கொரோனா..

நாட்டில் கொரோனா மரணங்களின் எண்ணிக்கை மேலும் அதிகரித்துள்ளதாக அரசாங்கத் தகவல் திணைக்களம் அறிக்கை வெளியிட்டுள்ளது. இதன்படி நேற்றைய தினம் (05-09-2021) 180 கொரோனா மரணங்கள் பதிவாகியுள்ளன.

இதில் 30 வயதுக்கும் குறைந்தவர்கள் 7 பேரும், 30 முதல் 59 வயதுக்கும் இடைப்பட்டவர்கள் 40 பேரும், 60 வயதுக்கும் மேற்பட்ட 133 பேரும் உயிரிழந்துள்ளனர்.

நேற்றைய தினம் உயிரிழந்தவர்களில் 97 ஆண்களும் 83 பெண்களும் உள்ளடங்குகின்றனர். இதன்படி நாட்டில் இதுவரையில் கோவிட் காரணமாக உயிரிழந்தோரின் மொத்த எண்ணிக்கை 10320 ஆக உயர்வடைந்துள்ளது.

கொரோனா..

உலக நாடுகளுக்கே பெரும் அச்சுறுத்தலாக உள்ள கொரோனா வைரஸை அழிக்கக்கூடிய இரண்டு இயந்திரங்களைக் பிலியந்தலை பகுதியைச் சேர்ந்த இளைஞர் ஒருவர் கண்டுபிடித்துள்ளார்.

காற்றிலுள்ள வைரஸ்கள் மற்றும் பக்டீரியாக்களை சில நொடிகளில் அழிக்கும் அதிவேக (virus air burnable automatic machine) தானியங்கி இயந்திரம் மற்றும் பணம், ஆவணங்களில் காணப்படும் வைரஸ்கள் மற்றும் பக்டீரியாக்களை அழிக்கும் தானியங்கி கிருமித்தொற்று நீக்கிக் கருவி ஆகியவை அவரது கண்டுபிடிப்புகளில் அடங்குகின்றன.

பொரளை சுசமவர்தன மகா வித்தியாலயத்தில் உயர்தரம் வரை கற்ற குறித்த இளைஞர், கொழும்புப் பகுதியில் உள்ள முன்னணி நிறுவனம் ஒன்றில் மோட்டார் பொறியியல் பயின்றார்.

அதன் பின்னர் ஜப்பான் சென்று மோட்டார் பொறியியல் மற்றும் தொழில்நுட்பத் தைக் கற்றதுடன் மலேசியாவிலும் இயந்திரப் பிரிவில் அவர் பயிற்சி பெற்றவர் எனவும் கூறப்படுகின்றது.

தடுப்பூசி..

தடுப்பூசி போடுவதில் ஏனைய நாடுகளை பின்னுக்குத்தள்ளி கடந்த வாரம் இலங்கை முதலிடத்தை பிடித்துள்ளது. உலகெங்கிலும் உள்ள தடுப்பூசி திட்டத்தின் முன்னேற்றத்தை ஆராயும்,

Our World in Data இணையத்தளம் இந்த தகவலை வெளியிட்டுள்ளது. அதன்படி, கடந்த வாரம் அதிக தடுப்பூசிகளை மக்களுக்கு செலுத்திய நாடாக இலங்கை அடையாளப்படுத்தப்பட்டுள்ளது.

நாட்டின் மக்கள் தொகையில் 13 சதவிகிதம் பேருக்கு கடந்த வாரம் முழுமையாக தடுப்பூசி போடப்பட்டது என World in Data-வின் தலைவர் தனது டுவிட்டர் கணக்கு மூலம் சுட்டிக்காட்டினார்.

யாழில்..

யாழ். நெல்லியடி பொலிஸ் பிரிவிற்கு உட்பட்ட மதவடி பகுதியில் நூற்றுக்கணக்கானோருக்கு தலா 2000 ரூபா அடிப்படையில் பணம் வழங்கிக் கொண்டிருந்த நபர் உள்ளிட்ட மூவரை பொலிஸார் கைது செய்துள்ளனர்.

ஊரடங்கு அமுலில் இருந்த சந்தர்ப்பத்தில் சுகாதார விதிமுறைகளை மீறி மக்களை திரட்டி உதவித் தொகை வழங்கிய குற்றச்சாட்டில் சந்தேகநபர்கள் நெல்லியடி பொலிஸாரால் இன்று (06.09) காலை கைது செய்யப்பட்டுள்ளனர்.

வடமராட்சி பகுதியில் வாழும் வறிய மக்களுக்கு உதவி தொகையாக ஒருவருக்கு தலா 2000 ரூபாய் வீதம் நபரொருவர் உதவி தொகை வழங்கியுள்ளார். இந்த நிலையில் பணத்தை பெறுவதற்காக சுகாதார விதிமுறைகளை மீறி பெருமளவானோர் அவ்விடத்தில் ஒன்று கூடியுள்ளனர்.

இது குறித்து கிடைத்த தகவலின் அடிப்படையில் சம்பவ இடத்திற்கு விரைந்த நெல்லியடி பொலிஸார் உதவி தொகை பெற வந்த மக்களை அங்கிருந்து உடனடியாக அப்புறப்படுத்தியுள்ளனர். அத்துடன் உதவி தொகை வழங்கியவர், அதற்கான ஏற்பாடுகளை செய்தவர் உள்ளிட்ட மூவரை பொலிஸார் கைது செய்துள்ளனர்.

இதேவேளை மக்களுக்கு பணம் வழங்கிய நபர், ஒருவருக்கு 2000 ரூபாய் வீதம் சுமார் 500இற்கும் மேற்பட்டோருக்கு பணம் வழங்கியுள்ளதாக தகவல்கள் தெரிவிக்கின்றன.

இந்தியாவிலிருந்து இலங்கைக்கு சட்டவிரோதமாக கடல்வழியாக வர முயன்ற பெண்ணொருவர் இன்று காலை கைது செய்யப்பட்டுள்ளார். முல்லைத்தீவு மாவட்டத்தை சேர்ந்த கஸ்தூரி என்ற பெண்ணே இவ்வாறு கைது செய்யப்பட்டுள்ளதாக தெரியவருகிறது.

குறித்த பெண் கடந்த 2018ஆம் ஆண்டு விமான மூலம் சென்னைக்கு சென்றுள்ள நிலையில் விசா முடிந்த பின்னரும் இலங்கை திரும்பாமல் சென்னை – வளசரவாக்கத்தில் உள்ள உறவினர் வீட்டில் சட்டவிரோதாக தங்கியிருந்துள்ளார்.

இந்த நிலையில், முல்லைத்தீவு – முள்ளியவலை கிராமத்தில் வசித்து வரும் கஸ்தூரியின் தந்தைக்கு உடல் நிலை சரியில்லாததால் இலங்கைக்கு வருவதற்கான இன்று அதிகாலை தனுஸ்கோடியில் இருந்து நாட்டு படகு மூலம் சட்டவிரோதமாக புறப்பட்டுள்ளார்.

அப்போது தனுஸ்கோடிக்கு அடுத்த இரண்டாம் மணல் திட்டு பகுதியில் இந்திய கடலோர காவல்படை ரோந்து படகு வந்ததை அறிந்த படகோட்டி கஸ்தூரியை முதல் மணல் திட்டு பகுதியில் இறங்கி விட்டு சென்றதாக கூறப்படுகிறது.

இதனையடுத்து அப்பகுதியில் மீன் பிடித்து கொண்டிருந்த மீனவர்கள் கொடுத்த தகவலின் அடிப்படையில் ராமேஸ்வரம் மெரைன் பொலிஸார் படகில் சென்று கஸ்தூரியை கைது செய்து தனுஸ்கோடிக்கு அழைத்து சென்றுள்ளனர்.

கஸ்தூரியிடம் மெரைன் பொலிஸார் முதல் கட்ட விசாரணைகளை முன்னெடுத்து பின் ராமேஸ்வரம் அனைத்து மகளிர் காவல் நிலையத்தில் ஒப்படைத்துள்ளனர்.

சமீப காலமாக இலங்கை மக்கள் சிலர் தனுஸ்கோடி கடல் வழியாக தமிழகம் வந்து வெளிநாடுகளுக்கு சட்டவிரோதமாக தப்பி செல்கின்றனர்.

எனவே பிடிபட்ட இலங்கை பெண் கஸ்தூரி வெளிநாடு செல்ல தமிழகம் வந்து சட்டவிரோதமாக தங்கி இருந்தாரா என்ற கோணத்தில் மத்திய உளவுத்துறை அதிகாரிகள் தீவிர விசாரணை நடத்தி வருவதுடன் தனுஸ்கோடியில் இருந்து சட்டவிரோமாக நாட்டு படகில் அழைத்து சென்ற நபரையும் தேடி வருகின்றனர்.

கஸ்தூரியிடம் இருந்து பாஸ்போர்ட் மற்றும் இலங்கை குடியுரிமை ஆவணங்கள் பறிமுதல் செய்யப்பட்டுள்ளதுடன், ராமேஸ்வரம் அனைத்து மகளிர் காவல் நிலைய பொலிஸார் கஸ்தூரி மீது வழக்கு பதிவு செய்துள்ளனர்.

இந்த நிலையில் விசாரணைகளின் பின் சந்தேகநபர் ராமேஸ்வரம் நீதிமன்றத்தில் ஆஜர்படுத்தப்பட்டு புழல் சிறையில் அடைக்கப்படுவார் என தெரிவிக்கப்பட்டுள்ளது.

அனுராதபுரத்தில் மிகவும் பின்தங்கிய கிராமத்தை சேர்ந்த மக்கள் அரசாங்கத்தினால் வழங்கப்பட்ட பணத்தை கொவிட் நிதியத்திற்காக தியாகம் செய்துள்ளனர்.

தனிமைப்படுத்தல் ஊரடங்கு சட்டம் காரணமாக தினசரி வருமானத்தை இழந்த குடும்பங்களுக்காக அரசாங்கத்தினால் வழங்கப்படும் 2000 கொடுப்பனவை அவர்கள் இவ்வாறு கொவிட் நிதியத்திற்காக வழங்க நடவடிக்கை எடுத்துள்ளனர்.

மிகவும் கடினமான சூழலில் தங்கள் வாழ்க்கையை நடத்தும் குடும்பத்தினரே இவ்வாறு தங்களுக்கு கிடைத்த கொடுப்பனவை இவ்வாறு தியாகம் செய்துள்ளதாக தெரியவந்துள்ளது.

அனுராதபுரம், தலாவ, ஹங்குரங்கெத்த பிரிவின் அருனபுர கிராமத்தை சேர்ந்த குடும்பங்களுக்கு வழங்கப்பட்டிருந்தது. எனினும் நாட்டின் தற்போதைய நிலைமையை கருத்திற் கொண்டு அவர்கள் இந்த கொடுப்பனவை கொவிட் நிதியத்திற்கு வழங்குமாறு பிரதேச செயலாளரிடம் கோரிக்கை விடுத்துள்ளனர்.

அதற்கமைய அருனபுர கிராமத்தை சேர்ந்த மக்கள் மேலும் சில உதவிகளை சேர்த்து அதனை கொவிட் நிதியத்திற்கு வழங்கியுள்ளனர்.

நெருக்கடியான காலத்தில் மிகவும் பின்தங்கி கிராம மக்களின் செயற்பாடு ஒட்டுமொத்த இலங்கை மக்களையும் வியப்பில் ஆழ்த்தியுள்ளது.

ஊரடங்கு..

நாட்டில் தற்போது நிலவும் நிலைமைக்கமைய கொவிட் தொற்றாளர்களின் எண்ணிக்கையை குறைந்த மட்டத்திற்கு கொண்டு வர வேண்டும் என இலங்கை மருத்துவ அதிகாரிகள் சங்கம் தெரிவித்துள்ளது.

அதற்கமைய எதிர்வரும் செப்டெம்பர் மாதம் 18ஆம் திகதி வரை ஊரடங்கு சட்டத்தை நீடிக்க வேண்டும் என இலங்கை மருத்துவ அதிகாரிகள் சங்கம் அரசாங்கத்திடம் கோரிக்கை விடுத்துள்ளது.

தனிமைப்படுத்தல் ஊரடங்கு சட்டம் அமுல்படுத்தப்பட்டுள்ளமையினால் தொற்றாளர்களின் எண்ணிக்கையில் குறைவு ஏற்பட்டுள்ளதாக சங்கத்தின் தலைவர் விசேட வைத்தியர் பத்மா குணரத்ன தெரிவித்துள்ளார்.

பயணக்கட்டுப்பாட்டை கடுமையான முறையில் அமுல்படுத்தவில்லை என்றாலும் தற்போது உள்ள முறையிலாவது 18ஆம் திகதி வரை நடத்தி செல்வது கட்டாயமாகும் என அவர் குறிப்பிட்டுள்ளார். கொழும்பில் இடம்பெற்ற ஊடகவியலாளர் சந்திப்பில் கலந்து கொண்டு கருத்து வெளியிடும் போதே அவர் இவ்வாறு குறிப்பிட்டுள்ளார்.

-தமிழ்வின்-

கொரோனா..

அம்பலாங்கொடை – தேவகொட பிரதேசத்தை சேர்ந்த மூன்றரை வயதுடைய பெண் குழந்தையொன்று கோவிட் தொற்றுக்குள்ளாகி உயிரிழந்துள்ளதாக தெரிவிக்கப்படுகிறது.

இவ்வாறு உயிரிழந்த குழந்தை லுகேமியா நோயால் பீடிக்கப்பட்டு அவதியுற்று வந்துள்ளதாகவும், கோவிட் தொற்று தீவிரமடைந்த நிலையில் உயிரிழந்துள்ளதாக தெரிவிக்கப்படுகின்றது.

இதற்கமைய,காலி, தடெல்ல தகன மேடையில் குழந்தையின் இறுதிக் கிரியைகள் இடம்பெற்றுள்ளது. இலங்கையில் பல சிறார்கள் கொரோனா தொற்றுக்குள்ளாகி வருகின்றமை குறிப்பிடத்தக்கது.