வவுனியா தோணிக்கல் காஸ் அடுப்பு வெடிப்பு..

வவுனியா தோணிக்கல் , திருவள்ளுவர் வீதியில் அமைந்துள்ள வீடு ஒன்றில் தேநீருக்காக தண்ணீர் வைத்துக்கொண்டிருந்த சமயத்தில் காஸ் அடுப்பு வெடித்துள்ளதாக வவுனியா பொலிசார் தெரிவித்துள்ளனர்.

வவுனியா தோணிக்கல், திருவள்ளுவர் வீதியில் உள்ள வீடு ஒன்றில் முதியவர் ஒருவர் தேநீருக்காக தண்ணீர் வைத்துக்கொண்டிருந்த போது இன்று (22.12) காலை திடீரென் காஸ் அடுப்பு வெடித்துள்ளது.

இதனையடுத்து வீட்டார் காஸ் சிலிண்டரை பாதுகாப்பாக அகற்றி மேலதிக அனர்த்தம் ஏற்படுவதை தடுத்துள்ளனர். அத்துடன் குறித்த சம்பவம் தொடர்பில் வவுனியா பொலிசில் முறைப்பாடு செய்துள்ளார்.

இதனையடுத்து சம்பவ இடத்திற்கு சென்ற பொலிசார் தடவியல் பொலிசாரின் உதவியுடன் இது தொடர்பான விசாரணைகளை மேற்கொண்டு வருகின்றனர்.

தேசிய கலை இலக்கியப்பேரவையின்..

முற்போக்கு கலை இலக்கியச்செயற்பாடுகளின் முன்னோடியாக செயற்ப்பட்டுவரும் தேசியகலை இலக்கிய பேரவையின் அலுவலகம் வவுனியாவில் இன்றையதினம் திறந்துவைக்கப்பட்டது.

பேரவையின் தலைவர் க.தணிகாசலம் தலைமையில் குடியிருப்பு வீதி பூந்தோட்டம் வவுனியா எனும் முகவரியில் குறித்த அலுவலகம் திறந்துவைக்கப்பட்டது.

நிகழ்வில் வரவேற்புரையை சு.டொன்பொஸ்கோ நிகழ்த்தியிருந்தார். அதனை தொடர்ந்து பேரவையின் தலைவரால் அலுவலகம் உத்தியோகபூர்வமாக நாடாவெட்டி திறந்துவைக்கப்பட்டது.
அதனைதொடர்ந்து வாழ்த்துரைகளும்,கவிதை அரங்கும் இடம்பெற்றிருந்தது.

அலுவலகத்தில் இ.கா.சூடாமணி அரங்கு மற்றும் மாவை வரோதயன் நூலகம் என்பன அமையபெற்றுள்ளது.

நிகழ்வில் சிரேஸ்ட பொதுவுடமைவாதி சி.கா.செந்தில்வேல்,ஓய்வுநிலை விரிவுரையாளர் நா.பார்த்தீபன்,தமிழ்மணி மேழிக்குமரன்,நி.பிரதீபன், கலை இலக்கியச்செயற்பாட்டாளர்கள், பொதுமக்கள் உட்பட பலர் கலந்துகொண்டனர்.

விபத்து..

வவுனியா குருமன்காடு பகுதியில் முச்சக்கர வண்டி – துவிச்சக்கரவண்டி என்பன நேருக்கு நேர் மோதி விபத்துக்குள்ளானதில் பெண் ஒருவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார்.

இன்று மாலை 6.30 மணியளவில் இடம்பெற்ற இவ் விபத்து சம்பவம் தொடர்பில் மேலும் தெரியவருவதாவது, வவுனியாகுருமன்காடு பகுதியில் இதுருந்து துவிச்சக்கர வண்டியில் வந்த பெண் ஒருவர் காளி கோவிலடி வீதிக்கு திரும்பிய போது மன்னார் வீதி வழியாகக வந்த முச்சக்கர வண்டி குறித்த துவிச்சக்கர வண்டியுடன் மோதி விபத்துக்குள்ளானது.

விபத்து காரணமாக துவிச்சக்கர வண்டியில் பயணித்த பெண் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார். விபத்து தொடர்பில் வவுனியா போக்குவரத்து பொலிசார் விசாரணைகளை முன்னெடுத்துள்ளனர்.

விபத்து..

கிளிநொச்சி இரணைமடு – முருகண்டிக்கு இடைப்பட்ட பகுதியில் ஏ9 வீதியில் இன்று (21.01) இரவு 8.30 மணியளவில் இராணுவ வாகனம் தடம்புரண்டு விபத்துக்குள்ளானதில் இருவர் காயமடைந்துள்ளனர்.

இரணைமடு பகுதியிலிருந்து ஏ9 வீதியூடாக முருகண்டி பகுதி நோக்கி பயணித்துக்கொண்டிருந்த இரானுவ வாகனம் முருகண்டி பொலிஸ் காவல் நிலையத்தினை அண்மித்த பகுதியில் இராணுவ வாகனம் சாரதியின் கட்டுப்பாட்டையிழந்து வீதியின் மறுபக்கத்தி்ற்கு சென்று வீதியினை விட்டு தடம்புரண்டு விபத்துக்குள்ளானது.

இவ்விபத்தில் இராணுவ வாகனத்தில் பயணித்த இருவர் காயமடைந்ததுடன் மேலதிக விசாரணைகளை முருகண்டி காவலரண் பொலிஸார் மேற்கொண்டு வருகின்றனர்.

நெல் அறுவடை..

வவுனியாவில் பெரும்போக நெல் அறுவடை ஆரம்பிக்கப்பட்டுள்ள நிலையில் ஒரு ஏக்கருக்கு 5 தொடக்கம்7 மூடைகள் நெல்லே விளையும் அவலநிலை ஏற்பட்டுள்ளது.

வவுனியா மாவட்டத்தில் கடந்த ஆண்டு சுமார் 50 ஆயிரம் ஏக்கருக்கும் மேல் பெரும்போக நெற்செய்கை மேற்கொள்ளப்பட்டிருந்தது. தற்போது அதன் அறுவடைக்காலம் நெருங்கியுள்ளதுடன் பல்வேறு பகுதிகளிலும் அறுவடை இடம்பெற்று வருகின்றது.

இம்முறை நெல்லிற்கான பசளை இறக்குமதிக்கு அரசு தடை விதித்திருந்தமையால் நெற்செய்கைக்கு தேவையான பசளை இல்லாமல் விளைச்சலில் கடுமையான வீழ்ச்சி ஏற்பட்டுள்ளது.

குறிப்பாகக் கடந்த காலங்களில் ஏக்கருக்கு 30 மூடைகளுக்கு அதிகமாக விளைச்சல் கிடைத்த நிலையில் இம்முறை 5தொடக்கம்7 மூடை நெல்லே விளைந்துள்ளதாகக் கவலை தெரிவிக்கும் விவசாயிகள் தமது வாழ்வாதாரம் கடுமையாகப் பாதிக்கப்பட்டுள்ளதாகத் தெரிவிக்கின்றனர்.

இம்முறை பசளை இன்மை மற்றும் மருந்து பொருட்களின் விலை அதிகரிப்பு, ஏனைய செலவுகள் என ஒரு ஏக்கருக்கு 60ஆயிரத்திற்கும் மேல் செலவழித்துள்ளோம். எனினும் 30 ஆயிரம் ரூபாயே வருமானமாகக் கிடைத்துள்ளது.

இதனால் எமது வாழ்வாதாரம் பாதிக்கப்பட்டுள்ளதுடன், கடனாளிகளாக ஆக்கப்பட்டுள்ளோம். எனவே பசளை விடயத்தில் முன் ஆயத்தமின்றி அரசாங்கம் மேற்கொண்ட முடிவினால் நாட்டின் முதுகெலும்பான விவசாயிகள் தற்கொலை செய்துகொள்ளும் அவலநிலைக்குத் தள்ளப்பட்டுள்ளனர்.

எமக்கான நஷ்டத்தை ஈடுசெய்வதற்கு அரசாங்கம் நடவடிக்கை எடுக்க வேண்டும் என்று விவசாயிகள் கோரிக்கை விடுக்கின்றனர்.

மின்சார மோட்டார் சைக்கிள்களுக்கு..

வவுனியா மாவட்டத்தில் இது வரையிலான காலமும் மின்சார மோட்டார் சைக்கில்களுக்கு இலக்கத்தகடு , வாகன வருமான உத்தரவு பத்திரம் , காப்புறுதி , தலைக்கவசம் , சாரதி அனுமதிப்பத்திரம் என்பன தேவையற்ற நிலையில் காணப்பட்டதுடன்,

தற்போது குறித்த ஆவணங்கள் மற்றும் தலைக்கவசம் என்பன கட்டாயமாக்கப்பட்டுள்ளது என வவுனியா தலைமை பொலிஸ் நிலைய போக்குவரத்து பிரிவுக்கான பொறுப்பதிகாரி ரோஷன் சந்திரசேகர தெரிவித்தார்.

மின்சார மோட்டார் சைக்கில்களுக்கு இது வரையிலான காலப்பகுதியில் தலைக்கவசம் உட்பட மேற்குறிப்பிட்ட ஆவணங்கள் தேவையின்றி காணப்பட்டது.

இந்நிலையில் இனிவரும் காலங்களில் இலக்கத்தகடு , வாகன வருமான உத்தரவு பத்திரம் , காப்புறுதி , தலைக்கவசம் , சாரதி அனுமதிப்பத்திரம் என்பன கட்டாயமாக்கப்பட்டுள்ளதாவும் அதனை மீறி செயற்படும் மின்சார மோட்டார் சைக்கில் உரிமையாளர்களுக்கு எதிராக சட்ட நடவடிக்கை மேற்கொள்ளப்படும்

மேலும் வவுனியா பல இடங்களில் பரவலாக குறித்த மின்சார மோட்டார் சைக்கில்களை விற்பனை முகவர்கள் எவ்வித ஆவணங்கள் , தலைக்கவசம் என்பன தேவையில்லை என மக்களை ஏமாற்றி விற்பனை மேற்கொள்ளப்படுகின்றது எனவே மக்கள் அவதானமாக செயற்படுமாறும் அவர் மேலும் தெரிவித்தார்.

சிவப்பு எச்சரிக்கை..

வவுனியா நகரசபைக்குட்பட்ட பகுதிகளில் சுகாதார பிரிவினரினால் டெங்கு பரவும் இடங்கள் பரிசோதனைக்குட்படுத்தப்பட்டதுடன் டெங்கு பரவும் அபாயம் காணப்பட்ட இடங்களுக்கு சிவப்பு எச்சரிக்கை நோட்டிஸ்களும் வழங்கப்பட்டன.

இறம்பைக்குளம் பிரிவுபொதுச்சுகாதார பரிசோதகர் தலமையில் நகரின் சகாயாமாதாபுரம் , சூசைப்பிள்ளையார்குளம் ஆகிய பகுதிகளில் இன்று (21.01.2022) காலை 8.30 மணி தொடக்கம் மதியம் 2.00 மணி வரையிலான காலப்பகுதியில் டெங்கு பரவும் இடங்கள் பரிசோதனைக்குட்படுத்தப்பட்டது.

இதன் போது அப்பகுதியிலுள்ள வீடுகள் , வர்த்தக நிலையங்களின் திண்மக்கழிவுகள் நகரசபை வாகனத்தில் ஏற்றப்பட்டதுடன் நுளம்பு குடம்பிகள் பெருகும் நிலையில் காணப்பட்ட இடங்களுக்கு எச்சரிக்கை நோட்டீஸ்களும் வழங்கப்பட்டன.

இவ் நடவடிக்கை பொலிஸ் உத்தியோகத்தர்கள் , சுகாதார ஊழியர்கள் . நகரசபை சுகாதார ஊழியர்கள் ஆகியோரின் பங்கு பற்றுதலுடன் இடம்பெற்றிருந்தமை குறிப்பிடத்தக்கது.