அவுஸ்திரேலியாவுக்கெதிரான ஆஷஸ் தொடரை வென்ற உற்சாகத்தில் மைதானத்தின் ஆடுகளத்தில் சிறுநீர் கழித்து இங்கிலாந்து கிரிக்கெட் வீரர்கள் அநாகரிகமாக நடந்து கொண்டுள்ளனர்.

இங்கிலாந்து அவுஸ்திரேலியா அணிகளுக்கு இடையிலான வரலாற்று சிறப்பு வாய்ந்த ஆஷஸ் தொடர் நடைபெற்றது. இதில் இங்கிலாந்து அணி 3 போட்டிகளில் வென்றது. ஆனால் ஒரு போட்டியில் கூட அவுஸ்திரேலியா வெற்றிபெறவில்லை. இதனால் அவுஸ்திரேலிய ரசிகர்களும் வீரர்களும் வருத்தத்தில் உள்ளனர்.

ஏற்கனவே ஒரு போட்டி டிரா ஆகியிருந்த நிலையில் இரு அணிகளுக்கும் இடையிலான கடைசி மற்றும் 5வது போட்டியும் நேற்று டிராவில் முடிந்தது. இதனால் 3-0 என்ற கணக்கில் இங்கிலாந்து அணி தொடரை வென்றது.

இந்த வெற்றியை இங்கிலாந்து வீரர்கள் தலை கால் புரியாமல் கொண்டாடியுள்ளனர். அதாவது மைதானத்திற்குள் புகுந்து பிட்ச்சில் போய் சிறுநீர் கழித்து விளையாடியுள்ளனர்.

இப்படி பிட்ச்சில் சிறுநீர் கழித்த செயல் பெரும் பரபரப்பை ஏற்படுத்தியுள்ளது. கிரிக்கெட்டின் தாயகமான இங்கிலாந்திலேயே அதன் வீரர்கள் இப்படி அநாகரிகமாக நடந்து கொண்டிருப்பது வரலாறு காணாத செயல் என்று வர்ணிக்கப்படுகிறது.

சமீபத்தில் இப்படித்தான் இங்கிலாந்து வீரர் மொன்டி பனேசர் கூட கிளப் ஒன்றில் சிறுநீர் கழித்து கேவலமாக நடந்து கொண்டார் என்பது நினைவிருக்கலாம்.

இந்த சம்பவம் நடந்தது ஓவல் மைதானத்தில். பிரபலமான இந்த ஓவல் மைதான பிட்ச்சில் இப்படி இங்கிலாந்து வீரர்கள் சிறுநீர் கழித்த செயல் ஓவல் மைதானத்திற்குப் பெரும் அவமானமாகியுள்ளது.

கெவின் பீட்டர்சன், ஸ்டூவர்ட் பிராட் ஆகியோர்தான் சிறுநீர் கழித்தவர்கள் என்று கூறப்படுகிறது. அவர்களுடன் மேலும் சில வீரர்களும் சம்பவ இடத்தின்போது இருந்துள்ளனர்.

இந்திய அணியில் தொடர்ந்து ஓரங்கப்படும் நிலையிலும் மீண்டும் அணியில் இடம்பிடிக்க போராடுவது ஏன் என்பதற்கு விளக்கம் அளித்துள்ளார் யுவராஜ் சிங்.

இந்திய அணியின் நட்சத்திர வீரரான யுவராஜ் சிங் கடந்த 2011ம் ஆண்டில் நடந்த உலக கிண்ண போட்டியில் தொடர் நாயகன் விருதினை வென்றார்.

இதன் பின் ஏற்பட்ட நுரையீரல் புற்றுநோயில் இருந்து மீண்டவர் 2012 T-20 உலக கிண்ண தொடருக்கான இந்திய அணியில் இடம் பெற்றார். தற்போது போம் இல்லாததால் அணியில் இருந்து நீக்கப்பட்டார்.

இந்நிலையில் யுவராஜ் சிங் கூறுகையில் கடந்த ஒரு ஆண்டாக அணியில் இடம் கிடைக்காதது கடினமாக இருந்தது. எனது கிரிக்கெட் வாழ்க்கையில் நிறைய ஏற்றத் தாழ்வுகளை சந்தித்துள்ளேன்.

உலக கிண்ண(2011) தொடருக்கு முன் ஏற்பட்ட காயம் அதன்பின் புற்றுநோயால் பாதிக்கப்பட்டு மீண்டது மீண்டும் அணியில் இடம் பிடித்தது தற்போது அணியில் இடம் கிடைக்காமல் தவிப்பது என எல்லாமே சோதனை தான்.

இருப்பினும் கிரிக்கெட் மீதுள்ள ஆர்வம் தான் மீண்டும் அணியில் இடம் பிடிக்க தூண்டியது. இதற்காக கடுமையாக பயிற்சி மேற்கொண்டு வருகிறேன்.

அடுத்த மாதம் நடக்கவுள்ள சலஞ்சர் கிண்ணத் தொடரில் பங்கேற்க உள்ளேன். அதற்கு முன் சில உள்ளூர் போட்டிகளில் விளையாட உள்ளேன்.

அதன்பின் ஒக்டோபரில் துலீப் கிண்ண தொடரில் பங்கேற்க உள்ளேன், வாய்ப்பு கிடைக்கும் பட்சத்தில் அவுஸ்திரேலியாவுக்கு எதிரான ஒருநாள் தொடரில் விளையாடுவேன். அதன்பின் ரஞ்சி கிண்ண தொடரில் பங்கேற்க திட்டமிட்டுள்ளேன் என்று தெரிவித்துள்ளார்.

தென் ஆப்பிரிக்காவின் சகலதுறை ஆட்டக்காரரான ஜக் கலிஸ் துடுப்பாட்டத்தில் நிலைத்து ஆட ஆரம்பித்தால் பின்னர் அவரை ஆட்டமிழக்க செய்வது என்பது எளிதான காரியமல்ல.

இது பள்ளி நாட்களிலிருந்தே அவருடைய இயல்பாக இருந்தது என்று அவருடைய சிறிய வயது பயிற்சியாளரும் வழிகாட்டியுமான கீத் ரிச்சர்ட்சன் தெரிவித்தார்.

விரோதம் பாராட்டும் அவுஸ்திரேலியர்கள் கூட கலிஸ் விளையாட ஆரம்பித்தால் தனி உலகத்தில் இருப்பார் என்று ஒரு முறை தெரிவித்துள்ளார்கள்.

கலிஸ் இதுவரை 162 டெஸ்ட் (274 இன்னிங்ஸ்) போட்டிகளில் ஆடி 13,128 ஓட்டங்களை எடுத்துள்ளார். அவரது சராசரி ரன் விகிதம் 56.10 ஆக உள்ளது. சச்சின் டெண்டுல்கர் 198 போட்டிகளில் (327 இன்னிங்ஸ்) ஆடி 15,837 ரன்கள் எடுத்துள்ளார்.

இவரது ரன் விகித சராசரி 53.86ஆக உள்ளது. எனவே கலிஸ் தொடர்ந்து 327 இன்னிங்ஸ் விளையாடினால் தற்போது அவருக்கு உள்ள ஓட்ட விகிதத்தில் நிச்சயம் சச்சின் டெண்டுல்கரின் சாதனையை முறியடிப்பார் என்று கூறப்படுகின்றது.

சச்சினை விட இரண்டரை வயது சிறியவரும், ஆட்டத்திறன் கொண்டவருமான கலிஸ் கடந்த 17 டெஸ்ட் போட்டிகளில் 46 ஓட்ட சராசரியில் 1181 ஓட்டங்களை எடுத்துள்ளார். சச்சின் 31 ரன் சராசரியில் 872 ஓட்டங்களை எடுத்துள்ளார்.இதனைக் கணக்கிடும்போது கலிஸின் பயிற்சியாளரான கீத் ரிச்சர்ட்சன். அவர் சச்சினின் சாதனையை முறியடிக்காமல் ஒய்வு பெறமாட்டார் என்று உறுதிபடக் கூறுகின்றார்.

ஆஷஸ் தொடரை கைப்பற்றியதன் மூலம் டெஸ்ட் தரவரிசையில் இங்கிலாந்து அணி 116 புள்ளிகளுடன் இரண்டாமிடத்திற்கு முன்னேறியுள்ளது. இரண்டாமிடத்திருந்த இந்திய அணி 116 புள்ளிகளுடன் மூன்றாமிடத்திற்கு இடத்துக்கு தள்ளப்பட்டுள்ளது.

ஆஷஸ் தொடர் தொடங்கும்போது இங்கிலாந்து அணி 112 புள்ளிகளுடன் 3ம் இடத்தில் இருந்தது. இத்தொடரின் 4வது போட்டிக்குப் பின் இங்கிலாந்து 3-0 என்ற நிலையில் இருந்தது. இதனால் கடைசி டெஸ்டில் சமநிலை அல்லது வெற்றி பெற்றால் தரவரிசையில் 2ம் இடத்துக்கு முன்னேற முடியும் என்ற நிலை இங்கிலாந்து அணிக்கு ஏற்பட்டது.

அதைப் போலவே கடைசி டெஸ்ட் டிராவில் முடிய தரவரிசையில் இங்கிலாந்து அணி முன்னேற்றம் கண்டது. 135 புள்ளிகளுடன் தென் ஆப்பிரிக்க அணி முதலிடத்தில் உள்ளது.

ஆஷஸ் தொடரில் 3 டெஸ்டில் தோற்றதால் அவுஸ்திரேலியாவுக்கு பின்னடைவு ஏற்பட்டுள்ளது. அந்த அணி 4வது இடத்தில் இருந்து 101 புள்ளிகள் பெற்று 5வது இடத்துக்கு பின்தங்கியுள்ளது.

5வது இடத்தில் இருந்த பாகிஸ்தான் 102 புள்ளிகள் பெற்று 4வது இடத்துக்கு முன்னேறி உள்ளது.

மேற்கிந்திய தீவுகள் (99 புள்ளிகள்) 6வது இடத்திலும், இலங்கை (88 புள்ளிகள்) 7வது இடத்திலும், நியூசிலாந்து (79 புள்ளிகள்) 8வது இடத்திலும், வங்காளதேசம் 9வது இடத்திலும் உள்ளன.

ஆஷஸ் தொடரை 3-0 என்ற கணக்கில் இங்கிலாந்து வென்றுள்ளது. இதன்மூலம், எங்களை தோற்கடிப்பது கடினம் என்று இங்கிலாந்து கிரிக்கெட் அணியின் கேப்டன் குக் எச்சரிக்கை விடுத்துள்ளார்.
கடைசி டெஸ்ட் போட்டி லண்டனில் ஞாயிற்றுக்கிழமை முடிவடைந்தது.

இந்தப் போட்டியின் ஒரு நாள் ஆட்டம் மழையால் பாதிப்படைந்தது. எனினும் கடைசி நாளில் 4 ஓவரில் 21 ரன்கள் எடுத்தால் வெற்றி என்ற எளிதான நிலையில் இங்கிலாந்து இருந்தது. ஆனால், போதிய வெளிச்சமின்மை காரணமாக ஆட்டம் வெற்றிதோல்வியின்றி முடிவடைந்ததாக அறிவிக்கப்பட்டது.

இதைத் தொடர்ந்து 2013ம் ஆண்டுக்கான ஆஷஸ் கோப்பை இங்கிலாந்து அணிக்கு வழங்கப்பட்டது. பின்னர் இந்த வெற்றி குறித்து குக் கூறியது:

ஆஷஸ் தொடர் தொடங்கும் முன், இங்கிலாந்து அணி குறித்து பல்வேறு விமர்சனங்கள் வைக்கப்பட்டன. சொந்த நாட்டில் நடக்கும் போட்டி என்பதால் இங்கிலாந்து அணிக்கே நெருக்கடி அதிகமாக இருக்கும் என்று கூறப்பட்டது. ஆனால், எங்கள் அணி போட்டியில் சிறப்பாகச் செயல்பட்டு வெற்றிகளைப் பெற்றது.

வேண்டியபோது ஓட்டங்களையும், விக்கெட்டையும் எங்கள் வீரர்கள் கைப்பற்றினர். இதன்மூலம் தன்னைத் தோற்கடிப்பது கடினம் என்ற நிலையை எங்கள் அணி எட்டியுள்ளது. அடுத்த ஆஷஸ் தொடர் அவுஸ்திரேலியாவில் வரும் நவம்பர் மாதம் தொடங்க உள்ளது.

அவுஸ்திரேலியாவில் அந்நாட்டு அணியினர் பலம் வாய்ந்தவர்களாக இருப்பர். ஆனால், அதனை சமாளிக்கும் வகையில் எங்கள் அணி உள்ளது என்று தெரிவித்தார். கடைசியாக அவுஸ்திரேலிய அணி விளையாடிய 9 ஆட்டங்களில் 7இல் தோல்வியைத் தழுவியுள்ளது. 2 போட்டிகளை சமநிலை செய்துள்ளது.

டெஸ்டில் ஜாம்பவானாக விளங்கிய அவுஸ்திரேலிய அணி தற்போது தடுமாறி வருகிறது. ஆஷஸ் தொடரை இழந்து விட்டபோதும், எங்கள் அணியின் செயல்பாட்டில் முன்னேற்றம் ஏற்பட்டுள்ளதாக அவுஸ்திரேலிய அணித் தலைவர் கிளார்க் நம்பிக்கை தெரிவித்துள்ளார்.

இத்தொடரில் 2 போட்டிகளில் வெற்றி பெறும் வாய்ப்பு எங்களுக்கு இருந்தது. ஆனால், மழையினால் அது மாறிப்போனது. 5வது டெஸ்டில் ஷேன் வட்சன், ஸ்டீவன் ஸ்மித், கிறிஸ் ரோஜர்ஸ் உள்ளிட்ட வீரர்கள் போர்முக்குத் திரும்பினர்.

ஆஷஸ் தொடரின் கடைசி 3 போட்டிகளில் எங்கள் அணி சிறப்பாகச் செயல்பட்டது மகிழ்ச்சி அளிக்கிறது என்று தெரிவித்தார்.