திருகோணமலை உப்புவெளி அபயபுர வீதியில் 3 வது மைல்கல் பிரதேசத்தில் குரங்குக் கூட்டம் ஒன்று வீதிக்குள் நுழைந்ததால் ஏற்பட்ட வாகன விபத்தில் ஒருவர் பலியாகியுள்ளார்.

இந்த சம்பவம் நேற்று முன்தினம் இடம்பெற்றுள்ளது.

குரங்குக் கூட்டம் ஒன்று வீதிக்குள் நுழைந்ததால் அந்த வீதியில் பயணம் செய்த ஒருவர் தான் ஓட்டிச் சென்ற மோட்டார் சைக்கிளை கட்டுப்படுத்த முடியாது மரத்தில் மோதுண்டு உயிரிழந்துள்ளார்.

27 வயதான இளைஞரே சம்பவத்தில் உயிரிழந்துள்ளதாக பொலிஸார் தெரிவித்தனர். சம்பவத்தில் காயமடைந்த இவர் திருகோணமலை வைத்தியசாலையில் அனுமதிக்கப்பட்ட பின்னர் உயிரிழந்துள்ளார்.

திருகோணமலை பஸ்தியன் ஹஸ்கிசன் வீதியை சேர்ந்த பாக்கியராஜா கௌரிசங்கர் என்ற இளைஞரே சம்பவத்தில் பலியாகியுள்ளார். மரண விசாரணைகள் நேற்று இடம்பெற்றன.

இலங்கை அரசாங்கத்துடன் ஐரோப்பிய முதலீட்டு வங்கி 90 மில்லியன் யூரோக்களுக்கான கடன் உடன்படிக்கையை செய்துள்ளது.

இந்த கடன்மூலம் அரச மற்றும் தனியார்துறையின் கைத்தொழில்களுக்கு ஊக்கம் வழங்கப்படவுள்ளது.
இந்த திட்டத்தின் மூலம் 2015 ஆம் ஆண்டுக்கான சக்தி உருவாக்க சூழல் மேம்பாட்டு நிகழ்ச்சியும் உள்ளக்கப்பட்டுள்ளது.

2005 முதல் 2015 ஆம் ஆண்டு வரையிலான காலப்பகுதியில் ஐரோப்பிய ஒன்றியம் 670 மில்லியன் யூரோக்களை இலங்கைக்கு வழங்கியுள்ளது. இதில் 250 யூரோக்களை ஐரோப்பிய வங்கி வழங்கியுள்ளது

தமிழ் மக்களிடமிருந்து பறிக்க முடியாதது பகுத்தறிவு மட்டுமல்ல, பட்டறிந்த உணர்வுகளும்தான், உடல் வேகும் உயிரி சாகும், எம் உணர்வுகள் வாழும் என்று குறிப்பிட்டு யாழ்.பல்கலைக்கழக மாணவர் ஒன்றியம் அறிக்கை ஒன்றினை நேற்று வெளியிட்டுள்ளது.

நாட்டில் உள்ள அனைத்துப் பல்கலைக்கழகங்களிலும் பார்க்க யாழ்.பல்கலைக்கழகத்திற்கு நீண்ட விடுமுறை வழங்கப்பட்டதைக் கண்டித்து நேற்று அடையாள வகுப்பு பகிஸ்கரிப்புப் போராட்டம் ஒன்றினை யாழ்.பல்கலைக்கழக அனைத்துப் பீட மாணவர்களும் நடாத்தியிருந்தனர்.

அப்போராட்டம் தொடர்பான அறிக்கை ஒன்றும் மாணவர் ஒன்றியத்தினால் ஊடகங்களுக்கு வழங்கப்பட்டது. அவ்வறிக்கையிலேயே மேற்கண்டவாறு குறிப்பிடப்பட்டுள்ளது.
அவ்வறிக்கையில் மேலும் குறிப்பிடப்பட்டுள்ளதாவது..

கடந்த மாதம் நடைபெற்ற பொதுநலவாய மாநாட்டிற்காக அனைத்து பல்கலைகழகத்திற்கும் 9ம் திகதி தொடக்கம் 17ம் திகதி வரை விடுமுறை விடப்பட்டு இருந்தது. ஆனால் யாழ் பல்கலைகழகத்திற்கு மட்டும் டிசம்பர் 2ம் திகதி வரை விடுமுறை விடப்பட்டு இருந்தது.

ஆனால் யாழ். பல்கலைக்கழகத்திற்கு மட்டும் டிசம்பர் 2 ஆம் திகதிவரை மூடப்பட்டிருக்கும் எனப் பல்கலைக்கழக நிர்வாகம் அறிவித்திருந்தது.

ஏனைய பல்கலைக்கழகங்கள் யாவும் ஒருவார விடுமுறையைத் தொடர்ந்து வழமைக்குத் திரும்பியிருந்த நிலையில் யாழ்.பல்லைக்கழகத்திற்கு மட்டும் நீண்ட விடுமுறை எதற்காக? மாணவர்களது பரீட்சை நெருங்குவதால் உரியவகையில் தம்மைத் தயார்படுத்துவதற்காகவே இந்த விடுமுறை வழங்கப்படுகின்றது. அத்துடன் பல்கலைக்கழகத்தில் காணப்படுகின்ற குறைபாடுகளை நிவர்த்தி செய்து தருவதாகப் பல்கலைக்கழக நிர்வாகம் அறிவித்திருந்தது.

உண்மையில் பரீட்சை விடுமுறை என்பது ஒரு அரையாண்டுப் பருவத்திற்குரிய அனைத்துப் பாடவிதானங்களும் பூர்த்தியாக்கப்பட்ட பின்னர் குறிப்பிட்ட சில நாட்களே விடப்படுவது வழமையாகும்.

ஆனால் எந்தவொரு பாடவிதானத்திலும் அரைவாசிப் பகுதிகளும் நிறைவுறாத நிலையில் நீண்டவிடுமுறையை அமுலாக்கிவிட்டுப் பரீட்சைக்கான தயார்ப்படுத்தல் என்றும், குறைபாடுகளை நிவர்த்தி செய்கின்றோம் என்று சொல்வது மிகவும் பம்மாத்து நடவடிக்கையாகவும கோமாளிக் கூத்தாகவுமே நாம் இதைப் பார்க்கின்றோம்.

மாணவர்கள் விடுதிகளில் தங்கியிருப்பதும் பல்கலைக்கழக வளாகத்தினுள் பிரவேசிப்பதும் அவர்களது சுயவிருப்பத்தினைப் பொறுத்தது எனக் கூறினாலும் நவம்பர் 9 ஆம் திகதியிலிருந்தே விடுதிகள் அடிததுச் சாத்தப்பட்டு விட்டன. விடுமுறைக் காலத்தில் பல்கலைக்கழக வளாகத்தினுள் பிரவேசிப்பவர்கள் பயங்கரவாதிகளாகவே பார்க்கப்படுவார் என மறைமுகமாக அச்சுறுத்தல்களையே மேற்கொண்டு வந்துள்ளனர்.

பரீட்சைத் தயார்ப்படுத்தலுக்காகவே இந்த விடுமுறை எனறு கூறிவிட்டு மாணவர்கள் விடுதிகளும் இழுந்து மூடப்பட்டமை உட்பட பாதுகாப்பு அச்சுறுத்தல்களையும் மேற்கொள்வதுதான் பரீட்சைக்கான உண்மையான தயார்படுத்தலா?

உண்மையில் இந்த நீண்ட விடுமுறையென்பது எதற்காக என்பது அனைவரும் அறிந்த விடயம். சுயமாகச் சிந்தித்து முடிவெடுக்கும் திராணியற்று கடந்த மாவீரர் நாளையோட்டிய தினங்களில் பல்கலைக்கழக சூழல் முழுவதையும் ஒரு யுத்த சூனிய பிரதேசத்தினை ஆக்கிரமித்து இருப்பது போல் ஆயுதம ஏந்திய கையினர்களாய் இராணுவத்தினரும், பொலிஸாரும் சுற்றிவளைத்திருந்தனர்.

ஒரு கல்விச்சாலையையே கரைபடிந்த கண்களோடு ஆயுதப் படைகள் சுற்றிவளைத்திருப்பது உலகத்தில் இதுவாகத்தான் இருக்க முடியும், இறந்துபோன ஆன்மாக்கள் மதிக்கப்படுவது உலகப் பொதுவிதியாகும். அதே நேரம் தன்னினம் சார்ந்து யாருக்காவது அஞ்சலி செய்வது அவ்வினத்தின் அடிப்படை உரிமையாகும்.

இந்த உரிமையையே மறுப்பதை விட கேவலமான அநாகரீகச் செயல் இவ்வுலகில் வேறு எதுவும் இலலை. இந்த நீண்ட விடுமுறையானது ஏனைய பல்கலைக்கழகங்களிற்கும் விடப்பட்டிருந்தால். ஏற்றுக் கொள்ளக் கூடியதாய் இருந்திருக்கும்.

ஆனால் யாழ்.பல்கலைக்கழகத்திற்கு மட்டும் என மட்டுப்படுத்தப்பட்ட விடயமானது எம்மை அவமானத்திற்கும், அடக்குமுறைக்கும் உள்ளாக்கும் செயலாகவே எம்மால் இதைப் பார்க்க முடியும். ஆனவே எவ்வளியிலும் ஏற்றுக் கொள்ள முடியாத இச்செயலிற்கு எமது வன்மையான கண்டனத்தினைத் தெரிவித்துக் கொள்ளுகின்றோம் என்று குறிப்பிடப்பட்டுள்ளது.

வடக்கு மாகாண முதலமைச்சர் சி.வீ.விக்னேஸ்வரனின் அழைப்புக்கு அமைய இந்திய பிரதமர் மன்மோகன் சிங் யாழ்ப்பாணத்திற்கு விஜயம் செய்தால் அதனை வரவேற்பதாக பிரதமர் டி.எம். ஜயரத்ன தெரிவித்தார்.

நாடாளுமன்றத்தில் நேற்று நடைபெற்ற ஊடகவியலாளர் சந்திப்பில் அவர் இதனை குறிப்பிட்டார். அவர் மேலும் தெரிவிக்கையில்..

ஏனையோர் கூறுவதை கேட்பதற்கு பதிலாக அவர் நேரில் யாழ்ப்பாணத்திற்கு சென்று நிலைமைகளை பார்த்து அறிந்து கொண்டால் நல்லது.

வடக்கு மாகாண முதலமைச்சர் இந்திய பிரதமருக்கு விடுத்துள்ள அழைப்பு குறித்து அரசாங்கம் இன்னும் அதிகாரபூர்வமான நிலைப்பாட்டை வெளியிடவில்லை. எனினும் இது என்னுடைய தனிப்பட்ட நிலைப்பாடு.

இந்திய பிரதமரின் இலங்கை விஜயம் தொடர்பில் இதுவரை அரசாங்கத்திற்கு அறிவிக்கப்படவில்லை. இந்திய பிரதமர் இலங்கை வருவது தமிழ்த் தேசியக் கூட்டமைப்புடன் மட்டும் பேச்சுவார்த்தை நடத்த அல்ல. அவர் அரசாங்கத்துடனும் பேசுவார்.

அதேவேளை வடக்கு மாகாணத்திற்கு விஜயம் மேற்கொண்ட பிரித்தானிய பிரதமரின் கருத்துக்கள் தேர்தலில் வாக்குகளை எதிர்பார்த்து வெளியிடப்பட்ட கருத்துக்கள்.

வாக்குகளை பெற வேண்டுமானால் நாங்களும் ஏதாவது ஆதரவை வழங்கி வாக்குகளை பெறுவது போன்றுதான் பிரித்தானிய பிரதமரும் செய்துள்ளார். பிரித்தானியாவில் வாழும் தமிழர்களின் வாக்குகளை பெறவே அவர் இவ்வாறான கருத்துக்களை வெளியிட்டுள்ளார் என்றார்.

தென்னாபிரிக்கா பிராந்தியம் உட்பட 15 நாடுகளில் இலங்கை தூதரகங்களை ஆரம்பிக்க இலங்கை அரசாங்கம் தீர்மானித்துள்ளது.

மொருடானியா, புகினோ, பாசோ, டிஜிபுகி, டொங்கோ, கேமன், ஐவரிகோஸ்ட், கம்பியா, சியாராலியோன், மலாவி, சேட், மத்திய ஆபிரிக்க குடியரசு, கெமரூன், கினியா, கேப்வர்ட், நைபர் ஆகிய நாடுகளில் இலங்கை புதிய தூதரங்களை ஏற்படுத்த உள்ளதாக அரசாங்க வட்டாரங்கள் நேற்று தெரிவித்தன.

ஆபிரிக்க நாடுகளில் 7 நாடுகள் மட்டுமே பொதுநலவாய நாடுகளின் மாநாட்டில் கலந்து கொண்டன.

புலம்பெயர் நாடுகளில் உள்ள விடுதலைப் புலிகள் தென்னாப்பிரிக்க பிராந்தியத்தில் உள்ள நாடுகளில் தூதுவர்களை ஜெனிவாவில் சந்தித் இலங்கைக்கு எதிராக பொய்யான தகவல்களை வழங்கியுள்ளதாக திவயின தெரிவித்துள்ளது.

புலம்பெயர் நாடுகளில் உள்ள புலிகளின் அணியொன்று அண்மையில் ஜெனிவாவில் போஸ்ட்வானா நாட்டின் தூதுவரை சந்தித்து இரகசியமான பேச்சுக்களை நடத்தியதாகவும் திவயின கூறியுள்ளது.

இந்த நிலையில் புலம்பெயர் புலிகளின் செயற்பாடுகளை முறியடிக்க 15 ஆப்பிரிக்க நாடுகளில் தூதரகங்களை திறக்க அரசாங்கம் தீர்மானித்துள்ளதாகவும் அதில் கூறப்பட்டுள்ளது.