துஷ்பிரயோகம் செய்யப்பட்ட  சிறுமி

இந்தியாவில் தந்தை வாங்கிய 10,000 ரூபாய் கடனுக்காக அவரின் 3 வயது மகள் துஷ்பிரயோகம் செய்யப்பட்டு கொடூரமாக கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது.

உத்தரப்பிரதேச மாநிலம் அலிகார் பகுதியைச் சேர்ந்தவர் பன்வாரிலால் சர்மா. இவருக்கு ட்விங்கிள் சர்மா (3) என்ற மகள் உள்ளார். கடந்த 31-ம் திகதி ட்விங்கிள் திடீரென காணாமல் போன நிலையில் பல இடங்களில் தேடியும் கிடைக்கவில்லை. இது தொடர்பாக பொலிஸ் புகார் அளிக்கப்பட்டது.

இந்நிலையில், அலிகார் பகுதியில் உள்ள ஒரு குப்பை மேட்டில் நேற்று துர்நாற்றம் வீசியுள்ளது. இதனால் சந்தேகமடைந்த அப்பகுதி மக்கள் துப்புரவுப் பணியாளர்களுக்குத் தகவல் கொடுத்தனர். சம்பவ இடத்துக்கு வந்த துப்புறவு தொழிலாளர்கள் அங்கு சோதனை செய்த போது ட்விங்கிளின் உடல் சிதைந்த நிலையில் இருப்பதை கண்டு அதிர்ச்சியடைந்து பொலிசுக்கு தகவல் கொடுத்தனர். அதற்குள் ட்விங்கிளின் உறவினர்கள், சடலத்துடன் சாலையில் அமர்ந்து மறியலில் ஈடுபடத்தொடங்கிவிட்டனர்.

பின்னர் சம்பவ இடத்துக்கு விரைந்த காவல் துறையினர், குழந்தையின் உடலைக் கைப்பற்றி பிரேதப் பரிசோதனைக்கு அனுப்பிவைத்துள்ளனர். விசாரணையில், யாரோ ட்விங்கிளை கடத்திச் சென்று பாலியல் வன்கொடுமை செய்த நிலையில் குழந்தை மயங்கியுள்ளது.

பின்னர், ட்விங்கிளின் ஒரு கையை வெட்டியதோடு, ஒரு கண்ணைத் தோண்டி எடுத்துள்ளனர். இறுதியாக, குழந்தையின் அடையாளம் தெரியாமல் இருக்க அவள் உடலில் ஆசிட் ஊற்றி கொடூரமாகக் கொலை செய்து குப்பையில் வீசியது தெரியவந்தது.

இது பற்றிப் பேசிய ட்விங்கிள் தாத்தா, எங்கள் பக்கத்து வீட்டில் உள்ள ஸாகித் என்பவரின் மீது தான் சந்தேகமாக உள்ளது. நாங்கள் அவரிடம் 10,000 ரூபாய் கடன் வாங்கியிருந்தோம். இது தொடர்பாக அவர் எங்கள் குடும்பத்துக்கு கொலை மிரட்டல் விடுத்தார் என கூறினார்.

இதன் அடிப்படையில், ஸாகித் மற்றும் அவருக்கு உதவி செய்த அஸ்லாம் என இருவரை கைது செய்த பொலிசார் அவர்களை விசாரித்தனர். அப்போது இருவரும் ட்விங்களை கொன்றதை ஒப்பு கொண்டனர்.

இதனிடையில் நாங்கள் புகார் அளித்த உடனேயே குழந்தையைத் தேடியிருந்தால், தற்போது என் மகள் இறந்திருக்க மாட்டாள். காவல் துறையினரின் அலட்சியம் இதற்கு காரணம் என குழந்தையின் பெற்றோர் கூறியுள்ளனர்.

இந்த சம்பவம் இந்திய மக்களிடையே பெரும் அதிர்வலைகளை ஏற்படுத்தியுள்ள நிலையில் டுவிட்டரில் #JusticeForTwinkle என்ற டேக்கில் குழந்தையின் சாவுக்கு பலரும் நீதி கேட்டு வருகின்றனர்.
இதே விடயத்தை சில நடிகர், நடிகைகளும் வலியுறுத்தியுள்ளனர்.

தாதி செய்த செயல்

இந்தியாவில் மருத்துவமனையில் குழந்தையின் கைவிரலை மருத்துவ தாதி துண்டித்தது அதிர்ச்சியை ஏற்படுத்தியுள்ளது. குஜராத் மாநிலம் ஆமதாபாத்தில் உள்ள அரசு மருத்துவமனை ஒன்றில் நிமோனியா நோயால் பாதிக்கப்பட்ட 5 மாத குழந்தை ஒன்று சிகிச்சைக்காக அனுமதிக்கப்பட்டது.

அங்கு மருந்து ஏற்றுவதற்காக குழந்தையின் கையில் கட்டு போடப்பட்டது. பின்னர் அதை மருத்துவ தாதி ஒருவர் பிரித்தார். அப்போது குழந்தையின் கட்டை விரலை அவர் தவறுதலாக துண்டித்து விட்டார். இதனால் அதிர்ச்சியடைந்த மருத்துவமனை நிர்வாகம் அறுவை சிகிச்சை மூலம் குழந்தையின் விரலை மீண்டும் சேர்த்து விட்டது.

எனினும் அந்த அறுவை சிகிச்சை வெற்றி பெறுமா என்பது குறித்து உறுதியாக கூற முடியாது என மருத்துவர்கள் தெரிவித்துள்ளனர். மேலும் அந்த குழந்தையை வேறு நவீன மருத்துவமனைக்கு கொண்டு செல்லுமாறும் அறிவுறுத்தியுள்ளனர்.

இதனால் அதிர்ச்சியடைந்த குழந்தையின் தாய் இது குறித்து பொலிசில் புகார் அளித்த நிலையில் இது தொடர்பாக குறித்த மருத்துவ தாதி மீது பொலிசார் வழக்குப்பதிவு செய்துள்ளனர்.
இதை தொடர்ந்து அவரிடம் விசாரணை நடத்தப்பட்டு வருகிறது.

கீமோ சிகிச்சை

கேரளாவில் மார்பக புற்றுநோய் இல்லாத பெண்ணுக்கு கீமோ சிகிச்சை அளிக்கப்பட்டதில் அவர் பாதிப்புக்கு உள்ளான நிலையில் இதில் தொடர்புடைய ஆய்வகம் மீது நடவடிக்கை எடுக்கப்படாது என மாநில சுகாதாரத்துறை தெரிவித்துள்ளது.

ஆலப்புழா பகுதியை சேர்ந்தவர் ரஜனி. இவருக்கு மார்பகத்தில் கட்டி இருப்பதாக தெரியவந்த நிலையில், அது புற்றுநோய் கட்டியாக இருக்கலாம் என்ற சந்தேகத்தில் கோட்டயம் மருத்துவக் கல்லூரியில் சிகிச்சைக்காக சென்றுள்ளார்.

நோயை உறுதிசெய்வதற்காகத் திசு மாதிரிகள் சேகரிக்கப்பட்டு அரசு மருத்துவமனை ஆய்வகத்துக்கும், தனியார் ஆய்வகத்துக்கும் அனுப்பி வைக்கப்பட்டன. அரசு மருத்துவமனை ஆய்வகத்தில் முடிவு வர தாமதமான சூழலில் தனியார் ஆய்வகம் அளித்த முடிவில் அது புற்றுநோய் கட்டி எனத் தெரிவிக்கப்பட்டது.

உடனே மருத்துவர்களும் ரஜனிக்கு புற்றுநோய்க்கான முதல் கட்ட கீமோதெரபி சிகிச்சை வழங்கப்பட்டது. கீமோதெரபி சிகிச்சையில் வழங்கப்படும் மருந்துகளின் வீரியத்தால் தலைமுடி அனைத்தும் உதிர்தல், வாந்தி, உடல் பலவீனம் போன்ற பல பக்கவிளைவுகள் ஏற்பட்டன.

இந்நிலையில் இரண்டாம் கட்ட சிகிச்சைக்கான நாள் குறித்த சமயத்தில் அரசு மருத்துவமனை ஆய்வக முடிவு வந்தது. அதில் ரஞ்சனியின் மார்பகத்திலிருந்தது புற்றுநோய் கட்டி இல்லை என கூறப்பட்டதைப் பார்த்த மருத்துவர்கள் அதிர்ச்சியடைந்தனர். இதையடுத்து அவருக்கு வழங்கப்பட்ட சிகிச்சைகள் நிறுத்தப்பட்டது.

பின்னர் ரஜனிக்கு புற்றுநோய் இருப்பதாக தெரிவித்த தனியார் ஆய்வகம் மீது நடவடிக்கை எடுக்கப்படுமா என்ற கேள்வி எழுந்தது. இந்நிலையில் தனியார் ஆய்வகம் மீது நடவடிக்கை எடுக்க சட்ட ரீதியான வாய்ப்பு இல்லை என்று கேரள சுகாதாரத் துறை அறிவித்துள்ளது.

அதாவது தனியார் ஆய்வகத்திற்குப் பெண்ணின் திசுக்களை அனுப்பியது மருத்துவ கல்லூரியின் தவறு என கூறப்பட்டுள்ளது. மேலும் கிளினிக்கல் எஸ்டாபிலிஷ்மென்ட் சட்டம் நடைமுறைக்கு வந்தால் தான் இது தொடர்பான நடவடிக்கை சாத்தியம் எனவும் தெரிவிக்கப்பட்டுள்ளது.

சடலமாக இளம் தம்பதி..

கேரளாவில் திருமணமான 3 மாதங்களில் புதுமண தம்பதி வீட்டில் சடலமாக கண்டெடுக்கப்பட்ட சம்பவம் அதிர்ச்சியை ஏற்படுத்தியுள்ளது. கொல்லம் பகுதியை சேர்ந்தவர் விஷ்ணு (23). இவருக்கும் ஆர்யா (21) என்ற இளம்பெண்ணுக்கும் கடந்த மூன்று மாதங்களுக்கு முன்னர் திருமணம் நடந்தது.

இந்த திருமணம் ஆர்யா குடும்பத்தினர் விருப்பத்திற்கு எதிராக நடைபெற்றது. திருமணத்துக்கு பின்னர் ஆர்யா தனது கணவர் விஷ்ணுவுடன் அவர் வீட்டில் வசித்து வந்தார். இந்நிலையில் ஆர்யா கர்ப்பமாக இருப்பதாக தகவல் கிடைத்ததையடுத்து அவர் பெற்றோர் மகளை காண விஷ்ணு வீட்டுக்கு இரு தினங்களுக்கு முன்னர் வந்தனர்.

அப்போது அவர்களின் படுக்கையறை கதவு உள்பக்கமாக பூட்டப்பட்டிருந்தது. அந்த சமயத்தில் விஷ்ணுவின் தந்தையும் வீட்டில் இருந்தார். இதையடுத்து ஆர்யா குடும்பத்தார் கதவை உடைத்து உள்ளே சென்று பார்த்த போது விஷ்ணுவும், ஆர்யாவும் தூக்கில் தொங்கிய நிலையில் சடலமாக கிடந்தனர்.

அவர்களை மீட்ட குடும்பத்தார் மருத்துவமனைக்கு கொண்டு சென்ற நிலையில் இருவரும் உயிரிழந்துவிட்டதை மருத்துவர்கள் மீண்டும் உறுதி செய்தனர். தம்பதியின் தற்கொலைக்கான காரணம் இன்னும் தெரியாத நிலையில் விசாரணை நடத்தப்பட்டு வருகிறது.

வெளிநாட்டில் உயிரிழந்த மகன்

இந்தியாவின் ஆந்திர மாநிலத்தை சேர்ந்த இளைஞர் அமெரிக்காவில் ஏரியில் குளித்த போது நீரில் மூழ்கி இறந்திருப்பது அவர் குடும்பத்தாரை அதிர்ச்சியில் ஆழ்த்தியுள்ளது. அவினாஷ் குணா (32) என்பவர் நியூ ஜெர்சியில் பொறியாளராக பணிபுரிந்து வந்தார். இந்நிலையில் ஏரியில் குளிக்கும் போது நீரில் மூழ்கி அவர் உயிரிழந்துவிட்டதாக ஆந்திராவின் விசாகப்பட்டினத்தில் உள்ள அவர் குடும்பத்தாருக்கு தகவல் தரப்பட்டது.

இது குறித்து பேசிய குணாவின் குடும்ப நண்பர் பிரசாத், குணா மிக சிறப்பாக நிச்சல் அடிப்பார், அவர் நீரில் மூழ்கி இறந்ததாக கூறப்படுவதை எங்களால் நம்பமுடியவில்லை. குறித்த ஏரியில் நீரின் அளவு 7 அடிக்கு குறைவாக இருப்பதாக எண்ணி அவர் அதில் குதித்திருக்கலாம், மேலும் சேற்றில் சிக்கி குணா இறந்துள்ளார்.

குணாவின் தாய் ஜனார்தனம்மா மருத்துவமனையில் சுயநினைவின்றி சிகிச்சை பெற்று வரும் நிலையில் மகனின் இறப்பு குறித்து அவருக்கு இன்னும் தெரியாது என கூறியுள்ளார். குணா கடைசியாக அவரின் பிறந்தநாளின் போது குடும்பத்தாருடன் போனில் பேசியுள்ளார்.

அப்போது சில மாதங்களில் சொந்த ஊருக்கு வருவேன் என கூறியிருக்கிறார். இதனிடையில் குணாவின் சடலத்தை அமெரிக்காவில் இருந்து சொந்த ஊருக்கு அனுப்புவதற்கான வேலைகள் நடந்து வருவதாக தெரியவந்துள்ளது.