பிரித்தானியாவின் குட்டி இளவரசர் ஜோர்ஜ் தனது முதல் கிறிஸ்மஸை வெகு விமர்சையாக கொண்டாடுவது போன்ற புகைப்படங்கள் வெளியாகி மக்களை ஈர்த்து வருகின்றது.

பிரித்தானியாவின் இளவரசர் வில்லியம்- கேட் மிடில்டன் தம்பதியினரின் மகன் ஜோர்ஜ் அலெக்ஸாண்டர் லூயிஸ். வருங்கால அரசரான ஜோர்ஜ், தனது முதல் கிறிஸ்துமஸை கொண்டாட இருக்கிறார்.

இந்நிலையில் அரச குடும்பத்தினர் மிக மகிழ்ச்சியுடன் கிறிஸ்மஸை கொண்டாடுவது போன்ற புகைப்படங்கள் வெளியாகி இணையத்தை கலக்கி கொண்டிருக்கிறது. இந்த புகைப்படங்கள் அனைத்தும் கற்பனையே, இதனை வடிவமைத்தவர் புகைப்பட நிருபர் ஆலிசன் ஜக்சன்.

நியூயோர்க்கில் இந்திய துணைத் தூதராக பணிபுரிபவர் தேவயானி கோப்ரகடே. அவர் தனது அலுவலகத்தில் வேலை செய்த நபருக்கு விசா கேட்டு விண்ணப்பித்ததில் முறைகேடான ஆவணங்களை சமர்ப்பித்தாக கூறி நேற்று கைது செய்யப்பட்டு பின்னர் பிணையில் விடுதலை செய்யப்பட்டார்.

அமெரிக்காவில் வேலைக்குரிய ஊதியம் வழங்காமல் குறைவான ஊதியம் வழங்குவது சட்டப்படி குற்றமாகும். தேவயானி தனது வீட்டில் வேலை செய்வதற்காக தேர்ந்தெடுத்த நபருக்கு விசா கேட்டு அமெரிக்க வெளியுறவுத்துறைக்கு விண்ணப்பம் சமர்ப்பித்திருந்தார்.

அதில் தவறான தகவல்களையும், முறைகேடான ஆவணங்களையும் அளித்துள்ளதாக, மென்ஹட்டன் நகரின் பெடரல் வழக்கறிஞர் ப்ரீத் பஹாரா குற்றஞ்சாட்டினார்.

இவ்வாறு தவறான ஆவணங்களை சமர்பித்த குற்றத்திற்காக தனது மகளை பள்ளியில் விட்டுச்செல்ல துணை தூதர் காரில் வந்தபோது பொதுமக்கள் முன்னிலையில் கைவிலங்கிடப்பட்டு கைது செய்யப்பட்டார்.

அவரது கைது குறித்து அமெரிக்க அரசுக்கு இந்திய அரசு தனது ஆழ்ந்த கவலையை தெரிவித்துள்ளது. அங்குள்ள நீதிமன்றத்தில் ஆஜர்படுத்தப்பட்ட அவர் தான் தவறேதும் செய்யவில்லை என நீதிபதியிடம் கூறினார்.

அதை தொடர்ந்து நீதிபதி தனது தீர்ப்பில் 2.5 இலட்சம் அமெரிக்க டொலரை பிணைத்தொகையாக செலுத்துமாறு உத்தரவிட்டார்.
பின்னர் இத்தொகையை நீதிமன்றத்தில் செலுத்தி துணைத் தூதர் தேவயானி விடுதலையானார்.

அமெரிக்காவின் கொலொரடோ அருகே உள்ள கேனான் நகரில் அறிவியல் மற்றும் தொழில்நுட்ப பாடசாலை உள்ளது. இங்கு 6 வயது சிறுவன் படிக்கிறான்.

இவன் தன்னுடன் படிக்கும் சக மாணவியை முத்தமிட்டதாக புகார் எழுந்தது. அதை தொடர்ந்து பாலியல் தொல்லை கொடுத்ததாக அவன் மீது குற்றம் சாட்டப்பட்டது.

அதைத்தொடர்ந்து ஒழுங்கு நடவடிக்கை எடுப்பதாக கூறி அவனை பாடசாலை முதல்வர் தற்காலிக நீக்கம் செய்தார். இதற்கு சிறுவனின் தாயார் ஜெனிபர் சவுந்தாஸ் கடும் எதிர்ப்பு தெரிவித்துள்ளார்.

எனது மகன் சக மாணவியின் கையில்தான் முத்தமிட்டான். அதில் தவறு எதுவும் இல்லை. தனது அன்பை வெளிப்படுத்த இந்த வழியை கையாண்டு இருக்கிறான். இதை பாலியல் தொந்தரவு என மிக கடுமையான குற்றமாக கருதக் கூடாது என்றார்.

வாஷிங்டனைச் சேர்ந்த ஆய்வு நிறுவனமான குளோபல் பைனான்ஷியல் இன்டெக்ரிட்டி கறுப்பு பணம் குறித்த ஆய்வு ஒன்றை மேற்கொண்டது.

கடந்த 2002ம் ஆண்டு முதல் 2011ம் ஆண்டு வரை எந்தெந்த நாடுகள் எவ்வளவு கறுப்பு பணத்தை வெளிநாடுகளுக்கு கடத்தியுள்ளது என்று ஆய்வு செய்யப்பட்டது.

இந்நிலையில் அந்நிறுவனம் தனது ஆய்வறிக்கையை நேற்று வெளியிட்டுள்ளது. அதன் விவரம் வருமாறு,

2011ம் ஆண்டில் மட்டும் 946.7 பில்லியன் அமெரிக்க டொலர்கள் மதிப்புள்ள கறுப்பு பணம் வளரும் நாடுகளில் இருந்து வெளிநாடுகளுக்கு கடத்தப்பட்டுள்ளது. 2002ம் ஆண்டு முதல் 2011ம் ஆண்டு வரை மொத்தம் 5.9 ட்ரில்லியன் அமெரிக்க டொலர்கள் மதிப்புள்ள கறுப்பு பணம் கடத்தப்பட்டுள்ளது.

உலக பொருளாதார நிலை மந்தமாக உள்ள நிலையில் கறுப்பு பண கடத்தல் அதிகரித்து வருகிறது. அதிலும் குறிப்பாக வளரும் நாடுகளில் இருந்து கடத்தப்படும் கறுப்பு பணத்தின் அளவு ஆண்டுக்கு ஆண்டு அதிகரித்துக் கொண்டே போகிறது.

கடந்த 10 ஆண்டுகளாக அதிக கறுப்பு பணம் கடத்தும் நாடுகள் பட்டியலில் தொடர்ந்து முதலிடத்தில் இருப்பது சீனா தான் (1.08 ட்ரில்லியன் அமெரிக்க டொலர்). ரஷ்யா, மெக்சிகோ, மலேசியா ஆகிய நாடுகள் அடுத்தடுத்த இடங்களில் உள்ளன.

2002ம் ஆண்டு முதல் 2011ம் ஆண்டு வரை அதிக கறுப்பு பணம் கடத்திய நாடுகளில் 343.04 பில்லியன் அமெரிக்க டொலர்கள் கடத்திய இந்தியா 5வது இடத்தில் உள்ளது.

கறுப்பு பணத்தை அதிகமாக கடத்தும் நாடுகளாக, ஆசியாவில் சீனா, மலேசியா, இந்தியா, இந்தோனேசியா, தாய்லாந்து மற்றும் பிலிப்பைன்ஸ், ஆப்பிரிக்காவில் நைஜீரியா மற்றும் தென்னாப்பிரிக்கா, ஐரோப்பாவில் ரஷ்யா, பெலாரஸ், போலந்து மற்றும் செர்பியா ஆகியவை உள்ளன.

இவை தவிர மெக்சிகோ, பிரேசில் மற்றும் ஈராக்கும் அதிக அளவில் கறுப்பு பணம் கடத்தும் நாடுகள் ஆகும்.