மர்மமான சிறுநீரக நோய் ஒன்று இலங்கையில் சுமார் ஐந்து லட்சம் மக்களுக்கு பரவக் காரணமாக இருந்ததாக ஐ.நாவின் உணவு மற்றும் விவசாய நிறுவனத்தின் மீது இலங்கையின் சிவில் சமூக அமைப்பு ஒன்று புகார் செய்துள்ளது.
பல்தேசிய நிறுவனங்களின் சார்பில் ஐ.நா உணவு மற்றும் விவசாய நிறுவனம், விவசாய இரசாயனப் பொருட்களின் பாவனையை ஊக்குவித்ததாக வளர்ச்சிக்கான செயற்பாட்டுக் குழுவான The Swarna Hansa Foundation என்னும் அமைப்பு கூறுகிறது.
அதன் விஷத்தால் பாதிக்கப்பட்ட மக்களுக்கு ஐநா இழப்பீடு வழங்க வேண்டும் என்றும் அந்த அமைப்பு கோரியுள்ளது.
ஐ.நா உணவு மற்றும் விவசாய நிறுவனம் அந்தக் குற்றச்சாட்டை நிராகரித்துள்ளது.
மூன்று வகையான இரசாயனங்களை தாம் தடைசெய்துள்ளதாக இலங்கை விவசாய அமைச்சு கூறியுள்ளது.
வடக்கு பாடசாலை நிகழ்வுகளில் தேசிய கொடியை ஏற்றுவதற்கு தடை விதிக்கப்பட்டுள்ளதாக சிங்களப் பத்திரிகையொன்று செய்தி வெளியிட்டுள்ளது.
வடக்கில் நடைபெறும் பாடசாலை நிகழ்வுகளின் போது தேசிய கொடியை ஏற்றக் கூடாது என சில பிரிவினைவாத தமிழ் அரசியல்வாதிகள் உத்தரவிட்டுள்ளனர்.
பாடசாலை உயர் அதிகாரிகளுக்கு இவ்வாறு அரசியல்வாதிகள் உத்தரவிட்டுள்ளமை பற்றிய தகவல் கிட்டியுள்ளது என புலனாய்வுப் பிரிவினர் தெரிவித்துள்ளனர். இவ்வாறு உத்தரவிட்ட பிரிவினைவாத அரசியல்வாதிகள் யார் என்பது அடையாளம் காணப்பட்டுள்ளது.
வடக்கின் சகல நடவடிக்கைகளையும் வட மாகாணசபை நிர்வாகம் மேற்கொள்ளும் எனவும், பாடசாலை நிகழ்வுகளில் சிங்கக் கொடியையோ அல்லது கொழும்பு அதிகாரிகளையோ அழைக்க வேண்டியதில்லை என அரசியல்வாதிகள் சிலர் கோரியுள்ளதாகத் தெரிவிக்கப்படுகிறது.
நாட்டின் சட்டங்களுக்கு எதிராக செயற்படும் குறித்த அரசியல் தலைவர்களுக்கு எதிராக கடுமையான நடவடிக்கை எடுக்க அரசாங்கம் தீர்மானித்துள்ளதாக சிங்களப் பத்திரிகையில் செய்தி வெளியிடப்பட்டுள்ளது.
தேசிய கொடிக்கு அவமரியாதை செய்யக் கூடாது : அரசாங்கம்..
தேசிய கொடிக்கு அவமரியாதை செய்யக் கூடாது என அரசாங்கம் அறிவித்துள்ளது. தேசியக் கொடிக்கு அவமரியாதை ஏற்படும் வகையில் எவரேனும் செயற்பட்டால் அரசியல் அமைப்பின் அடிப்படையில் அவர்களுக்கு எதிராக நடவடிக்கை எடுக்க முடியும் என உள்விவகார அமைச்சின் செயலாளர் பீ.பி.அபயகோன் தெரிவித்துள்ளார்.
வட மாகாணசபையைச் சேர்ந்த சில அமைச்சர்கள் உள்ளிட்ட மக்கள் பிரதிநிதிகள் வேண்டுமென்றே தேசிய கொடியை ஏற்ற மறுத்தமை தொடர்பான சம்பவங்கள் பதிவாகியுள்ளன.
தேசிய கொடி தொடர்பில் ஏற்கனவே சுற்று நிரூபமொன்று வெளியிடப்பட்டுள்ளது.
இந்த சுற்று நிரூபத்திற்கு மேலதிகமாக புதிதாக சுற்று நிரூபமொன்று நினைவூட்டும் வகையில் வெளியிடப்பட உள்ளது.
அரசியல் அமைப்பை பேணுவதாகத் தெரிவித்து பதவிப் பிரமாணம் செய்து கொண்ட வட மாகாண அரசியல்வாதிகள் அதற்கு முரணாக செயற்பட்டால், அவர்களுக்கு எதிராக நடவடிக்கை எடுப்பது குறித்து கவனம் செலுத்துமாறு அமைச்சர் டபிள்யூ.டி.ஜே.செனவிரட்ன தமக்கு ஆலோசனை வழங்கியதாக அபயகோன் தெரிவித்துள்ளார்.
தேசிய கொடி அனைத்து இன மக்களையும் பிரதிநிதித்துவம் செய்யும் வகையில் உருவாக்கப்பட்டுள்ளது. தேவையற்ற பிரச்சினைகளை ஏற்படுத்த தேசிய கொடியை பயன்படுத்திக்கொள்ள வேண்டிய அவசியமில்லை.
தேசிய கொடி ஏற்றல் தொடர்பிலான வழிகாட்டல்கள் மாகாண ஆளுனர்களுக்கு அனுப்பி வைக்கப்பட்டுள்ளது என அவர் தெரிவித்துள்ளார்.
வட மாகாண சபையினால் நிறைவேற்றப்பட்ட இரண்டு கோரிக்கைகளையும் அரசாங்கம் நிராகரித்துள்ளது.
வட மாகாண சபையின் நிர்வாகம் அரசாங்கத்திற்கு சவால் விடுக்கும் வகையில் இரண்டு தீர்மானங்களை ஏகமனதாக நிறைவேற்றியுள்ளது என சிங்களப் பத்திரிகையொன்று செய்தி வெளியிட்டுள்ளது.
வட மாகாண ஆளுனர் ஜீ.ஏ.சந்திரசிறிக்கு பதிலாக தமிழர் ஒருவரை மாகாண ஆளுனராக நியமிக்க வேண்டும், வடக்கு இராணுவ முகாம்கள் அகற்றப்பட வேண்டும் ஆகிய கோரிக்கைகளை முன்வைத்து தீர்மானம் நிறைவேற்றப்பட்டுள்ளது.
மாகாண சபை உறுப்பினரான எம்.கே.சிவாஜிலிங்கத்தினால் இந்தத் தீர்மானம் சமர்ப்பிக்கப்பட்டது. கே.சர்வேஸ்வரன் என்ற உறுப்பினரால் இந்தத் தீர்மானம் வழிமொழியப்பட்டுள்ளது.
வடக்கின் ஆளுனராக வடக்கைச் சேர்ந்த ஒருவரை நியமிக்க வேண்டுமெனவும் கோரப்பட்டுள்ளது. எனினும், இந்தக் கோரிக்கைகளை அரசாங்கம் நிராகரித்துள்ளது.
மன்னார் மாவட்ட கூட்டுறவுச் சபைக்குரிய கட்டடத்தை ஆக்கிரமித்துக்கொண்டுள்ள படைத்தரப்பினரிடமிருந்து அந்தக் கட்டடத்தை விடுவித்து கூட்டுறவுச் சங்கத்தினரிடம் மீளக் கையளித்து சங்கத்தின் அபிவிருத்தி நடவடிக்கைகளுக்கு வழிவிடுவதற்கு கூட்டுறவு அமைச்சர் வழிஏற்படுத்த வேண்டும் என்று வன்னி மாவட்ட பாராளுமன்ற உறுப்பினர் ந.சிவசக்தி ஆனந்தன் கோரிக்கை விடுத்துள்ளார்.
நேற்று12.12.2013 பாராளுமன்றத்தில் கூட்டுறவு, உள்நாட்டு வர்த்தகம், கடற்றொழில் நீர்வள மூலங்கள் அபிவிருத்திக்கான வரவு-செலவுதிட்ட ஒதுக்கீடு தொடர்பாக இடம்பெற்ற குழுநிலை விவாதத்தில் கலந்துகொண்டு உரையாற்றுகையிலேயே அவர் இவ்வாறு கோரிக்கை விடுத்துள்ளார். அங்கு அவர் தொடர்ந்தும் உரையாற்றுகையில்..
மன்னார் மாவட்டத்தில் உள்ள மொத்தம் ஏழு பல்நோக்கு கூட்டுறவு சங்கங்களுக்கும் தலா பத்து மில்லியன் ரூபாவிற்குக் குறையாமல் நிதியொதிக்கீடு செய்து மாவட்டத்தில் நெற்கொள்வனவு செய்வதற்கு வழியேற்படுத்த வேண்டும். இந்த நிதி வழங்கப்படாவிட்டால் பல்வேறு சிரமங்களுக்கு மத்தியில் பயிர்ச்செய்கையை மேற்கொண்டுள்ள விவசாயிகள் மிகக்குறைந்த விலைக்கு தனியார் வர்த்தகர்களிடம் நெல்லை விற்க வேண்டிய சூழல் ஏற்படும். இது வங்கிக்கடன் பெற்றுள்ள விவசாயிகள் தமது கடன்களைத் திரும்பச் செலுத்த முடியாத நிலையைத் தோற்றுவிப்பதுடன் விவசாயிகளின் அன்றாட வாழ்க்கையையே கேள்விக்குறியாக்கிவிடும்.
முசலி, அடம்பன் ஆகிய பிரதேசங்களில் பல்நோக்குக் கூட்டுறவு சங்கங்களின் வருவாயைப் பெருக்கும்பொருட்டு எரிபொருள் நிரப்பு நிலையங்கள் அமைப்பதற்கு அனுமதி வழங்க வேண்டும்.
விவசாயிகள் தாங்கள் அறுவடை செய்த நெல்லை சேமித்துவைப்பதற்கு இடமின்றித் தவிப்பதால் அவர்களது நெல்லைக் களஞ்சியப் படுத்துவதற்கு முசலி, மடு மற்றும் மாந்தை ஆகிய பகுதிகளில் நெற்களஞ்சியம் அமைத்துக் கொடுப்பதற்கு இந்த அரசு முன்வரவேண்டும்.
மன்னாரில் 32 மீனவர் சங்கங்கள் இருக்கின்றன. இவர்கள் தாங்கள் பிடிக்கின்ற மீன்களைக் கெடாமல் பாதுகாப்பதற்கு இன்றுவரை ஒரு ஐஸ் (பனிக்கட்டி) தொழிற்சாலைகூட நிறுவப்படவில்லை. இது தொடர்பாக பல்வேறுமுறை இந்தசபையில் தெரிவித்தும் இதுவரை இதற்கான நடவடிக்கைகள் மேற்கொள்ளப்படவில்லை. எனவே இம்முறையாவது மன்னார் மாவட்டத்தில் ஒரு ஐஸ்கட்டி தயாரிக்கும் தொழிற்சாலையை அமைப்பதற்கு இந்த அரசு நடவடிக்கை எடுக்க வேண்டும். தங்களது உயிரைப் பணயம் வைத்து மீன்பிடியில் ஈடுபடும் வன்னி மாவட்ட மீனவர்களின் வாழ்வாதாரத்தைப் பெருக்குவதற்கு இது மிகவும் அத்தியாவசியத் தேவையாகும்.
வவுனியா மாவட்டத்திற்கும் ஈச்சன்குளம், பம்பைமடு, கோமரசன்குளம், சாளம்பைக்குளம் ஆகியவற்றை உள்ளடக்கி ஆறு நெற்களஞ்சியங்கள் அமைக்கப்பட வேண்டும். போரில் பெரிதும் பாதிக்கப்பட்ட வன்னி மக்கள் சமாளித்து தமது பயிர்ச்செய்கையை மேற்கொண்டுள்ளபோதிலும் அவர்களது விளைச்சலை இயற்கை அனர்த்தங்களிலிருந்து பாதுகாப்பாகச் சேமித்துவைப்பதற்கான வழிதெரியாமல் துன்பப்படுகின்றனர். அவர்களின் உற்பத்தி வீணாகாமல் தடுப்பதற்கு இந்தக் களஞ்சியங்கள் மிகவும் அவசியமானதும் அவசரமானதுமாகும்.
ஓமந்தையில் நூதன அரிசிஆலை அமைப்பதற்கான முயற்சிகள் மேற்கொள்ளப்பட்டு கட்டுமானப் பணிகள் முடிவடைந்துள்ள போதிலும் போதிய இயந்திரங்கள் கொள்வனவு செய்யப்படாமையால் அந்த ஆலை செயற்படாமல் உள்ளது. சுமார் 20 மில்லியன் ரூபாய் செலவில் இயந்திரங்கள் மற்றும் கட்டுமானப் பணிகள் மேற்கொள்ளாமையால் ஏராளமான மக்களின் வரிப்பணம் வீணாக முடங்கிப்போயுள்ளது. மேலும் இப்பிரதேச மக்கள் தமது நெல்லை காயவைத்து அரைப்பதற்கு நெடுந்தூரம் செல்லவேண்டியுள்ளது. அரசு விரைந்து நடவடிக்கை எடுத்து ஓமந்தை அரிசிஆலையை இயங்கச்செய்யுமா?
மரக்காரம்பளையில் கால்நடை வளர்ப்போர் கூட்டுறவுச் சங்கத்தின் மூலம் பால் பதனிடுதல் மற்றும் பால்பொருட்கள் உற்பத்தி தொழிற்சாலை இயங்கிவருகின்றது. இதற்கு சர்வதேச தொண்டுநிறுவனங்கள் நிதியுதவி செய்துள்ளன. இருந்தபோதிலும் போதிய நிதியின்மையால் இத்தொழிற்சாலை இப்பொழுது இயங்காமல் உள்ளது.
இத்தொழிற்சாலையை இயக்குவதற்கு 5 மில்லியன் ரூபாய் தேவைப்படுவதாகத் தெரிகின்றது. அரசாங்கம் அந்நிதியை வழங்கினால் வவுனியா மாவட்டத்தின் பல்நோக்குக் கூட்டுறவுச் சங்கத்தின் வருவாயைப் பெருக்கிக்கொள்ள முடியும் என்பதுடன் இத்தொழிற்சாலை இயங்காமையால் வவுனியா மாவட்ட கால்நடை வளர்ப்போர்கள் தமது பாலை மிகக்குறைந்த விலையில் தனியார் நிறுவனங்களுக்கு விற்கவேண்டிய நிலையில் உள்ளனர். அரசு இவர்கள்மீது கவனம் செலுத்த முன்வரவேண்டும் என்று கூறினார்.
உத்தரதேச மாநிலம் கோராக்பூரை சேர்ந்த சிறுமி வீட்டு பிரச்சினை காரணமாக பெற்றோர்களுக்கு தெரியாமல் வீட்டை விட்டு ஓடியுள்ளார். அவர் ரெயில் மூலம் புதுடெல்லி செல்லும் போது நான்கு பேர் கொண்ட குழுவினால் கற்பழிக்கப்பட்டுள்ளார்.
இது தொடர்பாக பாதிக்கப்பட்ட சிறுமி பொலிஸாரிடம் முறைப்பாடு செய்கையில், நான் ரெயில் இருந்து கீழே இறங்கியதும், நான்கு பேர்கள் கொண்ட கும்பல் என்னை கடத்தி சென்று சிந்தியா ஹவுஸ்க்கு பின்புறம் கொண்டு சென்று கற்பழித்து விட்டனர் என்று கூறியுள்ளார். சிறுமி நேற்று காலை அங்குள்ள பார்க்கிங் ஒன்றில் மயக்க நிலையில் கிடந்துள்ளார். அவரை பார்த்த சிலர் அங்குள்ள ஆர்.எம்.எல் மருத்துவமனைக்கு கொண்டு சென்றுள்ளனர்.
மருத்துவமனையில் மேற்கொண்ட சிகிச்சையின் பின்னர் சிறுமி கற்பழிக்கப்பட்டது உறுதியாகியுள்ளது. இது தொடர்பாக பொலிஸார் விசாரணை நடத்தி வருகின்றனர். அப்பகுதியில் பொருத்தப்பட்டிருந்த சி.சி.டி.வி. கேமராக்களை பொலிஸார் ஆய்வு செய்து வருகின்றனர். இவ்வழக்கு தொடர்பாக யாரும் இதுவரை கைது செய்யப்படவில்லை.
சிறுமி மனதளவில் மிகவும் பாதிக்கப்பட்டுள்ளதாகவும், அவளிடம் இருந்து மேலும், சில தகவல்களை பெற நாங்கள் முயற்சித்து வருகிறோம் என்று பொலிஸ் தரப்பில் தெரிவிக்கப்பட்டுள்ளது.
செவ்வாய் கிரகத்துக்கு சென்று அங்கேயே நிரந்தரமாக தங்குவதற்கான பயணத்துக்கு, உலகின் பல்வேறு நாடுகளில் இருந்து மொத்தம் 2,02,586 பேர் விண்ணப்பித்துள்ளனர்.
செவ்வாய் கிரகத்தில் நிரந்தரமாகத் தங்குவதற்கான ஒரு வழிப் பயணம் ஒன்றை மார்ஸ் வன் என்ற தனியார் நிறுவனம் ஏற்பாடு செய்துள்ளது.
இந்தப் பயணத்துக்காக 5 மாதத்தில் 140 நாடுகளில் இருந்து சுமார் 2 இலட்சம் விண்ணப்பங்கள் அந்த தனியார் நிறுவனத்தில் அளிக்கப்பட்டுள்ளன.
இந்த மொத்த விண்ணப்பத்தில் 24 சதவீதம் அமெரிக்காவில் இருந்தும், 10 சதவீதம் இந்தியாவில் இருந்தும், 6 சதவீதம் சீனாவில் இருந்தும், 5 சதவீதம் பிரேசிலில் இருந்தும், மீதமுள்ள விண்ணப்பங்கள் பிரிட்டன், கனடா, ரஷியா, மெக்ஸிகோ, பிலிப்பின்ஸ், ஸ்பெயின் உள்பட பல்வேறு நாடுகளில் இருந்தும் பெறப்பட்டுள்ளன.
மார்ஸ் வன் நிறுவனத்தின் தேர்வுக் குழு தேர்வு செய்யும் தகுதியுடைய நபர்களுக்கு பயிற்சி அளிக்கப்பட்டு அவர்கள் 2023ஆம் ஆண்டு ஒரு குழுவாக செவ்வாய் கிரகத்துக்கு அனுப்பி வைக்கப்படுவர்
வட மாகாண சபையில் 2014ம் ஆண்டுக்கான வரவு – செலவுத் திட்டம் எதிர்ப்பின்றி நேற்று ஏகமனதாக நிறைவேற்றப்பட்டுள்ளது. வட மாகாண சபையின் வரவு – செலவுத்திட்ட அமர்வுகள் மூன்று தினங்களாக இடம்பெற்று வந்தன.
முதல் நாள் அமர்வின்போது, ஆளுநர் செயலகமும் பொதுச்சேவை ஆணைக்குழுவும், பேரவைச் செயலகம், முதலமைச்சர் செயலகம் ஆகியவற்றுக்கான வரவு – செலவுகள் விவாதங்களின்றி நிறைவேற்றப்பட்டன.
நேற்றைய அமர்வின்போது கல்வி, கலை, பண்பாட்டு, விளையாட்டு அமைச்சு மற்றும் சுகாதார, சுதேச வைத்தியத்துறை அமைச்சு ஆகியவற்றுக்கான வரவு – செலவுகளும் விவாதங்களின் பின்னர் ஏகமனதாக நிறைவேற்றப்பட்டன.
இந்நிலையில், இன்றைய அமர்வின்போது, மீன்பிடி, வர்த்தகம், வாணிபம், போக்குவரத்து அமைச்சு மற்றும் விவசாயம், கமநலசேவைகள், கால்நடை, நீர்ப்பாசன அமைச்சு ஆகியவற்றுக்கான வரவு – செலவுகள் ஏகமனதாக நிறைவேற்றப்பட்டன.
இதேவேளை, வடமாகாண சபையின் அடுத்த அமர்வு 2014 ஆண்டு ஜனவரி 9 ஆம் திகதி நடைபெறும் என சபைத் தலைவரால் அறிவிக்கப்பட்டுள்ளமை குறிப்பிடத்தக்கது.
இலங்கை அமைச்சகத்துக்கு இந்திய வெளியுறவு அமைச்சகம் மூலமாக கண்டன அறிக்கையும், இலங்கை ஜனாதிபதிக்கு பிரதமர் நேரடியாக தொடர்பு கொண்டு கடும் கண்டனத்தையும் உடனடியாக தெரிவிக்க வேண்டும் என்று தமிழக மீனவர்கள் பிரச்னை குறித்து பிரதமருக்கு முதல்வர் ஜெயலலிதா எழுதியுள்ள கடிதத்தில் குறிப்பிட்டுள்ளார்.
மேலும் முதல்வர் எழுதியுள்ள கடிதத்தில், தமிழக மீனவர்களின் நிலை குறித்தும், இலங்கை கடற்படையினர் செய்து வரும் அட்டூழியம் குறித்தும், உங்களுக்கு பல முறை வலியுறுத்தி கடிதங்களை எழுதியுள்ளேன்.
தமிழக அப்பாவி மீனவர்களை இலங்கை கடற்படையினரிடம் இருந்து பாதுகாக்கவும், தமிழக மீனவர்களுக்கு இந்திய கடல் எல்லையில் இருக்கும் மீன்பிடி உரிமையை நிலைநாட்டவும் நடவடிக்கை எடுக்குமாறு வலியுறுத்தியுள்ளேன்.
ஆனால், மத்திய அரசு இது தொடர்பாக எந்த நடவடிக்கையும் எடுக்காமல் மௌன சாட்சியாகவே இருந்து விட்டதால், இலங்கை கடற்படையினரின் அத்துமீறல்கள் எல்லை அடங்காமல் போய்விட்டது.
இதற்கு உதாரணமாக கடந்த புதன்கிழமை, 47 படகுகளில் சென்ற தமிழக மீனவர்கள் 325 பேரை இலங்கை கடற்படையினர் சிறைபிடிக்க முயன்றுள்ளனர். தமிழக மீனவர்களை சுட்டுக் கொன்றுவிடுவதாகவும் ஆயுதம் ஏந்திய இலங்கை கடற்படையினர் மிரட்டியுள்ளனர்.
இந்த நிலையில், 15 படகுகளில் சென்ற 110 மீனவர்களை பிடித்துக் கொண்ட இலங்கை கடற்படை, 32 படகுகளில் சென்ற 215 மீனவர்களை திருப்பி அனுப்பியுள்ளது. கைது செய்யப்பட்ட 110 தமிழக மீனவர்களும் திருகோணமலை சிறையில் அடைக்கப்பட்டுள்ளனர்.
இந்த தகவல் கடலோர காவல்படை மூலமாக தமிழக அரசுக்கு தெரிவிக்கப்பட்டதும் மிகுந்த அதிர்ச்சி அடைந்தேன். ஆனால், அதற்குள், 8 படகுகளில் சென்ற புதுக்கோட்டை மாவட்டம் ஜெகதாப்பட்டினத்தைச் சேர்ந்த 30 மீனவர்கள் இன்று கைது செய்யப்பட்டுள்ளதாக தகவல்கள் வந்துள்ளன.
இது மிகவும் கண்டிக்கத்தக்க, மிக மோசமான நடவடிக்கையாகும். இது போர் நடவடிக்கையை ஒத்த செயலாகும். இதனால், இந்தியாவின் மரியாதை மிகவும் மோசமாக்கப்படுகிறது. தங்களது வாழ்க்கையையும், வாழ்வாதாரத்தையும் மத்திய அரசு காப்பாற்றும் என்ற நம்பிக்கையே தமிழக மீனவர்களிடம் துளியும் இல்லாமல் போய்விட்டது.
எனவே, இனியும், இதுபோன்ற தொடக் கூடாது என்ற கொள்கையை நாம் தொடர முடியாது. இனியாவது மத்திய அரசு விழித்துக் கொண்டு தமிழக மீனவர்களின் வாழ்வாதாரத்தை காப்பாற்ற நடவடிக்கை எடுக்க வேண்டும்.
இலங்கை அமைச்சகத்துக்கு இந்திய வெளியுறவு அமைச்சகம் மூலமாக கண்டன அறிக்கையும், இலங்கை அதிபருக்கு பிரதமர் நேரடியாக தொடர்பு கொண்டு கடும் கண்டனத்தையும் உடனடியாக தெரிவிக்க வேண்டும். இந்த விவகாரத்தில் பிரதமர் நேரடியாக தலையிட்டு எந்த வித தாமதமும் இன்றி நடவடிக்கை எடுத்தாக வேண்டும்.
இலங்க கடற்படையினரின் இதுபோன்ற நடவடிக்கை மீண்டும் நிகழாத வண்ணம் தடுத்து, தமிழக மீனவர்களை காப்பதில் உரிய பணியை செய்திட வேண்டும்.
கடந்த 24 மணி நேரத்தில் இலங்கை கடற்படையினரால் பிடிபட்டுள்ள 22 படகுகளையும், 140 மீனவர்களையும் உடனடியாக விடுவிக்கவும், ஏற்கனவே சிறையில் அடைக்கப்பட்டுள்ள மீனவர்களையும், அவர்களது படகுகளையும் விடுவிக்கவும் மத்திய அரசு நடவடிக்கை எடுக்க வேண்டும் என்று ஜெயலலிதா வலியுறுத்தியுள்ளார்.
பாகிஸ்தானில் வெளிநாட்டு திரைப்படங்கள் மற்றும் தொலைக்காட்சி நிகழ்ச்சிகளுக்கு தடை விதித்து அந்நாட்டு நீதிமன்றம் உத்தரவிட்டுள்ளது.
குறிப்பாக இந்தியா தொடர்பான நிகழ்ச்சிகளை சுட்டிக்காட்டிய நீதிபதி காலித் மமூத் கான், இந்திய நிகழச்சியில் அனைத்தும் எதிர்மறை பட்டியலில் உள்ளதால் அப்பட்டியலிலுள்ள தயாரிப்புகளை இரு நாட்டு வர்த்தக ஒப்பந்தத்தில் குறிப்பிட்டுள்ளதை பரிசீலித்தே இத்தடை பிறப்பிக்கப்படுவதாகவும் தெரிவித்தார்.
இந்திய எதிர்ப்பு கொள்கையை கடைபிடித்து வரும் முபாஷிர் லக்மன் என்பவர் கடந்த மாதம் தொலைக்காட்சி நிகழ்ச்சி ஒன்றில் பிரச்சினைக்குரிய பேட்டியை தொடர்ந்து, தொடரப்பட்ட வழக்கில் இந்த உத்தரவு பிறப்பிக்கப்பட்டுள்ளது.
2006 ஆம் ஆண்டு பிறப்பித்த ஒழுங்குமுறை அரசாணையின்படி இந்திய மற்றும் வெளிநாட்டு திரைப்படங்கள் இறக்குமதி செய்யப்பட்டு திரையிடப்பட்டு வருவதாகவும், ஆனால் இவ்வாறு இறக்குமதி செய்வது பாகிஸ்தானின் இறக்குமதி கொள்கைக்கும், மின்னணு தொடர்பு துறை ஒழுங்குமுறை ஆணையத்திற்கும் எதிரானதென்றும் கூறப்பட்டுள்ளது.
பாகிஸ்தான் திரைப்படங்கள் அங்கு நல்ல வரவேற்பு பெறாத நிலையில், இந்திய பாலிவுட் திரைப்படங்கள் அங்கு நல்ல வரவேற்பு பெருவது குறிப்பிடத்தக்கது.
நிறவெறி கொள்கைகளிற்கெதிரான போராட்டத்திற்கு தனது வாழ்நாளையே அர்ப்பணித்திருந்த நெல்சன் மண்டேலாவின் தியாக வாழ்க்கை தென்னாபிரிக்க நாட்டு இளைஞர்களிற்கு மட்டுமல்லாமல் பூமியில் புத்துலகம் காணத்துடிக்கும் இளைஞர்கள் அனைவருக்கும் இதயகீதமானது.
விடுதலைக்காக இளமை முதல் போர்க்களம் கண்ட மண்டேலா அவரது வளர்ச்சிப்பருவத்தில் தென்னாபிரிக்க கம்யூனிஸ்ற் கட்சி தலைவர்களோடு இணைந்து போராடினார். மக்களின் விடுதலைக்காக சிறையை விரும்பி ஏற்றவர். அதிபர் பதவியை இரண்டாம் முறையாக ஏற்க வேண்டும் என உலகமே வற்புறுத்தியபோதும் ஏற்க மறுத்ததன் மூலம் உலக பெரும் தலைவராக உயர்ந்திருந்தவர். இருண்ட கண்டம் ஒளி வீச ஓங்கி ஒலித்த அந்த மனிதநேய சகாப்தம் 05.12.2013 அன்று இறவா காவியமானது.
இந்தியாவின், கேரள மாநிலத்தை சேர்ந்த கிரிக்கெட் வீரர் ஸ்ரீசாந்த். இந்திய அணியின் வேகப்பந்து வீச்சாளராக இருந்தார். ஐ.பி.எல்.போட்டிகளில் சூதாட்டத்தில் ஈடுபட்டதாக எழுந்த புகாரில் கைதாகி தற்போது பிணையில் விடுதலையாகி உள்ளார்.
இவரும், ராஜஸ்தான் ராஜ குடும்பத்தை சேர்ந்த நயன் என்ற புவனேஸ்வரி குமாரி (23) என்பவரும் நீண்ட நாட்களாக காதலித்து வந்தனர்.
இவர்களின் காதல் விவகாரத்திற்கு இரு வீட்டாரின் பெற்றோரும் சம்மதம் தெரிவித்ததின் பேரில் நேற்று அவர்களின் திருமணம் கேரள மாநிலத்தில் உள்ள பிரசித்தி பெற்ற குருவாயூர் கிருஷ்ணன் கோவிலில் இன்று நடந்தது.
கேரள பாரம்பரிய முறைப்படி இத் திருமணம் நடந்தது. இதில், ஸ்ரீசாந்தின் நெருங்கிய உறவினர்கள், நண்பர்கள் மட்டுமே கலந்து கொண்டனர்.
மணமகள் நயன் என்ற புவனேஸ்வரி குமாரி ராஜஸ்தான் ராஜ குடும்பத்தை சேர்ந்தவர் என்பதால் இன்று மாலை கொச்சியில் உள்ள லீராயல் மெரிடியன் ஹோட்டலில் ராஜஸ்தான் ராஜ குடும்ப பாரம்பரிய முறைப்படி திருமண விழா நடத்தப்படுகிறது.
இதிலும் முக்கிய குடும்ப உறுப்பினர்கள் மட்டுமே பங்கேற்கிறார்கள். இத்திருமணம் பற்றி ஸ்ரீசாந்தின் உறவினரும் பிரபல பாடகருமான மது பாலகிருஷ்ணன் கூறும்போது,
நயன் அவரது 13வது வயதில் இருந்தே ஸ்ரீசாந்த் மீதும் அவரை திருமணம் செய்ய வேண்டும் என்பதில் ஆர்வமாக இருந்தார். இதை அந்த வயதிற்கான ஆர்வக்கோளாறு என்றே பெற்றோர் கருதினர். ஆனால் அவர் வளர்ந்து இளமை பருவம் அடைந்த பின்பும் ஸ்ரீசாந்த் மீது அதே பாசத்துடன் இருந்தது பெற்றோருக்கு வியப்பை ஏற்படுத்தியது.
ஒரு முறை அவர் ஸ்ரீசாந்திடம் ஆட்டோகிராப் கேட்டு சென்ற போது அவரிடம் தனது விருப்பத்தை தெரிவித்தார். ஆனால் அவரோ தன்னிடம் ஆட்டோ கிராப் வாங்கும் மற்ற பெண்களை போல இவரும் பேசுவதாகவே கருதினார்.
பின்னர்தான் அந்த பெண் தனது குடும்பத்தினருக்கு தெரிந்தவர் என்பதையும், அவர் தன் மீது வைத்திருந்த பாசத்தையும் புரிந்து கொண்டார். அந்ததருணத்திற்கு பிறகே அவர்கள் இருவரும் அன்புடன் பழக தொடங்கினர்.
ஸ்ரீசாந்திற்கு சமீபத்தில் ஏற்பட்ட நெருக்கடிகளின் போதும் நயனின் குடும்பம் அவருக்கு ஆதரவாகவே இருந்தது. இதனால் தான் திருமணம் நடக்கிறது. ஸ்ரீசாந்திற்கு ஏற்பட்ட பிரச்சினைகள் விரைவில் விலகி நல்ல முடிவு ஏற்படும். அவரும் உயர்ந்த நிலைக்கு வருவார் என நம்புகிறேன் என்றார்.
வவுனியா நகரசபை உள்ளக அரங்கில் மனித உரிமைகள் தின நிகழ்வுகள் வவுனியா மாவட்ட பிரஜைகள் குழுவின் ஏற்பாட்டில் நடைபெற்றது.
இந்நிகழ்வில் மதத்தலைவர்கள் சார்பில் அதி வணக்கத்துக்குரிய அருட்தந்தை டெஸ்மொன்ட் ஏஞ்சலோ, வவுனியா இறம்பைக்குளம் பெண்கள் கல்லூரியை சேர்ந்த அருட்சகோதரிகள், கருமாரியம்மன் ஆலய குருக்களும், வவுனியா அந்தணர் ஒன்றிய செயலாளருமாகிய பிரபாசர்மா குருக்கள், வவுனியா நகரப்பகுதி பள்ளிவாசல் மௌலவியும், வவுனியா அரபுக்கல்லூரியின் பதில் அதிபருமாகிய சிட்தீக் ஆகியோரும், சிவில் சமுக அமைப்புகள் சார்பில் இலங்கை தமிழ் ஊடகவியலாளர் ஒன்றிய செயலாளர் நிக்சன், பிரஜைகள் குழுவின் காப்பாளரும், மனித உரிமை ஆர்வலருமான சண் மாஸ்டர், தன்னார்வ தொண்டு நிறுவன ஆர்வலர் திரு. நரசிங்கம்,
வவுனியா மாவட்ட பிரஜைகள் குழுவின் தலைவர் கி.தேவராசா மற்றும் உறுப்பினர்கள், முல்லைத்தீவு மாவட்ட மக்கள் ஒன்றியத்தின் செயலாளர் திருமதி சந்திரலீலா, மற்றும் உள்ளூர் தொண்டு நிறுவன பிரதிநிதிகளும், அரசியல் பிரமுகர்கள் சார்பில் கூட்டமைப்பின் பேச்சாளரும், யாழ் மாவட்ட பாராளுமன்ற உறுப்பினருமாகிய சுரேஸ் பிறேமச்சந்திரன், ஜனநாயக மக்கள் முன்னணியின் ஊடக செயலாளர் பாஸ்கரா, கூட்டமைப்பின் வன்னி மாவட்ட பாராளுமன்ற உறுப்பினர் சிவசக்தி ஆனந்தன், தமிழ் தேசிய மக்கள் முன்னணியின் வவுனியா மாவட்ட அமைப்பாளர் வசந்தன், காணாமல் போன குடும்பங்களை சேர்ந்த பெற்றோர்கள், பிள்ளைகள், பொது மக்கள் என நூற்றுக்கணக்கானோர் கலந்து கொண்டனர்.
இந்நிகழ்வில் வவுனியா மாவட்ட பிரஜைகள் குழுவின் 2013 ஆம் ஆண்டுக்கான மனித உரிமைகள் தின பிரகடனத்தை பிரஜைகள் குழுவின் காப்பாளரும், மனித உரிமை ஆர்வலருமான சண் மாஸ்டர் முன் வைத்தார். (பிரகடனத்தின் முழு விவரம் பின்னிணைப்பு செய்யப்பட்டுள்ளது.)
வவுனியா மாவட்ட பிரஜைகள் குழுவின் மனித உரிமைகள் தின பிரகடனங்கள்
மனித உரிமை என்பது கருவறையில் தொடங்கி கல்லறை வரை தொடர்கிறது. ஆம் ஒரு மனித உயிர் கருவாய் உருக்கொள்ளும் கணத்திலேயே மனித உரிமை பிறந்து விடுகிறது. ஏனெனில் முறையற்ற கருக்கலைப்பு முழுமையாய் பெரும் குற்றம். மனிதனை மனிதனாக மதிப்பதே மனித உரிமை.
மனித உரிமை என்ற சொல்இ 1766-ம் ஆண்டு வெளியிடப்பட்ட அமெரிக்க சுதந்திரப் பிரகடனத்தில் தான் முதன் முதலாக பயன்பட்டதாக அறியப்பட்டுள்ளது. பண்டையக் காலத்தில் மனித உரிமை என்பது தர்மசிந்தனையாகவும், பாவ புண்ணிய மதிப்பீடாகவும் இருந்து வந்திருக்கிறது.
சர்வதேச மனித உரிமைகள் தினம் ஆண்டு தோறும் டிசம்பர் 10ஆம் திகதி அனுஸ்டிக்கப்படுகிறது. இரண்டாம் உலகமகா யுத்தம் நடைபெற்றபோது நடந்த சொத்திழப்புக்கள்இ மனிதப்படுகொலைகள்இ அட்டுழியங்கள் மற்றும் மனிதப்பேரழிவுகளின் பின்னர் தோன்றிய ஐக்கிய நாடுகள் சபையால் பிரகடனப்படுத்தப்பட்டதே இந்த மனித உரிமைப் பிரகடனமாகும். 1945 -ஆம் ஆண்டு ஐக்கிய நாடுகள் சபை உருவாக்கப்பட்டது.
ஐக்கிய நாடுகள் சபையின் உருவாக்கத்தையடுத்து 1946 ஆம் ஆண்டு பெப்ரவரி மாதம் 16 ஆம் திகதி ஐக்கிய நாடுகள் “மனித உரிமை ஆணைக்குழு” உதயமாகியது. ஐம்பத்து மூன்று அங்கத்துவ நாடுகளைக் கொண்ட இம் மனித உரிமை ஆணைக் குழு, தனது முதல் வேலைத்திட்டமாக ‘சர்வதேச மனித உரிமைப் பிரகடனத்தை உருவாக்குவதற்கு அமெரிக்க ஜனாதிபதியின் மனைவி எலினா ரூஸ்வெல்ட் தலைமையில் ஒரு குழுவை அமைத்தது. ஐம்பத்து மூன்று அங்கத்துவ நாடுகளின் பிரதிநிதிகளைக் கொண்ட இந்த குழுவின் சிபாரிசின் படி 30 பிரிவுகளின் கீழ் மனித உரிமைகள் இனங்காணப்பட்டு அனைத்துலக மனித உரிமைகள் (Universal Declaration of Human Rights) பிரகடனம் ஐக்கிய நாடுகள் சபைக்கு சமர்ப்பிக்கப்பட்டது. டிசம்பர் 10, 1948-ஆம் ஆண்டு பிரான்ஸின் தலைநகரான பாரிஸில் உள்ள “பலேடு சாயிலோற்’ என்ற மண்டபத்தில் நடைபெற்ற ஐக்கிய நாடுகள் பொதுச் சபை இந்தப் பிரகடனத்திற்கு 58 நாடுகள் அங்கீகாரம் வழங்கியது.
இந்த புனித நாள் 1950 -ஆம் ஆண்டிலிருந்து டிசம்பர் 10 ஆம் திகதி “சர்வதேச மனித உரிமைகள் தினமாக” கொண்டாடப்பட்டு வருகிறது. “சகல மனிதப் பிரஜைகளும் சமத்துவமானதும், விட்டுக் கொடுக்க முடியாததுமான உரிமைகள் மற்றும் அடிப்படைச் சுதந்திரங்களுடனேயே பிறக்கின்றனர்” என்ற உண்மையை உணர்த்தும் வகையிலான நிகழ்வுகளும், செயற்திட்டங்களும் இத்தினத்தில் முழு உலகிலும் முன்னெடுக்கப்படுகின்றன. இன்று மனித உரிமைகளைப் பேணிக்காத்து மேம்படுத்துவதற்கான உலகளாவிய ஒரு நியமமாக இந்தப் பிரகடனம் மாறிவிட்டது.
1776 ஆம் ஆண்டு ஐக்கிய அமெரிக்க சுதந்திரப்பிரகடனத்தின், ‘எல்லாப் பிரஜைகளும் சமமாகவே படைக்கப்பட்டிருக்கிறார்கள், அவர்கள் வாழும் உரிமை, சுதந்திரம், மகிழ்ச்சியை நாடும் உரிமை போன்றன அவர்களிடமிருந்து பிரிக்கமுடியாத உரிமைகளாகும்.” என கூறப்பட்டிருந்தது.
எனவே மனித உரிமை என்பது, எல்லா மனிதர்களுக்கும் உரித்தான அடிப்படை உரிமைகளும், சுதந்திரங்களும் ஆகும். மனித உரிமைகள் என்பதனுள் அடங்குவதாகக் கருதப்படும் சிவில் மற்றும் அரசியல் உரிமைகளுள், வாழும் உரிமை, சுதந்திரம், கருத்து வெளிப்பாட்டுச் சுதந்திரம், சட்டத்தின் முன் சமநிலை, பண்பாட்டு உரிமை, உணவுக்கான உரிமை, வேலை செய்யும் உரிமை, கல்வி உரிமை என்பன முக்கியமானவையாகக் கருதப்படுகின்றது.
ஐக்கிய நாடுகள் சபையின் மனித உரிமை சாசனங்களை மேற்கோள் காட்டி இலங்கைத்தீவில் ஒடுக்கப்பட்ட சமுகங்களுக்கு எதிராக மேற்கொள்ளப்படும் அனைத்து அநீதிகளுக்கு எதிராகவும், அடக்குமுறைகளுக்கு எதிராகவும் குரல் கொடுத்து வரும் வவுனியா மாவட்ட பிரஜைகள் குழு மாவட்டத்தின் எல்லை தன்டி அனைத்து சமூகங்களினதும் மனித கௌரவத்தையும், மனித உரிமைகளையும் பாதுகாப்பதை இலட்சியமாக கொண்டுள்ளது. பல்வேறு அச்சுறுத்தல்கள், ஆபத்துகளுக்கு மத்தியிலும் அர்ப்பணிப்புடன் பணியாற்றி வருகின்றது.
ஆகவே சர்வதேச மனித உரிமைகள் தினமாகிய இன்று இலங்கைத்தீவில் மனித உரிமை பேணப்பட்டு மனித கௌரவம் பாதுகாக்கப்பட்டு வடகிழக்கில் முழுமையாக சிவில் நிர்வாகம் ஏற்படுத்தப்பட வேண்டும் என்ற தொனிப்பொருளில் மனித உரிமைகள் தின நிகழ்வை நாம் ஒழுங்குபடுத்தியிருப்பதோடு முக்கிய பிரகடனங்களையும் முன் வைக்கின்றோம்.
01.வடக்கு கிழக்கிலிருந்து இராணுவம் வெளியேற்றப்பட்டு முழு அளவில் சிவில் நிர்வாகம் ஏற்படுத்தப்பட வேண்டும்.
2009ஆம் ஆண்டு மே மாதம் 18ஆம் திகதியின் பின்னரான அரசியல் சூழலில் வடகிழக்கு பிராந்தியமானது ஒரு முழு இராணுவ வலயமாகவே காட்சியளிக்கின்றது. ஒவ்வொரு குடிமகனும் தன்னை அறியாமலேயே தான் இராணுவத்தினுடைய பார்வைக்குள் முடக்கப்பட்ட பிரமையுடனேயே வாழ்க்கையை கழிக்கின்றான். இந்நிலை அடிப்படை மனித உரிமை மீறலாகும்.
சர்வதேச அழுத்தங்களின் விளைவாக ஜனாதிபதியால் உருவாக்கப்பட்ட நல்லிணக்க ஆணைக்குழுவின் பரிந்துரைகளில் ஒன்று வடக்கு கிழக்கிலிருந்து இராணுவம் வெளியேற்றப்பட்டு சிவில் நிர்வாகம் ஏற்படுத்தப்பட்டு மக்களின் சுதந்திரமான வாழ்வியலுக்கு அடித்தளமிட வேண்டும் என்ற நல்லிணக்க ஆணைக்குழுவின் பரிந்துரைகள் கூட நடைமுறைப் படுத்தப்படவில்லை.
இலங்கையில் ஏனைய மாகாணங்களை விட, மிதமிஞ்சிய இராணுவ எண்ணிக்கையையும், அதற்கான கட்டுமான பணிகளும் வடகிழக்கு மாகாணத்தில் பிரஜையும் அச்சம் கொள்ள வைக்கின்றது. இந்தச்செயற்பாடுகளை அரசு தடுத்து நிறுத்தி சிவில் நிர்வாகத்தை உடனடியாக ஏற்படுத்த வேண்டும்.
02.காணாமல் போனோர் தொடர்பில் இலங்கை அரசாங்கம் நம்பிக்கை அளிக்கக் கூடிய வகையில் பொறுப்புக்கூற வேண்டும்.
உழைத்து தமது குடும்பத்தின் பொறுப்புகளை கவனிக்க வேண்டிய வயதில் பல இளைஞர் யுவதிகளும், குடும்ப தலைவர்களும் காணாமல் போகச்செய்யப்பட்டுள்ளனர். அவர்களின் உழைப்பை நம்பி தங்கி வாழும் நிலையிலிருந்த பல குடும்பங்கள் இன்றும் கூட மீள முடியாத வறுமை நிலையில் கண்ணீரோடு படுத்து கண்ணீரோடு எழும்பும் நிலைமையே காணாமல் போன குடும்பங்களின் தொடர் கதையாகி விட்டது.
காணாமல் போனோர் தொடர்பில் அரசின் பொறுப்புக்கூறா தன்மை நீண்டு கொண்டு செல்வதைப் போலவே நாளுக்கு நாள் காணாமல் போனோர் பட்டியலும் நீண்டு கொண்டு செல்கின்றது. சிறீலங்கா அரசானது காணாமல் போனோர் தொடர்பில் பொறுப்புணர்ச்சியுடன் பதிலளித்து, காணாமல் போனோரை கண்டுபிடித்து உறவினர்களுடன் இணைத்து, பாதிக்கப்பட்ட குடும்பங்கள் மறுவாழ்வு பெறுவதற்கு விரைந்து செயற்பட வேண்டும் என வவுனியா மாவட்ட பிரஜைகள் குழு வலியுறுத்துவதோடு, காணமால் போனவர்களின் உறவினர்கள் நடத்தும் அஹிம்சைப் போராட்டங்களுக்கு அரசாங்கம் தடை விதிக்கக்கூடாது.
பிரித்தானிய பிரதமர் டேவிற் கமரோன் யாழ்ப்பாணம் சென்றபோது நடத்தப்பட்ட போராட்டங்கள் மிக மோசமாக அடக்கப்பட்டதையும் கொழும்பை நோக்கிய அவர்களின் பயணத்துக்கும் அரசாங்கம் தடை விதித்தமையும் மனித உரிமை மிறலாகும். அரசாங்கத்தின் இந்த செயற்பாடுகளை வவுனியா மாவட்ட பிரஜைகள் குழு வன்மையாக கண்டிக்கின்றது.
03.தமிழ் அரசியல் கைதிகளை அரசாங்கம் மனிதாபிமான அடிப்படையில் விடுதலை செய்ய வேண்டும்.
உள்நாட்டில் நடைபெற்ற யுத்தம் மூன்று தசாப்த காலங்களுக்குப்பின்னர் முடிவுக்கு கொண்டு வரப்பட்டுள்ளது. யுத்தத்தைக் காரணம் காட்டி பல தமிழர்கள் பயங்கரவாத, அவசரகால தடைச்சட்டங்களின் கீழ் கைது செய்யப்பட்டு சிறையில் அடைக்கப்பட்டுள்ளார்கள். அன்றைய சூழ்நிலையைக்காரணம் காட்டி அரசாங்கம் இந்த கைதிகளின் விடயத்தில் பாராமுகமாக இருந்து வந்தது. இன்றும் அதே போக்கு தொடர்கின்றது. தாங்கள் என்ன குற்றத்திற்காக சிறையில் அடைக்கப்பட்டுள்ளோம் என்பதைக் கூட இதுவரை காலமும் அறியாது சிறைவாசம் அனுபவித்து வரும் தமிழ் அரசியல் கைதிகளை அரசாங்கம் மனிதாபிமான அடிப்படையில் உடனடியாக விடுதலை செய்ய வேண்டும்.
சுமத்தப்பட்டிருக்கும் குற்றச்சாட்டுக்கு மேலதிகமான சிறைத்தண்டனையை கைதிகள் அனுபவித்து விட்டார்கள். தமது குடும்பங்களைப் பிரிந்து பல வருடங்களை சிறைகளுக்குள்ளேயே கழித்துவிட்டார்கள். அரசாங்கம் இவர்கள் விடயத்தில் இனியும் பாராமுகமாக இருக்காது விரைந்து செயற்பட வேண்டும்.
2009ஆம் ஆண்டு மே மாதத்தின் பின்னரான அரசியல் சூழலில் 4 ஆண்டுகள் கழிந்த பின்னரும் சிறையில் அடைத்து வைத்திருப்பதானது சர்வதேச மனிதாபிமான சட்டதிட்டங்களுக்குப் புறம்பானதொரு செயற்பாடாகும். அடிப்படை மனித உரிமை மீறலாகும்.
04.திட்டமிட்ட நில அபகரிப்புகள் நிறுத்தப்பட வேண்டும்.
மனித குலத்தின் வாழும் உரிமையை உறுதி செய்வதே நிலம் தான். வடக்கு கிழக்கு பிரதேசங்களில் இராணுவ மயமாக்கல், தொழில் மயமாக்கல், பௌத்த விகாரைகளை அமைத்தல், தேசிய உடமையாக்கல் என்று பலவித நோக்கங்களை இலக்கு வைத்து மேற்கொள்ளப்படும் திட்டமிட்ட நில ஆக்கிரமிப்புகள் உடனடியாக நிறுத்தப்பட வேண்டும். தமிழ் பேசும் மக்கள் அனைவரும் தத்தமது பூர்வீக நிலங்களில் குடியமர்த்தப்பட வேண்டும்.
நிலஅபகரிப்பு ஒரு வித மனிதபாதுகாப்புப் பிரச்சனையுமாகிவிட்டது. இந்தச் சூழ்நிலையில் மனித பாதுகாப்பே மக்களின் சீவனோபாயச் செயற்பாடுகளின் முன்நிபந்தனையாகிறது. இந்த நிலை பல குடும்பங்களின் வாழ்வாதார மற்றும் நீண்டகால தனிமனித விருத்திக்கு உதவும் சந்தர்ப்பங்களைக் கட்டுப்படுத்துகிறது அல்லது மறுக்கிறது. இதுவும் புலப்பெயர்வுக்கு ஒரு காரணமாகலாம். எனவே தமிழ் பேசும் மக்களது வாழும் உரிமை உறுதிப்படுத்தப்படுதல் வேண்டும்.
05.இனங்களுக்கு இடையில் முரண்பாடுகளை ஏற்படுத்தக்கூடிய புதிய குடியேற்றங்கள் நிறுத்தப்பட வேண்டும்.
தமிழ் முஸ்லிம் சிங்கள மூவினங்களுக்கிடையில் கசப்புணர்வையும், அச்ச-உணர்வையும் ஏற்படுத்தக்கூடிய சிறுபான்மை சமுகங்களுக்கிடையில் முரண்பாட்டை ஏற்படுத்தக்கூடிய உட்கிடையான அரசியல் நோக்கம் கொண்ட அனைத்து புதிய குடியேற்றங்களும், அக் குடியேற்றங்களுக்காக இலக்கு வைத்து மேற்கொள்ளப்படும் பாரியளவிலான காடழிப்புகளும் உடன் நிறுத்தப்பட வேண்டுமென வவுனியா மாவட்ட பிரஜைகள் குழு அரசை வலியுறுத்துகின்றோம்.
குக்குடியேற்றங்கள் எதிர்காலத்தில் ஏற்படுத்தக் கூடிய முரண்பாடுகள் தொடர்பில் குறிப்பாக வடக்கு கிழக்கில் வாழும் தமிழ முஸ்லிம் சமுகத்தினர் விழிப்புடன் இருக்க வேண்டும் எனவும் ஒவ்வொரு பிரஜைகளையும் கேட்டுக்கொள்கின்றோம்.
06.வடக்கு கிழக்கில் தமிழ்ச் சமூகத்தின் இன சமநிலையை சீர் குலைக்கும் நோக்கில் மேற்கொள்ளப்படும் அனைத்து நடவடிக்கைகளும் உடனடியாக முடிவுக்கு கொண்டு வரப்பட வேண்டும்.
தமிழ் பேசும் சமுகத்தை வடகிழக்கிலிருந்து நீர்த்து போகச் செய்யும் நோக்கோடு வடகிழக்கிலிருந்து இளைஞர் யுவதிகளை வெளியேற்றுவதற்கான வாய்ப்புகள் உருவாக்கப்பட்டு இன விகிதாசாரத்தை மாற்றியமைக்கும் மனித நாகரிகமற்ற அனைத்து செயற் பொறி முறைகளையும் வவுனியா மாவட்ட பிரஜைகள் குழு வன்மையாக கண்டிக்கின்றது. குறிபாக தமிழ் பேசும் சமூகத்தின் நிலங்களை பிரித்து முன்னெடுக்கப்படும் சிங்கள குடியேற்றகள் ஒரு இன அழிப்பாகும்.
07.மக்களின் வழிபாட்டு சுதந்திரம் பாதுகாக்கப்பட வேண்டும்.
வரலாற்றில் என்றுமில்லாதவாறு இந்து ஆலயங்களும், பள்ளி வாசல்களும் தகர்க்கப்படுவதும் தாக்குதல்களுக்கு உள்ளாக்கப்படுவதும் ஒவ்வொரு இலங்கைகு பிரஜையையும் விரக்தியின் உச்ச நிலைக்கு கொண்டு சென்றுள்ளது. ஆகவே வழிபாட்டு ஸ்தலங்களின் பாதுகாப்பை அரசாங்கம் உறுதி செய்ய வேண்டும் எனவும் வலிறுத்துகின்றோம்.
ஐக்கிய நாடுகள் சபையின் மனித உரிமை பிரகடனங்களில் 18 ஆவது உறுப்புரையில் கூறப்பட்டுள்ள சிந்தனைச் சுதந்திரம், மனச்சாட்சிச் சுதந்திரம், மதச்சுதந்திரம் ஆகியவற்றுககு இலங்கை அரசாங்கம் பொறுப்புக் கூறும் வகையில் செயற்பட வேண்டும் எனவும் வலியுறுத்துகின்றோம்.
08.விடுதலை பெற்ற முன்னாள் போராளிகளின் பாதுகாப்பு உறுதிப்படுத்தப்படுவதோடு புதிய கைது நடவடிக்கைகள் நிறுத்தப்பட வேண்டும்.
தொடர்ந்தும் சந்தேகம் என்ற வட்டத்துக்குள் தமிழ் பேசும் இளைஞர் யுவதிகளின் வாழ்க்கை சக்கரத்தை இயங்க விடாது தான் சார்ந்தோ தனது சமுகம் சார்ந்தோ சமுக பற்றுறுதியுடன் அரசியல் அல்லது அரசியலுக்கு அப்பால் ஜனநாயக விழுமியங்களுக்கு உட்பட்டு அவர்கள் சுதந்திரமாக உரிமையுடன் வாழ்வதற்காக மேற்கொள்ளும் பணிகளுக்கு அரசு தடை விதிப்பதை வவுனியா மாவட்ட பிரஜைகள் குழு வன்மையாக கண்டிப்பதோடு புதிய கைதுகளையும் தடுக்க கோருகின்றது.
யுத்தத்துக்கு முன்னர் யாரை வேண்டுமானாலும் சந்தேகிக்கலாம். யாரை வேண்டுமானாலும் முன்னறிவிப்பின்றி கைது செய்யலாம் எனும் நிலையிருந்தது. இந்த அபாயகரமான சூழலே இலங்கைத்தீவில் பல இளைஞர் யுவதிகளின் வாழ்க்கையை சூனியமாக்கியிருக்கிறது. இனியும் இத்தகைய ஏதேச்சதிகார போக்குகள் தொடர இடமளித்தால் வீட்டுக்கும் நாட்டுக்கும் பயனளிக்க கூடிய இன்னும் பல ஆயிரம் இளைஞர் யுவதிகளின் அளவிட முடியாத எதிர்கால கனவுகள் குழி தோண்டி புதைக்கப்பட்டு விடும்.
ஐ.நாவின் மனித உரிமை பிரகடனங்களின் 9 ஆவது உறுப்புரை ஒரு தலைப்பட்ச மனப்போக்கான வகையில் கைது செய்யப்படுதல், தடுத்து வைக்கப்படுதல், நாடு கடத்தல் ஆகியவற்குக்கு எவரும் ஆட்படுத்தப்படலாகாது என்று தெளிவாக வலியுறுத்துகின்றது. எனவே விடுதலை பெற்ற இளைஞர் யுவதிகளையோ அன்றி சாதாரண இளைஞர் யுவதிகளையோ காரணம் இன்றி எழுந்தாமானமாக கைது செய்யும் நடவடிக்கைகள் உடனடியாக நிறுத்தப்பட வேண்டும்.
09.மக்கள் இறந்தவர்களை நினைவு கூரும் உரிமையை அரசாங்கம் அங்கீகரிக்க வேண்டும்.
இறந்தவர்களை இறைவனுக்கு ஒப்பாகவே உலகத்திலுள்ள அனைத்து மதங்களும் மதிக்கும் அதேவேளை இறந்தவர்களை அடக்கம் செய்யும் இடங்களை புனித பிரதேசங்களாக சர்வதேச நியமங்களும் பிரகடனம் செய்துள்ளன மனித குலம் தோற்றம் பெற்றதிலிருந்து இன்று வரையான அதன் வரலாற்று பரிணாம வளர்ச்சியில் நாகரிகங்களை வளர்ச்சிப் பாதைக்கு இட்டுச்சென்றதோடு வரலாற்றுத் தடங்களை பதித்தவர்கள் போர் வீரர்களே. பலத்தின் மூலம் தான் மனித சமுகம் ஒவ்வொன்றும் தன்னை வரலாற்றில் முன்னிலைப்படுத்தியுள்ளது. மனித இருப்புக்கே ஆதாரம் பலம் தான் என்று புகட்டியவர்கள் போர் வீரர்களே. தனக்கு எதிர் திசையில் நின்று போர் புரிந்தவன் இறந்த பின்பு அவர்களின் புனிதத்தன்மையை மதிக்க வேண்டும் என்று போர்க்கலை வல்லுநர்கள் விவரிக்கின்றனர்.
இற்றைக்கு 2500 ஆண்டுகளுக்கு முன் வாழ்ந்த சீனப்போரியல் மேதையான சன்சூ அவர்களால் எழுதப்பட்டதாகக் கூறப்படும் உலகப்போரியல் நுணுக்கங்களும், அதன் தந்திரோபாயங்களும் எனும் நூலில் எவனொருவன் போரில் இறந்த வீரர்களுக்கு மரியாதை செய்து கௌரவப்படுத்துகின்றானோ அவனே சிறந்த வீரன் என்று கூறியுள்ளார். இத்தகைய நீண்ட வரலாற்று பின்னணியில் சமர்க்களமாடி மடிந்தவர்களை இலட்சிய புருசர்களாகவும், காவல் தெய்வங்களாகவும் வழிபடும் முறை உலக மக்களின் வாழ்வியலுடன் பின்னிப்பிணைந்துள்ளது.
தமிழர்களின் வாழ்வியலில் இறந்தவர்களை கடவுளாக போற்றி வழிபடும் மரபு தொன்று தொட்டு இருந்து வருகின்ற பண்டைய தமிழர்கள் சங்க இலக்கியங்களிலும் அர்த்த சாஸ்திரத்திலும் நடுகல் வைத்து படையல் இட்டு போரில் இறந்த வீரர்களை நினைவு கூர்ந்து வந்தனர் என்பதற்கு சான்றுகள் உண்டு. இதன் தொடர்ச்சியாகவே தமிழ் மக்கள் தமது உரிமைக்காக உயிர் நீத்தவர்களை போற்றி வழிபடும் முறை காலம் காலமாக பின்பற்றப்பட்டு வருகின்றது. இப்பூமி பந்தில் தமது அடக்குமுறைகளுக்கு எதிராக உரிமை வேண்டி போராடிய ஒவ்வொரு இனத்தையும் அடக்கி ஆளும் தரப்பு பயங்கரவாதியாகவும், உரிமைக்காக ஏங்குகின்ற மக்கள் குழு அவர்களை தியாகிகளாகவும் பார்ப்பது வழமையாகும். ஒரு மனிதன் ஒரு தரப்பின் பார்வைக்கு தியாகியாகவும், இன்னுமொரு தரப்பின் பார்வைக்கு பயங்கரவாதியாகவும் தெரிவதை இன்றைய உலக ஒழுங்கில் இறந்தவர்களை நினைவு கூற மறுக்கும் தன்மையை இலங்கை தேசத்தின் அரசியல் முதிர்ச்சியின்மையாகவே உலகம் கணித்துள்ளது.
உலகெல்லாம் தமது நாட்டின் விடுதலைக்காக போராடியவர்களை தேசிய வீரர்கள் தினமாக பிரகடனப்படுத்தி அந்நாட்டு மக்கள் கொண்டாடி வரும் நிலையில் தமிழ் மக்கள் மட்டும் போரில் இறந்த தம் உறவுகளை கௌரவித்து நினைவு கூற விடாமல் தடுப்பது மனித நாகரிக விழுமியங்களுக்கு ஏற்பட்ட மிகப்பெரிய அவமானம் மட்டுமல்ல, ஐக்கிய நாடுகள் சபையின் வழிபாட்டு உரிமை சட்டங்களை மீறும் மிகப்பெரிய மனித உரிமை மீறல் செயலுமாகும்.
10.யுத்தத்தால் பாதிக்கப்பட்டவர்களுக்கு வீட்டுத்திட்டத்தில் முன்னுரிமை அளிக்கப்பட வேண்டும்.
கடந்த மூன்று தசாப்த கால யுத்தத்தில் சொல்லணா துன்பங்களை அநுபவித்து குடும்ப அங்கத்தவர்களையும் இழந்து அங்கவீனர்களாகி உடல்களில் குண்டுகளை தாங்கி நிற்கும் குடும்பங்களுக்கே இந்திய வீட்டுத்திட்டத்திலோ அல்லது ஏனைய வீட்டுத்திட்டங்களிலோ முன்னுரிமை வழங்கப்படுதல் வேண்டும். வீட்டுத்திட்டத்தில் பயனாளிகள் தெரிவின்போது புள்ளியிடும் திட்டம் கவனத்தில் கொள்ளப்படுவதாகவும், இந்த புள்ளியிடும் திட்டத்தில் குடும்ப அங்கத்தவர்களின் எண்ணிக்கை மிகப் பிரதானமானதெனவும் தெரிவிக்கப்படுகின்றது.
இறுதி யுத்தத்தில் பலர், குடும்ப அங்கத்தவர்களை கொத்துக்கொத்தாக இழந்து தனித்துப்போய் கையறுநிலையில் இருக்கிறார்கள். யுத்தம் தந்த கைம்பெண்கள் ஏராளம். அபலைப்பெண்கள் ஏராளம். யுத்தத்தில் மிகவும் மோசமாக பாதிக்கப்பட்ட தமிழ் பேசும் மக்கள், இந்த புள்ளியிடும் நடவடிக்கையால் வீட்டுத்திட்டத்தில் புறக்கணிக்கப்பட்டு, தறப்பாள் கொட்டகைக்குள் முடக்கப்பட்டிருக்கிறார்கள்.
குடும்ப அங்கத்தவர்களை இழந்து தனிமரமாக வீதியில் நிற்பவர்களிடம் அங்கத்தவர்களை காட்டு வீடு தருகிறோம் என்றால், அவர்கள் கொல்லப்பட்ட தமது அங்கத்தவர்களுக்கு உயிர் கொடுத்து கூட்டிவரவா முடியும்? எனவே தனிநபர், இருவர், இரண்டுக்கு மேற்பட்டோர் எனும் அங்கத்தவர் எண்ணிக்கையை கவனத்தில் கொள்ளாது, யுத்தத்தால் பாதிக்கப்பட்ட அனைவருக்கும் முன்னுரிமை அடிப்படையில் வீடுகளை வழங்குவதற்கு இந்திய அரசாங்கம் உள்ளிட்ட வீட்டுத்திட்ட உதவி வழங்கும் நாடுகள் பரிந்துரை செய்ய வேண்டும். அதிலும் இறுதி யுத்தத்தை சந்தித்தவர்களுக்கு அவசியம் வீடுகள் வழங்கப்பட வேண்டும்.
அங்கத்தவர் எண்ணிக்கையை கவனத்தில் கொண்டுதான் வீட்டுத்திட்டம் வழங்கப்படுமென்றால், முள்ளிவாய்க்காலில் பேரவலத்தைச்சந்தித்த பெரும்பாலான தமிழ் மக்களுக்கு வீடே கிடைக்காமல் போய்விடும் ஆபத்தும் உள்ளது என்பதை இந்த நாடுகள் உணர வேண்டும்.
11.மனித உரிமைக்காகவும், மனித கௌரவத்துக்காகவும் குரல் கொடுப்பவர்களின் பாதுகாப்பு உறுதிப்படுத்தப்பட வேண்டும்.
வடக்கு கிழக்கில் திட்டமிட்டு மேற்கொள்ளப்படுகின்ற அனைத்து அடக்குமுறைகள், அநீதிகளுக்கு எதிராகவும் குரல் கொடுக்கும் தன்னார்வ தொண்டு நிறுவன பணியாளர்கள், மனித உரிமை செயற்பாட்டாளர்கள், ஊடகவியலாளர்கள், சமுக ஆர்வலர்கள் ஒவ்வொருவரின் பாதுகாப்பையும் அரசாங்கம் முழுப்பொறுப்பு ஏற்க வேண்டும். அண்மை காலங்களில் வடகிழக்கின் உண்மை நிலையை ஆராய வரும் வெளிநாட்டு இராஜதந்திரிகளிடம் உண்மை நிலையை எடுத்துக்கூறும் ஒவ்வொரு பிரஜைகளுக்கும் தொலைபேசி மிரட்டல்களும், கொலை அச்சுறுத்தல் கடிதங்களும் தொடர்வதை அனுமதிக்க முடியாது. இது தொடர்பில் இலங்கை அரசாங்கம் முழுக்கவனம் செலுத்தி இதனை கட்டுப்பாட்டுக்குள் கொண்டு வருதல் வேண்டும்.
12.ஊடகங்களினதும் ஊடகவியலாளர்களினதும் பாதுகாப்பு உறுதிப்படுத்தப்படுவதோடு சுயாதீனமாக இயங்கவும் வழி கோலப்பட வேண்டும்.
யுத்தம் ஆரம்பிக்கப்பட்ட காலம் முதல் இன்று வரை ஊடகங்கள் மீதும் ஊடகவியலாளர்கள் மீதும் தாக்குதல்கள் அச்சுறுத்தல்கள் தொடருகின்றன. குறிப்பாக தமிழ் ஊடகவியலாளர்கள் தொடர்ந்தும் கொலை செய்யப்படுகின்றனர். அச்சுறுத்தப்படுகின்றனர். கடத்தப்படுகின்றனர். தமிழ் பேசும் சமூகத்தின் அரசியல் பிரச்சினைகளை எழுத முற்படும்போது தமிழ் ஊடகவியலாளர்கள் அச்சுறுத்தலுக்கு உள்ளாகின்றனர்.
வடக்கு கிழக்கு மாகாணத்தில் தமிழ் ஊடகத்துறை ஜனநாயகம் சுதந்திரம் அற்ற நிலையில்தான் செயற்படுகின்றது. கொலை செய்யப்பட்ட காணமல்போன ஊடகவியலாளர்கள் தொடர்பான விசாரணைகள் பொலிஸாரால் உரிய முறையில் முன்னெடுக்கப்படுவதில்லை. சந்தேகநபர்கள் பலர் பிணையில் விடுதலை செய்யப்பட்டுள்ளனர். குற்றவாளிகள் யார் என்று தெரிந்தும் கைது செய்யப்படாத நிலையும் உண்டு. ஆகவே ஊடக சுதந்திரம் ஊடக ஜனநாயகம் உறுதிப்படுத்தப்பட வேண்டும் என்பதையும் இந்த நாளில் வவுனியா மாவட்ட பிஜைகள் குழு வலியுறுத்துகின்றது.
வவுனியா வடக்கு பிரதேச செயலகத்திற்கு உட்பட்ட பகுதிகளில் முதன் முறையாக மத்தியஸ்தசபை அங்கத்தவர்களுக்கு நியமனக்கடிதம் வழங்கும் நிகழ்வு நேற்று வவுனியா பிரதேச செயலக மாநாட்டு மண்டபத்தில் இடம்பெற்றது.
20 கிராம சேவகர் பிரிவை உள்ளடக்கிய வவுனியா வடக்கு பிரதேச செயலகத்தில் 15 அங்கத்தவர்களை உள்ளடக்கி மத்தியஸ்தசபை உருவாக்கப்பட்டுள்ளது.
வவுனியா வடக்கு பிரதேச செயலாளர் க. பரந்தாமன் தலைமையில் இடம்பெற்ற இந் நிகழ்வில் நியமனக்கடிதங்கள் வழங்கி வைக்கப்பட்டதுடன் உத்தியாகபூர்வமாக மத்தியஸ்தசபையின் செயற்பாடுகளும் ஆரம்பித்து வைக்கப்பட்டது.
இந் நிகழ்விற்கு கனகராயன்குளம், புளியங்குளம், நெடுங்கேணி பொலிஸ் நிலையங்களின் பொறுப்பதிகாரிகள் வங்கிகளின் முகாமையாளர்கள் பிரதேச செயலக உத்தியோகத்தர்கள் என பலரும் கலந்து கொண்டடிருந்தனர்.
தர்மபுரி மாவட்டத்தில் சிகிச்சை அளிக்காமல் நோயாளியை வெளியே தூக்கி வீசிய அவல நிலை நடந்துள்ளது.
தர்மபுரி மாவட்டம் புதுப்பட்டி பகுதியை சேர்ந்தவர் செந்தில்குமார் (40). மனைவி சரஸ்வதி. செந்தில்குமார் லாரி ஓட்டுனராக வேலை பார்த்து வந்தார். 15 நாட்களுக்கு முன் ஆந்திராவுக்கு லொறி ஓட்டி சென்றபோது விபத்து ஏற்பட்டு மார்பு, கை, கால்களில் படுகாயம் அடைந்தார்.
ஆந்திராவில் உள்ள அரசு மருத்துவமனையில் சிகிச்சை அளிக்கப்பட்டு வந்தது. தெரிந்தவர்கள் யாரும் இல்லாததால் சென்னை ராஜிவ் காந்தி அரசு பொது மருத்துவமனைக்கு கொண்டு வந்தனர். 11 நாட்களாக அங்கு சிகிச்சை அளிக்கப்பட்டு வந்தது.
இந்நிலையில் நேற்று அவர் திடீரென டிஸ்சார்ஜ் செய்யப்பட்டதாகவும், உடனடியாக வார்டை காலி செய்து விட்டு செல்லும்படி மருத்துவமனை ஊழியர்கள் தெரிவித்துள்ளனர்.
மேலும், அங்கிருந்த ஊழியர்கள் சிலர் அவரை வலுக்கட்டாயமாக பெட்டில் இருந்து தூக்கி வார்டுக்கு வெளியே விட்டு சென்றுள்ளனர்.
இதுகுறித்து அவரது மனைவி சரஸ்வதி கூறுகையில் டிஸ்சார்ஜ் செய்துவிட்டோம். உடனே பெட்டை காலி செய்யுங்கள் என்றனர். எனது கணவரை சிலர் தூக்கி வார்டு வாசலில் போட்டுவிட்டனர் என்றும் அவரால் உட்காரவோ, சரியாக படுக்கவோ முடியாது. நெஞ்சில் எலும்புகள் நொறுங்கியுள்ளதால் மிகவும் அவதிப்படுகிறார் எனவும் தெரிவித்துள்ளார்.
நோயாளி செந்தில்குமார் கூறுகையில் பெட்டை காலி செய்து விட்டு செல்லுங்கள் என்று கூறினர். உடல்நிலை சரியாகவில்லை என்று கூறியதற்கு வீட்டில் சென்று ஓய்வு எடுத்தாலே சரியாகிவிடும் என்று கூறினர்.
அதற்கு, என்னால் தனியாக பயணிக்க முடியாது. உறவினர்கள் ஊரில் இருந்து வந்து கொண்டிருக்கின்றனர். காலையில் வந்துவிடுவார்கள், இன்று ஒருநாள் இரவு மட்டும் தங்கி சிகிச்சை பெற்றுவிட்டு நாளை காலை உறவினர்களுடன் சென்றுவிடுகிறேன் என்று கூறினேன். அதற்கு அவர்கள் சம்மதிக்காமல் என்னை வலுக்கட்டாயமாக தூக்கி வந்து வெளியே படுக்க வைத்துவிட்டனர் என்று கூறியுள்ளார்.
கொச்சி விமான நிலையம் வழியாக தங்க பிஸ்கட்டுகள் கடத்தப்பட்ட சம்பவம் தொடர்பாக பிரபல மலையாள நடிகை மைதிலிக்கு சுங்கத்துறை நோட்டீஸ் அனுப்பியுள்ளது.
கொச்சி விமானத்தில் கடந்த மாதம் 20 கிலோ தங்க பிஸ்கட்டுகள் கைப்பற்றப்பட்டன. இதுதொடர்பாக, குவைத்தில் இருந்து தங்கத்தை கடத்தி வந்த இரண்டு பெண்கள் கைது செய்யப்பட்டனர்.
அவர்களிடம் சுங்கத்துறையினர் விசாரணை நடத்தியபோது, தங்கம் கடத்தலில் கோழிக்கோட்டை சேர் ந்த பயாஸ் என்பவருக்கு தொடர்பு இருப்பது தெரியவந்தது.
இவரது தலைமையில் தான் குவைத், துபாய் உள்ளிட்ட வளைகுடா நாடுகளில் இருந்து, கேரளாவுக்கு தங்கம் கடத்தப்பட்டு வருவது விசாரணையில் கண்டுபிடிக்கப்பட்டது.
இதனைத் தொடர்ந்து பயாசை பொலிசார் கைது செய்தனர். அவரிடம் நடத்திய விசாரணையில், பயாசுக்கும் முன்னாள் தென்னிந்திய அழகி ஸ்ரவ்யா சுதாகருக்கும் தொடர்பு இருப்பது தெரியவந்தது.
இதையடுத்து, சுங்கத்துறை அதிகாரிகள் ஸ்ரவ்யா சுதாகரை நேரில் வரவழைத்து விசாரித்தனர். அப்போது தனக்கும், பயாசுக்கும் தொடர்பு இருப்பதை அவர் ஒப்புக்கொண்டார். பயாசை நடிகை மைதிலி தான் தனக்கு அறிமுகம் செய்து வைத்ததாகவும் கூறியுள்ளார்.
இந்த தங்கம் கடத்தல் தொடர்பாக நேரில் ஆஜராகி விளக்கம் அளிக்குமாறு நடிகை மைதிலிக்கு சுங்கத்துறை அதிகாரிகள் நோட்டீஸ் அனுப்பி உள்ளனர்.
இவர் கடந்த 2009ம் ஆண்டு மம்மூட்டி நடித்த பாலேறி மாணிக்கம் என்ற படத் தில் அறிமுகமானார். அதன்பின் கேரள கபே, நல்லவன் , மாயாமோகினி உள்ளிட்ட 20க்கும் மேற்பட்ட படங்களில் நடித்துள்ளனர்.
மர்மமான சிறுநீரக நோய் ஒன்று இலங்கையில் சுமார் ஐந்து லட்சம் மக்களுக்கு பரவக் காரணமாக இருந்ததாக ஐ.நாவின் உணவு மற்றும் விவசாய நிறுவனத்தின் மீது இலங்கையின் சிவில் சமூக அமைப்பு ஒன்று புகார் செய்துள்ளது.
வடக்கு பாடசாலை நிகழ்வுகளில் தேசிய கொடியை ஏற்றுவதற்கு தடை விதிக்கப்பட்டுள்ளதாக சிங்களப் பத்திரிகையொன்று செய்தி வெளியிட்டுள்ளது.
வட மாகாண சபையினால் நிறைவேற்றப்பட்ட இரண்டு கோரிக்கைகளையும் அரசாங்கம் நிராகரித்துள்ளது.
மன்னார் மாவட்ட கூட்டுறவுச் சபைக்குரிய கட்டடத்தை ஆக்கிரமித்துக்கொண்டுள்ள படைத்தரப்பினரிடமிருந்து அந்தக் கட்டடத்தை விடுவித்து கூட்டுறவுச் சங்கத்தினரிடம் மீளக் கையளித்து சங்கத்தின் அபிவிருத்தி நடவடிக்கைகளுக்கு வழிவிடுவதற்கு கூட்டுறவு அமைச்சர் வழிஏற்படுத்த வேண்டும் என்று வன்னி மாவட்ட பாராளுமன்ற உறுப்பினர் ந.சிவசக்தி ஆனந்தன் கோரிக்கை விடுத்துள்ளார்.
உத்தரதேச மாநிலம் கோராக்பூரை சேர்ந்த சிறுமி வீட்டு பிரச்சினை காரணமாக பெற்றோர்களுக்கு தெரியாமல் வீட்டை விட்டு ஓடியுள்ளார். அவர் ரெயில் மூலம் புதுடெல்லி செல்லும் போது நான்கு பேர் கொண்ட குழுவினால் கற்பழிக்கப்பட்டுள்ளார்.
செவ்வாய் கிரகத்துக்கு சென்று அங்கேயே நிரந்தரமாக தங்குவதற்கான பயணத்துக்கு, உலகின் பல்வேறு நாடுகளில் இருந்து மொத்தம் 2,02,586 பேர் விண்ணப்பித்துள்ளனர்.
வட மாகாண சபையில் 2014ம் ஆண்டுக்கான வரவு – செலவுத் திட்டம் எதிர்ப்பின்றி நேற்று ஏகமனதாக நிறைவேற்றப்பட்டுள்ளது. வட மாகாண சபையின் வரவு – செலவுத்திட்ட அமர்வுகள் மூன்று தினங்களாக இடம்பெற்று வந்தன.
இலங்கை அமைச்சகத்துக்கு இந்திய வெளியுறவு அமைச்சகம் மூலமாக கண்டன அறிக்கையும், இலங்கை ஜனாதிபதிக்கு பிரதமர் நேரடியாக தொடர்பு கொண்டு கடும் கண்டனத்தையும் உடனடியாக தெரிவிக்க வேண்டும் என்று தமிழக மீனவர்கள் பிரச்னை குறித்து பிரதமருக்கு முதல்வர் ஜெயலலிதா எழுதியுள்ள கடிதத்தில் குறிப்பிட்டுள்ளார்.
பாகிஸ்தானில் வெளிநாட்டு திரைப்படங்கள் மற்றும் தொலைக்காட்சி நிகழ்ச்சிகளுக்கு தடை விதித்து அந்நாட்டு நீதிமன்றம் உத்தரவிட்டுள்ளது.
நிறவெறி கொள்கைகளிற்கெதிரான போராட்டத்திற்கு தனது வாழ்நாளையே அர்ப்பணித்திருந்த நெல்சன் மண்டேலாவின் தியாக வாழ்க்கை தென்னாபிரிக்க நாட்டு இளைஞர்களிற்கு மட்டுமல்லாமல் பூமியில் புத்துலகம் காணத்துடிக்கும் இளைஞர்கள் அனைவருக்கும் இதயகீதமானது.
இந்தியாவின், கேரள மாநிலத்தை சேர்ந்த கிரிக்கெட் வீரர் ஸ்ரீசாந்த். இந்திய அணியின் வேகப்பந்து வீச்சாளராக இருந்தார். ஐ.பி.எல்.போட்டிகளில் சூதாட்டத்தில் ஈடுபட்டதாக எழுந்த புகாரில் கைதாகி தற்போது பிணையில் விடுதலையாகி உள்ளார்.
தர்மபுரி மாவட்டத்தில் சிகிச்சை அளிக்காமல் நோயாளியை வெளியே தூக்கி வீசிய அவல நிலை நடந்துள்ளது.
கொச்சி விமான நிலையம் வழியாக தங்க பிஸ்கட்டுகள் கடத்தப்பட்ட சம்பவம் தொடர்பாக பிரபல மலையாள நடிகை மைதிலிக்கு சுங்கத்துறை நோட்டீஸ் அனுப்பியுள்ளது.