வவுனிக்குளத்தில்..

முல்லைத்தீவு – வவுனிக்குளத்திற்குள் பட்டா வாகனம் கவிழ்ந்து விபத்துக்குள்ளானதில் இருவர் நீரில் மூழ்கி காணாமல் போயுள்ளனர். குறித்த சம்பவம் இன்று (19.12.2020) மாலை 4.40 மணியளவில் இடம்பெற்றுள்ளது.

வவுனிக்குளம் அணைக்கட்டு வழியாக பட்டா வாகனத்தில் தந்தையும் மூன்று பிள்ளைகளும் சென்றுள்ளனர். இதன்போது கட்டுப்பாட்டை இழந்த வாகனம் அணைக்கட்டிலிருந்து கவிழ்ந்து குளத்திற்குள் விழுந்துள்ளது.

இதன்போது வாகனத்திலிருந்த ஒரு பிள்ளை தப்பி கரை ஏறியுள்ள போதும் தந்தையையும், இரு பிள்ளையும் நீரில் மூழ்கி காணாமல் போயுள்ளனர்.

இந்நிலையில் வாகனத்தை மீட்டு காணாமல் போனவர்களை தேடும் நடவடிக்கை மக்கள் மற்றும் பொலிஸாரால் மேற்கொண்டதுடன் நீரில் முழ்கிய நிலையில் காணப்பட்ட ஒர் பிள்ளையை பொது மக்கள் மீட்டெடுத்து மாங்குளம் வைத்தியசாலைக்கு எடுத்து சென்றனர்.

காணாமல் போனவர்களை தேடும் நடவடிக்கை தொடர்ந்து இடம்பெற்றுவருகின்றது.

கொரோனா..

கொழும்பு முகத்துவாரம் பிரதேசத்தில் உள்ள முதியோர் இல்லம் ஒன்றில் முதியவர் உயிரிழந்ததை அடுத்து மேற்கொள்ளப்பட்ட மருத்துவப் பரிசோதனையில் 45 முதியவர்களுக்கு கொரோனா வைரஸ் தொற்றி இருப்பது கண்டறியப்பட்டுள்ளது.

முதியோர் இல்லத்தில் தங்கியிருக்கும் 98 முதியோருக்கு PCR பரிசோதனை நடத்தப்பட்டுள்ளதுடன், அவர்களில் 45 பேருக்கு கொரோனா தொற்றி இருப்பது உறுதியாகியுள்ளது.

இந்த முதியோரில் 6 பேர் தற்போது வைத்தியசாலையில் அனுமதிக்கப்பட்டுள்ளனர். முதியோர் இல்லத்திற்கு கொரோனா வைரஸ் எப்படி பரவியது என்பது இன்னும் உறுதிப்படுத்தப்படவில்லை.

கொரோனா தொற்றுக்கு உள்ளானவர்கள் 75 வயதுக்கும் மேற்பட்டவர்கள் என கொழும்பு மாநகர சுகாதார வைத்திய அதிகாரி மருத்துவர் ருவான் விஜயமுனி தெரிவித்துள்ளார்.

இராணுவ தளபதி எச்சரிக்கை..

பண்டிகை காலப்பகுதியில் பயண கட்டுப்பாடுகள் விதிப்பதற்கான வாய்ப்புகள் உள்ளதாக இராணுவ தளபதி ஷவேந்திர சில்வா தெரிவித்துள்ளார்.

பண்டிகை காலப்பகுதியில் தனிமைப்படுத்தல் ஊரடங்கு சட்டம் அமுல்படுத்துவது தொடர்பில் இதுவரையில் தீர்மானங்கள் மேற்கொள்ளப்படவில்லை என இராணுவ தளபதி குறிப்பிட்டுள்ளார்.

எனினும் எதிர்வரும் நத்தார் பண்டிகை காலப்பகுதியில் கொரோனா பரவலை தடுப்பது தொடர்பில் மேற்கொள்ளப்படும் தீர்மானங்களின் போது வார இறுதியில் கிடைக்கும் தரவுகளின் அடிப்படையில் தீர்மானம் மேற்கொள்ளப்படும் என அவர் தெரிவித்தார்.

மேல் மாகாணத்தில் இருந்து வெளியேறுவதனை முடிந்தஅளவு குறைத்துக் கொள்ளுங்கள் என இராணுவ தளபதி நாட்டு மக்களிடம் கேட்டுக்கொண்டுள்ளார். எந்தவொரு சந்தர்ப்பத்திலும் பயணக்கட்டுப்பாடுகள் விதிப்பதற்கான வாய்ப்புகள் உள்ளதாக இராணுவ தளபதி மேலும் தெரிவித்துள்ளார்.

நாளை இரவு..

நாளை இரவு(20.12.2020), வானில் விசேட கிரகங்கள் ஒன்று சேர்வதை கண்டுகொள்ள முடியும் என வானியல் நிபுணர் அனுர சி பெரேரா தெரிவித்துள்ளார்.

வியாழன் மற்றும் சனி கிரகங்கள் இவ்வாறு ஒன்றுசேரவுள்ளன. இது மிகவும் அரிய சந்தர்ப்பமாகும். மாலை 6.45 மணியளவில் இதன் உச்ச நிலையை கண்காணிக்க முடியும்.

800 வருடங்களுக்கு ஒரு தடவை இவ்வாறு கிரகங்கள் ஒன்றுசேர்கின்றன. இதனை வெற்றுக் கண்களால் பார்க்க முடியும். அதேபோல், தொலைநோக்கி ஊடாகவும் பார்க்கலாம் எனவும் அவர் மேலும் தெரிவித்துள்ளார்.

சமூக ஊடகப் பயனர்கள்..

சமூக ஊடகப் பயனர்கள் பதிவு செய்யப்பட உள்ளதாக அரசாங்கம் அறிவித்துள்ளது. ஊடக அமைச்சர் கெஹலிய ரம்புக்வெல்ல நேற்றைய தினம் கண்டியில் வைத்து இதனைத் தெரிவித்துள்ளார்.

அனைத்து வகையான சமூக ஊடகங்களை பயன்படுத்தும் பயனர்களையும் பதிவிற்கு உட்படுத்தும் நடவடிக்கைகள் ஆரம்பிக்கப்படும் என அவர் குறிப்பிட்டுள்ளார். பிழையான தகவல்கள் வெளியிடப்படுவதனை தடுக்கும் வகையில் சமூக ஊடகங்கள் கண்காணிக்கப்பட உள்ளதாகத் தெரிவித்துள்ளார்.

தொடர்பாடலின் மிகவும் வலுவான ஓர் ஊடகமான சமூக வலையமைப்புக்களை கிரமப்படுத்துவது அவசியமானது என அவர் வலியுறுத்தியுள்ளார்.

-தமிழ்வின்-

இலங்கையில்..

இலங்கையில் பாரியளவு உணவுத் தட்டுப்பாடு ஏற்படக்கூடிய அபாயம் நிலவுவதாக உலக உணவுத் திட்டம் எச்சரிக்கை விடுத்துள்ளது. கொவிட்-19 நோய்த் தொற்றினால் நாட்டில் இருபத்து ஐந்து வீதமானவர்களுக்கு உணவுத் தட்டுப்பாடு ஏற்படக்கூடிய சாத்தியம் உண்டு என தெரிவிக்கப்படுகின்றது.

உலக உணவுத் திட்டத்தின் எச்சரிக்கை குறித்து நீர்ப்பாசன அமைச்சு அமைச்சரவைக்கு அறிவித்துள்ளது. உணவுப் பிரச்சினைகயை எதிர்நோக்கக்கூடிய நாடுகளின் வரிசையில் இலங்கையையும் உலக உணவுத் திட்டம் உள்ளடக்கியுள்ளது.

உணவுப் பொருட்கள் இறக்குமதிக்கான கட்டுப்பாடுகள் காரணமாக இந்த நிலைமை ஏற்படக்கூடிய அபாயம் காணப்படுவதாக உலக உணவுத் திட்டம் தெரிவித்துள்ளது. எனவே மாற்று வழிகளை பின்பற்ற வேண்டியது அவசியமானது என வலியுறுத்தப்பட்டுள்ளது.

விவசாயத்தை மேம்படுத்துவதற்கும், குளங்கள் புனரமைப்பு பணிகளை முன்னெடுப்பதற்கும் நடவடிக்கை எடுக்கப்பட வேண்டுமென யோசனை முன்வைக்கப்பட்டுள்ளது.

-தமிழ்வின்-

கொழும்பில்..

கொழும்பு – நாவல, சேனாநாயக்க மாவத்தையில் திடீரென விழுந்து உயிரிழந்த பெண்ணொருவரின் சடலம் மீட்கப்பட்டுள்ளது.

வெலிக்கட பொலிஸாருக்கு கிடைத்த தகவலுக்கமைய இந்த பெண்ணின் சடலம் கண்டுபிடிக்கப்பட்டுள்ளது. உயிரிழந்தவர் நாவல, ராஜகிரிய பிரதேசத்தை சேர்ந்த 62 வயதுடைய பெண் என தகவல் வெளியாகியுள்ளது.

தனது மகனின் வீட்டிற்கு சென்ற நிலையில் மீண்டும் வீடு திரும்பிய போதே இந்த பெண் திடீரென விழுந்து மரணமடைந்துள்ளதாக உறவினர்கள் தெரிவித்துள்ளனர். உயிரிழந்த பெண் இதய சத்திரசிகிச்சை செய்துள்ளதாக தகவல் வெளியாகியுள்ளது.

சர்வதேச விமான நிலையம்..

எதிர்வரும் 26ஆம் திகதி கட்டுநாயக்க சர்வதேச விமான நிலையம் மற்றும் மத்தல விமான நிலையம் ஆகியவற்றை மீண்டும் திறப்பது தொடர்பில் உறுதியான தீர்மானத்திற்கு வரவில்லை என, விமான நிலையம் மற்றும் விமான சேவை நிறுவனத்தின் தலைவர் ஜீ.ஏ.சந்திசிரி தெரிவித்துள்ளார்.

எனினும் அதற்கு தேவையான சூழல் மற்றும் உட்கட்டமைப்பு வசதிகளை விரைவாக தயாரித்து வருவதாக அவர் குறிப்பிட்டுள்ளார். விமான நிலையத்தை மீண்டும் திறப்பது தொடர்பிலான ஒத்திகை ஒன்று எதிர்வரும் 23 ஆம் திகதி நடத்துவதற்கு நடவடிக்கை மேற்கொள்ளப்பட்டுள்ளதாக விமான நிலைய தலைவர் தெரிவித்துள்ளார்.

இதேவேளை கடந்த செப்டெம்பர் மாதம் முதல் டிசம்பர் மாதம் 16ஆம் திகதி வரையிலான காலப்பகுதியில் தனிமைப்படுத்தலை நிறைவு செய்த விமான பயணிகள், கட்டுநாயக்க விமான நிலையத்திற்கு வருகைதந்து தீர்வை வரியற்ற பொருட்களை கொள்வனவு செய்ய முடியும் என அவர் மேலும் தெரிவித்துள்ளார்.

விபத்தில்..

மட்டக்களப்பு – மீராவோடை பிரதேசத்தில் இன்று (19.12) இடம்பெற்ற விபத்தில் இளைஞர் ஒருவர் உயிரிழந்துள்ளதுடன், மற்றுமொருவர் காயமடைந்துள்ளதாக வாழைச்சேனை பொலிஸார் தெரிவித்துள்ளனர்.

உழவு இயந்திரமொன்று மீராவோடை பகுதியில் இருந்து கறுவாக்கேணி நோக்கி சென்று கொண்டிருந்த போது எதிரே வந்த பட்டா வாகனத்திற்கு இடம்கொடுத்த சந்தர்ப்பத்தில்,

உழவு இயந்திரத்திற்கு பின்னால் வந்த மோட்டார் சைக்கிள் உழவு இயந்திரத்தை முந்திச்செல்வதற்கு முயற்சித்த போதே உழவு இயந்திரத்தில் மோதுண்டு இந்த விபத்து இடம்பெற்றுள்ளதாக பொலிஸார் தெரிவித்துள்ளனர்.

இதன்போது குறித்த மோட்டார் சைக்கிளில் தந்தையும், மகனும் பயணித்துள்ளதாக தெரிவிக்கப்படுகின்றது.

விபத்தில் வாழைச்சேனை – விநாயகர்புரம் பகுதியைச் சேர்ந்த ஜெயசீலன் கிரிஜன் (வயது – 18) என்பவர் ஸ்தலத்திலேயே உயிரிழந்துள்ளதுடன்,

தந்தையான சிவப்பிரகாசன் ஜெயசீலன் என்பவர் காயமடைந்த நிலையில் வாழைச்சேனை ஆதார வைத்தியசாலையில் அனுமதிக்கப்பட்டு,மேலதிக சிகிச்சைக்காக மட்டக்களப்பபு போதனா வைத்தியசாலைக்கு மாற்றப்பட்டுள்ளார்.

கொரோனா..

நாட்டில் கொவிட் மரணங்களின் எண்ணிக்கை 165 ஆக உயர்வடைந்துள்ளது. இன்றைய தினம் ஐந்து கொவிட் மரணங்கள் தொடர்பில் அரசாங்கத் தகவல் திணைக்களம் வெளியிட்டுள்ள அறிக்கையில் தகவல்கள் வெளியிடப்பட்டுள்ளது.

1. அகலவத்தை பிரதேசத்தைச் சேர்ந்த 72 வயதான ஆண் ஒருவர் கடந்த 11ம் திகதி அகலவத்தை வைத்தியசாலையில் உயிரிழந்துள்ளார். கொவிட் மற்றும் உயர் குருதியழுத்தம் காரணமாக ஏற்பட்ட மாரடைப்பினால் இவர் உயிரிழந்துள்ளார்.

2. மக்கோன பிரதேசத்தைச் சேர்ந்த 86 வயதான பெண் ஒருவர் கடந்த 15ம் திகதி வீட்டிலேயே உயிரிழந்துள்ளார். கொவிட் மற்றும் உயர் குருதியழுத்தம் காரணமாக ஏற்பட்ட மாரடைப்பினால் இவர் உயிரிழந்துள்ளார்.

3. கொழும்பு 15 பிரதேசத்தைச் சேர்ந்த 76 வயதான ஆண் ஒருவர் இன்றைய தினம் ஹோமாகம வைத்தியசாலையில் உயிரிழந்துள்ளார். சிறுநீரக நோய் மற்றும் கொவிட், நிமோனியா காரணமாக இவர் உயிரிழந்துள்ளார்.

4. மஹரகம பிரதேசத்தைச் சேர்ந்த 50 வயதான ஆண் ஒருவர் இன்றைய தினம் ஹோமாகம வைத்தியசாலையில் உயிரிழந்துள்ளார். கொவிட் ,நிமோனியா காரணமாக இவர் உயிரிழந்துள்ளார்.

5. வத்துபிட்டிவல பிரதேசத்தைச் சேர்ந்த 86 வயதான ஆண் ஒருவர் இன்று வீட்டிலேயே உயிரிழந்துள்ளார். சிறுநீரக நோய் மற்றும் கொவிட் காரணமாக இவர் உயிரிழந்துள்ளார்.

சேவைப் பணிப்பாளர் நாயகத்தின் உறுதிப்படுத்தல்களுக்கு அமைய அரசாங்கத் தகவல் திணைக்களம் இந்த மரண விபரங்களை வெளியிட்டுள்ளது.