அரை நிர்வாணத்துடன் தே.மு.தி.க. கொடி வண்ணத்தை உடலில் பூசிக் கொண்டு விஜயகாந்த் வீட்டின் முன் சந்தேகப்படும்படியாக சுற்றிய நபரால் பரபரப்பு ஏற்பட்டது.

தே.மு.தி.க. தலைவர் விஜயகாந்தின் வீடு சென்னை விருகம்பாக்கம் கண்ணபிரான் கொலனியில் உள்ளது. இங்கு நேற்று காலை 8:00 மணியளவில் சந்தேகப்படும்படியாக ஒருவர் சுற்றித் திரிந்தார்.

தே.மு.தி.க. கரைவேட்டி கட்டி இருந்தார். சட்டை அணியாமல் அரை நிர்வாணத்துடன் இருந்த அவரது உடலில் தே.மு.தி.க., கொடியின் வண்ணம் பெயின்ட் செய்யப்பட்டிருந்தது.

விஜயகாந்தின் வீட்டிற்கு வெளியே பாதுகாப்பில் இருந்த பொலிஸார் ஒரு மணி நேரம் அவரை கவனித்தனர். பின் விருகம்பாக்கம் பொலிசாருக்கு தகவல் தெரிவித்தனர்.

விரைந்து வந்த பொலிசார் அந்த நபரை காவல் நிலையத்துக்கு அழைத்து சென்றனர். விசாரணையில் அவர் சென்னை பெருங்குடி, திருவள்ளுவர் நகரைச் சேர்ந்த ரமேஷ் 36 என்பது தெரிந்தது.

சமீபத்தில் அவரது வீடு இடிக்கப்பட்டுள்ளது. இது குறித்து விஜயகாந்திடம் தெரிவிக்க வந்துள்ளார். விஜயகாந்த் வீட்டில் இருந்து வெளியே வருவார் என கருதி அங்கு சுற்றி வந்துள்ளார்.

நடந்த சம்பவங்களை பொலிசார் அவரிடம் எழுதி வாங்கினர். மீண்டும் விஜயகாந்த் வீடு முன் சுற்றி திரிந்தால் கைது நடவடிக்கை எடுக்கப்படும் என எச்சரித்து அனுப்பினர். இந்த சம்பவத்தால் விஜயகாந்த் வீட்டின் முன் பரபரப்பு ஏற்பட்டது.

ரஜினிகாந்த் பிறந்த நாள் போஸ்டரில் இந்துக் கடவுள்கள் அவமதிக்கப்பட்டதாக முதலமைச்சர் தனிப்பிரிவில் முறைப்பாடு தெரிவிக்கப்பட்டுள்ளது.

தலைமைச் செயலகத்தில் உள்ள முதல்–அமைச்சர் தனிப்பிரிவில் விசுவ இந்து பரிஷத்தின் தமிழ்நாடு பிரிவின் சார்பில் கொடுக்கப்பட்ட புகார் மனுவில் கூறப்பட்டு இருப்பதாவது..

12ம் திகதியன்று நடிகர் ரஜினிகாந்தின் பிறந்த நாளை அவரது ரசிகர்கள் கொண்டாடும் விதத்தில் சென்னையில் பல இடங்களில் வாழ்த்து போஸ்டர்களை ஒட்டினர். அதில், ஒரு போஸ்டரில் உள்ள படத்தில், ரஜினிகாந்த் அவரது மனைவி, மகளுடன் வாக்குச்சாவடியில் வாக்குபோடுவது போலவும், வாக்கு போடுவதற்கு நிற்கும் ரசிகர் வரிசையில் விநாயகர், விஷ்ணு கடவுள்களும் காத்து நிற்பது போலவும் சித்தரிக்கப்பட்டுள்ளது.

இந்து மத தெய்வங்களை அரசியலுடன் ஒப்பிட்டு இழிவுபடுத்தியுள்ளனர். இந்து மதத்தை பின்பற்றுகிறவர்களின் மனதை தமிழகம் முழுவதிலும் ஒட்டப்பட்டுள்ள இந்த போஸ்டர் புண்படச் செய்துள்ளது. இந்த போஸ்டரை அச்சடித்தவர், ஒட்டியவர்களை உடனே கைது செய்ய வேண்டும். அதில் ஐந்து பேரின் பெயர்கள் உள்ளன.

ரஜினி ரசிகர் போர்வையில் மாற்று மதத்தினர் இதன் பின்னணியில் உள்ளதுபோல் தெரிகிறது. சென்னை பொலிஸ் கமிஷனரிடம் புகார் கொடுத்தும் நடவடிக்கை எடுக்கவில்லை. எனவே, கலெக்டர் மாநாட்டில் கூறியுள்ளதுபோல், மத மோதலைத் தூண்டும் வகையில் செயல்படுபவர்களை முதல்–அமைச்சர் ஜெயலலிதா இரும்புக்கரம் கொண்டு ஒடுக்க வேண்டும் என்று அதில் கூறப்பட்டுள்ளது.

ஸ்பெயினை சேர்ந்த இந்திய வம்சாவளியினரான பிரபல தொழிலதிபர் லட்சுமி மிட்டலின் சகோதரரின் மகள் திருமணம் 500 கோடி ரூபாய் செலவில் நடைபெற்றது.

கடந்த 7ம் திகதி லட்சுமி மிட்டலின் சகோதரரின் மகள் சிருஷ்டி(26) திருமணம் மிக பிரம்மாண்டமாக நடைப்பெற்றது. இத்திருமணத்தில் உணவு பரிமாற மட்டும் இந்தியாவிலிருந்து 200 ஊழியர்கள் அழைத்து செல்லப்பட்டனர்.

இதனை தொடர்ந்து மணமகன் வெள்ளை குதிரையிலும் மணமகள் காரிலும் ஊர்வலமாக அழைத்து வரப்பட்டனர் திருமண நிகழ்ச்சிகள் முழுவதையும் வீடியோ மற்றும் போட்டோ எடுக்க ஹெலிகப்டர் பயன்படுத்தப்பட்டது.

இந்த திருமணத்தில் மிட்டல் குடும்பத்தினர் மற்றும் முக்கிய வி.வி.ஐ.பி.க்கள் பார்சிலோனா நகர மேயரும் கலந்து கொண்டனர்.
மேலும் இத்திருமணத்தையொட்டி அப்பகுதியில் போக்குவரத்து தடை செய்யப்பட்டதால் அப்பகுதி எதிர்கட்சித் தலைவர்கள் இதற்கு கடும் கண்டனம் தெரிவித்துள்ளனர் என்பது குறிப்பிடத்தக்கது.

மத்தியப் பிரதேச மாநிலத்தில் பெண் ஒருவர் ஒரே பிரசவத்தில் 10 உயிரற்ற சிசுக்களைப் பிரசவித்த சம்பவம் அதிர்ச்சியை ஏற்படுத்தியுள்ளது.

மத்தியப் பிரதேசத்தின் சத்னா மாவட்டத்தில் உள்ள கோடி என்ற கிராமத்தைச் சேர்ந்தவர் அஞ்சு குஷ்வாஹா(28). இவர் குழந்தை இல்லாத காரணத்தினால் செயற்கை முறையில் கருவுறுவதற்கான சிகிச்சைகளை மேற்கொண்டுள்ளார். ஆனால், முறையான கண்காணிப்பு இல்லாததால் அவருக்கு பல கருக்கள் உருவாகியுள்ளன.

இந்நிலையில் கர்ப்பமாயிருந்த அவருக்கு திடீரென உடல்நலக்குறைவு ஏற்பட்டுள்ளது. இதனால் அவரது கிராமத்திலிருந்து 125 கி.மீ தொலைவில் உள்ள ரேவா மாவட்டத்தின் சஞ்சய் காந்தி மெமோரியல் மருத்துவமனையில் சிகிச்சைக்காக அவர் அழைத்துச்செல்லப்பட்டார்.

அங்கு வருவதற்குள்ளாக வழியிலேயே அவர் ஒன்பது குழந்தைகளைப் பிரசவித்திருந்தார். மருத்துவமனைக்கு வந்தவுடன் மருத்துவர்களின் உதவியுடன் மற்றொரு சிசுவையும் அவர் பெற்றார்.

ஆனால் அவற்றில் ஒன்று கூட உயிருடன் இல்லை. 12 வார வளர்ச்சியுடன் காணப்பட்ட அந்த சிசுக்கள் அனைத்தும் இறந்துள்ளன.

இதுகுறித்து மருத்துவமனையின் உதவி மேலாளரான மருத்துவர் எஸ்.கே பதக் கூறுகையில், செயற்கை முறையில் கருவுறச் செய்யும்போது அதனைத் தொடர்ந்து கண்காணிக்கத் தவறியதால் ஏற்பட்ட விளைவுதான் இது என்றும் ஆரம்பத்திலேயே கரு உருவானதைக் கவனித்திருந்தால் மூன்று குழந்தைகள் வரை காப்பாற்றியிருக்க முடியும் எனவும் கூறியுள்ளார்.

திருமண மண்டபத்தில் பாலியல் தொழில் நடத்திய குற்றத்திற்காக மேலாளர் கைது செய்யப்பட்டுள்ளார். சென்னை நங்கநல்லூர் 48வது தெருவில் உள்ள ஒரு திருமண மண்டபத்தில் இங்கு பாலியல் தொழில் நடப்பதாக பரங்கிமலை துணை கமிஷனர் சரவணனுக்கு புகார் தெரிவிக்கப்பட்டது.

அவரது உத்தரவின் பேரில் பழவந்தாங்கல் பொலிசார் அந்த மண்டபத்துக்கு சென்று திடீர் சோதனை நடத்தினர். அப்போது மண்டபத்தில் இருந்த மண்டப மேலாளர் பொலிசாரை கண்டதும் தப்பியோடினார்.

பொலிசார் அவரை மடக்கி பிடித்தனர். மேலும் மணமகள் அறையில் இருந்த ஒரு பெண், ஆணையும் பிடித்து விசாரித்தனர்.
அதில், மண்டப மேலாளர் முத்துக்குமார் கடந்த ஒரு வருடமாக மணமகள் அறையில் விபசாரத்துக்கு அனுமதி தந்தது தெரியவந்தது.இதையடுத்து அவர் மீது வழக்குப்பதிவு செய்து கைது செய்தனர்.

மேலும் சோதனையில் சிக்கிய கே.கே.நகர் முகமது நூரை கைது செய்தனர். அங்கு மீட்கப்பட்ட பெண்ணை மயிலாப்பூரில் உள்ள காப்பகத்தில் சேர்த்துள்ளனர்.

அம்பாலா விமானப்படைத் தளத்தில் ஒரு விமானப்படை விமானத்திலிருந்து 2 வெடிகுண்டுகள் கீழே விழுந்ததால் பரபரப்பு ஏற்பட்டது. இதில் ஒரு குண்டை நிபுணர்கள் செயலிழக்கச் செய்தனர். இன்னொரு குண்டு வெடிக்க வைக்கப்பட்டது. இதனால் அருகில் உள்ள ஜிடி சாலையில் உள்ள பல வீடுகளின் கண்ணாடி ஜன்னல்கள் உடைந்து சிதறின.

குண்டு வெடிப்பால் ஏற்பட்ட சிதறல்களால் இந்த ஜன்னல்கள் உடைந்தன. இது தொழில்நுட்பக் கோளாறு காரணமாக நடந்திருக்கலாம் என்று அம்பாலா காவல்துறை ஆணையர் கூறியுள்ளார். இதுகுறித்து அம்பாலா போலீஸ் கமிஷனர் ராஜ்பீர் தேஸ்வால் கூறுகையில்,

சோதனை குண்டுவெடிப்பை நடத்தப் போவதாக ஏற்கனவே விமானப்படை அதிகாரிகள் எங்களுக்குத் தகவல் தெரிவித்திருந்தனர். மேலும் அவர்களுக்குத் தேவையான பாதுகாப்பை நாங்களும் கொடுத்திருந்தோம். மேலும் போதிய முன்னெச்சரிக்கை நடவடிக்கைகளும் எடுக்கப்பட்டிருந்தன.

இன்னொரு இடத்தில் ஒரு விமானப்படை விமானம் கிளம்பத் தயாராக இருந்தது. அப்போது ஒரு குண்டு, விமானத்திலிருந்து கீழே விழுந்து விட்டது. தொழில்நுட்பக் கோளாறு அல்லது தவறுதலாக குண்டு பொருத்தப்பட்டிருந்தது. இதற்குக் காரணமாக இருக்கலாம். இதுதொடர்பாக வெடிபொருள் சட்டத்தின் கீழ் வழக்குப் பதிவு செய்துள்ளோம்.

விசாரணை நடந்து வருகிறது. தவறுக்குக் காரணமானவர்களிடம் நாங்கள் விசாரிக்க முடிவு செய்துள்ளோம். இந்த குண்டு வீடு ஏதாவது மீது விழுந்திருந்தால் பேராபத்து ஏற்பட்டிருக்கும் என்றார் அவர்.

இதுகுறித்து விமானப்படை அதிகாரிகள் தரப்பில் கூறுகையில், டிசம்பர் 11ம் திகதி இரவு 8 மணியளவில் அம்பாலா விமான்படைத் தளத்திலிருந்து பயிற்சி விமானம் கிளம்பி பறந்து கொண்டிருந்தது. அது ஜாகுவார் விமானமாகும். அப்போது விமானத்தில் அவசர நிலை ஏற்பட்டது.

இதையடுத்து விமானத்திலிருந்த குண்டை வெளியேற்ற வேண்டிய கட்டாயம் விமானிக்கு ஏற்பட்டது. இதையடுத்து விமானத் தளத்தில் உள்ள பகுதியில் 2000 இறாத்தல் கொண்ட இரண்டு குண்டுகளை விமானி விமானத்திலிருந்து கீழே போட்டார். இதன் மூலம் விமானமும், விமானியும் பாதுகாக்கப்பட்டுள்ளனர்.

குண்டு கீழே விழுந்ததும் அதை பாதுகாப்பான முறையில் செயலிழக்க வைக்கும் முயற்சிகள் நடந்தன. அதில் ஒரு குண்டு முழுமையாக செயலிழக்க வைக்கப்பட்டது. இன்னொரு குண்டு பாதியளவில் மட்டுமே செயலிழந்தது. இதையடுத்து அதை வெள்ளிக்கிழமை காலை முன்னெச்சரிக்கை நடவடிக்கைகளுடன் வெடிக்கச் செய்தோம் என்றனர்.

ஆனால் தவறுதலாக குண்டு விழுந்தது என்ற செய்தியை விமானப்படையினர் மறுத்துள்ளனர். தவறுதலாக குண்டுகள் விழவில்லை. மாறாக விமானத்தைக் காக்கவே விமானி அந்தக் குண்டுளை கீழே போட்டார் என்று விளக்கப்பட்டுள்ளது.