா மன்னிப்பு கேட்க வேண்டும் எனவும் இந்தியா வலியுறுத்தியுள்ளது.

இந்நிலையில் அமெரிக்க வெளியுறவுத்துறை செய்தித் தொடர்பாளர் மேரிஹார்ப் கூறுகையில், தேவ்யானி மீதான வழக்கை திரும்ப பெறும் வாய்ப்பு இல்லை. அவர் மீதான குற்றச்சாட்டுகளை மிக தீவிரமானதாக கருதுகிறோம்.

மேலும் இது ஒரு சட்ட அமுலாக்க பிரச்சனை, இவரது வழக்கு தொடர்பாக ஆஜராக இந்தியாவில் இருந்து ஒரு வழக்கறிஞரை அனுப்ப இந்திய அரசு முன் வந்தது, ஆனால் தேவ்யானி அதை ஏற்றுக்கொள்ளவில்லை என்றும் இந்த விவகாரத்தில் மன்னிப்பு எதுவும் கோரப்போவதில்லை எனவும் கூறியுள்ளார்.

சிங்கப்பூரில் நடந்த கலவரம் காரணமாக 52 இந்தியர்களை அந்நாட்டு அரசு இன்று நாடு கடத்தியுள்ளது. மேலும் 4 பேரை நாடு கடத்தவும் அந்நாடு முடிவு செய்துள்ளது.

சிங்கப்பூர் லிட்டில் இந்தியா நகரில் கடந்த மாதம் தமிழகத்தைச் சேர்ந்த சக்திவேலு குமாரவேலு தனியார் பேருந்து மோதி இறந்தார்.

இதையடுத்து அங்கு கலவரம் வெடித்தது. 40 வருடங்களில் மிக மோசமான இந்த வன்முறையில் 16 பொலிஸ் வாகனங்களும், 25 பொதுவான வாகனங்களும் தீ வைத்து கொளுத்தப்பட்டன. 39 பொலிஸார் வன்முறையாளர்களின் கல்வீச்சில் காயமடைந்தனர்.

இந்த வன்முறையில் ஈடுபட்டதாக 52 பேரும் நாடு கடத்தப்பட்டதாக சிங்கப்பூர் அரசு கூறியுள்ளது. நாடு கடத்தப்பட்ட இவர்கள் அனைவரும் எப்பொழுதும் சிங்கப்பூரில் நுழைய முடியாதவாறு தடை விதிக்கப்பட்டுள்ளது.

இச்சம்பவத்தில் கல்வீச்சில் ஈடுபடாமல், போராட்டம் நடத்திய மேலும் 200 பேருக்கு பொலிஸார் எச்சரிக்கை விடுத்துள்ளமை குறிப்பிடத்தக்கது.

கோயம்புத்தூரில் மண்டேலாவிற்கு மரியாதை செலுத்தும் போஸ்டரில் நடிகர் மோர்கன் ப்ரீ மேன் புகைப்படத்தை நிறுவியதால் பரபரப்பு ஏற்பட்டுள்ளது.

தென் ஆபிரிக்க முன்னாள் அதிபர் நெல்சன் மண்டேலா டிசம்பர் 5ம் திகதி மரணம் அடைந்தார். அவருக்கு மரியாதை செலுத்தும் வகையில் சந்திரசேகர் என்பவர் நெல்சன் மண்டேலாவிற்கு போஸ்டர் நிறுவியுள்ளார்.

அதில் நெல்சன் மண்டேலாவிற்கு பதில் நடிகர் மோர்கன் ப்ரீமேனின் புகைப்படம் தவறாக அச்சடிக்கப்பட்டது. இதை சிலர் புகைப்படம் எடுத்து சமூக வலைத்தளத்தில் விட்டதால் இச்செய்தி உலகம் முழுவதும் பரவி பரபரப்பை ஏற்படுத்தியுள்ளது.

மோர்கன் ப்ரீமேன் இன்விக்டஸ் என்ற படத்தில் நெல்சன் மண்டேலாவாக நடித்தார் என்பது குறிப்பிடத்தக்கது.

திருவண்ணாமலையில் மனைவியின் நடத்தையில் சந்தேகப்பட்ட கணவர் கொலை செய்து உடலை 3 துண்டுகளாக்கி வீசிய கொடூர சம்பவம் நடந்துள்ளது.

திருவண்ணாமலை மாவட்டத்தை சேர்ந்தவர் காந்திமதி (38). ஆசிரியரான இவருக்கும், அதே பகுதியை சேர்ந்த ஒருவருக்கும் திருமணம் ஆகி கருத்து வேறுபாடு ஏற்பட்டு விவாகரத்து பெற்றனர்.

அதன்பின்னர் காந்திமதி சென்னை வியாசர்பாடியை சேர்ந்த பரமசிவம்(40) என்பவரை கடந்த ஏப்ரல் மாதம் திருமணம் செய்தார். பரமசிவம் தனியார் கம்பெனியில் தலைமை கணக்காளராக வேலை செய்து வருகிறார்.

பணியிட மாறுதல் காரணமாக காந்திமதி பொன்னேரி அருகே உள்ள நெடும்பரம்பாக்கம் ஊராட்சி நடுநிலைப் பள்ளிக்கு மாறுதலாகி அங்கு வேலையில் சேர்ந்தார்.

45 நாட்களுக்கு முன்னர் பொன்னேரி அருகே உள்ள காரனோடை பஜார் தெருவில் வாடகை வீட்டில் குடியேறியுள்ளார். இந்நிலையில் 2 நாட்களாக பரமசிவத்திடம் இருந்து போன் வரவில்லை என்று சந்தேகப்பட்ட அவரது உறவினர்கள் காரனோடைக்கு வந்தனர்.

அப்போது அவரது வீடு பூட்டப்பட்டிருந்தது. இதனால் சந்தேகம் அடைந்த அவர்கள் வீட்டை திறந்து பார்த்தபோது குளியல் அறையில் எரிந்த நிலையில் இரு கால்கள் மட்டும் இருந்தது. இதுபற்றி அவர்கள் சோழவரம் பொலிசாருக்கு தகவல் தெரிவித்தனர்.

திருவள்ளூர் மாவட்ட பொலிசார் சம்பவ இடத்திற்கு விரைந்து சென்று விசாரணையில் ஈடுபட்டனர். விசாரணையில் மனைவியை அடித்துக் கொலை செய்து 3 துண்டுகளாக்கியதை பரமசிவம் ஒப்புக்கொண்டார்.

பொலிசாரிடம் பரமசிவம் அளித்த வாக்குமூலத்தில் எங்கள் இருவருக்கும் இடையே கடந்த ஞாயிற்றுக்கிழமை தகராறு ஏற்பட்டது. அப்போது கோபத்தில் அவரை தாக்கியதில் அவர் இறந்து போனார். அதன் பின்னர் உடலை பெட்ரோல் ஊற்றி கொளுத்தினேன்.

பின்னர் உடலை 3 துண்டுகளாக அறுத்து ஒரு பகுதியை வீட்டில் வைத்துவிட்டு இடுப்பு, கைகள் அடங்கிய மற்றொரு பகுதியை செம்புலிவரத்தில் உள்ள புதரில் வீசினேன், தலை பகுதியை சென்னை யானைக்கவுனி பாலத்தின் கீழ் வீசினேன் என்று தெரிவித்துள்ளார்.

இதனைத் தொடர்ந்து பொலிசார் பரமசிவத்தை அழைத்துக் கொண்டு சென்னை யானைக்கவுனி பாலத்தின் கீழ் பிளாஸ்டிக் பையில் இருந்த தலையையும், செம்புலிவரத்தில் இருந்த உடல் பகுதியையும் மீட்டனர். வீட்டில் இருந்த கால் பகுதியையும் பொலிசார் கைப்பற்றினர்.

இதுகுறித்து பொலிசார் தொடர்ந்து தீவிரமாக விசாரித்து வருகின்றனர்.