மடிக்கணனி..

பல்கலைக்கழக மாணவ மாணவியர் அனைவருக்கும் மடிக்கணனி வழங்கும் திட்டமொன்று முன்னெடுக்கப்பட உள்ளது. இம்முறை பல்கலைக்கழகத்திற்கு தெரிவாகியுள்ள நாற்பத்து ஓராயிரம் மாணவ மாணவியருக்கும் கடன் அடிப்படையில் மடிக்கணனிகளை வழங்குவதற்கு பல்கலைக்கழக மானியங்கள் ஆணைக்குழு தீர்மானித்துள்ளது.

அதிகபட்சமாக ஒரு லட்சம் ரூபா வரையில் கடன் வழங்கப்பட உள்ளதாகவும் இதன் ஊடாக மடிக்கணனி கொள்வனவு செய்ய ஏற்பாடு செய்யப்பட்டுள்ளது.

மாணவ மாணவியர் பட்டம் பெற்றுக்கொள்ளும் வரையில் மடிக்கணனிக்கான கடன் தொகையை செலுத்த தேவையில்லை எனவும் கற்கும் காலத்தில் மாதாந்த வட்டியைத் தொகையை மட்டுமே செலுத்த நேரிடும் எனவும் தெரிவிக்கப்படுகின்றது.

இந்த திட்டத்திற்காக பல்கலைக்கழக மானியங்கள் ஆணைக்குழு அரச வங்கியொன்றுடன் இணக்கப்பாட்டை ஏற்படுத்திக் கொண்டுள்ளது. மிகக் குறைந்த வட்டி வீத அடிப்படையில் மடிக் கணனிகள் வழங்கப்பட உள்ளது. மாணவர்கள் தங்களுக்கு விருப்பமான ஓர் நிறுவனத்தில் மடிக் கணனிகளை கொள்வனவு செய்ய முடியும் என அறிவிக்கப்பட்டுள்ளது.

றிஜ்வே மருத்துவமனையில்..

கொழும்பு றிஜ்வே மருத்துவமனையில் கொரோனா வைரஸ் தொற்றிய 20 சிறுவர்கள் கண்டறியப்பட்டுள்ளனர். இதுவரை றிஜ்வே மருத்துவமனையில் 32 கொரோனா வைரஸ் தொற்றாளர்கள் அடையாளம் காணப்பட்டுள்ளதாக அந்த மருத்துவமனையின் பணிப்பாளர் ஜீ. வீரசூரிய தெரிவித்துள்ளார்.

மருத்துவமனையில் அடையாளம் காணப்பட்ட இந்த கொரோனா தொற்றாளர்களில் 12 பேர் தாய்மார்கள் எனவும் ஏனையோர் சிறுவர்கள் எனவும் அவர் கூறியுள்ளார்.

அதேவேளை றிஜ்வே மருத்துவமனையில் சேவையாற்றும் மருத்துவர் ஒருவருக்கு கொரோனா வைரஸ் தொற்றி இருப்பது நேற்று கண்டறியப்பட்டுள்ளது.

எவ்வாறாயினும் ஏற்பட்டுள்ள இந்த நிலைமை காரணமாக மருத்துவமனைக்கு வருவதற்கு அச்சம் கொள்ள தேவையில்லை. மருத்துவமனையில் சிகிச்சை சேவைகள் எந்த தடையும் இன்றி முன்னெடுக்கப்பட்டு வருவதாகவும் வீரசூரிய குறிப்பிட்டுள்ளார்.

கொரோனா மூன்றாவது அலை..

மேல் மாகாணத்தில் அமுலிலுள்ள தனிமைப்படுத்தல் ஊரடங்கு சட்டம் நீக்கப்பட்டாலும், கொரோனா பரவலின் மூன்றாம் அவதான மட்டத்திற்கு இலங்கை வந்துள்ளதாக சுகாதார அமைச்சு அறிவித்துள்ளது. இதனால் 55 துறைகள் பின்பற்ற வேண்டிய புதிய வழிகாட்டல்களை சுகாதார அமைச்சு வெளியிட்டுள்ளது.

அதற்கமைய, தாதி, போக்குவரத்து, வாடகை சேவை, பயன்பாட்டு சேவைகள், அரச அலுவலகங்கள், தனியார் சேவைகள், பல்பொருள் அங்காடிகள், வணிக வளாகங்கள், நிதி நிறுவனங்கள் மற்றும் வங்கிகள், ஆடை விற்பனை நிலையங்கள், விவசாயம், பொருளாதார மையங்கள்,

பேக்கரிகள், வீதியோர விற்பனைகள், நடமாடும் விற்பனைகள் உட்பட 55 துறைகளுக்கு இந்த வழிகாட்டல்கள் வெளியிடப்பட்டுள்ளதாக சுகாதார சேவை பணிப்பாளர் வைத்தியர் அசேன குணவர்தன தெரிவித்துள்ளார்.

ஒன்றரை மீற்றர் தூரத்தில் ஒவ்வொருவரும் பயணிக்க கூடிய முறையில் பல்பொருள் அங்காடிகள் மற்றும் வணிக வளாகங்களை திறந்து வைப்பதற்கு அமைச்சு அனுமதி வழங்கியுள்ளது.

நிர்மாண நடவடிக்கைகள், பாடசாலைகள், பல்கலைக்கழகங்கள் மற்றும் உயர் கல்வி நிறுவனங்கள், மேலதிக வகுப்புகள், உட்புற விழாக்கள், வெளிப்புற விழாக்கள், பொதுக் கூட்டங்கள், திரையரங்குகள், குழந்தைகள் பூங்காக்கள், உயிரியல் பூங்காக்கள்,

திருவிழாக்கள், கடற்கரை விருந்துகள், நீச்சல் குளங்கள், கேசினோக்கள், மசாஜ் நிலையங்கள் மற்றும் தங்குமிடம் வழங்கும் இடங்கள் போன்றவற்றை தொடர்ந்து மூடி வைப்பதாக சுகாதார அமைச்சு குறிப்பிட்டுள்ளது.

-தமிழ்வின்-

20 நிமிடங்களில்..

நபர் ஒருவர் கொரோனா தொற்றினால் பாதிக்கப்பட்டுள்ளாரா என்பதை கண்டறிய 20 நிமிடங்களுக்குள் உடனடி ஆன்டிபாடி சோதனைகளை முன்னெடுக்க சுகாதார அமைச்சகம் நடவடிக்கை எடுத்துள்ளது.

இந்த சோதனை முறை பி.சி.ஆர் பரிசோதனையை விட வேகமாக நோயாளிகளை அடையாளம் காண முடியும் என சுகாதார அமைச்சின் துணை இயக்குநர் (ஆய்வக சேவைகள்) வைத்தியர் சமன் ரத்நாயக்க தெரிவித்தார்.

இந்த விரைவான ஆன்டிபாடி சோதனைகள் வைரஸின் பரவலைக் கட்டுப்படுத்த உதவும் என்று மருத்துவ நிபுணர்கள் சுட்டிக்காட்டுகின்றனர், இது எதிர்காலத்தில் சீரற்ற சோதனைகளுக்கு வழிவகுக்கும்.

இதன்படி, உலக சுகாதார அமைப்பால் அங்கீகரிக்கப்பட்ட 200,000 செட் உடனடி ஆன்டிபாடி சோதனை கருவிகள் தென் கொரியாவிலிருந்து இறக்குமதி செய்யப்பட்டுள்ளன,

மேலும் இதுபோன்ற 800,000 கருவிகளை அடுத்த வாரம் இறக்குமதி செய்ய சுகாதார அமைச்சகம் நடவடிக்கை எடுத்துள்ளது என்று வைத்தியர் சமன் ரத்நாயக்க தெரிவித்தார்.

முதலில் இறக்குமதி செய்யப்படும் இந்த கருவிகள், முதலீட்டு வாரியம் மற்றும் ஏற்றுமதி மேம்பாட்டு வாரியத்தின் 800,000 தொழிற்சாலை தொழிலாளர்கள் மீது சோதனைகளுக்கு உட்படுத்தப்படும் என அவர் மேலும் தெரிவித்துள்ளார்.

இராணுவ தளபதி..

மேல் மாகாணத்தில் கொரோனா வைரஸ் பரவல் சிறப்பாக கட்டுப்பாட்டில் கொண்டு வரப்பட்டுள்ளதாக கொரோனா வைரஸ் பரவல் தடுப்பு தேசிய செயற்பட்டு மத்திய நிலையத்தின் பிரதானி இராணுவ தளபதி சவேந்திர சில்வா தெரிவித்துள்ளார்.

இதனடிப்படையில் மேல் மாகாணத்தில் அமுல்படுத்தப்பட்டுள்ள ஊரடங்கு சட்டத்தை எதிர்வரும் திங்கட் கிழமை நீக்க எதிர்பார்த்துள்ளதாகவும் அவர் கூறியுள்ளார்.

அதேவேளை இந்த காலப்பகுதிக்குள் மேல் மாகாணத்தில் உள்ள சகல கொரோனா தொற்றாளர்களை அடையாளம் காணுமாறு ஜனாதிபதி உத்தரவிட்டுள்ளதாகவும் இராணுவ தளபதி குறிப்பிட்டுள்ளார்.

மக்கள் கவனமாக இருந்தால், இந்த பிரச்சினை தீர்க்க முடியும். இதனால், சுகாதார பரிந்துரைகளுக்கு அமைய செயற்படுமாறு மக்களிடம் கோரிக்கை விடுக்கின்றேன்.

அப்படி செயற்பட்டால், இந்த பிரச்சினையை விரைவாக தீர்க்க முடியும். தற்போது நிலைமை சிறப்பாக உள்ளது. முழு நாட்டையும் முடக்க வேண்டிய அவசியமில்லை.

கொரோனா வைரஸ் பரவலின் இரண்டாவது அலை ஏற்பட்ட விதம் தொடர்பான சில தகவல்கள் கிடைத்துள்ளன. அடுத்த வாரமளவில் இது குறித்த சரியான தகவல்களை வெளியிட முடியும் என நம்புவதாகவும் சவேந்திர சில்வா குறிப்பிட்டுள்ளார்.

தேசிய அடையாள அட்டை..

தேசிய அடையாள அட்டையின் தகவல்களை இணைய முறை ஊடாக சான்றிதழ் வழங்குவதற்கு ஆட்பதிவு திணைக்களம் விசேட வேலைத்திட்டம் ஒன்று அறிமுகம் செய்துள்ளது.

எதிர்வரும் நாட்களில் வெளியிடப்படவுள்ள இலத்திரனியல் தேசிய அடைய அட்டை செயற்பாட்டிற்கு இந்த திட்டத்தை இடைக்கால தீர்வாக அறிமுகப்படுத்தி வைக்கவுள்ளதாக திணைக்களத்தின் ஆணையாளர் வியானி குணதிலக்க தெரிவித்துள்ளார்.

இலங்கையில் உள்ள வங்கிகள், நிதி நிறுவனம், அரச கூட்டுத்தாபனம், அரசியலமைப்பு சபை, அரசாங்கத்திற்கு இணைக்கப்பட்டுள்ள நிறுவனங்கள் அல்லது எழுத்துப்பூர்வ சட்டத்தின் கீழ் இலங்கையில் நிறுவப்பட்டுள்ள நிறுவனங்களில் தேவைகளை பூர்த்தி செய்யும் போது வாடிக்கையாளரின் விருப்பப்படி மட்டுமே அடையாள அட்டை தகவல்களை சான்றளிக்க சந்தர்ப்பம் வழங்கப்பட்டுள்ளது.

எனினும் வாடிக்கையாளர்களின் தகவல்களை சான்றளிப்பதற்காக குறித்த நிறுவனங்களினால் ஆட்பதிவு திணைக்களங்களுடன் முழுமையான ஒப்பந்ததிற்கு வர வேண்டும்.

தனிப்பட்ட அடையாளத்தை நம்பகத்தன்மையுடன் சரி பார்க்கவும், தேசிய அடையாள அட்டையை தவறான பயன்படுத்தி மேற்கொள்ளப்படும் பல்வேறு மோசடிகளை தடுப்பதற்காகவும் இந்த நடவடிக்கை எடுக்கப்பட்டுள்ளதாக ஆணையாளர் மேலும் தெரிவித்துள்ளார்.

கொரோனா..

வடமராட்சியில் கரவெட்டி சுகாதார மருத்துவ அதிகாரி பிரிவில் ஒரே குடும்பத்தைச் சேர்ந்த மூவருக்கு கொரோனா வைரஸ் தொற்று உள்ளமை இன்று கண்டறியப்பட்டுள்ளது.

இரண்டு பெண்களுக்கும், சிறுவன் ஒருவனுக்குமே கொரோனா தொற்று ஏற்பட்டுள்ளதாக யாழ்ப்பாணம் போதனா வைத்தியசாலை பணிப்பாளர் மருத்துவர் த.சத்தியமூர்த்தி அறிவித்துள்ளார்.

கடந்த மாதம் கொழும்பு பேலியகொட மீன் சந்தைக்குச் சென்று வந்தவருக்கு கொரோனா வைரஸ் தொற்று உள்ளமை கண்டறியப்பட்டு சிகிச்சை பெற்று வரும் நபரின் உறவினர்கள் மூவரே கொரோனா வைரஸ் தொற்றால் பாதிக்கப்பட்டுள்ளனர்.

அவர்கள் மூவரும் ஒரு வாரத்துக்கு மேலாக சுயதனிமைப்படுத்தலில் கண்காணிக்கப்பட்டவர்கள். அவர்களிடம் நேற்றைய தினம் பெறப்பட்ட மாதிரிகளின் அடிப்படையில் யாழ். போதனா வைத்தியசாலையில் இன்று இடம்பெற்ற பி.சி.ஆர் பரிசோதனையில் கொரோனா வைரஸ் தொற்று நோய் உள்ளமை உறுதிப்படுத்தப்பட்டுள்ளது.

இது தவிர ஏற்கனவே கொரோனா தொற்று உறுதிப்படுத்தப்பட்ட தென்பகுதியைச் சேர்ந்தவர்கள் தற்போது மருதங்கேணி வைத்தியசாலையில் சிகிச்சை பெறுகின்றனர். அவர்களிடம் செய்யப்பட்ட பரிசோதனையில் 3 பேருக்கு இன்னும் தொற்று இருப்பதாக உறுதிப்படுத்தப்பட்டுள்ளது.