சொத்துக்குவிப்பு வழக்கில் நீதிபதி நியமனத்தை எதிர்த்து தொடரப்பட்ட வழக்கில் இரண்டு வாரத்தில் பதில் அளிக்கும்படி முதல்வர் ஜெயலலிதாவுக்கு உச்ச நீதிமன்றம் உத்தரவிட்டுள்ளது.

முதல்வர் ஜெயலலிதா உள்பட 4 பேர் மீதான சொத்துக்குவிப்பு வழக்கு பெங்களூரு சிறப்பு நீதிமன்றத்தில் நடந்து வருகிறது. இந்த வழக்கை விசாரித்து வந்த நீதிபதி பாலகிருஷ்ணா ஓய்வு பெற்றதைத் தொடர்ந்து புதிய நீதிபதியாக ஜான்மைக்கோல் குன்ஹாவை கர்நாடகா அரசு நியமித்தது.

இந்நிலையில், நீதிபதி நியமனத்தில் உச்ச நீதிமன்ற விதிகள் பின்பற்றப்படவில்லை என்று கூறி முதல்வர் ஜெயலலிதா உச்ச நீதிமன்றத்தில் வழக்கு தொடர்ந்தார்.

இந்த வழக்கில் முன்பு விசாரித்து வந்த நீதிபதி பாலகிருஷ்ணா தாம் பணியில் தொடர விரும்பவில்லை என்றதாகவும், நீதிபதி நியமனத்தில் உச்ச நீதிமன்ற விதிகள் பின்பற்றப்பட்டுள்ளதாகவும் கர்நாடக அரசு பதில் மனு தாக்கல் செய்தது.

இதனை தொடர்ந்து கர்நாடக அரசின் பதில் மனுவிற்கு 2 வாரத்திற்குள் பதில் அளிக்க வேண்டுமென்று ஜெயலலிதாவுக்கு உச்ச நீதிமன்றம் உத்தரவிட்டுள்ளது.

சீன எல்லையில் சுமார் ரூ.65 ஆயிரம் கோடி செலவில் கூடுதலாக 50,000 வீரர்களை பாதுகாப்புப் பணியில் ஈடுபடுத்த இராணுவத்துக்கு மத்திய அரசு அனுமதி வழங்கியுள்ளது.

ஜார்க்கண்ட் மாநிலம் ராஞ்சியில் தொடக்கத்தில் 17 பட்டாலியன்களை அமைக்கவும், உள்கட்டமைப்பு வசதிகளை மேம்படுத்திய பிறகு அவற்றை மேற்கு வங்கு மாநிலம் பனாகர் கொண்டு செல்லவும் திட்டமிடப்பட்டுள்ளது.

சீனாவை ஒட்டி ஆதிக்க எல்லை கோட்டுப் பகுதியில் அதிரடிப் படை வீரர்களை பாதுகாப்புப் பணியில் ஈடுபடுத்துவது இதுவே முதல்முறையாகும்.

இந்தப் படை அனுமதிக்கான உத்தரவுக் கடிதம் பாதுகாப்பு அமைச்சகத்திடம் வழங்கப்பட்டுவிட்டதாகவும், இதற்கான நிதி ஒதுக்கீட்டு அனுமதியும் வழங்கப்பட்டுள்ளதாகவும் மத்திய அரசு வட்டாரத் தகவல்கள் தெரிவிக்கின்றன.

புதிய படைக்கு அதிகாரிகளை நியமிக்கும் பணிகள் ஏற்கெனவே தொடங்கிவிட்டன. எல்லையில் படைகளை அதிகரிக்க பிரதமர் மன்மோகன் சிங் தலைமையிலான பாதுகாப்புக்கான அமைச்சரவைக் குழு கடந்த ஜுலை 17ஆம் திகதி அனுமதி வழங்கியது.

இத்திட்டத்தின் ஒரு பகுதியாக புதிய படையினர் வடகிழக்குப் பகுதி மற்றும் அருணாச்சல பிரதேச படைப்பிரிவுகளுடன் பிகார், அசாமில் புதிதாக உதயமாக உள்ள இரு மண்டலங்களை கண்காணிக்கவும் திட்டமிடப்பட்டுள்ளது.

அதேவேளையில் இந்திய விமானப் படையினரும் பனாகரில் நவீன ரக பீரங்கிகளுடன் படைகளை நிலைநிறுத்த உள்ளதாக தகவல்கள் தெரிவிக்கின்றன.

கடந்த 2010ஆம் ஆண்டு ராணுவம் இது தொடர்பாக சமர்பித்த திட்ட அறிக்கையை முப்படைகளும் இணைந்து பாதுகாப்புப் பணியை மேற்கொள்ளுமாறு கூறி மத்திய அரசு திருப்பி அனுப்பியது குறிப்பிடத்தக்கது.

திராவிடர் கழக தலைவர் கி.வீரமணி வெளியிட்டுள்ள அறிக்கையில் கூறியிருப்பதாவது:-

ஈழத்தமிழர்களுக்கு எதிரான இனப்படுகொலை, இன ஒடுக்கல், மனிதநேய உரிமைகள் மீறல், இவைகளை நடத்திய இலங்கை சிங்கள ஆதிக்க அரசினை நோக்கி உலகின் பன்னாடுகளும் தங்களது பார்வையை செலுத்த துவங்கிவிட்டன.

காமன்வெல்த் மாநாட்டை இந்தியா முழுமையாகப் புறக்கணித்திருந்தால், அதன் தாக்கம் உலகளாவிய நிலையில் மேலும் பெரும் விளைவினை சர்வதேச நாடுகள், ஐ.நா. மனித உரிமை ஆணையம், இவை மத்தியில் மேலும் ஏற்படுத்தியிருக்கக் கூடும்.

நிலை தடுமாறிய ராஜபக்ஷவின் ஆவேச, ஆத்திரப்பேச்சுகளே அவரது அச்சத்தை அறிவிப்புகளாக வெளிச்சம் போட்டுக்காட்டுகின்றன. 17ம் திகதி கூடிய ´டெசோ´ தீர்மானங்கள் கலங்கரை வெளிச்சம் ஆகும்.

ஒப்புக்கு அழுபவர்கள் யார்?, உண்மையாக அழுபவர்கள் யார்? என்பதை இதுவரை உணராதவர்கள் இப்போதாவது உணரத் தொடங்கியுள்ளார்கள்.

இவ்வாறு அவர் கூறியுள்ளார்.

பத்தாம் வகுப்பு மாணவிக்கு குளிர்பானத்தில் மயக்க மருந்து கலந்து கொடுத்து 4 பேர் பாலியல் பலாத்காரம் செய்துள்ளனர்.

கர்நாடக மாநிலம் பெங்களூரில் இருந்து 30 கிமீ தொலைவில் உள்ளது கண்ணமங்களா. அந்த கிராமத்தில் வசிக்கும் கூலித் தொழிலாளி ஒருவரின் 16 வயது மகள் பத்தாம் வகுப்பு படித்து வருகிறார்.

அவர் கடந்த ஞாயிற்றுக்கிழமை கன்னட ராஜ்யோத்சவா கொண்டாட்டத்தின் ஒரு பகுதியாக நடந்த இசை நிகழ்ச்சியை பார்க்க பக்கத்து கிராமத்திற்கு சென்றார்.

நிகழ்ச்சி முடிந்த பிறகு அவர் இரவு நேரத்தில் வீடு திரும்பிக் கொண்டிருந்தார். அப்போது அவரை வழிமறித்த நான்கு பேர் அவருக்கு மயக்க மருந்து கலந்த குளிர்பானம் கொடுத்து அதை வலுக்கட்டாயமாக குடிக்க வைத்து அவரை பாலியல் பலாத்காரம் செய்துள்ளனர்.

இந்த சம்பவம் நடந்த அரை மணிநேரம் கழித்து அந்த வழியாக சென்ற ஒருவர் மாணவி மயக்க நிலையில், அரை நிர்வாண கோலத்தில் கிடப்பதை பார்த்து அவரை அருகில் உள்ள வைத்தியசாலைக்கு அழைத்துச் சென்றார். அங்கு மாணவியை பரிசோதித்த மருத்துவர்கள் அவர் பலாத்காரம் செய்யப்பட்டதை உறுதி செய்தனர்.

மயக்கம் தெளிந்த மாணவி தன்னை சீரழித்தவர்களில் 2 பேரை தனக்கு தெரியும் என்று கூறியுள்ளார். இந்த சம்பவம் குறித்து வழக்குப் பதிவு செய்த பொலிசார் 4 பேரை கைது செய்து விசாரணை நடத்தி வருகின்றனர்.

இலங்கை ஜனாதிபதி மஹிந்த ராஜபக்ஷவுக்குத் தலையையும், தமிழர்களுக்கு வாலையும் காட்டி பிரதமர் மன்மோகன் சிங் ஏமாற்றிவிட்டதாக திமுக தலைவர் கருணாநிதி காட்டமாகக் கூறியுள்ளார். இது தொடர்பாக அவர் வெளியிட்ட அறிக்கை..

கனடா, பிரிட்டன், மொரீஷியஸ், ட்ரினிடாட், அவுஸ்திரேலியா போன்ற நாடுகளும், உலகத் தமிழர்களும் தெரிவித்த எதிர்ப்புக்குப் பிறகும் இலங்கையில் பொதுநலவாய மாநாடு நடைபெற்றுள்ளது. அந்த மாநாட்டின் ஒரே சிறப்பு ராஜபக்ஷவுக்கு ஏற்பட்ட நெருக்கடியான நிலையும், இங்கிலாந்து பிரதமர் டேவிட் கேமரூனுக்குக் கிடைத்த சர்வதேச கவனமும் ஆகும்.

உலகெங்கும் வாழும் அனைத்து தமிழர்கள் நெஞ்சங்களிலும் கேமரூன் இடம்பெற்றுவிட்டார். இந்தப் புகழும், பெருமையும் பிரதமர் மன்மோகன் சிங்குக்கும் கிடைத்திருக்கும். அது எப்போது தெரியுமா? இலங்கையில் நடைபெற்ற இனப்படுகொலைகளைக் கண்டிக்கும் வகையில் இந்தியா சார்பில் ஒரு துரும்புகூட பொதுநலவாய மாநாட்டில் பங்கேற்காது என்று மன்மோகன் சிங் அறிவித்திருந்தால் அந்தப் புகழ் கிடைத்திருக்கும்.

ராஜபக்ஷவுக்குத் தலையையும், தமிழர்களுக்கு வாலையும் காட்டி ஏமாற்ற நினைத்ததைப் போல இரண்டுங்கெட்டான் நிலையில், தான் செல்லவில்லை என்றும், சல்மான்குர்ஷித் தலைமையிலான குழு செல்லும் என்றும் பிரதமர் முடிவு எடுத்தார்.

இந்த முடிவை எடுத்த போதாவது, இலங்கை அரசால் ஈழத் தமிழர்களுக்கு இழைக்கப்பட்ட வன்கொடுமைகளைக் கண்டிக்கும் வகையில்தான் நான் (மன்மோகன் சிங்) மாநாட்டில் பங்கேற்கவில்லை என்று பிரதமர் அறிக்கை விடுத்திருக்கலாம்.

ஆனால் டேவிட் கேமரூன், ஈழத்தமிழர்களை நேரில் சந்தித்து ஆறுதல் கூறியதுடன், இலங்கை ராணுவம் செய்து வரும் கொடுமைகளைக் கண்டிக்கும் வகையில் விசாரணைக் குழு ஒன்றை உடனடியாக அமைக்க வேண்டும் என்றும், இலங்கையின் போர்க்குற்றங்கள் தொடர்பாக சர்வதேச விசாரணை அவசியம் என்றும் கேமரூன் வலியுறுத்தியுள்ளார்.

இந்தப் பணியை மத்திய அரசு செய்திருந்தால், தமிழ்ச் சமுதாயம் நன்றி செலுத்தியிருக்கும். குர்ஷித் செய்தது என்ன தமிழர்களின் கோரிக்கைகளைப் புறக்கணித்துவிட்டு, மாநாட்டில் பங்கேற்ற சல்மான் குர்ஷித் செய்தது என்ன தமிழர்களுக்கு ஆறுதலும் கூறவில்லை.

இலங்கை மீது விசாரணை நடத்த வேண்டும் என்று கூறவில்லை. தமிழர்களுக்கு இழைக்கப்படும் கொடுமைகள் தொடர்பாக மாநாட்டில் கர்ஜிக்கவும் இல்லை. சல்மான் குர்ஷித்துக்கு என்ன கவலை மாண்டதெல்லாம் தமிழ் மக்கள்தானே என்று கருணாநிதி கூறியுள்ளார்.