வவுனியா பொது வைத்தியசாலைக்கு..

வவுனியா மாவட்ட பொது வைத்தியசாலை விபத்து மற்றும் அவசர சிகிச்சை பிரிவின் மாடி கட்டிட நடவடிக்கைகாக 261 மில்லியன் ரூபாய் நிதி ஒதுக்கீடு செய்யப்பட்டுள்ளதாக வன்னி மாவட்ட நாடாளுமன்ற உறுப்பினரும், மாவட்ட அபிவிருத்தி குழுத் தலைவருமான கு.திலீபன் தெரிவித்துள்ளார்.

அவர் இது தொடர்பில் மேலும் தெரிவித்ததாவது, வவுனியா வைத்தியசாலையின் விபத்து மற்றும் அவசர சிகிச்சை பிரிவின் இரண்டாம் கட்ட கட்டிடம் பூர்த்தியாகாமல் பாரிய பிரச்சினையை வைத்தியசாலையில் எதிர்நோக்கினர்.

சுகாதார திணைக்களத்தினால் குறித்த விடயம் எனது கவனத்திற்கு கொண்டு வரப்பட்டதையடுத்து என்னூடாக அமைச்சர் டக்ளஸ் தேவானந்தா அவர்கள் கவனத்திற்கு குறித்த விடயத்தை கொண்டு சென்றிருந்தேன்.

அமைச்சர் டக்ளஸ் தேவானந்தா அவர்கள் உடனடியாக, சுகாதார அமைச்சர் பவித்திரா வன்னியராச்சி அவர்களிடம் இப்பிரச்சினையை எடுத்துக்கூறியதற்கு அமைவாக 261 மில்லியன் ரூபாவை ஒதுக்கீடு செய்யப்பட்டுள்ளது.

அதில் முதல் கட்டமாக இவ்வருடம் 100 மில்லியன் ரூபாய்கான வேலைத் திட்டத்தையும், அடுத்த வருடம் 161 மில்லியன் ரூபாய்கான வேலைத்திட்டத்தை முன்னெடுப்பதற்கும் அனுமதி வழங்கப்பட்டுள்ளது எனத் தெரிவித்தார்.

இதேவேளை, வவுனியா வைத்தியசாலைக்கு நிதி ஒதுக்கீடு செய்து கொடுத்தமைக்காக வவுனியா மாவட்ட சுகாதார பணிப்பாளர் மற்றும் வவுனியா பொது வைத்தியசாலை தலைமை மருத்துவர் ஆகியோரால் அமைச்சர் டக்ளஸ் தேவானந்தா மற்றும் நாடாளுமன்ற உறுப்பினர் கு.திலீபன் ஆகியோருக்கு நன்றி தெரிவித்து கடிதம் அனுப்பபட்டுள்ளமை குறிப்பிடத்தக்கது.

அரச அதிபர் எச்சரிக்கை..

சரியான சுகாதார நடைமுறைகள் பேணப்படாவிடின் சந்தை செயற்பாடுகளை இராணுவத்தினரின் ஒத்துழைப்புடன் நடத்த வேண்டிவரும் என்று மாவட்ட அரச அதிபர் சமன் பந்துலசேன எச்சரித்துள்ளார்.

கோவிட்-19 தாக்கம் மற்றும் அது தொடர்பில் முன்னெடுக்கப்படவுள்ள நடவடிக்கைகள், தொடர்பான விசேட கலந்துரையாடலொன்று வவுனியா மாவட்ட செயலகத்தில் நேற்று (24.04.2021) நடைபெற்றது.

இதில் கலந்துகொண்டு கருத்து தெரிவித்த போதே அவர் இவ்வாறு தெரிவித்தார்.தொடர்ந்து கருத்துதெரிவித்த அவர், சந்தை வியாபாரிகள் மிகவும் கட்டுப்பாட்டுடன் இருக்க வேண்டும். வெளிமாவட்டங்களில் இருந்தும் இங்கு வியாபாரிகள் வருகின்றனர்.

எனவே அந்த இடத்தில் ஒருவருக்கு தொற்று ஏற்பட்டால் பாரிய விளைவுகள் ஏற்படும் என்பதை நீங்கள் அறிந்திருக்க வேண்டும். அப்படி நடக்கும் பட்சத்தில் தினச்சந்தை செயற்பாடுகளை விசேட பொருளாதார மத்திய நிலையத்திற்கு மாற்ற வேண்டி ஏற்படும்.

அங்கும் உரிய நடைமுறைகள் பின்பற்றப்படாதவிடத்து கமநல திணைக்களங்களூடாக இராணுவத்தின் உதவியை பெற்றுக்கொண்டு விவசாயிகளின் பொருட்களை கொள்வனவு செய்வதற்கான நடவடிக்கைகளை நாங்கள் மேற்கொள்வோம்.

எனவே உங்களது ஏனைய உறுப்பினர்களிற்கு கோவிட் தொடர்பான உண்மை நிலையினை எடுத்துச்சொல்லி உரிய சுகாதார நடைமுறைகளை பின்பற்ற வேண்டும். கடந்த காலங்களில் ஏற்பட்ட இடர்பாடுகளிற்கு இடமளிக்க கூடாது என்றும் தெரிவித்துள்ளார்.

புகையிரத கடவை..

வவுனியாவில் புகையிரத பாதை மீள்புனரமைப்பு காரணமாக நகரசபை பூங்கா வீதியூடான போக்குவரத்து சுமார் ஒரு மணிநேரம் வரை பாதிப்படைந்திருந்துடன் மக்கள் மாற்று பாதையூடாக பயணித்திருந்தனர்.

வவுனியா மாவட்டத்திற்குட்பட்ட புகையிரத பாதைகளை மீள்புனரமைப்பு பணிகள் இடம்பெற்று வருகின்றன. குறித்த புனரமைப்பு பணி பொருட்களை ஏற்றிச் செல்லும் புகையிரதத்தின் உதவியுடன் இடம்பெற்று வருவதினால் நகரசபை பூங்கா வீதியூடான புகையிரத கடவை மூடப்பட்டது.

எவ்வித முன்னறிவித்தலும் இன்றி ஒரு மணிநேரமாக புகையிரத கடவை மூடப்பட்டமையினால் மக்கள் பல்வேறு சிரமங்களுக்கு முகங்கொடுத்திருந்ததுடன் மாற்று வீதியூடாக பயணித்திருந்தனர்.

தனியார் கல்லூரிகள்…

வவுனியா மாவட்டத்தில் கொரோனா தொற்றாளர்கள் அதிகரித்து வருகின்ற இந்நிலையில் மாவட்ட அரசாங்க அதிபர் தலமையில் வவுனியா மாவட்ட செயலக கேட்போர் கூடத்தில் விசேட கலந்துரையாடல் நேற்றையதினம் (24.04.2021) இடம்பெற்றது.

இக்கலந்துரையாடலில் மறு அறிவித்தல் வரை தனியார் கல்லூரி வகுப்புக்கள் , பிரத்தியோக வகுப்புக்கள் என்பனவற்றிக்கு தடை உட்பட பல்வேறு புதிய நடைமுறைகள் அமுல்ப்படுத்தப்பட்டதுடன் இதனை மீறி செயற்படுபவர்கள் மீதும் சட்ட நடவடிக்கை எடுக்கப்படுமெனவும் அரசாங்க அதிபர் தெரிவித்திருந்தார்.

இந்நிலையில் வவுனியா நகரின் சில தனியார் கல்லூரிகளின் நிர்வாகிகள் கல்வி நடவடிக்கை வழமை போல இடம்பெறும் என மாணவர் சமூகமளிக்குமாறு தெரிவித்துள்ளனர். பின்னர் இன்றையதினம் தனியார் கல்வி நிறுவனங்களுக்கு வருகை தந்த மாணவர்களை திருப்பியனுப்பிருந்தனர்.

அரசாங்க அதிபரின் உத்தரவினையடுத்து பெரும்பான்மையான தனியார் கல்லூரி நிறுவனங்கள் மூடப்பட்டுள்ள போதிலும் இவ்வாறான சில கல்லூரி நிர்வாகத்தினரின் செயற்பாடுகள் கண்டனத்துக்குறியது என பெற்றோர்கள் விசனம் தெரிவித்துள்ளனர்.

விபத்து..

வவுனியா ஈரட்டைபெரியகுளம் பகுதியில் இன்று (25.04.2021) காலை 9 மணியளவில் மோட்டார் சைக்கிள் – முச்சக்கரவண்டி மோதுண்டு விபத்துக்குள்ளானதில் ஒருவர் பலியாகியுள்ளதுடன் இருவர் படுகாயமடைந்துள்ளனர். குறித்த விபத்துச்சம்பவம் தொடர்பில் மேலும் தெரியவருகையில்,

ஈரட்டைபெரியகுளம் பகுதியிலிருந்து வவுனியா நோக்கி பயணித்த மோட்டார் சைக்கிளும் வவுனியா நகரிலிருந்து ஈரட்டைபெரியகுளம் ஊடாக பயணித்த முச்சக்கரவண்டியும் ஈரட்டைபெரியகுளம் பகுதியில் மோதுண்டு விபத்துக்குள்ளானதில்,

இருவர் படுகாயமடைந்த நிலையில் வவுனியா மாவட்ட பொது வைத்தியசாலையின் விபத்து பிரிவில் அனுமதிக்கப்பட்டுள்ளதுடன் ஒருவர் பலியாகியுள்ளார்.

குறித்த விபத்துச் சம்பவத்தில் முச்சக்கரவண்டியில் பயணித்த 10 வயதுடைய சிறுமியே இவ்வாறு பலியாகியுள்ளமையுடன் சிறுமியின் சடலம் பிரேத பரிசோதனைக்காக வைத்தியசாலை பிரேத அறையில் வைக்கப்பட்டுள்ளது.

விபத்து தொடர்பாக மேலதிக விசாரணைகளை ஈரட்டைபெரியகுளம் பொலிஸார் முன்னெடுத்து வருகின்றனர்.

புதிய நடைமுறைகள்..

வவுனியா மாவட்டத்தில் கொரோனா தொற்றாளர்கள் அதிகரித்து வருகின்ற இந்நிலையில் மாவட்ட அரசாங்க அதிபர் தலைமையில் வவுனியா மாவட்ட செயலக கேட்போர் கூடத்தில் விசேட கலந்துரையாடல் இன்று (24.04.2021) காலை இடம்பெற்றது.

நகரசபை அதிகாரிகள், சுகாதார அதிகாரிகள், இராணுவத்தினர், பொலிஸ் அதிகாரிகள், மாவட்ட செயலக உயர் குழுவினர், வர்த்தக சங்கத்தினர், பொது அமைப்புக்களின் பிரதிநிதிகள் என பலரின் பங்கு பற்றுதலுடன்,இக் கலந்துரையாடல் இடம்பெற்றிருந்ததுடன்,

இதன் போது பல்வேறு வவுனியா மாவட்டத்தில் கொரோனா வைரஸ் பரவலை கட்டுப்படுத்தும் முகமாக பல்வேறு நடைமுறைகள் அமுல்ப்படுத்தப்பட்டுள்ளன.

வவுனியா மாவட்டத்தில் தனியார் கல்வி நிறுவனங்களின் கல்வி நடவடிக்கை உட்பட பிரத்தியோக வகுப்புக்களுக்கு தடை , கழியாட்ட நிகழ்வுகளுக்கு தடை , மங்களகரமான மற்றும் துக்ககரமான நிகழ்வுகளுக்கு 150 நபர்கள் மாத்திரம் அனுமதி வழங்கப்படுவதுடன் இவைகள் அவ்விடத்தில் 50வீதமாக இருத்தல் வேண்டும் (மண்டபங்களின் இருக்கை எண்ணிக்கையில் 50வீதம்),

உணவகங்களின் இருக்கைகள் 50வீதமாக மாற்றப்படுதல் , நீச்சல் தாடாகம் பூட்டு , சிறுவர் பூங்கா பூட்டு போன்ற பல்வேறு திர்மானங்கள் நடைமுறைப்படுத்தப்பட்டுள்ளதுடன்,

வர்த்தக நிலையங்களில் ஊழியர்கள் முகக்கவசம் கட்டாயமாக்கப்பட்டுள்ளது மற்றும் வாடிக்கையாளர்கள் கை சுத்தம் செய்வதற்குரிய வசதிகள் ஏற்படுத்தி வழங்கப்படுதல் கட்டாயமாகும்.

மேலும் பொதுமக்களும் சீரான முறையில் முகக்கவசம் அணிவது அவசியமாகும் இவ்விடயங்களை மீறி செயற்படுவர்கள் மீது சட்ட நடவடிக்கை எடுக்கப்படும் எனவும் அத்துடன் வவுனியா மாவடத்தில் தங்கியிருந்து பணியாற்றும் வெளிமாவட்டத்தினை சேர்ந்தவர்கள் அவர்களின் சொந்த இடங்களுக்கு செல்வதற்கு சுகாதார பிரிவினரின் அனுமதியுடன் செல்ல முடியுமெனவும்,

இந்த நடைமுறைகள் மறுஅறிவித்தல் வரை நடைமுறையில் இருக்குமெனவும் வவுனியா மாவட்ட அரசாங்க அதிபர் எஸ்.எம்.சமன் பந்துலசேன தெரிவித்தார்.

ஒருவர் கைது..

வவுனியாவில் 42 வயதுடைய நபர் ஒருவர் ப.யங்கரவாத தடுப்பு பிரிவினரால் (ரி.ஐ.டி) நேற்று முன்தினம் (22.04) கைது செய்யப்பட்டுள்ளார்.

உ.யிரிழந்த விடுதலைப் புலி உறுப்பினர்களின் பெயரில் அடையாள அட்டை மற்றும் போலியான கடவுச் சீட்டுக்களை தயாரித்து நபர்களை வெளிநாடுக்களுக்கு அனுப்பி வைத்துள்ளதாக கிடைத்த தகவலையடுத்தே குறித்த நபர் கைது செய்யப்பட்டுள்ளார்.

கைது செய்யப்பட்ட நபரிடம் ப.யங்கரவாத தடுப்பு பிரிவுப் பொலிசார் மேலதிக வி.சாரணைகளை முன்னெடுத்துள்ளனர்.

பூந்தோட்டம் பகுதியில்..

வவுனியா பூந்தோட்டம் பிரதான வீதியில் பாரவூர்தியொன்று வீதியினை வீட்டு விலகி குடைசாந்தமையினால் அப்பகுதியூடான போக்குவரத்து 3 மணிநேரமாக ஸ்தம்பிதம் அடைந்துள்ளது. இவ் விபத்து சம்பவம் தொடர்பில் மேலும் தெரியவருகையில்,

குறித்த வீதியில் வயல் வெளியினை அண்மித்த பகுதியில் பாலம் நிர்மாண பணிகளுக்காக வீதியின் ஒர் பகுதியூடாக மாத்திரமே போக்குவரத்துக்கள் இடம்பெற்று வருகின்றன.

இந்நிலையில் இன்றையதினம் (24.04) பொருட்களை ஏற்றிய பாரவூர்தியொன்று பூந்தோட்டம் பிரதான வீதியூடாக பூந்தோட்டம் நோக்கி பயணித்துக்கொண்டிருந்த சமயத்தில் பாலம் நிர்மானப் பணி இடம்பெற்று வருகின்ற பகுதியின் மறுபக்கத்தில் பயணித்துக்கொண்டிருந்த சமயத்தில் பாரவூர்தியின் ஒர் பகுதி வீதியினை விட்டு கீழிறங்கி குடைசாந்துள்ளது.

இதன் காரணமாக வவுனியா – பூந்தோட்டம் வீதியூடான போக்குவரத்து சுமார் 3 மணிநேரமாக ஸ்தம்பிதம் அடைந்துள்ளதுடன் பொதுமக்கள் மாற்று பாதையூடான பயணத்தினை தொடர்ந்து வருகின்றனர்.

செயலமர்வு..

வடமாகாணத்தில் தமிழ் மொழி பேசும் இளைஞர், யுவதிகளை பொலிஸ் திணைக்களத்திற்குள் உள்ளீர்ப்பது தொடர்பான செயலமர்வு ஒன்று பொலிஸ் ஊடகப் பேச்சாளர் தலைமையில் வவுனியா மாவட்ட செயலக மாநாட்டு மண்டபத்தில் இன்று (23.04) இடம்பெற்றது.

இலங்கை பொலிஸ் திணைக்களம் மற்றும் வடமாகாண பொலிஸ் திணைக்களத்தின் ஏற்பாட்டில் நடைபெற்ற இந்த செயலமர்வில் பொலிஸ் ஊடகப் பேச்சாளர் அஜித் ரோஹண,

வடமாகாண சிரேஸ்ட பிரதி பொலிஸ் மா அதிபர் சஞ்சீவ தர்மரட்ண, வவுனியா மற்றும் மன்னார் மாவட்ட பிரதி பொலிஸ் மா அதிபர் லால் செனவிரட்ன உள்ளிட்ட பொலிஸ் அதிகாரிகள் கலந்து கொண்டு கருத்துரைகளை வழங்கினர்.

வடமாகாணத்தின் தமிழ் மொழி பேசும் இளைஞர், யுவதிகளுக்கான வேலைவாய்ப்பை பொலிஸ் திணைக்களம் ஊடாக வழங்குவதற்கு நடவடிக்கை எடுக்கப்பட்டுள்ளது.

அதற்கு தேவையான ஆலோசனை வழிகாட்ல்களை இளைஞர் யுவதிகளுக்கு வழங்குமாறும் இதன்போது பொலிஸ் அதிகாரிகளினால் கருத்துக்கள் முன்வைக்கப்பட்டது.

குறித்த கலந்துரையாடலில் மாவட்ட அரச அதிபர் சமன் பந்துல சேன, மேலதிக அரசாங்க அதிபர் தி.திரேஸ்குமார், வவுனியா தெற்கு வலயக் கல்வித் திணைக்கள அதிகாரிகள், வவுனியா வடக்கு கல்வி வலய அதிகாரிகள், படசாலை அதிபர்கள், பிரதேச செயலாளர்கள், பிரதேச செயலக இளைஞர் வலிவூட்டல் உத்தியோகத்தர்கள், கல்வி துறை சார்ந்தோர் எனப் பலரும் கலந்து கொண்டனர்.