காஞ்சிபுரம் அருகே மாட்டின் உயிரைக் காப்பாற்றுவதற்காக குட்டையில் இறங்கிய 3 மாணவிகள் நீரில் மூழ்கி பரிதாபமாகப் பலியானார்கள்.
காஞ்சிபுரம் மாவட்டத்தில் உள்ள ஆண்டி சிறுவள்ளூர் கிராமத்தைச் சேர்ந்த மகளிர் மேல்நிலைப் பள்ளி மாணவிகள் தனலட்சுமி (14), ஷாலினி ( 14) மற்றும் அஜிதா (12).
இதில் முறையே தனலட்சுமியும், ஷாலினியும் 9ம் வகுப்பும், அஜிதா 7ம் வகுப்பும் படித்து வந்தனர். நேற்று விடுமுறை தினமாததால் மூவரும் அருகில் உள்ள பகுதிக்கு மாடு மேய்க்கச் சென்றுள்ளனர். அப்போது அவர்கள் மேய்த்து வந்த மாடு ஒன்று அருகிலிருந்த குட்டைக்குள் இறங்குவதைக் கண்டுள்ளனர்.
உடனடியாக மாடு நீரில் மூழ்கி விடாமல் வெளியே விரட்டுவதற்காக ஒருவர் பின் ஒருவராக குட்டையில் இறங்கியுள்ளனர். மூவருக்குமே நீச்சல் தெரியாத காரணாத்தால் பரிதாபமாக மூவரும் நீரில் மூழ்கிப் பலியானார்கள்.
சிறுமிகள் மூவரும் நீரில் தத்தளிப்பதைக் கண்ட அருகில் மாடு மேய்த்துக் கொண்டிருந்த மற்றொரு சிறுவன் ஊருக்குள் சென்று தகவல் கூறியுள்ளான். ஆனால், ஊர்மக்கள் வருவதற்குள் சிறுமிகள் உயிரிழந்ததால் அவர்களால் சிறுமிகளின் உயிரற்ற சடலத்தை மட்டுமே மீட்க முடிந்தது.
தற்போது அச்சிறுமிகளின் உடல்கள் பிரேத பரிசோதனைக்காக காஞ்சிபுரம் அரசு மருத்துவமனையில் வைக்கப்பட்டுள்ளது. ஒரே ஊரைச் சேர்ந்த 3 சிறுமிகள் குட்டையில் மூழ்கி பலியான சம்பவத்தால் ஆண்டி சிறுவள்ளூர் கிராம மக்கள் சோகத்தில் மூழ்கியுள்ளனர்.
கண்ணை மட்டும் பார்த்து விசாரணை நடத்த முடியாது, குற்றம் சாட்டப்பட்ட பெண்ணை அடையாளம் காண்பதற்கு, அவர் அணிந்திருக்கும் முகத்திரை கட்டாயம் அகற்றப்பட வேண்டும் என நீதிபதி தெரிவித்துள்ளார். பிரிட்டனில் குற்ற வழக்கில் தொடர்புடையதாக சந்தேகிக்கப்படும் 21 வயது முஸ்லிம் பெண்ணை பொலிசார் நீதிமன்றத்தில் விசாரணைக்காக ஆஜர்படுத்தினர்.
விசாரணைக்கு உட்படுத்தப்பட்ட பெண் அவர் சார்ந்த மத வழக்கப்படி, பர்தா அணிந்திருந்தார். விசாரணையின் போதும், பர்தாவுடன் ஆஜரானார். இதையடுத்து, வழக்கை விசாரித்த நீதிபதி பீட்டர் மர்பி “”சம்பந்தப்பட்ட பெண்ணை அடையாளம் காண, அவரது முகத்தை பார்க்க வேண்டியுள்ளது எனவே அவர் முகத்தை மூடியுள்ள துணியை விலக்க வேண்டும்” என்றார்.
எனினும் இளம் பெண் அவரின் மத வழக்கப்படி ஆண்கள் முன்னிலையில் முகத்திரையை அகற்ற முடியாது என பெண்ணின் சார்பில் ஆஜரான வழக்கறிஞர் வாதாடினார்.
இதை கேட்ட நீதிபதி நீதிமன்றம் அனைவருக்கும் பொதுவானது. கோர்ட்டுக்கு வெளியே அவரவரது மத வழக்கங்களை பின்பற்ற அனைவருக்கும் அனுமதி உண்டு. விசாரணையின் போது அவர் கண்டிப்பாக முகத்திரையை அகற்ற வேண்டும்.
கண்களை மட்டும் பார்த்து, குற்றவாளியை அடையாளம் காண முடியாது என்றார். எனினும், முகத்திரையை அகற்ற அப்பெண் சம்மதம் தெரிவிக்காததால், வழக்கு விசாரணை, அடுத்த மாதம் 12ம் திகதிக்கு ஒத்திவைக்கப்பட்டது.
பாகிஸ்தானில் ஷாகிலால் மாவட்டத்தில் உள்ள சீசா வாடன் என்ற இடத்தை சேர்ந்தவர் முகமது அலி (55). இவருக்கு ஏற்கனவே திருமணமாகி விட்டது. மனைவியும், 3 மகள்களும் உள்ளனர்.இவருக்கு ஆண் குழந்தை இல்லை. எனவே வேறு ஒரு இளம்பெண்ணை மணந்து அவர் மூலம் ஆண் குழந்தை பெற முடிவு செய்தார்.
எனவே லாகூர் அருகேயுள்ள மமூ கஞ்சன் என்ற கிராமத்தை சேர்ந்த பேகம் பீபி என்ற 20 வயது பெண்ணை 1 லட்சத்து 20 ஆயிரத்துக்கு விலைக்கு வாங்கினார். பின்னர் அப்பெண்ணை திருமணம் செய்து சீசாவாடனில் தனியாக குடிவைத்தார்.
இவர்களது திருமணம் கடந்த ஒரு மாதத்துக்கு முன்பு நடந்தது. அதை தொடர்ந்து அவர் அப்பெண்ணுக்கு கடுமையான செக்ஸ் தொந்தரவு கொடுத்து வந்தார். மேலும், அவரை அடித்து கொடுமைப்படுத்தினார்.
அதைத்தொடர்ந்து கடந்த 2 நாட்களுக்கு முன்பு இவர் அவசர பொலிஸ் உதவியை நாடினார். உடனே பொலிசார் விரைந்து வந்து இளம் பெண்ணை திருமணம் செய்த முகமது அலியை கைது செய்தனர்.
அவரிடம் பொலிசார் விசாரணை நடத்தினர். அப்போது, அவர் எனது 2வது மனைவியை நான் மிகவும் நேசிக்கிறேன். எனக்கு அவர் ஒரு ஆண் குழந்தையை பெற்று தந்தவுடன் அவரை விட்டு விடுவதாக கூறி இருக்கிறேன்.அதன்படி அவர் ஒரு ஆண் குழந்தையை பெற்றவுடன் அவரை உங்களிடம் ஒப்படைத்து விடுகிறேன் என்றார். அதை ஏற்காத பொலிசார் பேகம் பீபியை மீட்டனர்.
மூன்று வயது குழந்தை ஒன்று கடல் அலையில் அடித்துச் செல்லப்பட்டு உயிரிழந்த பரிதாப சம்பவம் இன்று காலை மாரவில, குருசபல்லிய பிரதேசத்தில் இடம்பெற்றுள்ளது.
குடும்பத்தினர் வீட்டில் இருந்த வேளையிலேயே இச் சம்பவம் இடம்பெற்றுள்ளதாக தெரியவந்துள்ளது. குழந்தை வீட்டின் பின்புறமாக கடலிற்குச் சென்றுள்ளது. இதன்போது அலையில் அடித்துச் செல்லப்பட்டு உயிரிழந்துள்ளது.
குழந்தையின் சடலம் மாரவில வைத்தியசாலைக்கு எடுத்துச் செல்லப்பட்டுள்ளது. இச்சம்பவம் தொடர்பில் மாரவில பொலிஸார் விசாரணைகளை மேற்கொண்டுள்ளனர்.
18 வயதுக்கு உட்பட்ட பெண்ணுடன் அவரது சம்மதத்துடன் ஒரு ஆண் செக்ஸ் உறவு வைத்துக்கொள்வது சட்டப்படி குற்றம் இல்லை என்று டெல்லி நீதிமன்று பரபரப்பு தீர்ப்பு வழங்கி உள்ளது.
டெல்லியில் 15 வயது பெண் ஒரு பெண்ணை கடத்தி பலாத்காரத்திற்கு உட்படுத்தியதாக 22 வயது வாலிபர் ஒருவர் மீது குற்றச்சாட்டு எழுந்தது. இதுதொடர்பாக பொலிசார் வழக்கு பதிவு செய்து வாலிபரை கைது செய்தனர்.
இந்த வழக்கை டெல்லி கூடுதல் செசன்ஸ் நீதிபதி தர்மேஷ் சர்மா விசாரித்து வந்தார்.விசாரணை முடிவில் குற்றம் சாட்டப்பட்ட வாலிபரை விடுதலை செய்து அவர் தீர்ப்பு வழங்கினார். தீர்ப்பு விவரம் வருமாறு:
இந்த வழக்கில் டெல்லி பொலிசாரும் டெல்லி மகளிர் ஆணையமும், சமீபத்தில் இயற்றப்பட்ட போக்சோ சட்டப்படி (குழந்தைகள் பாலியல் குற்ற தடுப்பு சட்டத்தின்படி) 13 வயது முதல் 18 வயது வரையிலான பருவ வயதினர் எந்த விதமான செக்ஸ் உறவும் வைத்துக்கொள்ள ஒட்டுமொத்த தடை வேண்டும் என்றார்கள்.
இந்த விளக்கத்தை ஏற்றுக்கொண்டால் 18 வயதுக்கு உட்பட்ட எந்த ஒரு தனி நபரின் உடலும் அரசின் சொத்தாகி விடும் 18 வயதுக்குட்பட்ட தனி நபர் மற்றொருவருடன் உடல் இன்பம் அனுபவிக்க முடியாமல் போய் விடும் என அஞ்சுகிறேன்.
அதே நேரத்தில் மிக இளம் வயதில் ஒரு ஆணும் பெண்ணும் திருமணம் செய்து கொண்டாலோ அல்லது பாதுகாப்பற்ற செக்ஸ் உறவில் ஈடுபட்டாலோ அதனால் ஏற்படுகிற தாக்கங்கள் குறித்த விழிப்புணர்வை ஏற்படுத்தும் சமூகக்கடமை நம் அனைவருக்கும், அரசாங்கத்துக்கும், பொலிசுக்கும் இருக்கிறது.
போக்சோ சட்டத்தைப் பொறுத்தமட்டில் 18 வயதுக்கு உட்பட்ட ஆண்களையும், பெண்களையும் குழந்தைகளாகவே கருதுகிறது. இந்தச்சட்டத்தின் பிரிவுப்படி 18 வயதுக்குட்பட்ட ஒரு பெண்ணுடன் சம்மத பாலுறவு வைத்துக்கொள்வது குற்றம் ஆகாது. இவ்வாறு தீர்ப்பில் கூறப்பட்டுள்ளது.
இந்த வழக்கில் பாதிக்கப்பட்டதாகக் கூறப்படும் பெண்ணும், பலாத்காரம் செய்ததாக குற்றம்சாட்டப்பட்டுள்ள ஆணும் திருமணம் செய்து கொண்டு விட்டனர்.
கழுகு படத்தை தொடர்ந்து நடிகர் கிருஷ்ணா தற்போது நடித்து வரும் படம் வானவராயன் வல்லவராயன் இப்படத்தில் மா.கா.பா.ஆனந்த் மற்றொரு ஹீரோவாக நடிக்கிறார். மோனல் கஜ்ஜார் ஜோடியாக நடிக்கிறார். ராஜமோகன் இயக்கத்தில் யுவன்சங்கர் ராஜா இசையமைக்கிறார்.
இந்தப் படத்தில் திருமண பாடல் ஒன்று அமைந்துள்ளது. இது சென்னையில் உள்ள ஒரு பெரிய திருமண மண்டபத்தில் படமாக்கப்பட்டது. தொடர்ந்து 5 நாட்கள் இப்பாடலை எடுத்துள்ளனர். திருமண மண்டபத்தை அலங்காரம் செய்வதற்காக ஒருநாளைக்கு பூ மட்டும் 50 ஆயிரத்துக்கு வாங்கியுள்ளனர். மொத்தம் 5 நாட்களுக்கு இரண்டரை லட்சத்துக்கும் மேல் பூவுக்கு மட்டுமே செலவு செய்திருக்கிறார்கள். மேலும் ஜூனியர் ஆர்ட்டிஸ்டுகள் நடிக்க சம்பளம், பேட்டா என தனியாக 25 லட்சம் செலவழித்திருக்கிறார்கள்.
இதுகுறித்து இப்படத்தின் இயக்குனர் ராஜமோகன் கூறும்போது, இப்பவும் கிராமத்து திருமணங்களில் வாராயோ தோழி வாராயோ மணப்பந்தல் காண வாராயோ என்ற பாசமலர் படத்தில் இடம்பெற்ற பாடல்தான் ஒலித்துக் கொணடிருக்கிறது. வானவராயன் வல்லவராயன் படம் வெளிவந்த பிறகு இந்த படத்துல வர்ற “வாங்கம்மா வாங்கப்பா வாங்கண்ணே வாங்கத்தே” என்று உறவுகளை கூறி அழைக்கும் இந்த பாட்டுதான் ஒலிக்கும். சினேகன் எழுதியுள்ள இந்த பாட்டு நிச்சயம் பட்டையை கிளப்பும் என்று கூறினார்.
மின்சார கனவு படத்தில் இடம்பெற்ற மானா மதுர மாமரத்து கிளையே, தாஜ்மகால் படத்தில் இடம்பெற்ற சொட்ட சொட்ட நனையுது தாஜ்மகால், படையப்பா படத்தில் இடம்பெற்ற மின்சாரப் பூவே போன்ற எண்ணற்ற ஹிட் பாடல்களை பாடியவர் ஸ்ரீநி என்று அழைக்கப்படும் ஸ்ரீநிவாஸ்.
இவர் தற்போது இசையமைப்பாளராகவும் அவதாரம் எடுத்திருக்கிறார். மிருகம், உயிர், சிந்து சமவெளி போன்ற படங்களை இயக்கி பரபரப்பை ஏற்படுத்திய இயக்குனர் சாமி, தற்போது எந்தவித பரபரப்பும் இல்லாமல் அதாவது எந்தவித சர்ச்சையும் இல்லாமல் கங்காரு படத்தை இயக்கி வருகிறார். இந்த படத்திற்குத்தான் ஸ்ரீநிவாஸ் இசையமைத்திருக்கிறார். பாடல்கள் முழுவதையும் வைரமுத்து எழுதியிருக்கிறார்.
இப்படத்தின் படப்பிடிப்பு 80 சதவீதம் முடிவடைந்துள்ளது. முழுக்க முழுக்க கொடைக்கானல் மலையில் இதன் படப்பிடிப்பு நடைபெற்று வருகிறது. அமைதிப்படை – 2′ படத்தை தயாரித்த வி – ஹவுஸ் புரொடக்சன்ஸ் சார்பாக தயாரிப்பாளர் சுரேஷ் காமாட்சி தயாரிக்கிறார்.
இதில் புதுமுக நாயகனாக அர்ஜுனா நடிக்கிறார். வர்ஷா அஸ்வதி நடிக்கிறார். தங்கை கேரெக்டரில் பிரியங்கா, இவர்களுடன் தம்பி ராமையா, கலாபவன் மணி, ஆர்.சுந்தரராஜன் உட்பட பலர் நடிக்கின்றனர். இப்படத்தின் பாடல் வெளியீட்டை அக்டோபர் 14ம் திகதி மிகப்பிரம்மாண்டான விழாவாக நடத்த படக்குழுவினர் திட்டமிட்டுள்ளனர்.
அக்சன் கிங் அர்ஜூனுக்கு ஐஸ்வர்யா, அஞ்சனா என இரண்டு மகள்கள் உள்ளன. வெளிநாட்டில் படிப்பை முடித்த ஐஸ்வர்யா, விஷாலுடன் இணைந்து பட்டத்து யானை என்ற படத்தில் நடித்தார். படத்திற்கு நல்ல ஓபனிங் கிடைத்துள்ளதால் அர்ஜூன் மற்றும் ஐஸ்வர்யா மிகுந்த சந்தோஷத்தில் உள்ளனர்.
இந்நிலையில் ஐஸ்வர்யாவின் தங்கை அஞ்சனாவுக்கும் படத்தில் நடிக்க ஆசை வந்துள்ளதாம். சினிமாவில் அவ்வளவாக ஆர்வமில்லாத அஞ்சனா அக்காவுடன் ஷுட்டிங் சென்று வந்ததில் நடிக்க ஆசை வந்துவிட்டதாம். தன்னுடைய விருப்பத்தை அப்பாவிடம்கூற அவரும் சம்மதித்துவிட்டாராம்.
இந்த விஷயம் விஷால் காதுகளுக்கு தெரியவர ஐஸ்வர்யாவைப் போன்று அஞ்சனாவையும் நான்தான் அறிமுகப்படுத்துவேன் என அர்ஜுனிடம் விஷால் கூறினாராம். அவரும் சம்மதம் தெரிவித்துவிட்டாராம்.
பாடலாசியரியராக இருந்து வந்த சினேகன், யோகி படத்தில் அமீருடன் இணைந்து ஒரு சின்ன கதாபாத்திரத்தில் நடித்து இருந்தார். இதையடுத்து பாரதிராஜாவிடம் இணை இயக்குனராக பணியாற்றிய பிரேம்நாத் இயக்கிய உயர்திரு 420 என்ற படத்தில் நடித்தார். இப்படம் அவருக்கு எதிர்பார்த்த அளவுக்கு வெற்றியைத் தேடித் தரவில்லை.
இந்நிலையில், மீண்டும் ஒரு படத்தில் கதாநாயகனாக நடிக்கும் வாய்ப்பு சினேகனுக்கு கிட்டியுள்ளது. ஆர்.எஸ்.அமுதேஷ்வர் இயக்கும் இராஜராஜ சோழனின் போர்வாள் என்ற படத்தில் சினேகன் நடிக்கவுள்ளார். இப்படத்திற்கு இளையராஜா இசையமைக்கிறார். உலக சினிமா வரலாற்றிலேயே முதன்முறையாக மக்கள் முன்னிலையில் இளையராஜா மெட்டமைக்கிறாராம். உழவன் திரைக்களம் படத்தை தயாரிக்கிறது.
இப்படத்தில் நடிக்கும் பிற நடிகர், நடிகை, தொழில்நுட்ப கலைஞர்கள் பற்றிய தகவல்கள் ஏதும் வெளியிடப்படவில்லை. விரைவில், படம் குறித்த விரிவான செய்திகள் வெளியிடப்படும் என தெரிகிறது.
தீயா வேலை செய்யணும் குமாரு படத்திற்கு பிறகு சித்தார்த் நடித்து வரும் படம் ஜிகர்தண்டா. பீட்சா படத்தை சூடாக நமக்கு பரிமாறிய கார்த்திக் சுபாராஜ் கூலாக இந்த படத்தை இயக்குகிறார். இப்படத்தில் சித்தார்த்துக்கு ஜோடியாக லட்சுமிமேனன் நடிக்கிறார்.
இப்படத்தில் சித்தார்த், சினிமா இயக்குனராக வருகிறாராம். தன்னுடைய முதல் படத்திற்காக மதுரைக்கு செல்லும் சித்தார்த்துக்கு அங்கு உள்ள லோக்கல் ரவுடிகளால் பிரச்சினை வருகிறது. அதிலிருந்து எப்படி மீண்டு வருகிறார் என்பதே படத்தின் கரு என கூறப்படுகிறது.
சித்தார்த் ஏற்கெனவே இயக்குனர் மணிரத்னத்திடம் உதவி இயக்குனராக பணிபுரிந்தவர். இதனால், இப்படத்தில் இயக்குனர் வேடத்தில் நடிப்பதில் அவருக்கு சிரமம் இல்லையாம்.
இந்த படத்தில் நேரம், சூதுகவ்வும் படங்களில் வித்தியாசமான நடிப்பை வெளிப்படுத்திய சிம்ஹா ஒரு முக்கியமான கதாபாத்திரத்தில் நடிக்கிறார். பரபரப்பாக உருவாகிவரும் இப்படத்தின் மீதான எதிர்பார்ப்பு அதிகமாகியுள்ளது.
ஆர்யாவின் இரண்டாம் உலகம், ராஜா ராணி படங்கள் முடிந்துள்ளது. அடுத்து புறம்போக்கு என்ற படத்தில் நடிக்கிறார். இப்படத்தை ஜனநாதன் இயக்குகிறார். இதில் விஜய் சேதுபதியும் முக்கிய கரக்டரில் வருகிறார்.
இந்த படத்துக்கு புறம்போக்கு பெயர் வைப்பதற்கு பிரபல ஒளிப்பதிவாளர் நட்ராஜ் சுப்பிரமணியம் எதிர்ப்பு தெரிவித்துள்ளார். இவர் சமீபத்தில் ரிலீசான தனுசின் ராஞ்சனா படத்துக்கு ஒளிப்பதிவு செய்தவர். மிளகா படத்தில் கதாநாயகனாக நடித்துள்ளார். அவர் கூறியதாவது..
புறம்போக்கு தலைப்பை தயாரிப்பாளர் சங்கத்தில் நான் பதிவு செய்து வைத்துள்ளேன். இதில் நானே கதாநாயகனாக நடிக்கவும் முடிவு செய்துள்ளேன். இதர நடிகர், நடிகை மற்றும் தொழில்நுட்ப கலைஞர்கள் தேர்வு நடக்கிறது.
இந்த தலைப்பை புதுப்பிக்க இன்னும் எட்டு மாதங்கள் உள்ளன. இந்த நிலையில் புறம்போக்கு தலைப்பில் ஆர்யாவை வைத்து டைரக்டர் ஜனநாதன் படம் இயக்கப்போவதாக செய்தி வந்துள்ளது.
புறம்போக்கு தலைப்பு எனக்கே சொந்தம். அதை விட்டுத் தரமாட்டேன். ஜனநாதன் வேறு தலைப்பை தேர்வு செய்யும்படி கேட்டுக் கொள்கிறேன். இந்த தலைப்புக்காக சட்டப்படி நடவடிக்கை எடுக்கவும் தயார்.
இவ்வாறு அவர் கூறினார்.
உணவுக்குள் பல்லி விழுந்தால் அந்த உணவே நஞ்சாகி விடுமென்றுதான் நீங்கள் கேள்விப்பட்டிருப்பீர்கள். ஆனால் பல்லியையே உணவாக உண்டால் எப்படி இருக்கும்?
தாய்லாந்தில் அமைந்துள்ள ஒரு பிரபல சுற்றுலாப் பயணிகள் உணவகம் பல்லி வறுவலுக்கு மிகவும் பிரசித்தி பெற்றதாம். கீழுள்ள வீடியோவைப் பாருங்கள், உங்களுக்கே புரியும்..!
அவுஸ்திரேலியாவுக்கு எதிரான ஆஷஸ் டெஸ்ட் தொடரை, இங்கிலாந்து அணி 3-0 என்ற கணக்கில் கைப்பற்றி கோப்பை வென்றது.
ஓவலில் நடந்த ஐந்தாவது டெஸ்ட் வெற்றி தோல்வியின்றி முடிவடைந்துள்ளது. ஒரு போட்டியில் கூட வெற்றி பெற முடியாத அவுஸ்திரேலிய அணிக்கு ஏமாற்றமே மிஞ்சியது.
இங்கிலாந்து சென்றுள்ள அவுஸ்திரேலிய அணி, ஐந்து போட்டிகள் கொண்ட ஆஷஸ் டெஸ்ட் தொடரில் பங்கேற்கிறது. முதல் நான்கு போட்டியின் முடிவில், இங்கிலாந்து அணி 3-0 என முன்னிலை வகிக்கிறது. ஐந்தாவது மற்றும் கடைசி போட்டி, லண்டனில் உள்ள ஓவல் மைதானத்தில் நடைபெற்றது.
முதல் இன்னிங்சில் அவுஸ்திரேலிய அணி 9 விக்கெட்டுக்கு 492 ஓட்டங்ககளை எடுத்து ஆட்டத்தை நிறுத்திக் கொண்டது. மூன்றாம் நாள் ஆட்டநேர முடிவில், முதல் இன்னிங்சில் இங்கிலாந்து அணி 4 விக்கெட்டுக்கு 247 ஓட்டங்களை எடுத்திருந்தது. இயான் பெல் (29), கிறிஸ் வோக்ஸ் (15) அவுட்டாகாமல் இருந்தனர். கனமழை காரணமாக நான்காவது நாள் ஆட்டம் ரத்தானது.
நேற்று, ஐந்தாம் நாள் ஆட்டம் நடந்தது. முதல் இன்னிங்சை தொடர்ந்த இங்கிலாந்து அணியின் கிறிஸ் வோக்ஸ் (25) நிலைக்கவில்லை. இயான் பெல் (45) அரைசத வாய்ப்பை இழந்தார். ஸ்டூவர்ட் பிராட் (9), ஆண்டர்சன் (4) ஏமாற்றினர். மாட் பிரையர் (47), சுவான் (34) ஆறுதல் தந்தனர். முதல் இன்னிங்சில் இங்கிலாந்து அணி 377 ஓட்டங்களுக்கு சகல விக்கெட்டுகளையும் இழந்தது. அவுஸ்திரேலியா சார்பில் பால்க்னர் 4, மிட்சல் ஸ்டார்க் 3, ரேயான் ஹாரிஸ் 2 விக்கெட் வீழ்த்தினர்.
பின் இரண்டாவது இன்னிங்சை துவக்கிய அவுஸ்திரேலிய அணிக்கு வார்னர் (12) ஏமாற்றினார். வாட்சன் (26), பால்க்னர் (22) நிலைக்கவில்லை. ஸ்டீவன் ஸ்மித் (7), ரேயான் ஹாரிஸ் (1) சொற்ப ஓட்டங்களில் வெளியேறினர்.
தேநீர் இடைவேளைக்குப்பின், அவுஸ்திரேலிய அணி இரண்டாவது இன்னிங்சில் 6 விக்கெட்டுக்கு 111 ஓட்டங்களை எடுத்து, 226 ஓட்டங்களால் முன்னிலை வகித்த போது, ஆட்டத்தை இடைநிறுத்திக் கொண்டது. கிளார்க் (28), ஸ்டார்க் (13) ஆட்டமிழக்காமல் இருந்தனர். பிராட் 4 விக்கெட் வீழ்த்தினார்.
இரண்டாவது இன்னிங்சை துவக்கிய இங்கிலாந்து அணிக்கு குக் (34), ரூட் (11) ஓட்டங்களில் வெளியேறினர். பின் இணைந்த பீட்டர்சன், டிராட் ஜோடி அசத்தியது. பால்க்னர் ஓவரில் டிராட் இரண்டு பவுண்டரி விளாசினார். தன்பங்கிற்கு, ஸ்டார்க் ஓவரில் பீட்டர்சன் தொடர்ச்சியாக இரண்டு பவுண்டரி அடித்தார். பொறுப்புணர்ந்து விளையாடிய இருவரும் ஓட்டங்களை உயர்த்தினர். பீட்டர்சன் டெஸ்ட் அரங்கில் 33வது அரை சதம் கடந்தார். டிராட்டும் அரை சதத்தை எட்டினார். இந்த நேரத்தில், வார்னரின் அபாரமான பிடியெடுப்பில் பீட்டர்சன் 62 ஓட்டங்களில் வெளியேறினார்.
டிராட்டும் 59 ஓட்டங்களில் ஆட்டமிழந்தார். இயன் பெல் (17) ரன் அவுட்டானார். இங்கிலாந்து அணி 5 விக்கெட்டுக்கு 206 ஓட்டங்களை எடுத்தபோது, போதிய வெளிச்சம் இல்லாததால் ஆட்டம் நிறுத்தப்பட்டது. இதனால், போட்டி வெற்றி தோல்வியின்றி முடிவானது.
இதன் மூலம், ஆஷஸ் டெஸ்ட் தொடரை இங்கிலாந்து அணி 3-0 என கைப்பற்றியது.
காலையில் பதினைந்து நிமிடங்கள் முன்னதாகவே எழுந்து விடுங்கள்.
எங்கேயாவது செல்ல வேண்டியிருந்தால் அதற்குரிய ஆடைகள், பொருட்களை முன்கூட்டியே எடுத்து வைத்துக் கொள்ளுங்கள்.
ஒரு காகிதத்தில் அன்றைய தினம் செய்ய வேண்டிய பணிகளையும், எப்போது செய்யப் போகிறோம் என்பதையும் குறித்து வையுங்கள்.
காத்திருப்பது சிரமம் என்று கருதாதீர்கள். ஒரு புத்தகத்தை கையில் வைத்திருப்பது காத்திருத்தலை சுகமாக்கும். தேவையற்ற மன அழுத்தத்தைக் குறைக்கும்.
வேலைகளைத் தள்ளி வைப்பது மன அழுத்தத்தை அதிகரிக்கும். செய்ய வேண்டியதை தாமதப் படுத்தாமல் செய்யுங்கள்.
முன்கூட்டியே திட்டமிடுங்கள். எதையும் கடைசி நேரம் வரை காத்திருந்தபின் செய்வதைத் தவிருங்கள்.
வேலை செய்யாததைக் கட்டி அழாதீர்கள். சரிசெய்ய முயலுங்கள் காலணி ஆனாலும் கடிகாரம் ஆனாலும். இல்லையேல் அவை தேவையற்ற மன அழுத்தத்தைத் தரக்கூடும்.
சற்று முன்கூட்டியே செல்ல பழக்கப் படுங்கள். பத்து நிமிடத்தில் செல்ல முடிந்த இடத்துக்கு இருபது நிமிடத்திற்கு முன்பாகவே புறப்படுங்கள்.
கோப்பி அதிகம் குடிப்பதைத் தவிருங்கள். புகை மது எல்லாம் வேண்டாம்.
சில மாற்று யோசனைகளைக் கைவசம் வைத்திருங்கள். உதாரணமாக பஸ் தாமதமானால் இதைச் செய்வேன் என்பது போன்றவை.
இறுக்கம் தளருங்கள். சில வேலைகள் தடைபடுவதாலோ, தாமதப்படுவதாலோ உலகம் முடிந்து விடப் போவதில்லை.
தவறாய்ப் போன ஒரு விஷயத்தைக் குறித்து சிந்தித்துக் கொண்டே இருப்பதை விட சரியாய் நிகழ்ந்த பலவற்றைக் குறித்து அடிக்கடி நினைத்து மகிழுங்கள்.
செல்லும் இடங்கள் புதிய இடங்களாக இருந்தால் வழியை முதலிலேயே தெளிவாகக் கேட்டு வைத்துக் கொள்ளுங்கள்.
சற்று நேரம் கைப்பேசிகளையும், தொலைபேசிகளையும் அணைத்து விடுங்கள். ஓய்வு எடுங்கள் எந்த தொந்தரவும் இன்றி.
செய்வதற்கு இயலாத பணிகளோ, நேரமில்லாமையால் நாம் செய்ய முடியாது என்று நினைக்கும் பணிகளோ இருந்தால் “மன்னிக்கவும்.. என்னால் செய்ய இயலாது” என்று சொல்லப் பழகுங்கள்.
உணவு, உடை, உறைவிடம் தவிர்த்த எதுவும் உங்களை மன இறுக்கம் கொள்ளச் செய்யாமல் பார்த்துக் கொள்ளுங்கள். முன்னுரிமை எதற்குக் கொடுக்க வேண்டும் என்பதில் தெளிவு அவசியம்.
நண்பர்களுடன் உற்சாகமான பழகுங்கள்.
நன்றாகத் தூங்குங்கள். முடிந்தால் அலாரம் வைத்து தூங்குங்கள். தடையற்ற தூக்கத்துக்கு அது உதவும். வீட்டில் பொருட்களை ஒழுங்காக அடுக்கி வையுங்கள். அவசரமாய் தேடுகையில் அகப்படாத பொருள் மன அழுத்தம் தரும்.
ஆழமாக மூச்சை இழுத்து மெதுவாக வெளிவிடுங்கள்.
எழுதப் பழகுங்கள். கவலைகளை, எரிச்சல்களை, தோல்விகளை குறைக்க எழுத்து வடிகாலாகும்.
ஆண்டின் கடைசி கிராண்ட்ஸ்லாம் போட்டியான அமெரிக்க ஓபன் டென்னிஸ் போட்டி அமெரிக்காவின் நியூயோர்க் நகரில் இன்று ஆரம்பமாகி எதிர்வரும் செப்டெம்பர் 9ம் திகதி நிறைவடையும்.
ஆடவர் ஒற்றையர் பிரிவைப் பொறுத்தவரையில் ஓர் அரையிறுதியில் நடப்பு சாம்பியன் ஆன்டி முர்ரேவும், உலகின் முதல் நிலை வீரரான நோவக் ஜோகோவிச்சும் மோத வாய்ப்புள்ளது. இதனால் ஆடவர் ஒற்றையர் பிரிவில் முன்னணி வீரர்களாக திகழும் இவர்கள் இருவரில் ஒருவர் அரையிறுதியோடு வெளியேறும் வாய்ப்பு ஏற்பட்டுள்ளது.
மற்றொரு அரையிறுதியில் ஸ்பெயினின் டேவிட் ஃபெரருடன், சகநாட்டவரான ரஃபேல் நடால் அல்லது 17 கிராண்ட்ஸ்லாம் பட்டம் வென்றவரான ஸ்விட்சர்லாந்தின் ரோஜர் ஃபெடரர் ஆகியோரில் ஒருவர் மோதலாம்.
சமீபத்திய போட்டிகளில் ஃபெடரர், ஆரம்ப சுற்றுகளிலேயே தோற்றுள்ளதால், இந்தப் போட்டியில் அவருடைய ஆட்டம் எப்படியிருக்கும் என்று எதிர்பார்ப்பு அதிகரித்துள்ளது. எப்படியானாலும், ஃபெடரர், நடால் ஆகியோரில் ஒருவர் காலிறுதியோடு வெளியேற வேண்டிய நிலை ஏற்பட்டுள்ளது.
ஆடவர் ஒற்றையர் பிரிவில் இந்தியாவின் சார்பில் சோம்தேவ் பங்கேற்கிறார்.
மகளிர் பிரிவைப் பொறுத்தவரையில் ஓர் அரையிறுதியில் செரீனா வில்லியம்ஸுடன் சீனாவின் லீ நா அல்லது போலந்தின் அக்னீஸ்கா ரத்வன்ஸ்கா ஆகியோரில் ஒருவர் மோதலாம். மற்றொரு அரையிறுதியில் பெலாரஸின் விக்டோரியா அசரென்காவுடன், இத்தாலியின் சாரா எர்ரானி மோத வாய்ப்புள்ளது.
இப்போட்டிக்கான மொத்த பரிசுத் தொகை ரூ.217 கோடியாகும். அதிக பரிசுத் தொகைக் கொண்ட கிராண்ட்ஸ்லாம் போட்டி இதுதான்.
ஒற்றையர் பிரிவில் பட்டம் வெல்பவர்களுக்கு 16 கோடியே, 47 லட்சமும், இரட்டையர் பிரிவில் பட்டம் வெல்பவர்களுக்கு 2 கோடியே 66 லட்சமும், கலப்பு இரட்டையர் பிரிவில் பட்டம் வெல்பவருக்கு 95 லட்சமும் பரிசுத் தொகைûயாக கிடைக்கும்.
இதுதவிர முதல் 3 இடங்களைப் பிடிப்பவர்களுக்கு போனஸ் தொகையும் கிடைக்கும். இது கடந்த ஆண்டு வழங்கப்பட்ட பரிசுத் தொகையைவிட 37 சதவீதம் அதிகமாகும்.
புதிய சாதனை படைக்க காத்திருக்கும் செரீனா!
நடப்புச் சாம்பியனும், 16 கிராண்ட்ஸ்லாம் பட்டங்களை வென்றவருமான செரீனா வில்லியம்ஸ் இந்த முறை சம்பியனாகும் பட்சத்தில், அமெரிக்க ஓபனில் பட்டம் வென்ற மூத்த வீராங்கனை என்ற சாதனையைப் படைப்பார்.
அமெரிக்க ஓபனில் சம்பியன் பட்டம் வென்ற முத்த வீராங்கனை என்ற பெருமை அவுஸ்திரேலியாவின் மார்க்ரெட் கோர்ட் வசம் உள்ளது. அவர் 1973ல் நடைபெற்ற அமெரிக்க ஓபனில் பட்டம் வென்றபோது 31 வயது 55 நாள்கள் ஆகியிருந்தது. இந்த முறை செரீனா பட்டம் வென்றால், அப்போது அவர் 32 வயதை எட்டுவதற்கு 18 நாள்கள் மட்டுமே இருக்கும்.
இதுதவிர செரீனா இந்த முறை பட்டம் வெல்லும் பட்சத்தில், கடந்த 20 ஆண்டுகளில் அமெரிக்க ஓபனில் தொடர்ச்சியாக இரு முறை சாம்பியன் பட்டம் வென்ற 4வது வீராங்கனை என்ற பெருமையைப் பெறுவார். இதற்கு முன்னர் ஸ்டெஃபி கிராப் (1995, 1996), வீனஸ் வில்லியம்ஸ் (2000,2001), கிம் கிளிஸ்டர்ஸ் (2009, 2010) ஆகியோர் மட்டுமே தொடர்ச்சியாக இரு முறை பட்டம் வென்றுள்ளனர்.
ரஷியாவின் மரியா ஷரபோவா காயம் காரணமாக விலகிவிட்ட நிலையில், இந்த முறை செரீனாவுக்கு சவால் அளிக்கக்கூடிய ஒரே வீராங்கனை பெலாரஸின் விக்டோரியா அசரென்காதான். அவுஸ்ரேலிய ஓபனில் இரு முறை சம்பியன் பட்டம் வென்றவரான அசரென்கா, சமீபத்தில் நடைபெற்ற சின்சினாட்டி மாஸ்டர்ஸ் போட்டியில் செரீனாவை தோற்கடித்தது குறிப்பிடத்தக்கது.
அவுஸ்திரேலிய முன்னாள் அணித்தலைவர் ஸ்டீவ் வோக் மீது ஷேன் வோன் புதிய தாக்குதல் தொடுத்துள்ளார். ஏற்கனவே ஸ்டீவ் வோக் ஒரு சுயநலமி என்றும் தன்னம்பிக்கை அற்றவர் என்றும் எதிர்மறைச் சிந்தனை உள்ளவர் என்றும் ஷேன் வோன் அடுக்கடுக்கான புகார்களை எழுப்பியது நாம் அறிந்ததே.
அவுஸ்திரேலிய அணியில் அறிமுகம் ஆகும் வீரருக்கு “பேகி கிரீன்” தொப்பி வழங்குவது வழக்கம், மரபு. இதனை ஒவ்வொரு வீரரும் பெருமையாகக் கருதுவர். இதனை அந்த வீரர் ஒருமணி நேரம் தலையில் அணிய வேண்டும் என்ற நடைமுறை இருந்து வந்தது. இந்த நடைமுறையை ஸ்டீவ் வோக் கட்டாயமாக்கினார் இது மிகவும் பிடிவாதமானது அபத்தமானது என்று ஷேன் வோன் தாக்கியுள்ளார்.
மேலும் அவர் கூறுகையில் வட்டவடிவமான வெள்ளை நிறத் தொப்பிதான் எனக்கு பிடிக்கும் அது மிகவும் சௌரியமாக இருக்கும். அவுஸ்திரேலிய அணிக்காக உற்சாகமாக விளையாடுவதற்கு பச்சைத் தொப்பியெல்லாம் தேவையில்லை என்று நான் அவரிடம் கூறினேன்.
ஆனால் அவர் மிகவும் கண்டிப்பாக பச்சைத் தொப்பியைத்தான் அணிய வேண்டும் என்று வற்புறுத்தினார். வேறு வழியின்று நான் ஒத்துக் கொண்டேன். ஸ்டீவ் வோக்கின் இந்தப் பிடிவாதம் அபத்தமானது. அற்பத்தனமானது.
ஒரு முறை 2001ம் ஆண்டு விம்பிள்டன் டென்னிஸை பார்க்க அவுஸ்திரேலிய வீரர்கள் சென்றனர். அப்போதும் பச்சை நிறத் தொப்பியை அணியுமாறு வற்புறுத்தினார். அப்போது சில வீரர்கள் பச்சைத் தொப்பியை அணிந்தே வந்தனர் என்றும் பச்சைத் தொப்பியை கட்டாயம் அணிந்தேயாகவேண்டும் என்ற தேவையெல்லாம் இல்லை எனவும் கூறியுள்ளார்.
