நடிகர், நடிகைகள் டுவிட்டரில் தாங்கள் நடிக்கும் படங்கள் சம்பந்தப்பட்ட விவரங்களை உடனுக்குடன் வெளியிட்டு வருகின்றனர். சமந்தாவும் இதுபோல் டுவிட்டர் மூலம் ரசிகர்களுடன் தொடர்பு வைத்துள்ளார். தன்னைப் பற்றிய செய்திகளை அவ்வப்போது டுவிட்டரில் பதிவு செய்கிறார். சித்தார்த்தை இவர் காதலிப்பதும் டுவிட்டர் வாயிலாகத்தான் தெரியவந்தது.

தற்போது தெலுங்கில் நடிக்க உள்ள மனம் படத்தில் தனது கரக்டர் என்ன என்பதையும் டுவிட்டரில் வெளியிட்டுள்ளார். இதனால் இப்படத்தை தயாரித்து கதாநாயகனாகவும் நடிக்கும் நாகார்ஜுனா அதிர்ச்சியானார். படத்தின் ரகசியம் வெளியாகி விட்டதே என கொதிப்பானார்.

சமந்தாவை தொடர்பு கொண்டு கரக்டர் பற்றிய விவரத்தை எப்படி வெளியிடலாம் என்று கேட்டு கண்டித்தாராம். படப்பிடிப்பு முடியும்வரை தனது அனுமதியில்லாமல் படம் சம்பந்தமான எந்த விஷயத்தையும் டுவிட்டரில் வெளியிடக்கூடாது என்று தடை போட்டுள்ளார். இதனால் டுவிட்டரில் கருத்துக்கள் பதிவு செய்வதை சமந்தா தற்காலிகமாக நிறுத்தி வைத்துள்ளார்.

அமெரிக்காவில் ஆபாச படங்களில் நடித்து பிரபலமானவர் சன்னி லியோன் இவர் நடித்த நீலப்படங்களுக்கு வெளிநாடுகளில் பெரிய ரசிகர் பட்டாளம் இருக்கிறது. சன்னிலியோன் ஜிஸ்சம் 2 என்ற இந்தி படத்தில் அறிமுகமானவர். தற்போது ஜாக்பாட் என்ற இந்தி படத்தில் பரத்துடன் நடிக்கிறார்.

இவரை தயாநிதி அழகிரி தயாரிப்பில் ஜெய், சுவாதி ஜோடியாக நடிக்கும் வடகறி தமிழ்படத்தில் ஒரு பாட்டுக்கு நடனம் ஆட வைக்க முயற்சிக்கிறார். இதற்கு இந்து மக்கள் கட்சி தலைவர் அர்ஜூன் சம்பத் எதிர்ப்பு தெரிவித்துள்ளார்.

அவர் வெளியிட்ட அறிக்கையில் சன்னி லியோன் போன்ற நீலப்பட நடிகைகளை அனுமதித்தால் தமிழ்நாடு நீலப்பட நடிகைகள் சுதந்திரமாக நடமாட வசதியாகி விடும். நீலப்படங்கள் தவறானதல்ல என்ற கருத்தும் உருவாகிவிடும். இது தமிழ் சினிமாவுக்கு மட்டுமல்ல தமிழ் கலாச்சாரத்துக்கே முரணாகி விடும். ஒருபோதும் சன்னிலியோன் தமிழ்படத்தில் நடிப்பதை அனுமதிக்க மாட்டோம் என்று கூறினார்.

ஆனால் எதிர்ப்பை மீறி சன்னிலியோன் வடகறி படத்தில் நடனம் ஆடுகிறார். இதற்கான படப்பிடிப்பு விரைவில் துவங்கும் என்றும் டான்ஸ் மாஸ்டர் கல்யாண் இந்த நடன காட்சிகளை எடுக்கிறார் என்றும் அறிவிக்கப்பட்டு உள்ளது. சரவணராஜன் இப்படத்தை இயக்குகிறார்.

நடிகை டாப்சி ரன்னிங் ஷாதி டாட்காம் படம் மூலம் இந்திக்கு போய் உள்ளார். இது இந்தியில் அவருக்கு இரண்டாவது படம். இப்படத்துக்கு பிறகு இந்தியில் தொடர்ந்து நடிக்க முடிவு செய்துள்ளதாகவும் தமிழ், தெலுங்கு படங்களில் இனிமேல் நடிக்க மாட்டார் என்றும் செய்திகள் வந்தன.

சமீபத்தில் ரிலீசான ஆரம்பம் படத்தில் டாப்சி நடித்து இருந்தார். முனி 3ம் பாகம் படத்திலும் நடிக்கிறார். இவை தவிர வேறு தமிழ் படங்கள் அவருக்கு இல்லை. தமிழ் படங்களில் நடிக்க மாட்டீர்களா என்று டாப்சியிடம் கேட்டபோது அவர் கூறியதாவது..

மூன்று வருடங்களுக்கு முன் இந்திப் படங்களில் மட்டும் தான் நடிப்பீர்களா என்று கேட்டு இருந்தால் ஆமாம் என்று சொல்லி இருப்பேன். ஆனால் இப்போது நிலைமை வேறு. தமிழ், தெலுங்கில் நிறைய படங்களில் நடித்து நல்ல இடத்தை தக்க வைத்துள்ளேன். எனவே இந்தியில் மட்டுமே கவனம் செலுத்துவேன் என சொல்ல இயலாது.

தமிழ் தெலுங்கு படங்களில் நல்ல கதைகள் வந்தால் தொடர்ந்து நடிப்பேன். மூன்று மொழி படங்களிலும் கவனம் செலுத்துவேன் இவ்வாறு டாப்சி கூறினார்.

ஐந்து முக்கிய கதாபாத்திரங்களை மையமாக வைத்து உருவாகி வரும் புதிய படம் நேர் எதிர். இப்படத்தை இயக்குனர், தயாரிப்பாளர் கேயாரிடம் 12 ஆண்டுகளாக பணியாற்றிய எம்.ஜெயபிரதீப் என்பவர் இயக்குகிறார்.

இந்த படத்தில் ரிச்சர்ட், வித்யா, ஐஸ்வர்யா, எம்.எஸ்.பாஸ்கர், பார்த்தி உள்ளிட்ட பலரும் நடிக்கின்றனர். இப்படத்தை கலைப்புலி எஸ்.தாணுவின் தி மூவி ஹவுஸ் எண்டர்டெய்ன்மெண்ட் நிறுவனம் தயாரிக்கிறது. முழுநீள சஸ்பென்ஸ் திரில்லராக உருவாகும் இப்படத்தின் கதை முழுக்க முழுக்க இரவிலேயே நடக்கிறது. ஒரு காட்சிகூட பகலில் எடுக்கப்படவில்லை.

நேர் எதிர் என்பது வழக்கமான நாயகன், வில்லன் மோதலா என இயக்குனரிடம் கேட்டதற்கு அவர் கூறிய விளக்கம் வருமாறு..

உலகில் எல்லா விலங்குகளுக்கும் அதனதன் சுபாவத்தில் சரியாகவே இருக்கின்றன. சிங்கம் புல் தின்னாது. ஆனால் வேட்டையாடும். நாய் முனகாது, ஆனால் குரைக்கும். பூனை குரைக்காது, மியாவ் என்றே கத்தும், பாம்பு கொஞ்சாது, சீறவே செய்யும். ஆனால் மனிதன் மட்டுமே இதற்கு விதிவிலக்காக இருக்கிறான்.

ஒரு மனிதன் எப்போது புலி போல பதுங்குவான், எப்போது சிங்கம் போல வேட்டையாடுவான், எப்போது நரித்தனம் செய்வான், எப்போது பாம்பு போல விஷத்தை கக்குவான் என்று யாருக்குமே தெரியாது. எல்லா விலங்குகளின் குணத்தையும் தன்னுள்ளே கொண்டவனாக இருக்கிறான்.

ஒருவனைப் பற்றி உலகில் மற்றவர் நினைத்து நம்பி இருக்கும் எண்ணத்துக்கு நேர் எதிர் ஆக அவன் இருக்கிறான். இந்த சுபாவ முரண்பாடுகளை சுவராஸ்யப்படுத்தி உருவாக்கியுள்ள படம்தான் நேர் எதிர். படத்தில் வரும் 5 கதாபாத்திரங்களில் யார் நல்லவர், யார் கெட்டவர் என்று புரியாதபடி காலம் நடத்தும் ஆட்டம்தான் திரைக்கதை.

இன்றைய யதார்த்த உலகில் நாகரிகம் என்ற பெயரில் நடக்கும் கூத்துக்குளம் போக்குகளுமே கதைப் பின்னணி. தற்காலச் சூழலில் தவறு எப்படியெல்லாம் நடக்கிறது என்பதை படம் பிடித்துக்காட்டும் கதை. காதல், நட்பு எல்லாம் இணைந்த சஸ்பென்ஸ் உடையது. அடுத்தது என்ன என்று ஊகிக்க, நம்ப முடியாத திருப்பங்களுடன் கதை பயணிக்கும் என்று கூறினார்.

இந்த படத்துக்காக ஏவி.எம்.ஸ்டுடியோவில் ஒரு பெரிய செட் போடப்பட்டு பெரும்பாலான காட்சிகள் அதில் படமாகியுள்ளன. மூன்று மாடிகள் கொண்ட இந்த செட் 75 லட்ச ரூபாய் செலவில் போடப்பட்டுள்ளது. ஏவி.எம். செட் தவிர சென்னையில் முக்கிய சாலைகள், ஹோட்டல்கள், கிழக்கு கடற்கரை சாலை போன்ற இடங்களிலும் படமாகியுள்ளது.

படத்திற்கு சதீஷ் நாராயணன் இசையமைத்துள்ளார். இவர் ஏ.ஆர்.ரஹ்மானின் மாணவர். ஏற்கெனவே கனிமொழி, லீலை ஆகிய படங்களுக்கும் இசையமைத்துள்ளார். அறிவுமதி, கமலக்கண்ணன் ஆகியோருடன் இயக்குனர் ஜெயபிரதீப்பும் ஒரு பாடல் எழுதியுள்ளார்.

கவிஞர் அறிவுமதியின் மகன் ராசாமதி இப்படத்திற்கு ஒளிப்பதிவு செய்கிறார். இவர் ஏற்கெனவே சித்து+2 உள்ளிட்ட படங்களில் பணியாற்றியுள்ளார். இப்படத்தைப் பார்த்த கலைப்புலி எஸ்.தாணு, அதன் நிறமும், தரமும் பிடித்துப்போகவே தன்னுடைய தயாரிப்பு நிறுவனமான வி கிரியேஷன்ஸ் சார்பில் வாங்கி வெளியிடுகிறார்.

புது ஹீரோக்களுடன் நடிக்க தயார் என்று அமலாபால் அறிவித்து உள்ளார். விஜய்யுடன் அமலாபால் நடித்த தலைவா படம் கடந்த ஆகஸ்ட் மாதம் ரிலீசானது. தற்போது ஜெயம் ரவியுடன் நிமிர்ந்து நில், தனுசுடன் வேலை இல்லா பட்டதாரி படங்களில் நடிக்கிறார்.

தெலுங்கில் ஒரு படத்திலும் மலையாளத்தில் இரண்டு படங்களிலும் நடித்துக் கொண்டு இருக்கிறார். பெரிய ஹீரோக்களுடன் மட்டுமே நடிப்பேன் என்று அமலாபால் அடம்பிடிப்பதாக செய்திகள் வந்தன. இதனை அவர் மறுத்துள்ளார். இது குறித்து அமலாபால் கூறியதாவது..

நான் தமிழ், தெலுங்கு, மலையாளம் ஆகிய மூன்று மொழிகளில் நடிக்கிறேன். எனக்கு கதைதான் முக்கியம். நல்ல கதையம்சம் உள்ள படமாக இருந்தால் உடனே ஒப்புக்கொள்கிறேன். பெரிய ஹீரோவுடன்தான் நடிப்பேன் என்று கட்டாயப்படுத்துவது இல்லை. கதை பிடித்து இருந்தால் புது ஹீரோக்களுடனும் நடிப்பேன் என்று கூறினார்.