மொரட்டுவ ரண்வெலி மாவத்தைக்கு அருகிலுள்ள பலகை வர்த்தக நிலையம் ஒன்றிலிருந்து எரிகாயங்களுக்குள்ளான நிலையில் ஆண் ஒருவரின் சடலம் மீட்கப்பட்டுள்ளது.

குறித்த பகுதியில் வசிக்கும் பிரதேச வாசிகள் வழங்கிய தகவலுக்கு அமைய இந்த சடலம் இன்று அதிகாலை மீட்கப்பட்டுள்ளதாக தெரிவிக்கப்பட்டுள்ளது.

மஹரகம பகுதியில் வசிக்கும் 50 வயதுடைய குடும்ப தலைவர் ஒருவரே இவ்வாறு சடலமாக மீட்கப்பட்டுள்ளார். வாடகை வாகனம் செலுத்தும் சாரதியான குறித்த நபர் நேற்று முன்தினம் வீட்டிலிருந்து வௌியேறியுள்ளார்.

குறித்த தினத்திலிருந்து அவர் காணாமல் போயிருந்த நிலையில் காவல் துறையினர் இன்றைய தினம் சடலமாக மீட்டுள்ளனர். சடலம் மரண விசாரணைகளுக்காக வைத்தியசாலையில் வைக்கப்பட்டுள்ள நிலையில் காவல் துறையினர் விசாரணைகளை மேற்கொண்டு வருகின்றனர்.

கத்தியால் குத்தி கொலை

றாகமை – மெத்தேகொட பகுதியில் தனது மனைவியை கணவர் கூரிய ஆயுதத்தால் தாக்கி கொலை செய்துள்ளார்.

இருவருக்கும் இடையே நேற்றைய தினம் ஏற்பட்ட வாய்த்தகராறு அதிகரித்து இந்த கொலை சம்பவம் இடம்பெற்றுள்ளதாக காவல்துறை தெரிவித்துள்ளது.

கனேமுல்ல பகுதியை சேர்ந்த 35 வயதான பெண்ணே கொலை செய்யப்பட்டுள்ளார். கொலை செய்த சந்தேக நபரை காவல்துறை கைது செய்துள்ளது.

பீதியில் உறைய வைத்த யானை

வெல்லவாய – ஆனபல்லம பகுதியில் கிராமம் ஒன்றினுள் புகுந்த காட்டு யானையை விரட்டுவதற்கான நடவடிக்கை இன்று காலை இடம்பெற்றுள்ளது.

நேற்று இரவு வந்த காட்டு யானை காலை வரை அங்கு உலாவி கொண்டிருந்ததால் பிரதேவாசிகள் அச்சத்தில் காணப்பட்டதாக எமது செய்தியாளர் தெரிவித்துள்ளார்.

அந்த யானை அப்பகுதியில் உள்ள பாடசாலை அருகிலும் சென்றுள்ளதால் மாணவர்கள் கடும் பீதியடைந்திருந்த நிலையில், பின்னர் வெல்லவாய வனவிலங்கு அதிகாரிகளும் பிரதேசவாசிகளும் இணைந்து யானையை காட்டுக்கு விரட்டியுள்ளனர்.

பாரிய ஆபத்து

இலங்கையில் சேனா என்ற படைப்புழுவைப் போன்று மற்றுமொரு புதிய வகை புழு இனம் கண்டுபிடிக்கப்பட்டுள்ளது. நெல் மற்றும் சோளப் பயிர்களை நாசப்படுத்தும் இந்த புழு இனம் திம்புலாகல – மனம்பிட்டிய பிரதேசத்திலிருந்து கண்டுபிடிக்கப்பட்டுள்ளது.

நாவல் நிறத்தையுடைய இந்தப் புழுவின் உடலின் சில இடங்களில், செம்மஞ்சள் நிறமும் கலந்திருப்பதாக தெரிவிக்கப்படுகின்றது. இவை, ​நாற்று இலைகளில் இருந்து கண்டுபிடிக்கப்பட்டதாக குறித்த பிரதேச விவசாயிகள் தெரிவிக்கின்றனர்.

இவை, நெற்கதிர்கள் மாத்திரமன்றி, நாற்று இலைகளையும் உணவாக உட்கொண்டிருப்பதாக கண்டுபிடிக்கப்பட்டுள்ளது.

ஏற்கனவே சேனா என்ற படைப்புழு சோளம் உள்ளிட்ட பயிர்களை அழித்து வருகிறது. இதன் காரணமாக சுமார் 50 ஆயிரம் ஏக்கர் நிலப்பரப்பு சோள செய்கை பாதிக்கப்பட்டுள்ளது.

இந்நிலையில் புதிய வகை புழு நெற்கதிர்களை இலக்கு வைத்து தாக்குதல் நடத்துவதால் இலங்கை பாரிய நெருக்கடிக்கு முகங்கொடுக்க நேரிடும் என எச்சரிக்கப்பட்டுள்ளது.

மோட்டார் சைக்கிள்  தீவைத்து எரிப்பு

பரந்தன்-முல்லைத்தீவு பிரதான வீதியின் விஸ்வமடு சந்திக்கு அருகாமையில் இன்று (24.01.2019) மாலை இச் சம்பவம் இடம்பெற்றுள்ளது. சம்பவம் குறித்து தெரிய வருகையில்,

விஸ்வமடு சுகாதார வைத்திய அதிகாரி பணிமனைக்கு அருகாமையில் இரு இளைஞர்கள் மதுபானம் அருந்திய நிலையில் கதைத்துக் கொண்டிருந்தனர். இதன் இருவருக்குமிடையில் வாய்த் தர்க்கம் ஏற்பட்டுள்ளது. இதன் போது குறித்த இளைஞர்களில் ஒருவர் மோட்டார் சைக்கிளுக்கு தீயூட்டியுள்ளார்.

சடுதியாக செயற்பட்ட மக்கள் மோட்டார் சைக்கிளில் பற்றியெரிந்த தீயினை கட்டுப்பாட்டுக்குள் கொண்டு வந்தனர். பொதுமக்கள் பொலிஸாருக்கு தகவல் வழங்கியதினையடுத்து சம்பவ இடத்திற்கு விரைந்த தர்மபுரம் பொலிஸார் விசாரணைகளை முன்னெடுத்ததுடன் குறித்த இளைஞர்கள் இருவரையும் கைது செய்தனர்.

மோட்டார் சைக்கிலில் இருவரும் ஒன்றாக வருகை தந்துள்ளனர். அதன் பின்னர் விசுவடு பகுதியில் உள்ள மதகில் இருவரும் அமர்ந்திருந்து கலந்துரையாடியுள்ளனர். இதன் போது இவர்களில் ஒருவர் வா போவம் என தெரிவித்த சமயத்தில் மற்றைய நபர் மறுப்பு தெரிவித்துள்ளார்.

இதனையடுத்தே உனது மோட்டார் வண்டி தேவையில்லை என தெரிவித்து குறித்த நபர் மோட்டார் சைக்கிலினை எறித்துள்ளதாக ஆரம்ப கட்ட விசாரணைகளிலிருந்து தெரியவருவதாகவும் இச் சம்பவம் தொடர்பான மேலதிக விசாரணைகளை தாம் மேற்கொண்டு வருவதாக தருமபுரம் பொலிஸார் தெரிவித்தனர்.

இலங்கையில் பாரியளவில் போதைப்பொருள் கடத்தலில் ஈடுபடும் வெளிநாட்டு தம்பதியொன்று தப்பியோடியுள்ளதாக பொலிஸார் தெரிவித்துள்ளனர்.

சில நாட்களுக்கு முன்னர் கொள்ளுப்பிட்டியில் அமைந்துள்ள சொகுசு வீடு ஒன்றில் 100 கோடி ரூபா பெறுமதியான ஹெரோயினுடன் வெளிநாட்டவர்கள் கைது செய்யப்பட்டனர். அவர்களிடம மேற்கொண்ட விசாரணையின் போது இந்த விடயம் தெரியவந்துள்ளது.

அதற்கமைய இந்த போதைப்பொருள் நடவடிக்கையினை முன்னெடுத்துச் சென்றவர்கள் துருக்கியை சேர்ந்த தம்பதியர் எனத் தெரியவந்துள்ளது.

குறித்த வௌநாட்டு தம்பதி நீண்ட காலமாக இலங்கையில் தங்கயிருந்து பாரிய ஹெரோயின் போதைப்பொருள் வர்த்தகத்தில் ஈடுபட்டுள்ளனர்.

எவ்வித சந்தேகத்தையும் ஏற்படுத்தாமல் இந்த வர்த்தகத்தை நடத்தி செல்வதற்காக துருக்கி நாட்டு தம்பதியினர் அமெரிக்கர்களை தொடர்புப்படுத்தியுள்ளதாக பொலிஸார் தெரிவித்துள்ளனர்.

போதைப்பொருள் களஞ்சிய அறையை நடத்தி செல்வதற்கு கொள்ளுப்பிட்டியில் உள்ள சொகுசு வீட்டிற்கு மாத வாடகையாக இரண்டரை லட்சம் ரூபாய் செலுத்தி வந்ததாக விசாரணைகளில் தெரியவந்துள்ளது.

சந்தேக நபர்களாக இந்த தம்பதி தற்பொது கொழும்பை விட்டு தப்பிச் சென்றுள்ள நிலையில், அவர்களை கைது செய்வதற்கு விசேட பொலிஸ் விசாரணைகள் ஆரம்பிக்கப்பட்டுள்ளது.

சூட்சுமமான முறையில் இலங்கையில் பதுங்கியிருந்து பாரிய போதைப்பொருள் கடத்தலில் ஈடுபட்டமை தொடர்பில் பொலிஸார் அதிர்ச்சி வெளியிட்டுள்ளனர்

மோசமான செயல்

முல்லைத்தீவு – பாண்டியன்குளம் பகுதியில் கடை ஒன்றின் பின்னால் நிறுத்தி வைக்கப்பட்டிருந்த மோட்டார் சைக்கிளை தீயிட்டு எரித்த சந்தேக நபரை கைது செய்துள்ளதாக பொலிஸார் தெரிவித்துள்ளனர்.

முல்லைத்தீவு – மாந்தை கிழக்கு, பாண்டியன்குளம் பகுதியில் உள்ள வர்த்தக நிலையம் ஒன்றுக்கு பின்னால் தனது மோட்டார் சைக்கிள் ஒன்றை அதன் உரிமையாளர் நேற்றிரவு நிறுத்தி விட்டு வீட்டுக்கு சென்றுள்ளார். இதையடுத்து மற்றொரு மோட்டார் சைக்கிளில் மதுபோதையில் வந்த நபர் ஒருவர் குறித்த சைக்கிளை தீயிட்டுக் எரித்துள்ளனர்.

மோட்டார் சைக்கிள் திடீரென தீப்பற்றி எரிவது தொடர்பில் அவதானித்த அதன் உரிமையாளர் சம்பவ இடத்துக்கு ஓடிச் சென்றபோது அந்த இடத்திலிருந்து குறித்த நபர் மோட்டார் சைக்கிளில் தப்பிச் சென்றுள்ளார். அதன் பின் குறித்த நபரை பின்தொடர்ந்து துரத்தி சென்ற போது அருகிலுள்ள வீட்டுடன் கூடிய மற்றுமொரு வர்த்தக நிலைய வளாகத்துக்குள் நுழைந்துள்ளார்.

இதனையடுத்து சம்பவத்தில் பாதிக்கப்பட்ட மோட்டார் சைக்கிளின் உரிமையாளர் மல்லாவி பொலிஸ் நிலையத்துக்கு இன்று அதிகாலை சென்று தனது முறைப்பாட்டை பதிவு செய்திருந்தார்.

முறைப்பாட்டினை அடுத்து சம்பவ இடத்துக்கு விரைந்த பொலிஸார் இது தொடர்பான விசாரணைகளை மேற்கொண்டதுடன் இன்று பிற்பகல் சந்தேகத்தின் பேரில் ஒருவரை கைது செய்து விசாரணைகளை முன்னெடுத்து வருகின்றனர்.

சந்தேகநபரை நபரை நாளைய தினம் நீதிமன்றத்தில் ஆஜர்படுத்த நடவடிக்கைகளை முன்னெடுத்து வருவதாகவும் பொலிஸார் தெரிவித்துள்ளனர்.

தொழில்நுட்ப புரட்சி

இலங்கையில் செயற்கை மழைத் திட்டத்தை முன்னெடுப்பது தொடர்பான புரிந்துணர்வு உடன்படிக்கை கைச்சாத்திடப்பட்டுள்ளது. எதிர்காலத்தில் வரட்சி நிலை ஏற்படுகையில் நீர்மின்வலு உற்பத்தி சார்ந்த பிரச்சினைகளைத் தீர்க்கும் நோக்கத்துடன் செயற்கை மழைத் திட்டம் அமுலாகிறது. இதனை மின்வலு மற்றும் வணிக அபிவிருத்தி அமைச்சு நடைமுறைப்படுத்துகிறது.

தாய்லாந்து அரசாங்கம் புதிய தொழில்நுட்பத்தைப் பயன்படுத்தி செயற்கை மழை பெய்யச் செய்யும் திட்டங்களை அமுலாக்குகிறது.

இந்த விடயத்தில் தாய்லாந்தின் தொழில்நுட்ப அறிவைப் பெறுவது புரிந்துணர்வு உடன்படிக்கையின் நோக்கமாகும். இதில் கைச்சாத்திடும் நிகழ்வு நேற்று விமானப்படை தலைமையகத்தில் இடம்பெற்றது.

இலங்கை மின்சார சபையின் செயலாளர் கலாநிதி வி.என்.எஸ்.பட்டகொட, விமானப்படைத் தளபதி எயார் மார்ஷல் கபில ஜயம்பதி ஆகியோர் கைச்சாத்திட்டார்கள். இதன் போது அமைச்சர்கள் ரவி கருணாநாயக்க, பாட்டலி சம்பிக்க ரணவக்க ஆகியோரும் உடனிருந்தார்கள்.

புத்த மத வரலாற்று சின்னங்களை அவமதித்ததாக குற்றம்சாட்டப்பட்ட தென்கிழக்கு பல்கலைக்கழக மாணவர்கள் 7 பேர் நேற்று கைது செய்யப்பட்டுள்ளனர்.

பொலிஸ் ஊடக பேச்சாளர் இதனை தெரிவித்துள்ளார். வரலாற்று சிறப்புமிக்க கிரலாகல தூபி மீதேறி புகைப்படங்கள் எடுத்து, அவற்றை முகப்புத்தகத்தில் பதிவிட்ட ஏழு பேர் இவ்வாறு கைது செய்யப்பட்டுள்ளனர்.

வரலாற்று தொன்மை மிக்க, அனுராதபுரத்தில் அமைந்துள்ள கிரலாகல தூபி மீது ஏறி நின்று இளைஞர்கள் சிலர் புகைப்படம் எடுத்தமை பெரும் சர்ச்சையை ஏற்படுத்தியுள்ளது.

கடந்த ஜனவரி மாதம் ஐந்தாம் திகதி அல்லது அதற்கு அண்மித்த நாள் ஒன்றில் கிரலாகல தொல்பொருள் வனப்பகுதியில் சட்டவிரோதமாக நுழைந்த சிலர் இந்த புகைப்படங்களில் தோன்றியுள்ளதாக தெரிவிக்கப்படுகின்றது.

குறித்த இளைஞர்களின் செயற்பாடு பெரும் சர்ச்சைகளை ஏற்படுத்தியுள்ள நிலையில், அவர்களுக்கு எதிராக உடனடி நடவடிக்கை எடுக்க வேண்டும் என கோரிக்கை விடுக்கப்பட்டிருந்தது.

இந்நிலையிலேயே, குறித்த ஏழு இளைஞர்களும் கைது செய்யப்பட்டுள்ளதாக பொலிஸ் ஊடக பேச்சாளர் தெரிவித்துள்ளார்.