இலங்கையின் வடக்கு உட்பட மூன்று மாகாண சபைகளுக்கு நடைபெறவுள்ளத் தேர்தலில் ஸ்ரீலங்கா முஸ்லிம் காங்கிரஸ் தனித்து போட்டியிட முடிவு செய்துள்ளது.இதை அக்கட்சியின் பொதுச் செயலர் ஹஸன் அலி உறுதிப்படுத்தியுள்ளார்.

கடந்த மூன்று வாரங்களாக இது குறித்த விவாதங்கள் நடைபெற்றன என்றும் அதையடுத்து இடம்பெற்ற கட்சியின் உயர்மட்டக் கூட்டத்திலேயே தனித்து போட்டியிடுவது எனும் முடிவு எட்டப்பட்டது எனவும் அவர் தெரிவித்தார்.

ஆளும் கூட்டணியின் ஒரு அங்கமாக போட்டியிடுவது சாத்தியப்படாது என்று தமது உறுப்பினர்கள் சுட்டிக்காட்டியதை அடுத்தே, கட்சி இம்முடிவுக்கு வரவேண்டிய நிலை ஏற்பட்டது எனவும் அவர் மேலும் தெரிவித்தார்.

வட மாகாணத்திலுள்ள முஸ்லிம்களின் பிரச்சினைகள் முற்றாக தீர்ந்தபாடில்லை எனும் சூழலில் ஆளும் கூட்டணியுடன் சேர்ந்து போட்டியிடுவது தங்களது நலன்களை பாதிக்கும் என்று உயர்மட்டக் கூட்டத்தில் தெரிவிக்கப்பட்டதாகவும் அதை கட்சி கவனத்தில் எடுத்தது என்றும் அவர் தெரிவித்தார்.

மத்திய அரசில் ஆளும் ஐக்கிய மக்கள் சுதந்திரக் கூட்டணியில் ஒரு அங்கமாக தமது கட்சி இருந்தாலும் தாங்கள் பாரபட்சமாக நடத்தப்படுவதாக கட்சி உறுப்பினர்கள் தெரிவித்த காரணத்தாலேயே தனித்து போட்டியிடும் சூழலுக்கு தள்ளப்பட்டதாகவும் ஹஸன் அலி கூறுகிறார்.

எனினும் ஆளும் கூட்டணியிலுள்ள இதர முஸ்லிம் கட்சிகள் தனியாக ஒரு அணி அமைத்து அதன் அடிப்படையில் தேர்தலை சந்திக்க விரும்பினால் அது குறித்து ஆக்கபூர்வமாக விவாதிக்க ஸ்ரீலங்கா முஸ்லிம் காங்கிரஸ் தயாரகவுள்ளது என்றும் அவர் கூறினார்.

தேர்தலுக்கு பிறகே யாரை ஆதரிப்பது என்கிற முடிவு எடுக்கப்படும் எனவும் ஹஸன் அலி தெரிவித்தார்.

-BBC தமிழ்-

இலங்கை இளைஞர்கள் இருவர் பிரித்தானியாவில் கைது செய்யப்பட்டுள்ளதாக பிரித்தானிய குடிவரவு குடியகழ்வு அமைச்சர் தெரிவித்துள்ளார்.

வீசா காலாவதியான நிலையிலும் பிரித்தானியாவில் தங்கியிருந்த குற்றத்திற்காகவே இவர்கள் கைது செய்யப்பட்டுள்ளனர்.

21 மற்றும் 22 வயதுடைய இளைஞர்கள் இருவர் இவ்வாறு கைது செய்யப்பட்டுள்ளதாக பிரித்தானிய தூதரகம் குறிப்பிட்டுள்ளது.

இவர்கள் உணவகம் ஒன்றில் சட்டவிரோதமாக வேலை செய்துவந்த நிலையில் கைது செய்யப்பட்டுள்ளனர்.

இவ் இலங்கை இளைஞர்களை வேலைக்கமர்த்தியிருந்த உணவகத்தின் உரிமையாளருக்கு தண்டப்பணம் அறவிடப்பட்டுள்ளது.

சட்டவிரோதமான முறையில் அவுஸ்திரேலியாவிற்குச் செல்வதற்கு உதவிய குற்றசச்சாட்டின் பேரில் மூவர் கைது செய்யப்பட்டுள்ளனர்.

திக்வெல்ல பிரதேசத்தில் வைத்து இவர்கள் மூவரும் கைது செய்யப்பட்டுள்ளனர்.

இவர்கள் மாவனல்லை, நீர்கொழும்பு மற்றும் நகுலுகமுவ பிரதேசங்களில் வசித்து வருபவங்கள் என பொலிஸார் தெரிவித்தனர்.

சந்தேகநபர்களிடமிருந்து 30 லட்சம் ரூபா பெறுமதியான காசோலை மூன்று, கடவுச் சீட்டு மற்றும் உபகரணங்கள் பலவும் கைப்பற்றப்பட்டுள்ளன.

இவர்கள் கடந்த 5ஆம் திகதி சட்டவிரோதமான முறையில் அவுஸ்திரேலியாவுக்கு 60 பேரை அனுப்பி வைத்துள்ளதாக தெரியவந்துள்ளது.

ஒருவார கால உத்தியோகபூர்வ விஜயமொன்றை மேற்கொண்டு ஐரோப்பிய ஒன்றியப் பாராளுமன்றத்தூதுக்குழுவொன்று நேற்று இலங்கையை வந்தடைந்துள்ளதாக கொழும்பில் உள்ள ஐரோப்பிய ஒன்றிய காரியாலயம் தெரிவித்துள்ளது.

தெற்காசிய நாடுகளுடனான உறவுகளுக்கான ஐரோப்பிய பாராளுமன்றத் தூதுக்குழுவின் தலைவரான ஜீன் லம்பேர்ட் தலைமையிலான மேற்படி தூதுக்குழுவினர் தங்களின் ஒருவார கால விஜயத்தின்போது வட புலத்திற்கு பயணிக்கவுள்ளதுடன் அரசாங்கம், எதிர்க்கட்சி மற்றும் ஏனைய குழுக்களின் முக்கியஸ்தர்களையும் சந்தித்து உரையாடவுள்ளனர். எதிர்வரும் செப்டெம்பரில் வட மாகாண சபைத் தேர்தல்கள் நடைபெறவுள்ளதை முன்னிட்டே அவர்களின் இந்த விஜயம் அமைந்துள்ளதாகக் கருதப்படுகின்றது.

மேற்படி தேர்தலுக்கான ஐரோப்பிய ஒன்றிய கண்காணிப்பாளர்களை வரவழைப்பது குறித்து அரசாங்கம் இன்னமும் அறிவிக்காத நிலையில் இலங்கையில் நடைபெற்றிருந்த இறுதிக்கால கட்ட யுத்தம் குறித்து தேசிய மட்டத்திலான விசாரணைக்கு மேலாக சுயாதீனமான விசாரணையொன்று நடத்தப்பட வேண்டுமென ஐரோப்பிய ஒன்றியம் இந்த வருட முற்பகுதியில் கோரியிருந்தமை குறிப்பிடத்தக்கது.

இலங்கையில் மனித உரிமைகளுக்காக குரல் கொடுப்போர் மற்றும் ஊடகவிலாளர்கள் மீதான அச்சுறுத்தல்கள் மற்றும் தாக்குதல்கள் பற்றிய முறைப்பாடுகளையிட்டு ஐரோப்பிய ஒன்றியம் தொடர்ந்தும் விசனமடைந்துள்ளதுடன் அவற்றுக்குப் பொறுப்பானவர்களை பொறுப்புக்கூற வைக்க அதிகாரிகள் நடவடிக்கை எடுக்க அது ஊக்கப்படுத்துவதாகவும் ஜீன் லம்பேர்ட் இதற்கு முன்னர் தெரிவித்திருந்தார்.

அத்துடன் கடந்த மார்ச் மாதம் நடைபெற்ற ஐ.நா. மனித உரிமைகள் பேரவை அமர்வுக்கு முன்னர் இலங்கையில் பொறுப்புக் கூறும் கடப்பாடு மற்றும் நல்லிணக்கம் ஆகியவற்றிற்கான தேவைப்பாட்டினை மீண்டும் வலியுறுத்தும் வகையில் ஐரோப்பிய பாராளுமன்றம் தீர்மானமொன்றையும் நிறைவேற்றியிருந்தமையும் குறிப்பிடத்தக்கது.

இலங்கையில் எதிர்வரும் நவம்பர் மாதம் நடைபெறவுள்ள பொதுநலவாய மாநாட்டுக்குச் செல்ல பொதுநலவாய செயலகத்தின் அனுமதியை பெறுகின்ற எல்லா வெளிநாட்டு ஊடகவியலாளர்களுக்கும் இலங்கை அரசாங்கம் வீசா அனுமதி கொடுக்க வேண்டும் என்று பிரிட்டன் தெரிவித்துள்ளது.

வெளிநாட்டு ஊடகவியலாளர்கள் சிலருக்கு இலங்கை அரசாங்கம் வீசா அனுமதி வழங்காது என்று கவலைகள் எழுப்பப்பட்டிருந்த சூழ்நிலையிலேயே, பிரிட்டனின் துணை வெளியுறவு அமைச்சர் அலிஸ்டர் பர்ட் இந்தக் கருத்தை வெளியிட்டுள்ளார்.

´சில ஊடகவியலாளர்கள் இலங்கை செல்வதற்கு வீசா கிடைக்காது என்பது போலத் தெரிவதாக வெளியாகியுள்ள தகவல்கள் பற்றி நாங்கள் அறிந்துள்ளோம். பொதுநலவாய செயலகத்தின் அனுமதியைப் பெறுகின்ற எல்லா ஊடகவியலாளர்களும் மாநாட்டுக்குச் செல்வதற்கான சந்தர்ப்பம் கிடைக்கவேண்டும் என்றும் அவர்கள் அங்கிருக்கும்போது இலங்கையில் சுதந்திரமாக பயணிக்கக் கூடுமாக இருக்க வேண்டும் என்றும் ஐக்கிய இராச்சியம் அதன் நிலைப்பாட்டைத் தெரிவித்திருக்கிறது´ என்றார் பிரிட்டனின் துணை வெளியுறவு அமைச்சர்.

´ஊடகவியலாளர்களுக்கு பொதுநலவாய மாநாட்டுக்குச் செல்வதற்கான அனுமதி கிடைத்துவிட்டால் அவர்களுக்கு வேண்டும் என்று அனுமதி கொடுத்தால் அவர்களுக்கு மாநாட்டை நடத்தும் நாடு வீசா வழங்குவது என்பது தானாக நடக்கவேண்டிய ஏற்பாடு. இதில் முடிவுகளை எடுக்க வேண்டியது காமன்வெல்த் செயலகம் தான்´ என்றும் அலிஸ்டர் பர்ட் கூறினார்.

இதற்கிடையே, சர்வதேச மற்றும் உள்நாட்டு ஊடகவியலாளர்களுக்கு மாநாட்டில் செய்தி சேகரிப்பதற்கான அனுமதி என்பது முன்னைய பொதுநலவாய மாநாடுகளின்போது கடைப்பிடிக்கப்பட்ட பொதுநலவாய செயலகத்தின் ஒழுங்குவிதிகளின் படியே நடக்கும் என்று இலங்கை அரசாங்கம் முன்னதாக தெரிவித்திருந்தது.

மாநாட்டை நடத்தும் நாடு என்ற அடிப்படையில், பொதுநலவாய செயலகத்தின் அனுமதியைப் பெற்ற சர்வதேச ஊடகவியலாளர்களின் வீசா விண்ணப்பங்களை பரிசீலிப்பது இலங்கை அரசின் பொறுப்பு என்று பொதுநலவாய மாநாட்டின் ஊடக விவகாரங்களுக்குப் பொறுப்பான இலங்கை அதிகாரி சரித்த ஹேரத் அறிக்கை வெளியிட்டிருந்தமை குறிப்பிடத்தக்கது.

(BBC)