தமிழ்த் தேசியக் கூட்டமைப்பின் பாராளுமன்ற உறுப்பினர் சிவஞானம் சிறீதரனின் தைரியம் பாராட்டுக்குரியது என பொதுபல சேனா அமைப்பு புகழாரம் சூட்டியுள்ளது.

பாராளுமன்றில் தமிழீழ விடுதலைப் புலிகளின் தலைவர் பிரபாகரனை போற்றியும் மாவீரர் தினத்தை பற்றியும் பேசிய சிறீதரனின் தைரியம் பாராட்டுக்குரியது என பொதுபலசேனா அமைப்பின் பொதுச் செயலாளர் கலபொடத்தே ஞானசார தேரர் தெரிவித்துள்ளார்.

பிரபாகரனை ஓர் சுதந்திரப் போராட்ட வீரராகவும் தமிழ் உரிமைகளுக்காக குரல் கொடுத்தவராகவும் சிறீதரன் தனது பாராளுமன்ற உரையில் குறிப்பிட்டிருந்தார்.

இவ்வாறெனினும், தேசிய சுதந்திரப் போராட்ட வீரர்களில் ஒருவரான மொனரவில கெப்பிட்டிப்பொலவை எந்தவொரு சிங்கள பாராளுமன்ற உறுப்பினரும் நினைவு கூர்ந்து பேசவில்லை என ஞானசார தேரர் தெரிவித்துள்ளார்.

இந்த நிலைமை மிகவும் வெட்கப்பட வேண்டிய ஓர் நிலைமையாகும் என அவர் சுட்டிக்காட்டியுள்ளார். கெப்பிட்டிபொல நிலமேயின் சிரார்த்த தினமன்று ஒரு சிங்கள பாராளுமன்ற உறுப்பினரேனும் அதனை நினைவு கூர்ந்து பேசாமை கவலைக்குரியது என அவர் தெரிவித்துள்ளார்.

சிங்கள பாராளுமன்ற உறுப்பினர்கள் சிறீதரனின் உரையை செவிமடுத்துக் கொண்டிருந்ததாகவும், எவரும் இடையூறு விளைவிக்கவில்லை எனவும் அவர் வருத்தம் வெளியிட்டுள்ளார்.

இலங்கைப் பாராளுமன்றம் ஓர் மிருகக் காட்சிச்சாலைக்கு நிகரானது என அவர் சுட்டிக்காட்டியுள்ளார். சிறீதரன் தனது இனத்திற்காக குரல் கொடுத்துள்ளார் என அவர் தெரிவித்துள்ளார்.

இதேவேளை, நாட்டின் அரசியல் சாசனத்திற்கு முரணாக செயற்பட்ட சிறீதரனை கைது செய்ய சட்டம் ஒழுங்கை பாதுகாக்கும் தரப்பினர் நடவடிக்கை எடுக்க வேண்டுமென ஞானசார தேரர் கோரியுள்ளார்.

இலங்கையின் சனத்தொகையில் 31 லட்சத்து 13 ஆயிரத்து 247 பேர் தமிழர்கள் என புள்ளி விபரத் திணைக்களம் தகவல் வெளியிட்டுள்ளது.

அண்மையில் இலங்கையில் சனத்தொகை மதிப்பீடு நடத்தப்பட்டுள்ளது.

இலங்கையின் மொத்த சனத்தொகை 2 கோடியே இரண்டு லட்சத்து 63723 எனத் தெரிவிக்கப்படுகிறது.

இதில் ஒரு கோடியே 51 லட்சத்து 73820 பேர் சிங்கள மக்களாவர். 18 லட்சத்து 69820 பேர் சோனகர்கள் எனத் தெரிவிக்கப்படுகிறது. 33061 பேர் பர்கர் இனத்தவர்கள். 40189 பேர் மலே இனத்தவர்கள்.

2011 – 2012ம் ஆண்டுகளில் மேற்கொள்ளப்பட்ட சனத் தொகை மதிப்பீட்டிற்காக 173 கோடி ரூபா செலவாகியுள்ளது.

மதிப்பீடு நடவடிக்கைகளுக்காக 99000 உத்தியோகத்தர்கள் ஈடுபடுத்தப்பட்டுள்ளனர்.

பிரதேச செயலகங்களும், புள்ளி விபரத் திணைக்களமும் இணைந்து மதிப்பீட்டு நடவடிக்கைகளை முற்கொண்டுள்ளன.

பௌத்தர்களின் எண்ணிக்கை ஒரு கோடிய 42 லட்சத்து 21 ஆயிரத்து 844 ஆகும்.

இந்துக்களின் எண்ணிக்கை 25 லட்சத்து 54ஆயிரத்து 606 ஆகும்.

முஸ்லிம்களின் எண்ணிக்கை 19 லட்சத்து 67 ஆயிரத்து 227 ஆகும் என புள்ளி விபரவியல் திணைக்களம் அறிவித்துள்ளது.

ரோமன் கத்தோலிக்க கிறிஸ்தவர்களின் எண்ணிக்கை 15 லட்சத்து 9 ஆயிரத்து 606 என அறிவித்துள்ளது.

பாராளுமன்றத்தை மலினப்படுத்துவதே தமிழ்த் தேசியக் கூட்டமைப்பின் தொடர்ச்சியான செயல். இதன் ஒரு நடவடிக்கையாகவே பாராளுமன்றத் தெரிவுக் குழுவை அக்கட்சி நிராகரித்து வருகிறது என தகவல் ஊடகத்துறை அமைச்சர் கெஹலிய ரம்புக்வெல்ல தெரிவித்தார்.

சிறுபான்மையினருக்கு பாராளுமன்றத்தில் உரையாற்றுவதற்குச் சுதந்திரமில்லை என்று கூறும் சம்பந்தன் எம்.பி. அந்தக் கூற்றை எங்கிருந்து கொண்டு வெளியிட்டார் என கேட்க விரும்புகிறேன்.

பாராளுமன்றத்திலிருந்து கொண்டே இக்கூற்றை வெளியிடும் அவரின் ஏனைய கூற்றுக்களும் ஏற்கக் கூடியதல்ல என்பதற்கு இது ஒரு நல்ல உதாரணம் எனவும் அமைச்சர் தெரிவித்தார்.

பாராளுமன்றத்தில் வரவு – செலவுத் திட்டம் மீதான விவாதத்தில் உரையாற்றிய தமிழ்த் தேசியக் கூட்டமைப்பு எம்.பி. இரா. சம்பந்தன் பாராளுமன்றத் தெரிவுக் குழு மூலம் தேசிய பிரச்சினைக்குத் தீர்வுகாண முடியும் என்பது நம்பிக்கையற்றது என்றும் அக்குழு காலத்தைக் கடத்தும் செயல் எனவும் குறிப்பிட்டிருந்தார்.

இது தொடர்பில் கருத்துத் தெரிவித்த போதே அமைச்சர் கெஹெலிய ரம்புக்வெல்ல இவ்வாறு தெரிவித்தார்.

சம்பந்தன் எம்.பி.யின் கூற்றுக்கள் தொடர்பில் மேலும் கருத்துத் தெரிவித்த அமைச்சர்,

பாராளுமன்றம் என்பது உயர் கெளரவம் மிக்கதும் பிரச்சினைகளுக்குத் தீர்வுகளைப் பெற்றுக் கொள்வதற்குப் பொருத்தமான இடம் என்பதுமே அரசாங்கத்தின் நம்பிக்கை. அந்த வகையிலேயே பாராளுமன்றத் தெரிவுக் குழு அமைக்கப்பட்டுள்ளது.

தமிழ்த் தேசியக் கூட்டமைப்பினர் எக்காலத்திலும் உயர் கெளரவம் மிக்க பாராளுமன்றத்தை மலினப்படுத்தும் வகையிலேயே செயற்பட்டு வந்துள்ளனர். அதன் ஒரு அம்சமாகவே பாராளுமன்றத் தெரிவுக் குழுவை அவர்கள் நிராகரித்து அக்குழுவிற்கு சமுகம் தருவதை தவிர்த்து வருகின்றனர்.

பாராளுமன்றத்தில் நம்பிக்கை வைக்காத தமிழ்த் தேசியக் கூட்டமைப்பினர் தொடர்ந்தும் பாராளுமன்றத்தை மலினப்படுத்தும் வகையிலேயே கருத்துக்களை வெளியிடுகின்றனர். அதன் ஒரு அம்சமாகவே சம்பந்தன் எம்.பி.யின் கூற்றும் அமைந்துள்ளது. என்றார்.

எரிபொருள் கொள்வனவு செய்வது தொடர்பிலான இலங்கைக்கு வழங்கி வந்த சலுகையை அமெரிக்கா நீட்டித்துள்ளது.

ஈரானிடமிருந்து உலக நாடுகள் எரிபொருட்களை இறக்குமதி செய்யக் கூடாது என அமெரிக்கா பொருளாதாரத் தடை விதித்திருந்தது.

எனினும் ஒரு சில நாடுகள் மட்டும் எரிபொருளை இறக்குமதி செய்ய அனுமதியளித்திருந்தது. அந்த சலுகைத் திட்டத்தின் அடிப்படையில் இலங்கைக்கும் எரிபொருள் இறக்குமதி செய்ய சந்தர்ப்பம் வழங்கப்பட்டிருந்தது.

இந்தச் சலுகையை மேலும் ஆறு மாத காலத்திற்கு அமெரிக்கா நீடித்துள்ளது.

இலங்கை உள்ளிட்ட ஒன்பது நாடுகளுக்கு இந்த சலுகை வழங்கப்பட்டுள்ளது.