கொரோனா தடுப்பூசி..

இந்தியாவில் கொரோனாவிற்கு பயந்து 8 முறை தடுப்பூசி போட்டுக் கொண்ட நபருக்கு எந்த் ஒரு பக்க விளைவுகளும் ஏற்படவில்லை என்பது பொலிஸ் விசாரணையில் தெரியவந்துள்ளது.

கொரோனா வைரஸ் பரவல் உலகின் பல்வேறு நாடுகளில் தீவிரமாக பரவி வருகிறது. இதனால் இந்த வைரஸிடம் இருந்து பாதுகாத்து கொள்ள தடுப்பூசி மிகவும் முக்கியம் என்று அறிவுறுத்தப்பட்டு வருகிறது.

அதன் படி உலகின் பல்வேறு நாடுகளில் மக்களுக்கு தடுப்பூசி போடப்பட்டு வருகிறது. குறிப்பாக இந்தியாவில் கோவாக்சின், கோவிஷீல்ட் என இரண்டு தடுப்பூசிகள் போடப்பட்டு வருகிறது.

தற்போது ஒமைக்ரான் வைரஸ் தீவிரமாக பரவி வருவதால், பூஸ்டர் தடுப்பூசி, அதாவது மூன்றாவது தடுப்பூசி அவசியம் என்று அறிவுறுத்தப்பட்டுள்ளது.

இந்நிலையில் கர்நாடகா மாநிலம் பெலகாவிவை சேர்ந்த நபர் நபர்(பெயர் தெரிவிக்கப்படவில்லை) உயிர் பயம் காரணமாக, கொரோனாவிடம் இருந்து எப்படியாவது தப்பித்தால் போதும் என்பதற்காக, தற்போது வரை 8 முறை தடுப்பூசி போட்டுக் கொண்டுள்ளார்.

அதன் பின் 9-வது முறையாக தடுப்பூசி போடும் போது, அவர் போலி ஆவணங்களை வைத்து தடுப்பூசி போட முயற்சி செய்துள்ளார் என்பது தெரியவந்துள்ளது.

இது குறித்து சுகாதாரத்துறை ஊழியர்கள் அளித்த புகாரின் பேரில், விரைந்து வந்த பொலிசார், அவரை பிடித்து விசாரித்த போது, தான் 8 முறை தடுப்பூசி போட்டும் எந்த வித பக்கவிளைவுகளும் ஏற்படவில்லை என்று தெரிவித்துள்ளார். இதைக் கேட்டு, அதிர்ச்சியடைந்த பொலிசார் இந்த சம்பவம் குறித்து அவரிடம் தொடர்ந்து விசாரணை மேற்கொண்டு வருகின்றனர்.

குஜராத்..

மனைவிக்கு ஆசையாக வைத்த செல்லப்பெயரை பக்கத்து வீட்டு நாய்க்கும் வைத்து கூப்பிட்டு வந்ததால் கடும் மன உளைச்சலுக்கு ஆளான அந்த நபர் அந்த பக்கத்து வீட்டு பெண்ணுக்கு மண்ணெண்ணெய் ஊற்றி தீ வைத்துள்ளார். இந்த அதிர்ச்சி சம்பவம் குஜராத் மாநிலத்தில் நடந்துள்ளது.

அம்மாநிலத்தில் பாவ் நகரில் வசித்து வருகிறார் நீத்தாபென்(35). இவர் ஒரு நாய்க்குட்டி வளர்த்து வருகிறார். அந்த நாய்க்குட்டிக்கு சோனு என்று பெயர் வைத்து அழைத்து வருகிறார்.

இவரது பக்கத்து வீட்டில் வசிக்கும் சுரபாய்க்கு இது கடும் ஆத்திரத்தை ஏற்படுத்தி இருக்கிறது. அவர் தனது மனைவியை சோனு என்றுதான் செல்லமாக அழைத்து வந்திருக்கிறார்.

இதனால் நீதாபென்னிடம் சண்டைக்கு சென்றிருக்கிறார். நாயை சோனு என்று அழைக்கக்கூடாது என்று அவர் கூறியிருக்கிறார். இதில் என்ன இருக்கிறது என் வீட்டு நாய்க்கு நான் செல்லமாக பெயர் வைக்கிறேன்.

இந்த பெயரை வைக்கக்கூடாது என்று சொல்வதற்கு நீங்கள் யார் என்று அவர் கேட்டிருக்கிறார். இதனால் இருவருக்கும் இடையே அடிக்கடி வாக்கு வாதம் ஏற்பட்டு வந்திருக்கிறது.

இந்த நிலையில் நீதாபென் கணவரும் இரண்டு குழந்தைகளும் வீட்டில் இல்லாத நேரத்தில் , தனது ஆட்கள் 5 பேரை அழைத்துக்கொண்டு நீதாபென் வீட்டுக்குள் சென்றிருக்கிறார் சுரபாய். நாய்க்கு சோனு என்று பெயர் வைக்கக்கூடாது என்று வாக்குவாதம் செய்து இருக்கிறார்.

வாக்குவாதம் நடந்தபோது திட்டமிட்டு எடுத்துச் சென்றிருந்த மண்ணெண்ணெய்யை நீதாபென் மீது ஊற்றி தீ வைத்துள்ளனர். இதில் துடிதுடிக்க அலறியிருக்கிறார். அலறல் சத்தம் கேட்டு அக்கம்பக்கத்தினர் ஓடிவந்து தீயை அணைத்து உள்ளனர்.

அந்த நேரத்தில் வெளியே சென்றிருந்த கணவரும், குழந்தைகளும் வந்திருக்கிறார்கள். உடனே மருத்துவமனைக்கு அழைத்துச் சென்று சிகிச்சைக்கு சேர்த்திருக்கிறார்கள் . இந்த சம்பவம் தொடர்பாக 6 பேர் மீதும் வழக்குப்பதிவு செய்யப்பட்டு இருக்கிறது.

ஆனால் இதுவரைக்கும் யாரும் கைது செய்யப்படவில்லை. இந்த கொலைவெறி தாக்குதல் ஏற்படாமல் இருப்பதற்கு அப்பகுதி மக்கள் கடும் கண்டனம் தெரிவித்து வருகின்றனர். குற்றவாளிகளை பிடிக்க தனிப்படை அமைக்கப்பட்டது என்று போலீஸ் தரப்பில் தெரிவிக்கப்பட்டிருக்கிறது.

அரியலூர்…

அரியலூர் மாவட்டத்திலுள்ள நக்கம்பாடி கிராமத்தில் ரவிச்சந்திரன் என்பவர் வசித்து வருகிறார். இவருக்கு தனுசியா என்ற மகள் இருந்துள்ளார். இவர் திருச்சி மாவட்டத்திலுள்ள கல்லக்குடியில் ஒரு வாடகை வீடு எடுத்து தனியார் நர்சிங் பயிற்சி மையத்தில் படித்து வந்துள்ளார்.

இவருடன் 2 மனைவிகள் தங்கியிருந்தனர். கடந்த வாரம் விடுமுறையில் ஊருக்கு சென்ற தனுசியாவை அவரது தந்தை கல்லக்குடிக்கு பேருந்தில் அனுப்பி வைத்துள்ளார்.

ஆனால் தனுசியா அவர் இருக்கும் வாடகை வீட்டிற்கு தாமதமாக சென்றதால் ரவிச்சந்திரன் அவரை கண்டித்துள்ளார். இதனால் மன உளைச்சலில் இருந்த தனுசியா கல்லக்குடி முதுவத்தூர் சாலை அருகில் இருக்கும் ரயில்வே தண்டவாளத்தில் செல்போனில் பேசியபடி நடந்து சென்றுள்ளார்.

அப்போது அவ்வழியாக வேகமாக வந்த ரயில் மோதியதால் தனுசியா சம்பவ இடத்திலேயே பரிதாபமாக இறந்துவிட்டார். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று தனுசியாவின் சடலத்தை கைப்பற்றி,

அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.

கர்நாடகா..

காதலித்து பதிவு திருமணம் செய்து கொண்ட 21 வயது மகளின் கழுத்தில் கிடந்த தாலியை அறுத்துப்போட்ட, தந்தை ஒருவர் ரிஜிஸ்டர் அலுவலகத்தில் இருந்து மகளின் தலைமுடியை பிடித்து இழுத்துச்சென்ற சம்பவத்தால் பரபரப்பு ஏற்பட்டது

சினிமாவில் வருவது போல வீட்டை விட்டு ஓடிச்சென்று பதிவு திருமணம் செய்து கொண்ட மகளை தலைமுடியை பிடித்து இழுத்துச்சென்ற இந்த சம்பவம் கர்நாடக மாநிலம் மைசூரு மாவட்டம் நஞ்சன்கூடு ரிஜிஸ்டர் அலுவலகத்தில் அரங்கேறியுள்ளது.

அங்குள்ள ஹரதலே கிராமத்தைச் சேர்ந்த விவசாயி பசவராஜ் நாய்கின் மகள் சைத்ரா. இவர் பக்கத்து கிராமத்தைச் சேர்ந்த மகேந்திரா என்ற 21 வயது இளைஞரை கடந்த ஒன்றரை வருடமாக காதலித்து வந்தார்.

இவர்களது காதல் விவகாரம் இருவரது பெற்றோருக்கும் தெரியவந்த நிலையில் பெண் வீட்டில் கடும் எதிர்ப்பு கிளம்பியது. இருந்தாலும் சைத்ரா தனது காதலில் உறுதியாக இருந்தார்.

இதையறிந்த பசவராஜ் நாய்க், தனது மகளுக்கு வேறு இடத்தில் மாப்பிள்ளை பார்க்க தொடங்கினார். இதையடுத்து சைத்ரா, வீட்டை விட்டு வெளியேறி காதலன் மகேந்திராவை திருமணம் செய்து கொள்ள திட்டமிட்டார்.

இந்த நிலையில் செவ்வாய்கிழமை காலையில் வீட்டைவிட்டு வெளியேறிய சைத்ரா, தனது காதலன் மகேந்திராவை சந்தித்தார். தன்னை தந்தை விரட்டி வருவதை அரிந்த சைத்ரா காதலனின் கையை இழுத்துக் கொண்டு நஞ்சன்கூடுவில் உள்ள பத்திரப்பதிவு அலுவலகத்திற்கு ஓடிச்சென்றார்.

மகேந்திராவின் நண்பர்கள், அவரது உறவினர்கள் முன்னிலையில் காதல் ஜோடி பதிவு திருமணம் செய்து கொண்டது. அதற்குள்ளாக அங்கு வந்த தந்தை பசவராஜ் நாய்க், பத்திரப்பதிவு அலுவலகத்தில் காதலனுடன் ஜோடியாக நின்ற மகளை கண்டு ஆத்திரம் அடைந்து தாக்கியதாக கூறப்படுகின்றது.

மகளின் கழுத்தில் கிடந்த மாலை மற்றும் தாலியை பிடித்து இழுத்து பறித்து தூக்கிவீசியதோடு, மகளின் கையை பிடித்து இழுத்துச்சென்றார். தந்தையுடன் செல்ல மறுத்து கையை தட்டிவிட்ட சைத்ராவின் தலைமுடியை கொத்தாக பிடித்து இழுத்துச்சென்றதால் அங்கு பரபரப்பு ஏற்பட்டது.

பசவராஜின் இந்த செயலை கண்டு கோபமடைந்த சிலர் , அவரை தடுத்து நிறுத்தியதோடு, அவரது பிடியில் இருந்து சைத்ராவை மீட்டு அனுப்பி வைத்தனர்.

அரசு அலுவலகத்துக்குள்ளேயே அத்துமீறி நடந்து கொண்ட பசவராஜை பிடித்து போலீசில் ஒப்படைக்க முயன்ற நிலையில் அவர் அங்கிருந்து நழுவிச்சென்றார்.

தனது தந்தையால் தங்கள் உயிருக்கு ஆபத்து இருப்பதாக குற்றஞ்சாட்டிய சைத்ரா, பதிவு திருமண சான்றிதழை பெற்றுக் கொண்டு அங்கிருந்து சென்றார்.

இதற்கிடையே தனது மகளை காதலன் மகேந்திரா கடத்திச் சென்று திருமணம் செய்து கொண்டதாக நஞ்சன்கூடு போலீசில் புகார் செய்த பசவராஜ் நாய்க், தனது மகளை மீட்டு தன்னிடம் ஒப்படைக்குமாறும் கூறியிருந்தார்.

புகார் தொடர்பாக போலீசார் வழக்குப்பதிவு செய்து விசாரித்து வருகின்றனர். மகள்களை பெற்ற அப்பாக்களுக்கு தான் தெரியும் பருவ காதல், பெற்றவர்களின் பாசத்தை கூட மறக்கடிக்க செய்து விடும் என்று.

சென்னை..

சென்னை ஓட்டேரி ஏகாங்கிபுரம் பகுதியைச் சேர்ந்தவர் ரமேஷ். இவர் பூந்தமல்லியில் உள்ள தனியார் கம்பெனியில் வேலை செய்து வருகிறார். இவரது மனைவி வாணி. இவர்களுக்கு கடந்த 2005 ஆம் ஆண்டு திருமணம் நடைபெற்றது. இவர்களுக்கு கௌதம், ஹரிஷ் என்ற 2 மகன்கள் உள்ளனர்.

ரமேஷ் அடிக்கடி குடித்து விட்டு வாணியுடன் தகராறில் ஈடுபட்டு வருவது வழக்கம். மேலும் வாணியின் நடத்தையில் சந்தேகம் ஏற்பட்டு அவரை அடிக்கடி அடித்து வந்துள்ளார்.

இந்நிலையில் நேற்று முன்தினம் இவர்களுக்குள் சண்டை ஏற்பட்டதாக கூறப்படுகிறது. அதன் பின்பு நேற்று முன்தினம் இரவு ரமேஷ் தனது துணிமணிகளை எடுத்துக் கொண்டு வீட்டை விட்டு வெளியே சென்றுள்ளார்.

ரமேஷின் மூத்த மகன் கௌதம் அம்மா எங்கே என்று கேட்ட போது அம்மா வேறு ஒருவருடன் ஓடிப் போய் விட்டார்கள் என்று கூறி சென்றுள்ளார். அன்று இரவு வீட்டில் கௌதம் மற்றும் அவரது நண்பர் மட்டுமே இருந்துள்ளனர்.

நேற்று முழுவதும் வாணியின் மகன்கள் தனது தாயை தேடி உள்ளனர். மேலும் தந்தையையும் காணவில்லை என உறவினர்கள் இடத்தில் கூறியுள்ளனர்.

இந்நிலையில் கௌதம் , ஹரிஷ் மற்றும் கௌதமின் நண்பர் ஒருவர் என மூன்று பேர் மட்டுமே வீட்டில் படுத்து உறங்கி உள்ளனர். வாணியின் இளைய மகன் எழுந்து பார்த்த போது டிவியின் அடியிலுள்ள டேபிள் பகுதியில் இருந்து ரத்தம் வெளியேறுவதை கண்டுள்ளார்.

மேலும் லேசான துர்நாற்றமும் வந்துள்ளது. உடனடியாக இதுகுறித்து வீட்டின் கீழ்ப்பகுதியில் உள்ள வீட்டின் உரிமையாளரிடம் தெரிவித்துள்ளார். அவர் மேலே வந்து பார்த்த போது துர்நாற்றம் வீசியதால் உடனடியாக இதுகுறித்து ஓட்டேரி போலீசாருக்கு தகவல் தெரிவித்தார்.

தகவலின் பேரில் அங்கு வந்த ஓட்டேரி போலீசார் டிவி வைப்பதற்கு பயன்படுத்தப்படும் டேபிள் அடியில் துணி மூட்டையை பிரித்து பார்த்தபோது அதில் முகத்தில் பலத்த காயங்களுடன் வாணி இறந்து கிடப்பதை கண்டு அதிர்ச்சி அடைந்தனர்.

உடனடியாக வாணியின் உடலை கைப்பற்றி கீழ்ப்பாக்கம் அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இது குறித்து வழக்குப்பதிவு செய்து ஓட்டேரி போலீசார் விசாரணை மேற்கொண்டு வருகின்றனர். மேலும் வாணியின் கணவர் ரமேஷை தேடி வருகின்றனர்.