வாட்சப்பில்..

வாட்சப்பில் புது எண்ணிலிருந்து வந்த Link-ஐ கிளிக் செய்ததால், ஒரு பெண்ணின் வங்கியில் இருந்து 21 லட்சம் கொள்ளையடிக்கப்பட்டுள்ள சம்பவம் அதிர்ச்சியை ஏற்படுத்தியுள்ளது.

நவீன உலகில் அனைத்தும் நவீனமயக்கப்பட்டதால் எந்த அளவு நல்லது இருக்கிறதோ, அதே அளவு கேட்டதும் இருக்கிறது. இந்தியாவில் நாளுக்கு நாள் சைபர் கிரைம் குற்றங்கள் அதிகரித்து வரும் நிலையில், லிங்க் அனுப்பி அதன் மூலம் மொபைல் வங்கி கணக்கு என அனைத்தும் ஹேக் செய்கின்றனர் ஹேக்கர்கள். அதே போன்றொரு சம்பவம் ஆந்திராவில் நடந்துள்ளது.

ஆந்திர மாநிலம் அன்னமய்யா என்ற பகுதியை அடுத்து மதனப்பள்ளி என்ற நகரத்தை சேர்ந்தவர் வரலக்ஷி (Varalakshi). ஓய்வு பெற்ற ஆசிரியையான இவர் தனது குடும்பத்துடன் அந்த பகுதியில் வசித்து வருகிறார்.

இந்த நிலையில், சம்பவத்தன்று வரலக்ஷிக்கு வாட்சப்பில் ஒரு புது எண்ணிலிருந்து Link ஒன்று வந்துள்ளது. மேலும் அதனுடன் அதனை கிளிக் செய்யுமாறு செய்தியும் வந்துள்ளது. இதனால், அவரும் அந்த லிங்கை கிளிக் செய்துள்ளார். அவர் அதனை க்ளிக் செய்த பிறகு, சில மணித்துளிகளிலே அவரது மோபைல் எண்ணிற்கு குறுஞ்செய்தி ஒன்று வந்தது.

அதில் அவரது வங்கியிலிருந்த 21 லட்ச ரூபாய் பணம் எடுக்கப்பட்டதாக குறிப்பிட்டிருந்தது. இதை கண்டதும் அதிர்ச்சியடைந்த அவர், உடனடியாக காவல்துறையில் இது குறித்து புகாரளித்தார். புகாரின் அடிப்படையில் விசாரித்த அதிகாரிகள், அந்த link ஒரு scam என்பதை கண்டறிந்தனர். மேலும் அவரது வங்கிக் கணக்கும் ஹேக் செய்யப்பட்டது தெரியவந்தது.

இதையடுத்து இது குறித்து வழக்குப்பதிவு செய்த அதிகாரிகள், ஹேக் செய்த நபரை தேடி வருகின்றனர். அதோடு இது போன்று ஏதேனும் லிங்க் வந்து கிளிக் செய்ய சொன்னால் அதனை தெரியாமல் செய்து விட வேண்டாம் என்றும் காவல்துறை தரப்பில் அறிவுறுத்தப்பட்டுள்ளது. இந்த சம்பவம் பெரும் பரபரப்பை ஏற்படுத்தியுள்ளது.

இந்தியாவில்..

இந்தியாவின் கேரள மாநிலம் ஆலுவா பகுதியைச் சேர்ந்தவர் ஆதிலா நஸ்ரின், இவரது தோழி பாத்திமா நூரா. இவர்கள் இருவரது பெற்றோரும் வளைகுடா நாட்டில் வேலை செய்த நிலையில் தோழிகள் இருவருக்குள்ளும் தன்பாலின சேர்க்கை ஏற்பட்டது.

இதை அறிந்து பாத்திமா நூராவை பெற்றோர் கேரளாவுக்கு அனுப்பியிருந்தனர். இதனையடுத்து அவரைத் தேடி, கேரளாவுக்கே வந்து விட்டார் ஆதிலா நஸ்ரின்.ஒரு கட்டத்தில் இருவரும் சேர்ந்து வீட்டை விட்டு வெளியேறி நிலையில் உறவினர்கள் தேடி பாத்திமா நூராவை வலுக்கட்டாயமாக இழுத்து வந்தனர்.

அத்துடன் ஆதிலா நஸ்ரின், தங்கள் மகள் பாத்திமா நூராவைக் கடத்தி வந்ததாகவும் காவல் நிலையத்தில் புகார் கொடுத்தனர். இதன் காரணமாக அதிர்ச்சியடைந்த ஆதிலா நஸ்ரின், கேரள உயர்நீதிமன்றத்தில் வழக்கு தொடர்ந்தார்.

அந்த வழக்கை விசாரித்த கேரள உயர்நீதிமன்றம் ஆதிலா நஸ்ரின், பாத்திமா நூரா இருவரும் சேர்ந்து வாழ கடந்த மே மாதம் அனுமதி வழங்கியது. இதனையடுத்து கடந்த 3 மாதங்களாக ஆதிலா நஸ்ரினும், பாத்திமா நூராவும் சென்னையில் வீட்டை வாடகைக்கு எடுத்து சேர்ந்து வசித்து வருகின்றனர்.

இதுகுறித்து ஆதிலா நஸ்ரின், பாத்திமா நூரா இருவரும் கூறுகையில், ‘‘எங்கள் உணர்வைப் புரியாமல் பெற்றோர் உடலால் காயப்படுத்தினர். நானும், என் தோழியும் எங்கள் கருத்தில் உறுதியாக இருந்து, நீதிமன்ற உத்தரவுப்பெற்று சேர்ந்துள்ளோம்.

இப்போது யாருடைய தலையீடும் இல்லாமல், ஒரு பறவையைப் போல் சுதந்திரமாக வாழ்கிறோம். நமக்காக வாழாத வரை வாழ்க்கை முழுமையடையாது. நாங்கள் சென்னையில் வாடகைக்கு பிளாட் தேடிய போதும் கூட எங்கள் அடையாளத்தை மறைக்கவில்லை.

பெரும்பாலான பெற்றோருக்கு இதுகுறித்துப் புரிதல் இருப்பதில்லை. நாங்கள் இருவருமே வேலை செய்வதால் எங்களிடம் பொருளாதாரச் சுதந்திரம் இருந்தது. அதனால் உயர் நீதிமன்ற படியேறி சட்ட உரிமையை நிலைநாட்டி சேர்ந்து வாழ்கிறோம்.

அனைத்து விஷயங்களிலும் தன்பாலின தம்பதியினர் சமம்தான். ஒரே பாலின உறவு குறித்த புரிதலில் மக்கள் மனதில் மிகப்பெரிய மாற்றம் தேவையிருக்கிறதாக கூறியுள்ளனர்.

உத்தரபிரதேசத்தில்..

லக்னோவிலிருந்து தொழில் அதிபரின் 12 வயது மகளை கடத்தியது போலீஸ்காரரின் மகன் என்பது தெரிய வந்துள்ளது. உத்தரபிரதேசம் லக்னோ மாவட்டத்தை சேர்ந்த தொழில் அதிபர் அமான் சிங். இவருடைய 12 வயது மகள் கடந்த செவ்வாய்க்கிழமை அன்று கடத்தப்பட்டுள்ளார்.

இது குறித்து அவரது தந்தை முதல் தகவல் அறிக்கை நகலையும் பெண்ணின் புகைப்படத்தையும் ட்விட்டரில் பதிவிட்டு தமிழ்நாடு காவல்துறை மற்றும் ரயில்வே துறைக்கு உதவி செய்யுமாறு கேட்டுள்ளார்.

இதற்கு தமிழக காவல்துறை ட்விட்டரில், சிறுமியை மீட்பது குறித்து கோயம்புத்தூர் காவல் ஆணையருக்கும், அனைத்து ரயில் நிலைய காவலர்களுக்கும் அலெர்ட் செய்திருப்பதாகவும் டிஜிபி சைலேந்திர பாபு தரப்பில் பதில் அளிக்கப்பட்டுள்ளது.

மேலும், கடத்தப்பட்ட மகள் கோவையில் உள்ளதாகவும் இருவரும் ரயில் நிலையம் வருவார்கள் என்று தகவல் தெரிவித்த நிலையில் டிஜிபி உத்தரவின் பேரில் கோவை மாநகர காவல் ஆணையர் பாலகிருஷ்ணன் தலைமையில் கோவை ரயில் நிலையத்தில் தனிப்படை போலீசார் மற்றும் ரயில்வே போலீசார் சிறுமியையும், கடத்தல்காரரையும் தேடி வருகின்றனர்.

முதற்கட்ட தகவலின் பேரில் லக்னோ போலீஸ்காரரின் 14வயது மகன் அந்த 12 வயது சிறுமியை கடத்தியதாக கூறப்படுகிறது. மேலும், அந்த.சிறுவனின் தந்தையான போலீசாரிடமும் லக்னோ போலீசார் விசாரணை நடத்தி வருவதாக தகவல் வெளியாகியுள்ளது.

இதற்கிடையே லக்னோவில் சம்பவத்தன்று பதிவான சிறுமி மற்றும் அந்த சிறுவனின் சிசிடிவி காட்சிகள் வெளியாகி பரபரப்பை ஏற்படுத்தியுள்ளது.

கேரளாவில்..

சொத்துக்கு ஆசைப்பட்டு மகளே தாய்க்கு விஷம் கொடுத்த கொன்றுள்ள சம்பவம் அதிர்ச்சியை ஏற்படுத்தியுள்ளது. கேரள மாநிலம் திருச்சூர் பகுதியை அடுத்துள்ள கீழூர் என்ற கிராமத்தை சேர்ந்தவர் ருக்மணி – சந்திரன் தம்பதியினர்.

இவர்களுக்கு இந்துலேகா என்ற ஒரு மகள் இருக்கும் நிலையில், மகளுக்கு கடந்த சில ஆண்டுகளுக்கு முன்பு திருமணம் ஆனது. இவரது கணவர் வெளிநாட்டில் வேலை செய்து வரும் நிலையில், இவர் தனது பெற்றோர் மற்றும் இரண்டு குழந்தைகளுடன் வசித்து வந்துள்ளார்.

ஆடம்பர வாழ்க்கைக்கு ஆசைப்பட்ட இந்துலேகா, அதற்காக பல்வேறு விஷயங்களை செய்து வந்துள்ளார். அந்த வகையில், தனது நகைகளை 8 லட்ச ரூபாய்க்கு அடமானம் வைத்து மகிழ்ச்சியாக இருந்து வந்துள்ளதாக கூறப்படுகிறது.

இந்த நிலையில், கடந்த சில நாட்களுக்கு முன்பு வெளிநாட்டிலிருந்து இவரது கணவர் சொந்த ஊருக்கு வந்துள்ளார். அப்போது இந்துலேகாவிடம் நகைகள் பற்றி விசாரித்துள்ளார். அப்போது அவர் ஏதோதோ சொல்லி சமாளித்துள்ளார்.

பின்னர் அடமானம் வைத்திருந்த நகைகளை எப்படி மீட்கலாம் என்பது குறித்து யோசித்த இவர், தனது தந்தை வைத்திருந்த 14 ஏக்கர் நிலத்தை விற்க முடிவு செய்துள்ளார்.

ஆனால் அது தனது பெற்றோர்கள் உயிருடன் இருக்கும் வரையில் நடக்காது என்பதை உணர்ந்த இந்துலேகா, அவர்களை கொல்ல திட்டமிட்டுள்ளார். அதன் படி கடந்த ஆகஸ்ட் 18-ம் தேதி தனது பெற்றோர்களுக்கு கொடுக்கும் டீ-யில் எலி மருந்து கலந்து கொடுத்துள்ளார்.

அதனை வாங்கிய தந்தை எதோ நாற்றம் அடிப்பதாக கூறி குடிக்காமல் விட, தாயோ அதனை பருகியுள்ளார். இதில் தாய் சம்பவ இடத்திலேயே மயங்கி கீழே விழ, இதனை பார்த்த தந்தையும் இந்துலேகாவும் அவரை மீட்டு மருத்துவமனைக்கு கொண்டு சென்றனர்.

அங்கே அவரை மருத்துவர்கள் பரிசோதித்தபோது, அவருக்கு மஞ்சள் காமாலைக்கான அறிகுறிகள் தென்பட்டுள்ளது. இதையடுத்து அவருக்கு அளிக்கப்பட்ட தீவிர சிகிச்சை பலனின்றி உயிரிழந்தார்.

இதையடுத்து அவரது தாய்க்கு நடத்திய உடற்கூராய்வில், அவருக்கு எலி மருந்து கொடுத்திருப்பது கண்டுபிடிக்கப்பட்டது. பின்னர் இது குறித்து காவல்துறைக்கு தகவல் தெரிவிக்க, விரைந்து வந்த அவர்கள், விசாரணை மேற்கொண்டனர்.

அப்போது மகளின் நடைபெற்ற விசாரணையில் அவர் தனக்கும் இதற்கும் சம்மந்தமில்லை என்று கூறிவந்துள்ளார். இதையடுத்து அவரது மொபைல் போனை பரிசோதித்த போது, கூகுளில் விஷம் பற்றி தகவல்களை தேடியுள்ளது தெரியவந்தது. பின்னர் அவரிடம் காவல்துறை நடத்திய கிடுக்குப்பிடி விசாரணையில், தனது குற்றத்தை ஒப்புக்கொண்டார்.

இதைத்தொடர்ந்து அவர் மீது வழக்குப்பதிவு செய்த அதிகாரிகள், சிறையில் அடைத்தனர். சொத்துக்காக சொந்த தாயையே மகள் கொலை செய்துள்ள சம்பவம் அதிர்ச்சியை ஏற்படுத்தியுள்ளது.

கர்நாடகாவில்..

கர்நாடக மாநிலம், பாழேன ஹள்ளி என்ற கிராமத்தில் உள்ள தேசிய நெடுஞ்சாலையில் இன்று அதிகாலை 4 மணி அளவில் லாரி ஒன்று ஜீப் மீது மோதியுள்ளது.

இதில் ஜீப் வாகனத்தில் பயணம் செய்த 9 பேர் சம்பவ இடத்திலேயே உடல் நசுங்கி உயிரிழந்துள்ளனர். மேலும் காயம் அடைந்த 14 பேர் படுகாயம் அடைந்துள்ளனர். ராய்ச்சூர் மாவட்டத்தைச் சேர்ந்தவர் 24 பேர் பெங்களூருவிற்கு ஜீப்பில் பயணம் செய்துள்ளனர்.

இவர்களது வாகனம் பாழேன ஹள்ளி அருகே வந்தபோது இந்த விபத்து நடந்துள்ளது. உயிரிழந்த 9 பேரில் 3 பெண்கள், 2 குழந்தைகள் அடங்குவர். மேலும், காயமடைந்த 14 பேரும் அருகே உள்ள மருத்துவமனையில் சிகிச்சை பெற்று வருகின்றனர்.

இதில் நான்கு பேர் கவலைக்கிடமாக உள்ளதாகவும் தெரியவருகிறது. இதனால் பலி எண்ணிக்கை உயரக்கூடும் என அஞ்சப்படுகிறது. அதேபோல் குரூசர் வாகனத்திலிருந்தவர்கள் அனைவரும் பெங்களூருவில் கூலி வேலை செய்து வருபவர்கள் என்றும் தெரியவந்துள்ளது. இந்த விபத்து குறித்து போலிஸார் வழக்கு பதிவு செய்து விசாரணை நடத்துகின்றனர்.