தற்போது வெளியாகக் கூடிய பாதிக்கும் மேற்பட்ட தமிழ்ப் படங்களில் சந்தானம் இருக்கிறார். அவர் இருந்தால்தான் படம் ஓடுகிறது என்ற தயாரிப்பாளரும், இயக்குநரும் நினைக்கிறார்கள்.

இதனால் சந்தானத்தின் கால்ஷீட் டயரி நிரம்பி வழிகிறது. ஒருநாளைக்கு 10 லட்ச ரூபாய் சம்பளம் வாங்கி வந்தவர் “25 நாட்கள் கால்ஷீட், 5 கோடி ரூபாய் சம்பளம், படம் முழுக்க வரவேண்டும் என அதிரடி வேட்டையைத் தொடங்கி உள்ளார்.

இருந்தாலும் சந்தானத்தின் கால்ஷீட்டுக்காகத் தவம் கிடக்கும் தயாரிப்பாளர்கள் ஏராளம். படத்தின் ஹீரோவை முடிவு செய்வதற்கு முன்பு சந்தானத்திடம் கால்ஷீட் வாங்கி விடுகிறார்கள்.

கால்ஷீட் வாங்கும்போது படத்தின் கதையைச் சொல்ல வேண்டுமல்லவா? அப்படி படத்தின் கதையைக் கேட்கும் சந்தானம், இந்தக் கதையில் அந்த ஹீரோ நடித்தால்தான் நன்றாக இருக்கும் என்கிறாராம்.

இப்படித்தான் “மிர்ச்சி” சிவா – தன்ஷிகா நடிப்பில் உருவாகியுள்ள “யா யா” படத்துக்கு சந்தானத்திடம் கதை சொன்னார் ராஜசேகரன். இந்தப் படத்தில் யார் ஹீரோ என சந்தானம் கேட்க, சிவகார்த்திகேயனை கேட்கலாம் என நினைத்திருக்கிறேன் என்றிருக்கிறார் ராஜசேகரன். அவரை விட “மிர்ச்சி” சிவா இந்தக் கதைக்கு பொருத்தமா இருப்பார் என சந்தானம் சொல்ல, இப்போது அந்தப் படத்தில் “மிர்ச்சி” சிவா தான் ஹீரோ.

இப்படி விஷால், சிம்பு என இன்றைய முன்னணி இளம் ஹீரோக்களுக்கான கதையை முடிவு செய்வது சந்தானம் தானாம்.

குறிப்பாக, ஒன்றிரண்டு படம் இயக்கியவர்களும், புதிதாக இயக்க வருபவர்களும் சந்தானம் சொல்வதைத்தான் வேதவாக்காக எடுத்துக் கொள்கிறார்களாம்.

யாராவது பணக்காரர் ஒருவர் என்னைத் தத்தெடுக்க முன்வந்தால் சினிமாவை விட்டே விலகிக் கொண்டு குடும்பம் குழந்தை என்றிருந்துவிடுவேன். இப்படிச் சொல்லியிருப்பவர் இயக்குநர் செல்வராகவன்.

13 ஆண்டு திரை வாழ்க்கையில் அவருக்குக் கிடைத்த அனுபவங்களும் அவரது உடல்நிலையும்தான் இப்படி அவரைச் சொல்ல வைத்திருக்கிறது.

சமீபத்தில் அவர் அளித்துள்ள ஒரு பேட்டியில், “இரண்டாம் உலகம் படத்துக்குப் பிறகு என் அடுத்த படம் பற்றி நிறைய பேர் கேட்கிறார்கள். அடுத்து நான் என் தம்பியுடன் சேர்ந்து படம் பண்ணலாம். அல்லது ராணாவுடன் இணையலாம்.

ரொம்ப நாளாக தாமதமாகிக் கொண்டிருக்கும் என் இந்திப் படத்தைத் தொடங்கலாம். ஏன் நான் இந்த சினிமாவை விட்டே கூட விலகலாம். என் உடல்நிலை சரியில்லை. அதனால்தான் ஒவ்வொரு விஷயத்தையும் ரொம்ப மெதுவாகச் செய்கிறேன்.

குடும்பத்தோடு நிறைய நேரம் செலவழிக்க வேண்டியுள்ளது. என் மகள் என்னை வீட்டைவிட்டு நகரவிடமாட்டேன் என்கிறாள். யாராவது பணக்காரர் ஒருவர் என்னைத் தத்தெடுத்துக் கொண்டு, எனது கடன்களை செட்டில் செய்ய ஒப்புக் கொண்டால் நிச்சயம் சினிமாவிலிருந்து விலகி குடும்பத்தோடு செட்டிலாகி இன்னும் குழந்தைகள் பெற்றுக் கொள்வேன் என்று கூறியுள்ளார்.

பாவம் இவரைப் போன்ற ஏழையை தத்தெடுக்க யாராவது பணக்காரர்கள் முன்வருவார்களா??

கவிஞர் வாலி மருத்துவமனையில் அனுமதிக்கப்பட்டு கிட்டத் தட்ட நாற்பது நாட்களாகிவிட்டது. இதில் சுமார் முப்பது நாட்களுக்கு மேலாக அவர் அவசர சிகிச்சை பிரிவில் இருந்து வருகிறார்.

கடந்த ஜுன் 8ம் திகதி இயக்குனர் வசந்த பாலனின் “தெருக்கூத்து” படத்திற்காக அவர் பணியாற்றினார்.

இதன்பொருட்டு ஏ.ஆர்.ரஹ்மானின் இசைக்கூடத்திற்கு வரவழைக்கப்பட்ட அவர் சுமார் ஏழு மணி நேரம் அங்கு அமர்ந்து படம் குறித்தும், எடுக்கப்பட்ட விதம் குறித்தும் பேசியபடியே பாடல் ஒன்றை எழுதிக் கொடுத்தாராம்.

அன்றிரவே அவருக்கு உடல்நிலை மோசமாகிவிட்டது. உடனடியாக மருத்துவமனையில் அனுமதிக்கப்பட்டார் வாலி.  நுரையிரல் தொற்றுதான் காரணம் என்பதை கண்டறிந்த மருத்துவர்கள் அவருக்கு தீவிர சிகிச்சை அளித்தார்கள். இரண்டொரு நாளில் உடல்நிலையில் முன்னேற்றம் ஏற்பட்டு சிறப்பு வாட்டுக்கு மாற்றப்பட்டார்.

அதன்பின்னர் மீண்டும் அவருக்கு உடல்நிலை மோசமானது. உடனடியாக தீவிர சிகிச்சை பிரிவுக்கு மாற்றப்பட்டார். சுமார் முப்பது நாட்களுக்கும் மேலாக அவர் தீவிர சிகிச்சை பிரிவில் இருந்து வருகிறார். இடையில் நடிகர் கமல் ஹாசன் மருத்துவமனைக்கு வந்து வாலியின் உடல்நலம் குறித்து மருத்துவர்களிடம் விசாரித்தார்.

“விஸ்வரூபம் 2 படத்திற்கு ஒரு பாடல் எழுதணும். நாங்க வெயிட் பண்ணிகிட்டு இருக்கோம். அவரை சீக்கிரம் அனுப்பி வைங்க” என்று வாலியின் காதில் படும்படி மருத்துவரிடம் கூறிவிட்டு சென்றார் கமல்.

ஏ.ஆர்.ரஹ்மானும் வாலியை சந்திக்க வந்திருந்தார். இந்த நிலையில் நேற்றிரவு கவிஞர் வாலியின் உடல்நிலை மோசமானது. உடனடியாக அவருக்கு வென்டிலேட்டர் பொருத்தப்பட்டுள்ளது.

மருத்துவர்கள் தீவிர சிகிச்சை அளித்து வருகிறார்கள். வாலியின் உடல்நிலை பற்றி அறிந்த திரையுலகம் கடும் சோகத்தில் ஆழ்ந்துள்ளது.

ரஜினி நடிப்பில் இந்தியாவின் முதல் முழுநீள மோஷன் கேப்சரிங் தொழில்நுட்பத்தில் தயாரான கோச்சடையான் படம் கைவிடப்பட்டுள்ளது என்றால் எப்படி இருக்கும்?

பணம் போட்ட தயாரிப்பாளர்கள், வேலை செய்த நூற்றுக்கணக்கான தொழிலாளர்கள், படத்தில் நடித்தவர்கள், தொழில்நுட்பக் கலைஞர்கள் முக்கியமாக ரஜினியின் இலட்சக்கணக்கான இரசிகர்கள்… எல்லோருக்கும் எவ்வளவு பெரிய அதிர்ச்சி.

ஆனால்,படம் வெளிவரப் போவதில்லை, அதுதான் உண்மை என கோச்சடையான் உள்வட்டாரங்கள் தெரிவிக்கின்றன.

கோச்சடையான் பிரமாண்டமாகவும் ஆர்ப்பாட்டமாகவும் ஆரம்பிக்கப்பட்டது. லண்டன் சென்று படப்பிடிப்பு நடத்தினர். அங்கு எடுத்தக் காட்சிகள் சரிவராமல் கேரளாவில் உள்ள மோகன்லாலின் ஸ்டுடியோவில் சில காட்சிகளை படமாக்கினர்.

மோஷன் கேப்சரிங் தொழில்நுட்பத்துக்கான வசதிகள் மோகன்லாலின் ஸ்டுடியோவில்தான் உள்ளது, தமிழகத்தில் இல்லை.

சென்ற வருடம் தீபாவளிக்கு படம் வெளியாகும் என தயாரிப்பாளர்கள் தெரிவித்தனர். ஆனால் அது நடக்கவில்லை. ரஜினி டப்பிங் பேசினார் கடலில் டால்பின்களுடன் சண்டை போடுகிறார் என சில துணுக்கு செய்திகளுக்கு அப்பால் கோச்சடையான் நிலவரம் யாருக்கும் தெரியவில்லை.

இந்த வருட தொடக்கத்தில் கான் படவிழாவில் கோச்சடையான் ட்ரெய்லர் வெளியிடப்படும் என்றனர். ட்ரெய்லரும் தயாரானது. ட்ரெய்லரைப் பார்த்த ரஜினி கடும் அப்செட்.

அவர் எதிர்பார்த்த தரத்தில் ட்ரெய்லர் இல்லை. சர்வதேச திரைப்பட விழாவில் அதனை வெளியிடுவது சரியல்ல என்று ட்ரெய்லரை மேம்படுத்த கூறிவிட்டார்.

இதுவரை எடுத்தக் காட்சிகள் ரஜினியை திருப்திப்படுத்தவில்லை. இதே தரத்துடன் படத்தை வெளியிட அவருக்கு விருப்பமும் இல்லை என கூறப்படுகிறது. அதனால் படம் யாருக்கும் சொல்லாமல் கைவிடப்படலாம் என கிசுகிசுக்கிறார்கள்.

கோச்சடையானுக்கு ஒரு ரஜினி படத்துக்கான கோடிகள் கொட்டப்பட்டிருக்கிறது, ரஜினி, சௌந்தர்யா போன்றவர்களின் கனவு, இரசிகர்கள் அதிகம் எதிர்பார்த்த படம்.

கோச்சடையான் வெளியாக வேண்டும் என்பதுதான் அனைவரின் விருப்பமும் எதிர்பார்ப்பும். ஆனால் கோச்சடையானின் இன்றைய நிலை அதற்கு மாறாக இருப்பதுதான் உண்மை என்கிறார்கள் கோடம்பாக்கத்தில்.

இசை இரசிகர்களுக்கு இது நிச்சயம் நல்ல செய்தியாகத்தான் இருக்கும். ஆம் இந்திய சினிமா இசையின் ஜாம்பவான்கள் இளையராஜாவும் ஏ ஆர் ரஹ்மானும் இணைந்து ஒரு பாடலை உருவாக்கப் போகிறார்கள்.

இது படத்துக்காக அல்ல இந்திய சினிமாவின் நூற்றாண்டு விழாவைக் கொண்டாட. இந்தத் தகவலை தென்னிந்திய சினிமா வர்த்தக சபையின் தலைவர் சி கல்யாண் தெரிவித்தார்.

இந்திய சினிமாவின் நூற்றாண்டு விழா கொண்டாட்டத்தின் சிறப்பு அம்சமாக இந்தப் பாடல் இடம்பெறவிருக்கிறதாம். இதனை இசைஞானி இளையராஜாவும், இசைப்புயல் ஏஆர் ரஹ்மானும் இணைந்து இசையமைத்து உருவாக்கினால் சிறப்பாக இருக்கும் என அவர்களிடம் நேரில் வேண்டுகோள் விடுத்துள்ளனர் விழா அமைப்பாளர்கள்.

இருவருமே இந்தக் கோரிக்கையை புன்னகையுடன் கேட்டுக் கொண்டாலும், இன்னும் அதுகுறித்து உறுதியான பதிலைச் சொல்லவில்லையாம்.

இதுகுறித்து கல்யாண் கூறுகையில், “பிரபல இசையமைப்பாளர்களான இளையராஜாவும், ஏ.ஆர் ரஹ்மானும் இந் நிகழ்ச்சிக்கென சிறப்பான ஒரு பாடலை இசையமைக்க இருக்கிறார்கள். இதுகுறித்து இருவரும் இன்னும் உறுதி செய்யவில்லை.

ஆயினும், விரைவில் அந்த உன்னதமான பாடலைக் கேட்போம் என்ற நம்பிக்கை இருக்கிறது. நிகழ்ச்சியின் இறுதி நாளன்று இந்தப் பாடல் அரங்கத்தில் நிகழ்த்தப்படும்,” என்றார்.