இலங்கையில் மீண்டும் கொவிட் அலை ஏற்படும் அபாய நிலை உள்ளதாக தேசிய தொற்று நோய் விஞ்ஞான நிறுவகத்தின் வைத்தியர் ஆனந்த விஜேவிக்ரம எச்சரித்துள்ளார்.
அரசாங்கத் தகவல் திணைக்களத்தில் நேற்று செய்தியாளர்களை சந்தித்த போதே தேசிய தொற்றுநோய் விஞ்ஞான நிறுவகத்தின் வைத்தியர் ஆனந்த விஜேவிக்ரம இவ்வாறு குறிப்பிட்டுள்ளார்.
கடந்த இரு வாரங்களை ஒப்பிட்டுப் பார்க்கும்போது, தொற்று உறுதியானவர்களின் எண்ணிக்கை, சற்று அதிகரித்துள்ளது. இதன் காரணமாக மீண்டும் கொவிட் அலை ஏற்படக்கூடும் என்ற ஐயம் நிலவுகிறது.
நாட்டின் பல பகுதிகளில் ஒமிக்ரோன் திரிபுடனான கொவிட் நோயாளர்கள் அடையாளம் காணப்பட்டுள்ளனர். ஒமைக்ரோன் திரிபானது மிக இலகுவாக பரவக்கூடியது.
அறிகுறிகள் குறைந்துள்ள போதிலும், பெரும்பாலானோருக்கு அந்த திரிபு தொற்றக்கூடும் என தேசிய தொற்று நோய் விஞ்ஞான நிறுவகத்தின் வைத்தியர் ஆனந்த விஜேவிக்ரம தெரிவித்துள்ளார்.
வடமாகாண விமல் அணி ஏற்பாட்டில் அமைச்சர் விமல்வீரவன்சவின் திட்டமிடலுக்கு அமைய வவுனியாவில் பொங்கல் நிகழ்வு சிறப்பாக இடம்பெற்றது.
அமைச்சரின் வன்னி மாவட்ட இணைப்பு செயலாளர் புஸ்பதேவா வழிகாட்டலில் வவுனியா பழைய பேரூந்து நிலையத்தில் குறித்த பொங்கல் நிகழ்வு இன்று காலை இடம்பெற்றது.
இயற்கை பசளை இட்டு விளைவிக்கப்பட்ட தமிழ் மக்களின் பாரம்பரிய பச்சைப் பெருமாள் நெல்லில் இருந்து பெறப்பட்ட அரிசியில் பொங்கல் நடைபெற்றது.
பௌத்த, இந்து, கத்தோலிக்க மத தலைவர்கள் கலந்து கொண்டு பொங்கல் நிகழ்வை ஆரம்பித்து வைத்தனர்.
இதில், நகரசபை தலைவர் இ.கௌதமன், உப நகரபிதா சு.குமாரசாமி, வர்த்தக சங்க செயலாளர் அம்பிகைபாகன், மாவட்ட விவசாய சம்மேளனத் தலைவர் சிறிதரன், வவுனியா பொலிஸ் நிலைய பதில் பொறுபதிகாரி அழகியவண்ண , வடமாகாண விமல் அணி தலைவர் சி.ஜோதிக்குமரன் , விமல் அணி உறுப்பினர்கள் உள்ளிட்ட பலரும் கலந்து கொண்டனர்.
வவுனியா குடியிருப்பு பகுதியில் வீடு ஒன்றில் சமைத்துக் கொண்டு இருந்த போது திடீரென காஸ் அடுப்பு பற்றி எரிந்துள்ளது
வவுனியா, குடியிருப்பு வீதியில் உள்ள வீடு ஒன்றில் பெண் ஒருவர் சமைத்துக் கொண்டிருந்த போது இன்று (14.01.2022) முற்பகல் திடீரென காஸ் அடுப்பின் கீழ் பகுதி பற்றி எரிந்துள்ளது.
இதனையடுத்து வீட்டார் காஸ் சிலிண்டர் பாதுகாப்பாக அகற்றி மேலதிக அனர்த்தம் ஏற்படுவதை தடுத்துள்ளனர். அத்துடன் குறித்த சம்பவம் தொடர்பில் வவுனியா பொலிசில் முறைப்பாடு செய்துள்ளார்.
வவுனியாவில் பொங்கல் நிகழ்வுகள் சிறப்பாக இடம்பெற்று வருகின்றது. தமிழர்களின் தை திருநாளாம் பொங்கல் தினமான இன்று மக்கள் தங்கள் வீடுகள் வர்த்தக நிலையங்களை அலங்கரித்து புத்தாடை அணிந்து தைப் பொங்கல் கொண்டாட்டங்களில் ஈடுபட்டு வருகின்றனர்.
இந்த நிலையில் வைரவப்புளியங்குளம் ஆதி விநாயகர் ஆலயம் , நகர் பகுதியில் அமைந்துள்ள கந்தசுவாமி ஆலயம் உட்பட பல இந்து ஆலயங்களிலும் இன்று (14.01.2022) காலை பொங்கல் பொங்கியதுடன் விசேட பூஜைகள் நடைபெற்றுள்ளன.
அத்துடன் குறித்த பகுதியில் உள்ள மக்கள் தங்களது வீடுகளிலும் பொங்கல் பொங்கி சூரிய பகவானுக்கு தங்களது நன்றிகளை தெரிவித்துள்ளனர்.
வவுனியா ஏ9 வீதி பூனாவை பகுதியில் இன்று அதிகாலை அதிசொகுசு பேரூந்து உட்பட மூன்று வாகனங்கள் ஒன்றுடன் ஒன்று மோதுண்டு விபத்துக்குள்ளானதில் 12 பயணிகள் காயமடைந்த நிலையில் வைத்தியசாலையில் அனுமதிக்கப்பட்டுள்ளனர். இவ் விபத்துச்சம்பவம் தொடர்பில் மேலும் தெரியவருகையில்,
பூனாவை பகுதியில் வீதியின் அருகே விபத்துக்குள்ளான டிப்பர் வாகனம் நின்றுள்ளது. டிப்பர் வாகனத்தின் பின்பகுதியில் கொழும்பிலிருந்து யாழ்ப்பாணம் நோக்கி பயணித்த பேரூந்தொன்று டிப்பருடன் மோதுண்டு விபத்துக்குள்ளானதுடன் குறித்த விபத்துக்குள்ளான பேரூந்துடன் கொழும்பிலிருந்து யாழ்ப்பாணம் நோக்கி பயணித்த மற்றுமொரு அதிசொகுசு பேரூந்து மோதி விபத்துக்குள்ளானது.
இவ் விபத்துச்சம்பவத்தில் பேரூந்தில் பயணித்த 12 பயணிகள் காயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்டுள்ளனர்.
விபத்து காரணமாக ஏ9 வீதியூடான போக்குவரத்து சுமார் 1 மணிநேரம் வரை ஸ்தம்பித்ததுடன் விபத்துச்சம்பவம் தொடர்பிலான மேலதிக விசாரணைகளை போக்குவரத்து பொலிஸார் மேற்கொண்டு வருகின்றனர்.
வவுனியா சிதம்பரபுரத்தில் இந்து கலாசார திணைக்களத்தின் ஏற்பாட்டில் வவுனியா பிரதேச செயலகம் இணைந்து நடாத்தும் பழனி முருகனின் தெய்வீக கிராமிய நிகழ்வும் கலை கலாசார பாரம்பரிய ஊர்வலமும் எதிர்வரும் 17 ஆம் திகதி இடம்பெற்றவுள்ளது.
சிதம்பரபுரம் பழனி முருகன் அறநெறி பாடசாலை பகுதியில் மு.ப. 10 மணியளவில் நிகழவுள்ளது. நிகழ்வின் பிரதம அதிதியாக இந்துமத விவகார இணைப்பாளர் சிவஸ்ரீ இராமசந்திர குருக்கள் கலந்துகொண்டு சிறப்பிக்கவுள்ளமை குறிப்பிடத்தக்கது. வவுனியா இந்து கலாசார அபிவிருத்தி உத்தியோகத்தர் பிரம்மஸ்ரீ.எஸ்.குகனேஸ்வரசர்மா வரவேற்புரை நிகழ்த்தவுள்ளார்.
வவுனியா பிரதேச செயலாளர் திரு.நா.கமலதாசன் தலைமையில் பிரதம அகதிகளாக அரசாங்க அதிபர் திரு.பி.ஏ.சரத்சந்திர , மேலதிக அரசாங்க அதிபர் திரு.தி.திரேஸ்குமார் சிறப்பு அதிதிகளாக உதவிப் பிரதேச செயலாளர் பிரியதர்சினி சஜீவன் , உதவி மாவட்ட செயலாளர் திருமதி.ம.சபர்ஜா மற்றும் தமிழ்விருட்சம் திரு.செ.சந்திரகுமார் கண்ணன் ஆகியோர் கலந்து சிறப்பிக்கவுள்ளனர்.
மேலும் கௌரவ அதிதிகளாக ஆசிக்குளம் கிராம சேவையாளர் ஜனகன் பாலசுப்பிரமணியம் , ஆசிக்குளம் சமுர்த்தி அபிவிருத்தி உத்தியோகத்தர் திருமதி.தெ.மகேஸ்வரி ,
ஆசிக்குளம் கிராம அபிவிருத்தி உத்தியோகத்தர் குணசேகரம் கோபிதரன், சிதம்பரபுரம் பொலிஸ் பொறுப்பதிகாரி ஆர்.எம்.திலகரத்ன, ஆசிக்குளம் சுகாதார வைத்திய அதிகாரி புவனேஸ்வரன் நிரோசன் ஆகியோர் கலந்துக்கொள்ளவுள்ளனர்.
இங்கு ஆசிகுளம் பகுதி 06 அறநெறிப் பாடசாலை மாணவர்களைச் சேர்ந்த 150 மாணவர்கள் பங்குபற்றி பாராட்டு மற்றும் உதவிகள் பெறவுள்ளனர் அத்துடன் 15 அறநெறி ஆசிரியர்கள் கௌரவிக்கப்படவுள்ளனர். இங்கு இந்துப் பண்பாட்டு நிதியத்தின் உதவியும் தொண்டு நிறுவனங்களின் உதவிகளும் செய்யப்படவுள்ளது.
வவுனியா நகரிலுள்ள தனியார் நிதி நிறுவனம் முன்பாக நிறுத்தி வைக்கப்பட்டிருந்த துவிச்சக்கரவண்டி திருட்டு சம்பவம் தொடர்பில் சந்தேகநபர் ஒருவரை பொலிஸார் கைது செய்துள்ளனர்.
வவுனியா முதலாம் குறுக்குத்தெரு வீதியில் அமைந்துள்ள தனியார் நிறுவனம் முன்பாக நிறுத்தி வைக்கப்பட்டிருந்த துவிச்சக்கரவண்டி நேற்று முன்தினம் (11.01) காலை 10.44 மணியளவில் இனந்தெரியாத நபரினால் களவாடப்பட்டுள்ளது.
இச் சம்பவம் தொடர்பில் சி.சி.ரி.வீ காணோளி உதவியுடன் விசாரணைகளை முன்னெடுத்த வவுனியா பொலிஸார் சந்தேகநபர் ஒருவரை கைது செய்துள்ளதுடன் அவரிடமிருந்து களவாடப்பட்ட துவிச்சக்கரவண்டியினையும் கைப்பற்றியுள்ளனர்.
மேலதிக விசாரணைகளின் பின்னர் சந்தேகநபர் மற்றும் துவிச்சக்கரவண்டியினை வவுனியா மாவட்ட நீதவான் நீதிமன்றில் ஆயர்படுத்துவதற்குறிய நடவடிக்கையினை பொலிஸார் முன்னெடுத்துள்ளனர்.
ஜனாதிபதி கோட்டாபய ராஜபக்ஷ முத்துராஜவெல – மாபிம லிட்ரோ நிறுவனத்திற்கு அவசர விஜயம் ஒன்றை மேற்கொண்டுள்ளதாக சிங்கள ஊடகங்கள் தகவல் வெளியிட்டுள்ளன.
இதனையடுத்து லிற்றோ காஸ் நிறுவனத்தின் தலைவர் தெசார ஜயசிங்க பதவி நீக்கம் செய்யப்பட்டுள்ளதாக தெரிவிக்கப்படுகிறது.
நாட்டில் நிலவும் சமையல் எரிவாயு தட்டுப்பாடு மற்றும் எரிவாயுவுடன் தொடர்புடைய வெடிப்புச் சம்பவங்கள் போன்றவற்றை கருத்தில் கொண்டு இந்த தீர்மானம் எடுக்கப்பட்டுள்ளதாக குறிப்பிடப்படுகிறது.
அதற்கமைய, லிட்ரோ நிறுவனத்தின் புதிய தலைவராக ரேனுக பெரேரா நியமிக்கப்பட்டுள்ளதாக ஊடகங்கள் சுட்டிக்காட்டியுள்ளன.
இந்த மாதத்தில் எந்த நேரத்திலும் எரிபொருள் தட்டுப்பாடு ஏற்படும் அபாயம் உள்ளதாக எரிசக்தி அமைச்சர் உதய கம்மன்பில தெரிவித்துள்ளார்.
நேற்றிரவு ஒளிபரப்பான வானொலி நிகழ்ச்சியில் கலந்துகொண்டு கருத்து தெரிவிக்கும் போதே அமைச்சர் இதனைத் குறிப்பிட்டுள்ளார்.
எரிவாயு கப்பல்கள் 3 துறைமுகத்தில் தரித்து நிற்கின்றது. டொலர் இல்லாமையிலேயே கப்பல்களை வரவழைத்துள்ளோம். எனினும் அதனை பெற்றுக் கொள்வதற்கு டொலர் இல்லாத பிரச்சினை ஏற்பட்டுள்ளது.
கடந்த 7, 8 நாட்களாக கப்பல்கள் தரித்து நிற்கின்றது. சீனாவிடம் 300 மில்லியன் டொலர் கடன் பெற்றோம், இந்தியாவிடம் 400 மில்லியன் டொலர் கடன் பெற்றோம், பங்களாதேஷிடம் 250 மில்லியன் டொலர் கடன் பெற்றோம், எனினும் இந்த ஒன்றுமே ஒரு மாதத்திற்கு போதுமான எரிபொருள் பெறுவதற்கு போதுமானதாக இல்லை.
இந்த நிலையில், எரிபொருள் தட்டுப்பாடு அபாயத்தைத் தவிர்ப்பதற்கு அனைத்து முயற்சிகளும் மேற்கொள்ளப்பட்டு வருவதாக அமைச்சர் குறிப்பிட்டுள்ளார்.
எனினும் ஜனவரி மாதத்தில் ஏதோ ஒரு சந்தர்ப்பத்தில் எரிவாயு தட்டுப்பாடு ஏற்படுவதற்கான வாய்ப்புகள் உள்ளதென அவர் மேலும் தெரிவித்துள்ளார்.
உள்ளுர் சந்தையில் மோட்டார் வாகனங்களின் விலை பாரியளவு அதிகரித்துள்ளதாக புதிய தரவுகள் தெரிவிக்கின்றன.
இணையத்தளங்களில் பதிவாகியுள்ள வாகன விலைகளின் விபரங்களுக்கமைய இரண்டு வருட காலப்பகுதிக்குள் 100 சதவீதம் அதிகரித்துள்ளது.
அந்நியச் செலாவணி நெருக்கடி காரணமாக நாட்டிற்கு மோட்டார் வாகனங்களை இறக்குமதி செய்ய தடை விதிக்கப்பட்டுள்ளதால் இந்த அளவிற்கு விலைகள் உயர்ந்துள்ளன.
வாகனங்களின் விலை உயர்ந்த நிலையில் வாகன விற்பனைகள் பாரியளவு குறைந்துள்ளதாக வாகன விற்பனையாளர்கள் தெரிவிக்கின்றனர். இலங்கையில் அதிக அளவில் விற்பனையாகும் பிரபலமாக வாகனங்களின் புதிய விலைகள் சில வெளியாகியுள்ளது.
அதற்கமைய, 2018 – Vitz – 8.1 மில்லியன் ரூபாய், 2018 – alto japan – 5 மில்லியன் ரூபாய், 2015 – alto india – 3 மில்லியன் ரூபாய், 2017 – Axio – 15 மில்லியன் ரூபாய், 2008 – Axio – 6.4 மில்லியன் ரூபாய், 2014 – Premio – 12.5 மில்லியன் ரூபாய், 2019 – Premio – 19 மில்லியன் ரூபாயில் விற்பனை செய்யப்படுவதாக தெரியவந்துள்ளது.
உலகின் மிக சக்திவாய்ந்த கடவுசீட்டு பட்டியலில் இலங்கைக்கு 102வது இடம் கிடைத்துள்ளது.
2022ஆம் ஆண்டிற்கான உலகின் சக்திவாய்ந்த கடவுச்சீட்டு பட்டியலை ஹென்லி வெளியிட்டிருந்தது. 111 நாடுகளை உள்ளடக்கிய இந்த பட்டியலில் இலங்கைக்கு 102வது இடம் கிடைத்துள்ளது.
இந்த பட்டியலில் இலங்கை, லெபனான் மற்றும் சூடான் நாடுகளுடன் 102வது இடத்தை பிடித்துள்ளது. அதற்கமைய இலங்கை கடவுசீட்டு வைத்திருப்பவர்கள் 41 நாடுகளுக்கு விசா இன்றி பயணிக்க முடியும் என குறிப்பிடப்பட்டுள்ளது.
சர்வதேச விமான போக்குவரத்து சங்கம் வழங்கும் தரவுகளின் அடிப்படையில், 2006 ஆம் ஆண்டு முதல் உலகின் சக்தி வாய்ந்த கடவுச்சீட்டு பட்டியலை ஹென்லி வெளியிட்டு வருகின்றது.
அதற்கமைய இந்த பட்டியலில் ஜப்பான் மற்றும் சிங்கப்பூர் நாடுகளின் கடவுசீட்டுகள் முதலாவது இடத்தை பிடித்துள்ளது. குறித்த நாடுகளின் கடவுசீட்டுகளை கொண்டு 190 நாடுகளுக்கு பயணிக்க முடியும் என்பது குறிப்பிடத்தக்கது.
உழவர் திருநாளாம் தைப்பொங்கல் தினத்தை கொண்டாடுவதற்கு மக்கள் தயாராகி வரும் நிலையில் வவுனியாவில் பொங்கல் வியாபாரம் களைகட்டியுள்ளது.
நாளையதினம் உழவர் தினமான தை முதலாம் திகதி பிறக்கவுள்ள நிலையில் தை பிறந்தால் வழிபிறக்கும் என்ற வாக்கிற்கிணங்க தைப்பொங்கலை மக்கள் சிறப்பாக கொண்டாடவுள்ளனர்.
வவுனியா நகரப்பகுதியில் அதிக சன நெரிசல் காணப்படுவதுடன் பொங்கலுக்கு தேவையான பானை ,அகப்பை, கரும்பு, பட்டாசு, பழவகை என்பவற்றின் விற்பனை சூடு பிடித்துள்ளது.
தைப்பொங்கல் திருநாள் நாளையதினம் (14.01.2022) உலகளாவிய ரீதியில் கொண்டாடப்படவுள்ள நிலையில் வவுனியாவில் தைப்பொங்கல் பண்டிகை களைக்கட்ட ஆரம்பித்துள்ளதை காணக்கூடியதாகவுள்ளது.
அத்துடன் கடந்த வருடத்தினை விட இம்முறை குறைந்தளவு மக்களே பொங்கல் பொருட்களைக் கொள்வனவு செய்வதில் ஆர்வம் காட்டி வருவதாக வவுனியா வர்த்தகர்கள் தெரிவித்தனர்
வவுனியா மாவட்டத்தினை கொவிட் தொற்றிலிருந்து பாதுகாக்கும் பொருட்டு முச்சக்கரவண்டி சாரதிகளுக்கு கொவிட் பாதுகாப்பு திரை வழங்கி வைக்கப்பட்டது.
வவுனியா பொலிஸாரின் ஒத்துழைப்புடன் தனியார் நிதி நிறுவனத்தின் பிரதான அனுசரனையுடன் குறித்த நிகழ்வு முதலாம் குறுக்குத்தெருவில் இன்று (12.01) காலை 9.00 மணியளவில் இடம்பெற்றது.
முச்சக்கரவண்டியின் சாரதி மற்றும் அதில் பயணிக்கும் பயணிகளுக்கிடையே குறித்த கொவிட் பாதுகாப்பு திரையினை பொருத்தும் வகையில் வழங்கி வைக்கப்பட்டதுடன் இதன் மூலம் கொரோனா தொற்று பரவுவதை குறைந்த பட்சம் தடுக்க முடியும் எனவும் அனுசரனையாளர்கள் தெரிவித்திருந்தனர்.
வவுனியாவில் வரவேற்பு நடனமாடுவதற்கு அழைத்து வரப்பட்ட இரு சிறுமிகளின் நடனத்தை அரங்கேற்ற முன்னர் எதிர்கட்சித் தலைவர் சஜித் பிரேமதாச மற்றும் பொதுமக்கள் மண்டபத்தை விட்டு வெளியேறிய சம்பவம் ஒன்று கடந்த வெள்ளிக்கிழமை (07.01) இடம்பெற்றிருந்தது.
இந்நிலையில் குறித்த நிகழ்வில் சிறுமிகளைக் கொண்ட கலையம்ச அரங்கேற்றம் ஏற்பாடு செய்யப்பட்டிருந்தமையை எதிர்கட்சித் தலைவர் சஜித் பிரேமதாச அறிந்திருக்க வில்லை என எதிர்கட்சித் தலைவரின் ஊடகப் பிரிவு அறிவித்துள்ளது.
இது குறித்து ஊடகப் பிரிவு மேலும் குறிப்பிட்டுள்ளதாவது, எதிர்க்கட்சித் தலைவரும், ஐக்கிய மக்கள் சக்தியின் தலைவருமான சஜித் பிரேமதாச இந் நாட்களில் வடக்கு மற்றும் கிழக்கு மாகாணங்களில் பல சமூக நலத் திட்டங்களில் ஈடுபட்டு வருகிறார்.
அதன் ஒரு அங்கமாக வவுனியா நகரசபை மண்டபத்தில் இடம்பெற்ற அரசியல் கூட்டம் ஒன்றிலும் கலந்து கொண்டிருந்தார். குறித்த நிகழ்வில் சிறுமிகளைக் கொண்ட கலையம்ச அரங்கேற்றம் ஏற்பாடு செய்யப்பட்டிருந்ததை எதிர்கட்சிதர் தலைவர் அறிந்திருக்கவில்லை.
குறித்த நிகழ்வுக்கு பொறுப்பானவர்களும், பிரதான ஏற்பாட்டாளர்களும் ஏலவே குறிப்பிட்ட கலையம்ச அரங்கேற்றம் குறித்து எதிர்கட்சி தலைவர் நிகழ்விற்கு முன்னதாகவோ அல்லது நிகழ்வின் போதேனும் அறிந்திருக்கவில்லை.
மேற்படி கலையம்ச நடன அரங்கேற்றம் நிகழ்ச்சி நிரலில் உள்ளடக்கபடவில்லை. மேற்படி நிகழ்வுகள் எதிர்கட்சி தலைவர் அலுவலகத்தால் ஏற்பாடு செய்யப்பட்டவையல்ல. அத்தோடு மாவட்ட மற்றும் தொகுதி மட்ட அமைப்பாளர்களாலேயே ஏற்பாடு செய்யப்பட்டது.
எதிர்கட்சித் தலைவர் குறித்த சம்பவத்தை அறிந்ததும், சகல ஒருங்கிணைப்பாளர்களுக்கும், வவுனியா மாவட்ட மற்றும் தொகுதி மட்ட அமைப்பாளர்களுக்கும் இது போன்ற சம்பவங்கள் எதிர்காலத்தில் இடம்பெறக் கூடாது என கடுமையாக எச்சரிக்கை விடுத்திருந்தார்.
அவ்வாறு கலையம்ச அரங்கம் இடம்பெறுவதாக ஏற்கனவே அறிந்திருந்தால் அதனை வரவேற்பதோடு குறித்த சிறுமிகளை பாராட்டியும் அவர்களுக்குரிய கௌரவத்தையும் எதிர்கட்சித் தலைவர் வழங்கியிருப்பார். எனவே இது எதிர்கட்சி தலைவருக்கு முற்றாக அறிவிக்கப்படாத ஒரு விடயமாகும்.
மனிதாபிமானமிக்க மக்கள்சார் எதிர்கட்சி தலைவர் என்பதும், எதிர்கட்சியில் இருந்த போதிலும் குறுகிய காலத்தில் பல்வேறு மனிதாபிமான செயற்பாடுகளில் பாகுபாடற்ற விதமாக செயற்பட்டு வருகின்றார் எனவும் எதிர்க்கட்சி ஊடகப் பிரிவு மேலும் தெரிவித்துள்ளது.
வவுனியா நகரிலுள்ள தனியார் நிதி நிறுவனம் முன்பாக நிறுத்தி வைக்கப்பட்டிருந்த துவிச்சக்கரவண்டி மாயமானமை தொடர்பில் பொலிஸார் பொதுமக்களின் உதவியினை நாடியுள்ளனர்.
வவுனியா முதலாம் குறுக்குத்தெரு வீதியில் அமைந்துள்ள தனியார் நிறுவனம் முன்பாக நிறுத்தி வைக்கப்பட்டிருந்த துவிச்சக்கரவண்டி நேற்று (11.01) காலை 10.44 மணியளவில் இனந்தெரியாத நபரினால் களவாடப்பட்டுள்ளது.
இச் சம்பவம் தொடர்பில் துவிச்சக்கரவண்டி உரிமையாளர் வவுனியா பொலிஸ் நிலையத்தில் வழங்கிய முறைப்பாட்டினையடுத்து குறித்த தனியார் நிதி நிறுவனத்தின் சி.சி.ரி.வி காணோளி உதவியுடன் பொலிஸார் விசாரணைகளை முன்னெடுத்து வருகின்றனர்.
அத்துடன் துவிச்சக்கரவண்டியினை களவாடி சென்றவரின் உருவம் சி.சி.ரி.வி காணோளியில் பதிவாகியுள்ளதுடன் அவர் தொடர்பில் விபரம் தெரிந்தால் பொலிஸாருக்கு தகவல் வழங்குமாறும் வவுனியா பொலிஸார் தெரிவித்துள்ளனர்.
எதிர்வரும் பண்டிகைக் காலத்தில் நாடு மூடப்படுமா என்பதை தற்போது கணிக்க முடியாது என விசேட வைத்திய நிபுணர் வைத்திய ஜூட் ஜயமஹ தெரிவித்துள்ளார்.
சுகாதார மேம்பாட்டுப் பணியகத்தில் இன்று (12.01) நடைபெற்ற செய்தியாளர் சந்திப்பில் கலந்துகொண்டு பேசிய அவர் இதனை கூறியுள்ளார். தொடர்ந்தும் கருத்து வெளியிட்ட அவர்,
“நாளுக்கு நாள், வாரத்துக்கு வாரம், மாதாமாதம், நிலைமையை ஆய்வு செய்து, அடுத்தகட்ட முடிவுகளை எடுக்கிறோம். நாட்கள் மாதங்கள் வேகமாக நகர்கின்றன. அதனால் அடுத்த வாரம் ஒரு முக்கியத்துவம் வாய்ந்த வாரம்.
பாடசாலைகள் அனைத்தும் ஆரம்பமாகின்றன.” “ஏப்ரல் மீண்டும் ஒரு பண்டிகை காலம் வருகிறது, எனவே நாம் தற்போதே அது குறித்து கவனம் செலுத்தி சுகாதார பழக்கங்களுடன் செயற்படுத்தல் கட்டாயமாகும்.
“பிப்ரவரி 1ம் திகதி நாட்டை மூடுவது குறிது எமக்கு இப்போது கணிக்க முடியாது.” “வைரஸின் தாக்கம் குறித்து நாங்கள் ஆலோசனை கூறுகிறோம். ஆனால் கணிப்பது எங்களுக்கு மிகவும் கடினம்.
புதிய பிறழ்வு வந்தாலும், முகக்கவசத்தை அணிந்திருந்தால் பரவாது. “இன்னொரு விடயம் என்னவென்றால், நாடு இயல்பு நிலைக்கு வரவில்லை, புதிய பொதுமைப்படுத்தலுக்குதான் நாம் சென்றுள்ளோம்.”
“நம் நாட்டில் கோவிட் மற்றும் இன்ஃப்ளூயன்ஸா ஒன்றாக தொற்றிய நோயாளர்கள் இதுவரை பதிவாகவில்லை. அவ்வாறு பதிவானாலும், இது ஒரு பாரிய பிரச்சனை இல்லை.” என தெரிவித்துள்ளார்.
