இலங்கையில் பாடசாலைகளை திறப்பது தொடர்பில் கல்வி அமைச்சர் வெளியிட்டுள்ள தகவல்!!

பாடசாலைகளை திறப்பது தொடர்பில்..

எதிர்வரும் மே மாதம் 11ஆம் திகதி பாடசாலைகளை திறப்பது குறித்து திடமான தீர்மானங்களை எடுக்க முடியவில்லை என அறிவிக்கப்பட்டுள்ளது. இந்த விடயத்தை கல்வி அமைச்சர் டலஸ் அழப்பெரும தெரிவித்துள்ளார்.

கொரோனா வைரஸ் தொற்று காரணமாக கடந்த மார்ச் மாதம் 12ஆம் திகதி முதல் நாட்டின் அனைத்து பாடசாலைகளும் மூடப்பட்டன. இதன்போது ஏப்ரல் 20 ஆம் திகதி வரையில் பாடசாலைகளுக்கு விடுமுறை வழங்கப்பட்டிருந்தன.

என்ற போதும் நாட்டில் தற்போது உள்ள கொரோனா வைரஸ் தொற்று நிலையை கருத்தில் கொண்டு பாடசாலைகளை திறக்கும் திகதி மே மாதம் 11ஆம் திகதிக்கு பிற்போடப்பட்டுள்ளது.

இந்த நிலையில் இது தொடர்பில் சிங்கள ஊடகமொன்றுக்கு கருத்து தெரிவிக்கும் போதே கல்வி அமைச்சர் குறித்த விடயத்தை தெரிவித்துள்ளார். அவர் மேலும் கூறுகையில், கொரோனா நோய் தொற்று நிலைமையை கருத்திற் கொண்டே பாடசாலைகளை திறப்பது பற்றி தீர்மானிக்கப்படும்.

பாடசாலைகளை திறப்பது தொடர்பில் சுகாதாரத்துறையினரின் பூரண அனுமதியுடன் தீர்மானங்கள் எடுக்கப்படும் என குறிப்பிட்டுள்ளார்.

இலங்கையில் மக்கள் கூடும் வகையிலான அனைத்து நிகழ்வுகளுக்கும் தடை!!

அனைத்து நிகழ்வுகளுக்கும்..

மக்கள் கூடும் வகையிலான அனைத்து நிகழ்வுகளுக்கும் அரசாங்கம் தடை விதித்துள்ளது. நாட்டில் நிலவி வரும் அசாதாரண சூழ்நிலையை கருத்திற் கொண்டு அரசாங்கம் இந்த தீர்மானம் எடுத்துள்ளது.

குறிப்பாக கொரோனா வைரஸ் தொற்று சமூகத்தில் பரவுவதனை தவிர்க்கும் நோக்கில் இவ்வாறு பொது நிகழ்வுகளுக்கு தடை செய்யப்பட்டுள்ளது.

பொதுக் கூட்டங்கள், சுற்றுலாக்கள், பேரணிகள் உள்ளிட்ட பல்வேறு மக்கள் கூட்டமாக குழுமியிருக்கக் கூடிய நிகழ்வுகளுக்கு அரசாங்கம் தடை விதித்துள்ளது.

உலகம் முழுவதும் கொரோனா வைரஸ் தொற்று வேகமாக பரவி வரும் நிலையில், இலங்கையில், 248 பேர் பாதிக்கப்பட்டுள்ளதுடக், ஏழு பேர் உயிரிழந்துள்ளமை குறிப்பிடத்தக்கது.

ஒரு மாத காலத்தில் காலிமுகத்திடலில் ஏற்பட்ட மாற்றம்!!

காலிமுகத் திடல்

ஒரு மாத காலம் ஊரடங்குச் சட்டம் அமுலில் இருக்கும் நிலையில் நீண்டகாலத்திற்கு பின்னர் கொழும்பு காலிமுகத் திடல் புற்களால் நிறைந்து பச்சையாக காட்சியளிக்கின்றது. காலிமுகத் திடல் மைதானம் பிரித்தானியர் ஆட்சிக்காலத்தில் கடந்த 1800ம் ஆண்டு உருவாக்கப்பட்டது.

அந்த காலத்தில் பொது மக்கள் பெருமளவில் அங்கு செல்வதில்லை என்பதால், மைதானத்தில் புற்கள் மனிதர்களின் கால் படாது பச்சை நிறமாகவே இருந்து வந்தது.

எனினும் அதற்கு பின்னர் காலிமுகத் திடல் பொழுது போக்கும் இடம் என்பதால், மக்கள் நடமாட்டம் அதிகமாக காணப்படுவது வழக்கம், இதனால், திடலில் உள்ள புல் மக்களின் நடமாட்டம் காரணமாக ஆங்காங்கே காணாமல் போயிருந்தது.

இந்த நிலையில் கடந்த ஒரு மாத கால ஊரடங்குச் சட்டம் காரணமாக மக்கள் நடமாட்டம் இன்றி காணப்பட்ட காலிமுகத்திடலின் சுமார் ஒரு கிலோ மீற்றர் பகுதி புற்கள் நிறைந்து பச்சை நிறமாக காட்சியளிப்பதை காணமுடிகிறது.

இலங்கையில் கொரோனா தொற்று அபாயம் முழுமையாக நீங்கவில்லை : இன்று வெளியிடப்பட்டுள்ள அறிவிப்பு!!

கொரோனா தொற்று..

கொரோனா வைரஸ் தொற்று அபாயம் முழுமையான அளவில் நீங்கவில்லை என சுகாதார சேவைகள் பணிப்பாளர் நாயகம் அனில் ஜாசிங்க இன்றைய தினம் அறிவித்துள்ளார்.

சில ஊடகங்களில் தகவல் வெளியிடப்பட்டது போன்று கொரோனா வைரஸ் தொற்று முழு அளவில் நீங்கவில்லை என அவர் சுட்டிக்காட்டியுள்ளார். எவ்வாறெனினும், கொரோனா வைரஸ் தொற்று இலங்கையில் கட்டுப்பாட்டுக்குள் கொண்டு வரப்பட்டுள்ளதாகத் தெரிவித்துள்ளார்.

சமூகத்திற்கு இடையில் கொரோனா வைரஸ் தொற்று பரவுவதனை வரையறுத்துள்ளதாகவும், அடையாளம் காணப்பட்டவர்கள் சமூகத்துடன் தொடர்பு கொள்வது தடுக்கப்பட்டுள்ளதாகவும் அவர் குறிப்பிட்டுள்ளார்.

வைரஸ் தொற்று பரவுவதனை தடுப்பதற்கு தொடர்ச்சியாக நடவடிக்கைகள் எடுக்கப்பட்டு வருவதாக தெரிவித்துள்ளார். மக்களின் இயல்பு வாழ்க்கை முன்னெடுக்கப்பட்டாலும் வைரஸ் தொற்று பரவுவதனை தடுப்பதற்கு தொடர்ச்சியாக நடவடிக்கைகள் எடுக்கப்படும் என அனில் ஜாசிங்க தெரிவித்துள்ளார்.

-தமிழ்வின்-

ஊரடங்கு நடைமுறைகள் தொடர்பில் சற்று முன்னர் வெளியான முக்கிய செய்தி!!

ஊரடங்கு நடைமுறைகள்..

கொழும்பு, கம்பஹா, களுத்துறை, புத்தளம், கண்டி, கேகாலை, மற்றும் அம்பாறை மாவட்டங்கள் தவிர்ந்த 18 மாவட்டங்களின் ஊரடங்கு சட்டம் தளர்த்தப்படுவதாக அறிவிக்கப்பட்டுள்ளது.

அதன்படி குறித்த 18 மாவட்டங்களிலும் எதிர்வரும் 20ஆம் திகதி காலை 5 மணிக்கு தளர்த்தப்பட்டு அன்று இரவு 8 மணிக்கு மீள அமுல்படுத்தப்படும். ஜனாதிபதி ஊடகப்பிரிவு விடுத்துள்ள ஊடக அறிக்கையில் இந்த விடயம் தெரிவிக்கப்பட்டுள்ளது.

இதனையடுத்து மறு அறிவித்தல் வரை இந்த மாவட்டங்களில் இரவு 8 மணி முதல் காலை 5 மணி வரையில் தினமும் ஊரடங்கு சட்டம் அமுல்படுத்தப்படும்.

கண்டி, கேகாலை மற்றும் அம்பாறை மாவட்டங்களில் அலவத்துகொட, அக்குரணை, வரகாபொல மற்றும் அக்கரைப்பற்று காவல்துறை பிரிவுகளில் ஊரடங்கு சட்டம் தொடர்ந்தும் அமுலில் இருக்கும். இந்த மாவட்டங்களுக்கு உட்பட்ட ஏனைய காவல்துறை பிரிவுகளில் ஊரடங்கு சட்டம் ஏப்ரல் மாதம் 20 ஆம் முதல் தினமும் காலை 5 மணிக்கு தளர்த்தப்பட்டு இரவு 8 மணிக்கு மீள அமுல்படுத்தப்படும்.

கொழும்பு, கம்பஹா, களுத்துறை மற்றும் புத்தளம் மாவட்டங்களின் சில காவல்துறை பிரிவுகள் தவிர்ந்த ஏனைய காவல்துறை பிரிவுகளில் எதிர்வரும் 22 ஆம் திகதி காலை 5 மணிக்கு ஊரடங்கு சட்டம் தளர்த்தப்பட்டு அன்று இரவு 8 மணிக்கு மீள அமுல்படுத்தப்படும்.

இதனடிப்படையில் கொழும்பு மாவட்டத்தின் கொட்டாஞ்சேனை, கிரேன்பாஸ், பம்பலபிட்டி, வாழைத் தோட்டம், மருதானை, கொத்தட்டுவ, முல்லேரியா, வெல்லம்பிட்டிய, கல்கிஸ்ஸை, தெஹிவளை மற்றும் கொஹூவளை காவல்துறை பிரிவுகளில் தொடர்ந்தும் ஊரடங்கு சட்டம் அமுலில் இருக்கும்.

கம்பஹா மாவட்டத்தில் ஜா-எல, கொச்சிக்கடை மற்றும் சீதுவ காவல்துறை பிரிவுகளில் ஊரடங்கு சட்டம் தொடர்ந்தும் அமுலில் இருக்கும். புத்தளம் மாவட்டத்தில் புத்தளம், மாரவில மற்றும் வென்னப்புவ காவல்துறை பிரிவுக்குட்பட்ட பகுதிகளில் ஊரடங்கு சட்டம் தொடந்தும் அமுலில் இருக்கும் என தெரிவிக்கப்பட்டுள்ளது.

களுத்துறை மாவட்டத்தில் பண்டாரகம, பயாகல, பேருவளை மற்றும் அளுத்கம காவல்துறை பிரிவுகளுக்கு உட்பட்ட பகுதிகளில் ஊரடங்கு சட்டம் தொடர்ந்தும் அமுலில் இருக்கும் என அறிவிக்கப்பட்டுள்ளது.

5 ஆயிரம் பேருந்துகள், 400 புகையிரதங்களை சேவையிலீடுபடுத்த அரசு தீர்மானம்!!

20ஆம் திகதிக்குப் பின்னர்..

எதிர்வரும் 20ஆம் திகதிக்குப் பின்னர் பேருந்துகள் மற்றும் புகையிரதங்களை பொதுப்போக்குவரத்துப் சேவையில் ஈடுபடுத்த அரசு தீர்மானித்துள்ளது.

அதற்கமைவாக 5 ஆயிரம் அரச பேருந்துகளும், 400 புகையிரதங்களும் சேவையில் ஈடுபடும் என்று போக்குவரத்து அமைச்சர் மஹிந்த அமரவீர தெரிவித்துள்ளார்.

அத்தியாவசிய சேவைகளின் கீழ் வரும் தனியார் மற்றும் பொது நிறுவவனங்கள் மீண்டும் திறக்கப்பட்டால் பொதுப்போக்குவரத்தை இயக்க போக்குவரத்து அமைச்சில் நேற்று நடைபெற்ற கூட்டத்தில் தீர்மானம் எடுக்கப்பட்டிருந்தது.

பொதுப் போக்குவரத்து சேவையைப் பயன்படுத்தும்போது, சுகாதார மற்றும் பாதுகாப்புத் துறையினரால் வழங்கப்பட்டுள்ள ஆலோசனைகளைக் கடுமையாக அமுல்படுத்தவும் இந்தக் கலந்துரையாடலின்போது தீர்மானிக்கப்பட்டிருந்தது.

அத்தியாவசிய சேவையில் ஈடுபடுவோர் தவிர்ந்த ஏனைய நபர்களை பேருந்துகள் மற்றும் புகையிரதங்களில் ஏற்றாதிருப்பதற்கும் தீர்மானிக்கப்பட்டுள்ளமை குறிப்பிடத்தக்கது.

-தமிழ்வின்-

கொழும்பில் கொரோனா தொற்று 55 ஆக அதிகரிப்பு!!

கொரோனா தொற்று..

இலங்கையில் கொரோனா வைரஸ் தொற்றுக்குள்ளாகிவர்களில் கொழும்பு மாவட்டத்திலேயே அதிகளவான தொற்றாளர்கள் அடையாளம் காணப்பட்டுள்ளனர். அந்த மாவட்டத்தில் பாதிப்படைந்தோர் எண்ணிக்கை 55 ஆக அதிகரித்துள்ளது. சுகாதார அமைச்சு இன்று மதியம் வெளியிட்டுள்ள அறிக்கையில் இந்தத் தகவல் வெளியாகியுள்ளது.

அதேவேளை, களுத்துறை மாவட்டத்தில் 45 பேரும், புத்தளம் மாவட்டத்தில் 35 பேரும், கம்பஹா மாவட்டத்தில் 28 பேரும், யாழ்ப்பாணம் மாவட்டத்தில் 16 பேரும், கண்டி மாவட்டத்தில் 07 பேரும், இரத்தினபுரி மாவட்டத்தில் 05 பேரும்,

குருநாகல், கேகாலை, மாத்தறை, அம்பாறை ஆகிய மாவட்டங்களில் தலா 2 பேர் வீதமும், காலி,மட்டக்களப்பு, பதுளை, வவுனியா ஆகிய மாவட்டங்களில் தலா ஒருவர் வீதமும் பாதிக்கப்பட்டுள்ளனர்.

இதனிடையே தனிமைப்படுத்தும் நிலையங்களில் இருந்து 38 பேரும், வெளிநாட்டுப் பிரஜைகள் 03 பேரும் கொரோனா தொற்றால் பாதிக்கப்பட்டுள்ளனர்.

இலங்கையில் கொரோனா வைரஸ் தொற்றால் இன்று பிற்பகல் ஒரு மணிவரை 244 பேர்பாதிக்கப்பட்டுள்ளனர். அவர்களில் 77 பேர் பூரண குணமடைந்து வீடு திரும்பியுள்ளனர்.

அத்துடன் 7 பேர் உயிரிழந்துள்ளனர். ஏனைய 160 நோயாளர்களில் 84 பேர் கொழும்பு அங்கொடை தேசிய தொற்று நோய் தடுப்புவைத்தியசாலையிலும், 41 பேர் வெலிக்கந்த ஆதார வைத்தியசாலையிலும், 20 பேர் முல்லேரியா ஆதார வைத்தியசாலையிலும், 15 பேர் சிலாபம் – இரணவில கொரோனா சிகிச்சை நிலையத்திலும் சிகிச்சை பெற்று வருகின்றனர்.

இதனைவிட நாடளாவிய ரீதியில் 24 வைத்தியசாலைகளில் மேலும் 103 பேர் கொரோனா தொற்று சந்தேகத்தில் கண்காணிக்கப்பட்டு வருகின்றனர்.

வவுனியா உட்பட வடமாகாணத்தை சேர்ந்த 64 பேரின் பரிசோதனை முடிவுகள் இதோ!!

பரிசோதனை முடிவுகள்..

யாழ்ப்பாணம், வவுனியா மற்றும் கிளிநொச்சி மாவட்டங்களைச் சேர்ந்த 64 பேரின் இரத்த மாதிரிகள் நேற்று பரிசோதிக்கப்பட்ட நிலையில் அவர்களில் எவருக்கும் கொரோனா தோற்று இல்லை என உறுதிப்படுத்தப்பட்டுள்ளது.

யாழ். போதனா வைத்தியசாலையில் பணிப்பாளர் வைத்தியர் த.சத்யமூர்த்தி இதற்கான அறிவித்தலை வெளியிட்டுள்ளமை குறிப்பிடத்தகக்கத்து.

யாழ்ப்பாணம் அரியாலையில் உள்ள தேவாலயத்தில் கடந்த மார்ச் 15ஆம் திகதி சுவிஸ் போதகர் தலைமையில் நடைபெற்ற ஆராதனையில் பங்கேற்றவர்கள் யாழ்ப்பாணம், கிளிநொச்சி, வவுனியா என வடக்கு மாகாணத்தில் அவர்களது வீடுகளில் சுய தனிமைப்படுத்தலுக்கு உட்படுத்தப்பட்டுள்ளனர்.

இந்நிலையில், யாழ்பாணத்தில் இடம்பெற்ற குறித்த மத ஆராதனையில் கலந்துகொண்ட மற்றும் வேறு பகுதிகளில் தொடர்புகளைக் கொண்டிருந்த வவுனியாவைச் சேர்ந்தவர்களுக்கு கொரோனா வைரஸ் தாக்கம் இருக்கின்றதா என சோதனை செய்வதற்கான இரத்த மாதிரிகள் சேர்க்கும் நடவடிக்கை கடந்தவாரம் முன்னெடுக்கப்பட்டிருந்தது.

குறித்த சோதனை நடவடிக்கையின் இரண்டாம் கட்டப் பணிகளே நேற்றயதினம் முன்னெடுக்கப்பட்டன. குறித்த கொரோனோ வைரஸ் தொற்று தொடர்பான இரத்த மாதிரிகள் சேகரிக்கும் செயற்பாடு பிராந்திய சுகாதாரசேவைகள் பணிமனை மற்றும் சுகாதாரவைத்திய அலுவலகத்தால் முன்னெடுக்கப்பட்டது.

இந்நிலையில், வவுனியாவின் காத்தான்கோட்டம் மற்றும் ஓமந்தை,புளியங்குளம் ஆகிய இடங்களில் தனிமைப்படுத்தி வைக்கப்பட்ட 14 பேரிடம் குறித்த இரத்தமாதிரிகள் சேர்ககப்பட்டதுடன் அவை மேலதிக ஆய்வுகூட பரிசோதனைக்களிற்காக அனுராதபுரத்திற்கு அனுப்பிவைக்கப்பட்டிருந்தது.

குறித்த இரத்த மாதிரிகள் பரிசோதிக்கப்பட்டு உத்தியோகபூர்வ முடிவுகள் வெளியிடப்பட்டுள்ள நிலையில், குறித்த நபர்களில் எவருக்கும் கொரோனா தொற்று இல்லையென்பது உறுதிசெய்யப்பட்டுள்ளது.

இதேவேளை, யாழ்ப்பாணம் மற்றும் கிளிநொச்சி மாவட்டங்களை சேர்ந்த 50 பேரிடம் நேற்று மேற்கொள்ளப்பட்ட பி.சி.ஆர். பரிசோதனையில் எவருக்கும் கொரோனா வைரஸ் தொற்று இல்லை என யாழ். போதனா வைத்தியசாலைப் பணிப்பாளர் மருத்துவர் த.சத்தியமூர்த்தி உறுதிப்படுத்தியுள்ளார்.

யாழ்ப்பாணம் மாநகர சுகாதார மருத்துவ அதிகாரி பிரிவுக்குட்பட 30 பேரிடமும் கிளிநொச்சியைச் சேர்ந்த 11 பேரிடமும் மாதிரிகள் பெறப்பட்டு யாழ்ப்பாணப் பல்கலைக்கழக மருத்துவ பீட ஆய்வுகூடத்தில் பரிசோதனைக்கு உட்படுத்தப்பட்டன.

அத்துடன், வெளிநாடுகளிலிருந்து திரும்பி வீடுகளில் சுயதனிமைப்படுதலுக்கு உட்படுத்தப்பட்ட 5 பேர், கொரோனா வைரஸ் அறிகுறியுடன் யாழ்ப்பாணம் போதனா வைத்தியசாலையில் சேர்க்கப்பட்ட 3 பேர், வைத்தியசாலையில் சேர்க்கப்பட்ட ஒருவரும் என 9 பேரிடமும் மாதிரிகள் பெறப்பட்டு பி.சி.ஆர். பரிசோதனைக்கு உட்படுத்தப்பட்டது.

இந்நிலையில் குறித்த 50 பெரும் கொரோனா வைரஸ் தாக்கத்துக்கு உட்படவில்லை என உறுதிப்படுத்தப்பட்டுள்ளமை குறிப்பிடத்தக்கது.

கொரோனா வைரஸுக்கு இலக்கான அடுத்த கண்டம் : 3 லட்சம் மக்கள் உயிரிழப்பர் : WHO எச்சரிக்கை!!

கொரோனா வைரஸ்..

கொரோனா வைரஸ் தொற்றின் அடுத்த மையப் புள்ளியாக ஆப்பிரிக்கா மாறக்கூடும் என்று உலக சுகாதார அமைப்பு (WHO) எச்சரித்துள்ளது. இந்த தொற்றுநோய் ஆப்பிரிக்காவில் குறைந்தது 300,000 மக்களைக் கொன்று கிட்டத்தட்ட 30 மில்லியனை வறுமையில் தள்ளும் என்று ஐ.நா அதிகாரிகள் அதிர்ச்சியான தகவலை வெளியிட்டுள்ளார்கள்.

உலகையே அச்சுறுத்தி வரும் கொரோனா வைரஸ் ஆப்பிரிக்காவில் கடந்த வாரம் முதல் வேகமாக பரவி வருகிறது. ஆப்பிரிக்கா கண்டம் முழுவதும் கிட்டத்தட்ட 1,000 பேர் கொரோனாவால் இறந்திருக்கிறார்கள். கிட்டத்தட்ட 19,000 பேர் பாதிக்கப்பட்டுள்ளார்கள்.

இந்த பாதிப்பு என்பது ஐரோப்பா மற்றும் அமெரிக்காவின் சில பகுதிகளை விட மிகக் குறைந்த எண்ணிக்கையாகத்தான் இப்போதைய நிலையில் உள்ளது. இந்நிலையில் ஆப்பிரிக்காவிற்கான ஐ.நா. பொருளாதார ஆணையம் கொரோனாவால் ஆப்பிரிக்காவில் 300,000 பேர் இறக்கக்கூடும் என்று எச்சரித்துள்ளதோடு ஆப்பிரிக்க கண்டத்தின் பாதுகாப்பிற்கு 100 பில்லியன் டொலர் இப்போது தேவை என்று கூறுகிறது.

இந்த கொரோனா வைரஸ் ஆப்பிரிக்க நாடுகளின் தலைநகரங்களில் வேகமாக பரவி வருவதாக உலக சுகாதார அமைப்பு கூறுகிறது. இந்த தொற்றுநோயைக் கையாள்வதற்கு போதிய அளவிலான வென்டிலேட்டர்கள் இந்த கண்டத்தில் இல்லை என்பதும் தெரியவந்துள்ளது.

ஆப்பிரிக்காவின் மக்கள்தொகையில் மூன்றில் ஒரு பங்கினருக்கு போதுமான நீர் கிடைப்பதில்லை. அத்துடன் கிட்டத்தட்ட 60% நகரவாசிகள் நெரிசலான சேரிப் பகுதியில் வாழ்கின்றனர். இப்படிப்பட்ட சூழல்கள் தான் கொரோனா வைரஸ் அதிகமாக தொற்றக்கூடிய சூழ்நிலைகள் ஆகும்.

அல்ஜீரீயாவில் பாதிப்பு ஆபிரிக்காவில் கிட்டத்தட்ட 19,000 பேருக்கு கொரோனா பரவி உள்ளது. ஆப்பிரிக்காவின் முழு கண்டத்திலும் குறைந்தது 970 இறப்புகள் உறுதிப்படுத்தப்பட்டுள்ளன. ஆப்பிரிக்காவில் சுமார் 1.3 பில்லியன் சனத்தொகை உள்ளது.

வட ஆபிரிக்கா மிகவும் பாதிக்கப்பட்டுள்ள பகுதி. அல்ஜீரியா, எகிப்து மற்றும் மொராக்கோ ஆகிய நாடுகளில் 2,000 க்கும் மேற்பட்டோர் பாதிக்கப்பட்டுள்ளனர். குறைந்தது 100பேர் இந்த பகுதிகளில் இறந்துள்ளனர். அல்ஜீரியாவில் மட்டும் 348 பேர் உயிரிழந்துள்ளனர்.

தென்னாப்பிரிக்காவில் 2,000 க்கும் மேற்பட்டோர் கொரோனாவால் பாதிக்கப்பட்டுள்ளனர். 48 பேர் இறந்துள்ளனர். அதே நேரத்தில் ஆப்ரிக்கா கண்டத்தின் அதிக மக்கள் தொகை கொண்ட நாடான நைஜீரியாவில் 442 பேர் பாதிக்கப்பட்டுள்ளனர். மேலும் அந்த நாட்டில் உள்ள 200 மில்லியன் மக்கள் தொகையில் 13 பேர் இதுவரை கொரோனாவல் இறந்துள்ளனர்.

ஐரோப்பா கண்டம் மற்றும் அமெரிக்கா கண்டத்தோடு ஒப்பிடும்போது மிக குறைவான வைரஸ் தொற்று இருப்பதற்கு காரணம் குறித்து WHO ஆப்பிரிக்காவின் இயக்குனர் டாக்டர் மாட்ஷிடிசோ ஊடகம் ஒன்றுக்கு அளித்த பேட்டியில் “ஏனைய கண்டங்களோடு ஒப்பிடுகையில் ஆப்பிரிக்காவில் சர்வதேச அளவில் பாதிப்புக்குள்ளானோர் குறைவாகவே உள்ளனர்.

ஆனால் இப்போது வைரஸ் ஆப்பிரிக்காவிற்குள்ளும் பரவி இருப்பதால், அது வேறு நாட்டைப் போலவே விரைவாகவும் பரவுகிறது என்ற அனுமானத்தின் கீழ் தனது அமைப்பு செயல்பட்டு வருவதாக” அவர் தெரிவித்தார்.

வைரஸ் இப்போது தென்னாப்பிரிக்கா, நைஜீரியா, ஐவரி கோஸ்ட், கேமரூன் மற்றும் கானாவில் பெரிய நகரங்களில் இருந்து சிறிய பகுதிகளுக்கு வேகமாக பரவி வருகிறது. வைரஸ் இதுவரை பரவாத சுமார் 15 ஆப்பிரிக்க நாடுகள் உள்ளன, இந்த நாடுகள் வலுவான சமூக தொலைதூர நடவடிக்கைகளை மேற்கொண்டால், அவை வைரஸை உள்ளே வரவிடமால் கட்டுப்படுத்த முடியும் என்று ஆப்பிரிக்க உலக சுகாதார அமைப்பு கூறியுள்ளது.

கொரோனா வைரஸின் அடுத்த கேந்திர நிலையம் இதுதான் : உலக சுகாதார அமைப்பு விடுத்துள்ள எச்சரிக்கை!!

கொரோனா வைரஸ்..

கொரோனா வைரஸின் அடுத்த கேந்திர நிலையமாக ஆபிரிக்க கண்டம் மாறலாம் என உலக சுகாதார அமைப்பு எச்சரித்துள்ளது. கடந்த வாரத்தில் ஆபிரிக்க கண்ட நாடுகளில் கொரோனா வைரஸ் தொற்றிய நோயாளிகளின் எண்ணிக்கை அதிகரித்தமையே இதற்கு காரணம் என அந்த அமைப்பு சுட்டிக்காட்டியுள்ளது.

இவ்வாறான நிலைமையில் ஆபிரிக்க கண்ட நாடுகளில் மாத்திரம் கொரோனா வைரஸ் காரணமாக சுமார் 3 லட்சம் பேர் வரை இறக்கலாம் எனவும் உலக சுகாதார அமைப்பு குறிப்பிட்டுள்ளது.

மேலும் ஆபிரிக்க கண்டத்தில் சுமார் மூன்று கோடி மக்கள் வறிய நிலைமைக்கு செல்லக் கூடும் எனவும் அந்த அமைப்பு எச்சரிக்கை விடுத்துள்ளது.

எவ்வாறாயினும் தற்போது ஐரோப்பா மற்றும் அமெரிக்கா ஆகியவற்றுடன் ஒப்பிடும் போது ஆபிரிக்காவில் கொரோனா மரணங்கள் மற்றும் தொற்றுக்கு உள்ளாவோரின் எண்ணிக்கை குறிப்பிடத்தக்களவு குறைந்து காணப்படுகிறது.

எனினும் ஆபிரிக்காவில் சன நெருக்கடி மிக்க நகரங்களில் கொரோனா வைரஸ் வேகமாக பரவக் கூடும் எனவும், மருத்துவ உபகரணங்களின் தட்டுப்பாடு காரணமாக அதனை கட்டுப்படுத்துவது சிரமமாக அமையலாம் எனவும் உலக சுகாதார அமைப்பு குறிப்பிட்டுள்ளது.

ஊரடங்குச் சட்டத்தை மீறிய 30 ஆயிரத்து 631 பேர் கைது!!

ஊரடங்குச் சட்டத்தை மீறிய..

ஊரடங்குச் சட்டத்தை மீறிய 343 பேர் இன்று காலை 6 மணி தொடக்கம் நண்பகல் 12 மணி வரையான காலப்பகுதியில் கைதுசெய்யப்பட்டுள்ளனர். அத்துடன் இவர்களிடமிருந்து 102 வாகனங்களும் பொலிஸாரால் கைப்பற்றப்பட்டுள்ளன.

கடந்த மார்ச் மாதம் 20ஆம் திகதி தொடக்கம் இன்று நண்பகல் 12 மணி வரையான காலப்பகுதியில் ஊரடங்குச் சட்டத்தை மீறிய 30 ஆயிரத்து 631 பேர் கைது செய்யப்பட்டுள்ளனர்.

இந்தக் காலப்பகுதியில் 7 ஆயிரத்து 892 வாகனங்களுக்கும் கைபப்பற்றப்பட்டுள்ளன. இதேவேளை, கொழும்பு, யாழ்ப்பாணம், கம்பஹா, களுத்துறை, கண்டி மற்றும் புத்தளம் ஆகிய 6 மாவட்டங்களில் மறு அறிவித்தல் வரை ஊரடங்கு அமுல்படுத்தப்பட்டுள்ளது.

ஏனைய 19 மாவட்டங்களிலும் எதிர்வரும் 20ஆம் திகதி காலை 6 மணி வரை ஊரடங்குச் சட்டம் அமுல்படுத்தப்பட்டுள்ளது.

கொரோனா வைரஸ் தாக்கம் : தங்கத்தின் விலையில் ஏற்பட்டுள்ள மாற்றம்!!

தங்கத்தின் விலையில்..

கொரோனா வைரஸ் தாக்கம் காரணமாக பல நாடுகள் முடங்கியுள்ள நிலையில் கடந்த சில தினங்களாக தங்கத்தின் விலை தொடர் அதிகரிப்பை பதிவு செய்து வந்தது.
இந்த நிலையில் தங்கத்தின் விலையில் வீழ்ச்சி பதிவாகியுள்ளதாக தெரியவருகிறது.

கடந்த சில தினங்களாக ஏற்றம் கண்டு வந்த தங்கத்தின் விலையானது காலையில் ஏற்றத்துடன் தொடங்கினாலும் இறுதியில் சற்று வீழ்ச்சியுடனே முடிவடைந்துள்ளதாக இந்திய ஊடகமொன்று குறிப்பிட்டுள்ளது.

அதிலும் இன்றோடு மூன்றாவது நாளாக சரியும் சர்வதேச தங்கத்தின் விலையானது தற்போது அவுன்ஸுக்கு 28.7 டொலர் குறைந்து 1,702.85 டொலர்களாக பதிவாகியுள்ளது. இது கிட்டதட்ட 1.63% வீழ்ச்சி கண்டுள்ளது.

கடந்த எட்டு சந்தை தினங்களாக தொடர்ந்து ஏற்றம் கண்டு வந்த தங்கத்தின் விலையானது, இன்று ஒரே நாளில் 10 கிராம் தங்கத்தின் விலையானது 1,470 ரூபாய் வரையில் வீழ்ச்சி கண்டுள்ளதாக தகவல்கள் தெரிவிக்கின்றன. இது கிட்டதட்ட 3.11% வீழ்ச்சியாகும் என தெரிவிக்கப்பட்டுள்ளமை குறிப்பிடத்தக்கது.

வவுனியாவில் ஊரடங்கு நேரத்தில் கிராம அலுவலங்களுக்கு வரவழைக்கப்பட்டுள்ள மக்கள்!!

ஊரடங்கு நேரத்தில்..

நாட்டில் ஏற்பட்டுள்ள கொரோனா தொற்றையடுத்து ஊரடங்கு சட்டம் அமுல்படுத்தப்பட்டுள்ள நிலையில் வவுனியாவிலுள்ள தோணிக்கல், கோவில்குளம் உட்பட பெரும்பாலான கிராம சேவையாளர் அலுவலகங்களை பொதுமக்கள் முற்றுகையிட்டுள்ளனர்.

கொரோனா வைரஸ் தொற்று பரவலை தடுக்கும் முகமாக வவுனியா உட்பட நாட்டின் பல பாகங்களில் ஊரடங்கு சட்டம் அமுல்படுத்தப்பட்டுள்ள நிலையில் ஊரடங்கு காலப்பகுதியில 5000 ரூபா கொடுப்பனவனவுகளுக்கான பதிவுகளை வீடு வீடாக சென்று பதிவுகளை மேற்கொள்ளுமாறு உரிய அதிகாரிகளுக்கு அரசாங்கம் அறவித்தல் விடுத்திருந்தது.

எனினும் வவுனியாவில் இன்றையதினம் (18.04.2020) காலை 9.00 மணி தொடக்கம் தற்போது வரை அரசாங்கத்தினால் வழங்கப்படும் 5000 ரூபா கொடுப்பனவனவுகளுக்கான பதிவுகளை மேற்கொள்வதற்காக ஊடரங்கு சட்டத்தினை மீறி (வவுனியாவில் ஊரடங்கு சட்டம் அமுலில்) மக்களை கிராம சேவையாளர் அலுவலகத்திற்கு வரவழைத்து பதிவுகள் மேற்கொள்ளப்பட்டு வருகின்றன.

இதன் காரணமாக வவுனியாவிலுள்ள பெரும்பாலான கிராம சேவையாளர் அலுவலகங்களில் 200க்கு மேற்பட்ட மக்கள் சமூக இடைவெளி பேனாது முகக்கவசம் போன்ற இல்லாமல் வரிசையில் காத்துநின்றனர்.

இவ்விடயம் தொடர்பாக வவுனியா மாவட்ட அரசாங்க அதிபர் எஸ்.எம்.சமன் பந்துலசேன அவர்களை தொலைபேசியூடாக தொடர்பு கொண்டு வினாவிய போது, இவ்விடயம் தொடர்பில் உடனடியாக நடவடிக்கை எடுப்பதாக தெரிவித்தார்.

திடீரென சீனாவில் ஏற்பட்ட மாற்றம் : கொரோனாவால் சுமார் 1300 பேர் உயிரிழப்பு!!

சீனாவில் ஏற்பட்ட மாற்றம்..

சீனாவின் ஹூபேய் மாகாணம் வுகான் நகரில் கடந்த ஆண்டு டிசம்பர் மாதம் கொரோனா வைரஸ் கண்டுபிடிக்கப்பட்டது. வைரஸ் பரவத்தொடங்கியது முதல் ஊரடங்கு உள்பட பல்வேறு நடவடிக்கைகளை சீன அரசு மேற்கொண்டது.

இதனால் கொரோனா வைரஸ் பரவும் வேகம் மற்றும் பலி எண்ணிக்கை வெகுவாக குறைந்தது. குறிப்பாக இந்த வருடம் பெப்ரவரி மாதத்திற்கு பின் அந்நாட்டில் கொரோனாவால் உயிரிழப்போரின் எண்ணிக்கை வெகுவாக குறைந்து வந்தது.

மேலும், கடந்த சில நாட்களாக வைரஸ் தாகத்திற்கு எந்த உயிரிழப்புகளும் ஏற்படவில்லை என்ற நிலைக்கு வந்தது. இதனால் நிம்மதி அடைந்த சீன அரசு ஹூபேய் மாகாணத்தில் ஊரடங்கை தளர்த்தி போக்குவரத்துக்கு அனுமதி அளித்தது. இந்நிலையில், கொரோனாவை கட்டுப்படுத்திவிட்டோம் என நினைத்துக்கொண்டிருந்த சீனாவுக்கு இன்றைய நிலவரம் மரண அடி கொடுத்துள்ளது.

கொரோனா பரவத்தொடங்கிய நாளில் இருந்து இத்தனை நாட்களில் இன்று தான் சீனா அதிக உயிரிழப்புகளை சந்தித்துள்ளது. அதாவது இன்று மட்டும் கொரோனா தாக்கத்திற்கு அந்நாட்டில் சுமார் ஆயிரத்து 300 பேர் பலியாகியுள்ளனர். இந்த உயிரிழப்புகள் அனைத்தும் வுகான் நகர் ஏற்பட்டுள்ளது.

தற்போதைய நிலவரப்படி சீனாவில் 82 ஆயிரத்து 692 பேருக்கு வைரஸ் பரவியுள்ளது. குறிப்பாக நேற்று ஒரே நாளில் புதிதாக 351 பேருக்கு வைரஸ் தொற்று உறுதி செய்யப்பட்டுள்ளது. மேலும், அந்நாட்டில் கொரோனா தாக்கத்திற்கு இன்று ஒரே நாளில் ஆயிரத்து 290 பேர் பலியாகியுள்ளனர். இதனால் சீனாவில் கொரோனாவுக்கு உயிரிழந்தோர் எண்ணிக்கை 4 ஆயிரத்து 632 ஆக அதிகரித்துள்ளது.

இதற்கு முன்னதாக சீனாவில் பெப்ப்ரவரி 23-ம் திகதி (150 பேர்) தான் கொரோனாவுக்கு அதிக உயிரிழப்புகளை ஏற்படுத்திய நாளாக இருந்தது. ஆனால், அந்த பலி எண்ணிக்கையை மிஞ்சும் வகையில் இன்று ஒரே நாளில் அங்கு ஆயிரத்து 290 பேர் பலியாகியுள்ளதால் அந்நாட்டு மக்களும், அரசாங்கமும் திகைத்து நிற்கின்றனர்.

வுகான் நகரில் ஒரே நாளில் இத்தனை உயிரிழப்புகள் ஏற்பட்டுள்ளதாக அரசு தெரிவித்துள்ள நிலையில் வைரஸ் விவகாரத்தில் உண்மையாக உயிரிழந்தோரின் எண்ணிக்கையை சீனா மறைக்கிறதோ? என்ற கருத்துக்களும் மக்களிடையே எழுந்தவண்ணம் உள்ளது.

இந்நிலையில் உலகம் முழுவதும் பெரும் அச்சுறுத்தலாக விளங்கி வரும் கொரோனா வைரஸ் இதுவரை 22 லட்சத்து 39 ஆயிரத்து 082 பேருக்கு பரவியுள்ளது. இந்த கொடிய வைரசுக்கு ஒரு லட்சத்து 53 ஆயிரத்து 913 பேர் பலியாகியுள்ளனர்.

கொரோனாவின் தாக்கம் நாளுக்கு நாள் அதிகரித்து வரும் நிலையில் இந்த கொடிய வைரசுக்கு தடுப்பு மருந்து கண்டுபிடிக்க விஞ்ஞானிகள் தீவிர முயற்சி மேற்கொண்டு வருகின்றனர். ஆனால் அந்த முயற்சியில் குறிப்பிடத்தக்க முன்னேற்றம் எதுவும் ஏற்படவில்லை என்பதும் குறிப்பிடத்தக்கது.

இலங்கையின் 19 மாவட்டங்களில் ஊரடங்கு சட்டம் தளர்த்தப்படுகிறதா?

ஊரடங்கு சட்டம்..

கொழும்பு, யாழ்ப்பாணம், புத்தளம், கண்டி மற்றும் களுத்துறை மாவட்டங்களை தவிர ஏனைய 19 மாவட்டங்கள் எதிர்வரும் 20ஆம் திகதி முதல் திறக்கப்படலாம் என அரசாங்கத்தின் தகவல்கள் தெரிவிக்கின்றன.

இதனடிப்படையில், இந்த 19 மாவட்டங்களில் அமுல்படுத்தப்பட்டுள்ள ஊரடங்குச் சட்டம் நீக்கப்பட உள்ளதாக சிங்கள ஊடகமொன்று வெளியிட்டுள்ள செய்தியில் தெரிவிக்கப்பட்டுள்ளது. அத்துடன் தற்போது மூடப்பட்டுள்ள கட்டுநாயக்க சர்வதேச விமான நிலையம் TRANSIT விமானங்களுக்காக எதிர்வரும் 21ஆம் திகதி முதல் திறக்கப்பட வாய்ப்புள்ளது.

அதேவேளை முடக்கப்படடுள்ள கொழும்பு, யாழ்ப்பாணம், கண்டி, களுத்துறை, புத்தளம் மாவட்டங்கள் எதிர்வரும் 30ஆம் திகதி திறக்கப்படலாம் என அரசாங்கத்தின் தகவல்கள் கூறுகின்றன என அந்த செய்தியில் குறிப்பிடப்பட்டுள்ளது.

முதலில் 19 மாவட்டங்கள் திறக்கப்பட்ட பின்னர் ஏற்படும் நிலைமைக்கு அமைய இது தீர்மானிக்கப்பட உள்ளது. இதனிடையே அரச ஊழியர்களின் கடமைகளை பகுதிப் பகுதியாக ஆரம்பிக்க அரசாங்கம் திட்டமிட்டுள்ளது.

ஆரம்பத்தில் கொழும்பு உட்பட அவதானத்திற்குரிய மாவட்டங்களில் உள்ள அரச அலுவலங்களுக்கு தினமும் ஒரு பகுதி ஊழியர்களை மாத்திரம் வரவழைக்க தீர்மானிக்கப்பட்டுள்ளது. முதல் நாள் அரச அலுவலங்களில் பணியில் ஈடுபடும் ஊழியர்கள் மீதமுள்ள நான்கு நாட்களும் வீடுகளில் தங்கியிருந்து வேலை செய்ய வேண்டும்.

அடுத்த நாள் அரச அலுவலங்களுக்கு வந்து கடமையாற்றும் ஊழியர்கள் அடுத்த நான்கு தினங்கள் வீடுகளில் இருந்து பணியாற்ற வேண்டும். இவ்விதமாக ஊழியர்களில் ஐந்தில் ஒரு பகுதி ஊழியர்கள் தினமும் கடமையில் ஈடுபடுத்தப்பட உள்ளனர்.

-தமிழ்வின்-

கனடாவில் கொரோனா தொற்றால் இலங்கை தமிழ் தம்பதி மரணம் : பெற்றோரை இழந்து தவிக்கும் மூன்று மகள்கள்!!

நாகராஜா தேசிங்குராஜா..

கனடாவில் இலங்கை தமிழ் தம்பதி கொரோனாவால் உயிரிழந்த நிலையில் அவர்களின் மூன்று மகள்களும் பெற்றோரை இழந்து தவித்து வருகின்றனர். ஒன்றாறியோவின் பிராம்டனில் வசித்து வந்தவர் நாகராஜா தேசிங்குராஜா (61). இவர் மனைவி புஷ்பராணி (56). தம்பதிக்கு 29, 22, 19 வயதுகளில் மூன்று மகள்கள் உள்ளனர்.

இந்நிலையில் கொரோனா வைரஸ் பாதிப்பால் நாகராஜா மற்றும் புஷ்பராணி ஆகிய இருவரும் உயிரிழந்துள்ளனர். அவர்களின் மகள்களுக்கும் கொரோனா உறுதி செய்யப்பட்ட நிலையில் தனிமைப்படுத்தப்பட்டு சிகிச்சை பெற்று வருகின்றனர்.

பெற்றோர் உயிரிழந்துவிட்டதால் மூவரும் மனதளவிலும், உடல் அளவில் மிகுந்த வலியை அனுபவித்து வருகின்றனர். இது குறித்து உயிரிழந்த தம்பதியின் உறவினர் நாதன் கதிர்காமநாதன் கூறுகையில், கடந்த 2ஆம் திகதி நாகராஜா மற்றும் புஷ்பராணி ஆகிய இருவருக்கும் உடல்நலக்குறைவு ஏற்பட்டது. பின்னர் குடும்பத்தார் பரிசோதனை செய்த போது அனைவருக்கும் கொரோனா இருப்பது உறுதி செய்யப்பட்டது கனடா ஊடகம் செய்தி வெளியிட்டுள்ளது.

இந்த சூழலில் ஏப்ரல் 13ஆம் திகதி புஷ்பராணியும், 15ஆம் திகதி நாகராஜாவும் உயிரிழந்தனர். இருவரும் உயிரிழந்தது வருத்தமளிக்கிறது, இருவரும் சேர்ந்து இறந்ததற்கு காரணம் உள்ளது. திருமணமான 30 வருடத்தில் மனைவியை நல்லபடியாக நாகராஜா கவனித்து கொண்டார்.

நாகராஜா Gate Gourmet Canada-ல் பணிபுரிந்து வந்தார். அதே சமயம் பகுதி நேர பணியாக உதயன் என்ற தமிழ் பத்திரிக்கையை Bramptonல் உள்ள கடைகள் மற்றும் கோவில்களில் வழங்கி வந்தார். அவர் கடைசியாக மார்ச் 27ஆம் திகதி தான் பத்திரிக்கையை வழங்கியுள்ளார்.

அதனால் நாகராஜா சென்ற தமிழ் கடைகள், இலங்கையர்கள் கடைகள் மற்றும் மூத்தவர்களின் குடியிருப்புகளில் உள்ள மக்கள் இது தொடர்பில் எச்சரிக்கையாகவும், விழிப்புணர்வுடனும் இருக்க வேண்டும் என விரும்புகிறேன் என கூறியுள்ளார்.

இதனிடையில் தம்பதியரின் மூன்று மகள்களுக்கு நிதி உதவி செய்ய குடும்ப நண்பர் ஒருவர் GoFundMe மூலம் நிதி வசூல் செய்து வருகிறார். அதில் வியாழன் பகல் வரை கிட்டத்தட்ட $60,000 வரை நிதி சேர்ந்துள்ளது.