கேரள மாநிலம் பாலக்காட்டில் தமிழ் பிராமணக் குடும்பத்தில் பிறந்தவர் வித்யாபாலன். தற்போது இந்தி சினிமாவில் முன்னணி நடிகையாக உள்ள அவர், தனக்கென ஒரு ஸ்டைல் வைத்துள்ளார். சில்க் ஸ்மிதாவின் வாழ்க்கையை அடிப்படையாக வைத்து எடுக்கப்பட்ட “தி டேட்டி பிக்சர்” படமும் கஹானி படமும் வித்யாபாலனுக்கு மிகப்பெரிய பெயரையும், புகழையும் பெற்றுத் தந்துள்ளது.

இந்தியாவின் பெரிய நடிகைகள் அனைவரும் தென்னிந்தியாவைச் சேர்ந்தவர்கள். வைஜெயந்தி மாலா, ஹேமமாலினி, ரேகா, ஸ்ரீதேவி, ஜெயப்பிரதா, ஐஸ்வர்யா ராய் ஆகியோர் திரையிலும், வெளியிலும் சுதந்திரம் பெற்றவர்களாக உள்ளார்கள். கேமரா முன் வந்ததுமே ஸ்ரீதேவிக்கு என்ன தான் நடக்கிறது என்று வித்யா வியந்துள்ளார்.

மேலும், ஸ்ரீதேவி நடிக்கும் படத்தில் சிறு உதவியாளராகக் கூட வேலை பார்க்கத் தயாராக இருக்கிறேன். தி டேட்டி பிக்சர் படத்திற்குப்பிறகு பூசினாற் போன்ற எனது தோற்றத்தை நானே ரசிக்க ஆரம்பித்தேன். ஒல்லியான பெண்கள் தசை தூக்கலாக, ஆண்மைத்தனமாக தெரிவார்கள். அவ்வாறு ஆண்மைத்தனமாக இருப்பதில் எனக்கு விருப்பமில்லை.

முன்பு ரசிகர்கள் அடுத்தவர்களின் மனைவியை ரசிக்க மாட்டார்கள். ஆனால் தற்போது திருமணத்திற்கு வெளியிலான உறவுகள் அதிகரித்து வரும் நிலையில் திருமணமான பெண்ணை ஆசையோடு பார்க்க பலர் தயங்குவதில்லை என்கிறார் வித்யா.

சிங்கம் 2 படத்தின் வெற்றியை தொடர்ந்து சூர்யா நடிக்க இருக்கும் படத்தினை பற்றி பல்வேறு தகவல்கள் வெளிவந்த வண்ணம் உள்ளன.
சிங்கம் 2வை தொடர்ந்து கெளதம் மேனன் இயக்கத்தில் துருவ நட்சத்திரம் மற்றும் லிங்குசாமி இயக்கும் படம் என இரண்டு படங்களிலும் ஒரே நேரத்தில் நடிக்க இருப்பதாக அறிவித்தார் சூர்யா.

அதனைத் தொடர்ந்து இரண்டு படங்களுக்கும் சிக்கல் மேல் சிக்கல். கெளதம் மேனன் இயக்கத்தில் சூர்யா நடிக்க இருந்த துருவ நட்சத்திரம் படம் கைவிடப்பட்டு விட்டது என்கிறது கோடம்பாக்கம்.

ஆனால் கெளதம் மேனன் தனது டிவிட்டர் இணையத்திலேயோ சூர்யாவும் நானும் இணைந்து ஒரு நல்ல படத்தைத் தர திட்டமிட்டுள்ளோம்.அதுகுறித்து யோசித்து வருகிறோம். என்று தெரிவித்தார்.

அதனைத் தொடர்ந்து லிங்குசாமி படத்திற்கும் பிரச்சனை தான். இயக்குனர் சங்கத்தில் சீமான் தனது பகலவன் கதையும், லிங்குசாமி சூர்யாவுக்காக தயார் செய்த கதையும் ஒன்றே என்று புகார் செய்து இருக்கிறாராம். இதனால் இப்படமும் எப்போது படப்பிடிப்பு தொடங்கும் என்ற சூழ்நிலை உருவாகி இருக்கிறது.

லிங்குசாமி தரப்போ ஒகஸ்ட் 21ம் தேதி முதல் சென்னையில் படப்பிடிப்பு தொடங்கப்படும் என்று தெரிவித்து வருகிறது. ஆனால் சூர்யா தரப்பில் இருந்து அடுத்த படம் இது தான் என்கிற அறிவிப்பு வரவில்லை.

அதற்குள் கார்த்தி நடித்து வரும் “ஆல் இன் ஆல் அழகுராஜா” படத்தினைத் தொடர்ந்து சூர்யா நடிக்க இருக்கும் படத்தினை இயக்க இருக்கிறார் ராஜேஷ் என்கிற தகவல் தான் இன்றைய பேச்சு.

சூர்யா நடிக்கும் அடுத்த படத்தின் இயக்குனர் கெளதம் மேனன், லிங்குசாமி, ராஜேஷ் ஆகியோரை தொடர்ந்து இப்பட்டியலில் இணையப் போவது யாரோ தெரியவில்லை.

மங்காத்தா வெற்றிக்குப் பிறகு வெங்கட் பிரபு இயக்கும் படம் பிரியாணி. இப்படத்திற்கு இசை யுவன் சங்கர் ராஜா. இது அவருக்கு 100வது படமாகும். ஸ்டுடியோ கிரீன் நிறுவனம் சார்பாக ஞானவேல் ராஜா இப்படத்தை தயாரிக்கிறார்.

பிரியாணி படத்தை வரும் செப்டம்பர் 6ம் திகதி வெளியிட முடிவு செய்துள்ளனர். பிரியாணி படத்தின் புகைப்படங்கள் ஏற்கெனவே வெளியாகி ரசிகர்கள் மத்தியில் அமோக ஆதரவை பெற்றதை தொடர்ந்து பிரியாணி படமும் ரசிகர்கள் மனதை கவரும் என்று எதிர்பார்க்கப்படுகிறது.

பிரியாணி படத்தின் இயக்குனர் வெங்கட்பிரபு முதலில் படத்தின் ஹீரோவாக விஜயை நடிக்க வைக்க திட்டமிட்டுயிருந்தார். ஆனால், அவரது கால்ஷீட் கிடைக்கவில்லையாம். அவருக்கு அடுத்து, கார்த்திக்கு தான் ஹீரோ கதாபாத்திரம் சரியாக பொருந்தும் என முடிவெடுத்த வெங்கட் பிரபு கார்த்தியை படத்தின் ஹீரோவாக்கினார். இதனால், விஜய்க்கு கிடைக்க வேண்டிய வாய்ப்பு கார்த்திக்கு கிடைத்தது.

விஜய்யிடம் இருந்து கால்ஷீட் கிடைக்காத ஏமாற்றத்தில் இருக்கும் வெங்கட்பிரபு விஜய் நடிக்கும் தலைவா ரிலீஸ் தினத்தன்றே தனது பிரியாணி படத்தையும் வெளியிட்டு போட்டி போட முடிவு செய்திருப்பதாக செய்திகள் தெரிவிக்கின்றன.

பிரியாணி படத்தின் வெற்றியை பார்த்து, இந்த மாதிரி அருமையான படத்தில் தன்னால் நடிக்க முடியவில்லை என விஜய் வருத்தப்படும் அளவிற்கு வெற்றி பெறவேண்டும் என்ற வெறியோடு உழைத்திருக்கிறாராம் வெங்கட்பிரபு.

இந்த ஆண்டு ஆரம்பத்தில் இருந்தே அடுத்தடுத்து ஜாம்பவான்களை பறிகொடுத்து வருவதால் தமிழ் சினிமா கலைஞர்கள் அதிர்ச்சியில் இருக்கிறார்கள். இந்த ஆண்டு ஜனவரி மாதம் மாஜி ஹீரோயின் ராஜசுலோச்சனா திடீர் மரணம் அடைந்தார்.

அடுத்து ஆயிரம் படங்களுக்கு மேல் நடித்த சுகுமாரி மரணம் அடைந்தார். இசைத் துறையை சேர்ந்த பி.பி.ஸ்ரீனிவாஸ். டி.எம்.சவுந்தர்ராஜன், டி.கே.ராமமூர்த்தி, லால்குடி ஜெயராமன் ஆகியோர் அடுத்தடுத்து இயற்கை எய்தி இசை உலகில் பெரிய வெற்றிடத்தை ஏற்படுத்திச் சென்றார்கள்.

50 படங்களை இயக்கிய மணிவண்ணன் மரணத்தை முத்தமிட்டார். அவரைத் தொடர்ந்து இயக்குனர் ராசுமதுரவன் இளம் வயதிலேயே புற்றுநோய்க்கு பலியானார். ஜெமினி லேப் ஆனந்த் சினி சர்வீஸ் நிர்வாகத்தின் தலைவரும் தயாரிப்பாளருமான ரவிசங்கர் பிரசாத் தற்கொலை செய்து கொண்டது சினிமாவில் அதிர்ச்சி அலையை உண்டாக்கியது.

15 ஆயிரம் பாடல்களுக்கு மேல் எழுதி குவித்து 50 வருடங்கள் தமிழ் சினிமாவின் ஆணிவேராக இருந்த காவியக் கவிஞர் வாலி நம்மை விட்டுச் சென்றது சினிமாவில் மட்டுமல்ல நாட்டு மக்களிடமும் பெரிய துக்கத்தை ஏற்படுத்தியது. அந்த துக்கம் முடிவதற்குள்ளாகவே மஞ்சுளாவை சினிமா இழந்தது. இப்படி அடுத்தடுத்து சினிமா ஜாம்பவான்கள் மறைந்தது அதிர்ச்சியாகவே இருக்கிறது.

மரணம் கடவுளின் கையில் என்றாலும் அடுத்தடுத்து அதை சந்திப்பதால் அது கலைஞர்கள் இடையே கலக்கத்தை ஏற்படுத்தி உள்ளது.

ஒரு கல் ஒரு கண்ணாடி படத்தின் வெற்றிக்குபின் ராசியான நடிகை பட்டியலில் சேர்க்கப்பட்ட ஹன்சிகாவுக்கு மள மளவென்று முன்னணி ஹீரோக்களின் படங்கள் கிடைத்தன.

சில இயக்குனர்கள் ஹன்சிகாவின் குண்டான உடம்பை குறைக்குமாறு அறிவுறுத்தினர். அதனால், மாதக்கணக்கில் உடற்பயிற்சி செய்தும், உணவு கட்டுப்பாட்டை கடைபிடித்தும், மற்றவர்கள் ஆச்சர்யப்படும் அளவுக்கு சேட்டை படத்தில் காட்சியளித்தார்.

அதையடுத்து உடற்பயிற்சியை நிறுத்தியதால் இப்போது மீண்டும் உடல் குண்டாகி விட்டதாம். இதனால், மறுபடியும் தீவிர பயிற்சி மூலம் 10 கிலோ வரை எடை குறைந்துள்ள அவர் உடம்பை சீராக வைத்திருக்க தினமும் நீச்சல் பயிற்சி எடுக்கிறாராம். மனதை கட்டுக்குள் வைத்துக் கொள்ள யோகா பயிற்சியும் செய்கிறாராம்.