வவுனியா சமளங்குளம் கல்லுமலை விநாயகர் ஆலயம்

வவுனியா சமளங்குளம் கல்லுமலை விநாயகர் ஆலயத்தில் உள்ள தொல்பொருள் எச்சங்களை புனரமைப்பதற்காக தொல்பொருள் திணைக்களம் பலமுறை முயற்சித்தநிலையில் மக்களின் எதிர்ப்பினால் அதில் தடை ஏற்பட்டிருந்தது. இந்நிலையில் கடந்த 17 ம் திகதி புனரமைப்பு பணிகளுக்காக சென்ற திணைக்களத்தினருடன் மக்கள் முரண்பட்டிருந்தன்னர்.

எனினும் இருக்கின்ற பகுதிகளில் ஒரு செங்கற்கள் கூட புதிதாக வைக்கபடாமல் தற்போது இருப்பதனை போலவே புனரமைக்கபடும் என்று எமக்கு எழுத்து மூலம் உறுதிமொழி தந்தால் புனரமைக்க அனுமதிக்கின்றோம் என்று பொதுமக்கள் மற்றும் ஆலய நிர்வாகத்தால் கூறப்பட்டது.

அதன்பின்னர் அதற்கான எழுத்துமூலமான கடிதத்தை வழங்குவதாக தெரிவித்துவிட்டு தொல்பொருள் திணைக்களத்தினர் அங்கிருந்து சென்றனர். அதனடிப்படையில் நிலைமை கட்டுக்குள் கொண்டுவரப்பட்டிந்தது.

அதற்கமைவாக தொல்பொருள் நிலையபாதுகாப்பு சம்பந்தமாக மக்களைதெளிவுபடுத்தலும் அதற்கான காரணங்களை வெளிப்படுத்தலும் என்ற தலைப்பில் தொல்பொருள் திணைக்களத்தின் வன்னி மாவட்டங்களிற்கான ஊதவிப் பணிப்பாளர் பியதிலக பண்டா என்பவரால் குறித்த கடிதம் ஆலய நிர்வாகத்தினருக்கு கடந்த 18ம் திகதி வழங்கப்பட்டுள்ளது. அக்கடிதத்தில் தெரிவிக்கப்பட்டுள்ளதாவது..

குறித்த தொல்பொருள் எச்சங்களைக் கொண்ட பகுதி பாதுகாப்பு செய்வதற்காக 2018 திட்ட நடவடிக்கை மூலம் தொல்பொருள் திணைக்களத்தால் நிதி ஒதுக்கபட்டுள்ளது. 1970ம் ஆண்டு முதல் குறித்த பகுதியில் தொல்பொருட்பாதுகாப்பு நடவடிக்கைள் மேற்கொள்ளப்பட்டு வருகின்றது.

எனினும் சில வாரங்களிற்கு முன்னர் குறித்த பகுதியை புனரமைக்க முற்பட்டபோது அப்பகுதியில் காணப்படும் ஆலயத்தின் நிர்வாகம், பிரதேச மக்கள் எதிர்பினை தெரிவித்துவந்தனர். கடந்த 17ம் திகதி இவ்விடத்தை புனரமைப்பது தொடர்பாக தொல்பொருள் திணைக்கள அதிகாரிகள், அரசியல்வாதிகள், பொதுமக்கள் மத்தியில் கலந்துரையாடல் ஒன்று நடைபெற்றது.

அதற்கமைவாக குறித்த இடத்தின் பாதுகாப்பு தொடர்பாக தமக்கு அறியதரப்படவில்லை என்று அவர்களால் தெரிவிக்கபட்டதுடன், அது தொடர்பான தகவல்களை வழங்கிய பின்னர் அதனை புனரமைக்குமாறு கூறியிருந்தனர்.

பாதுகாப்பு (புனரமைப்பு) என்பது மாசடைதல் மற்றும் அழிவடைந்துபோகக்கூடிய கலாசார நிர்மானத்தின் ஆயள் காலத்தை முடியுமான அளவு அதிகரிப்பதற்கான நடவடிக்கையாகும்.

அதன்படி சமளங்குளத்தில் அமைந்துள்ள தூபி மற்றும் மூலஸ்தான கட்டடம் இதுவரை சேதமடைந்து காணப்படுவதனால் அழிவடைந்துள்ளது. எனவே அவற்றின் ஆயள்காலத்தை அதிகரித்து பாதுகாக்கவே இச்செயற்பாடு மேற்கொள்ளபடுகின்றது.

இதன்போது மேற்கொள்ளபடும் நடவடிக்கைகளாக தூபி மற்றும் மூலஸ்தானத்தில் அழிவடைந்துள்ள
செங்கற்களை மீண்டும் புணரமைத்தல், சேதமடைந்த சீமந்து அடைப்புகளை அகற்றி மீண்டும் புதிய சீமந்தை பூசி அதன் சக்தியை அதிகரித்தல். தூபியின் அமைப்பபை முழுமைப்படுத்தல், மூன்று வரிகள் அல்லது 9 அங்குலம் உயர்துதல், சந்துகளிற்கு பழைய முறைப்படி நிறப்பூச்சிடுதல் போன்ற பணிகள் இடம்பெறவுள்ளதாக குறித்த கடித்த்தில் தெரிவிக்கப்பட்டுள்ளது.

அத்துடன் வழங்கபட்ட அறிக்கை சிங்கள தமிழ் மொழிகளில் காணப்பட்டாலும் சொற்பிரயோகங்களில் ஏதேனும் வேறுபாடுகள் ஏற்படின் சிங்கள மொழியிலான சொற்பிரயோகத்திற்கே முன்னுரிமை அளிக்கபடும் என்று அவர்களால் வழங்கப்பட்டுள்ள கடிதத்தில் தெரிவிக்கப்பட்டுள்ளது.

அதிருப்தி உள்ளதாக நிர்வாகம் தெரிவிப்பு… குறித்த கடிதம் தொடர்பாக தமக்கு அதிருப்தி உள்ளதாக ஆலயத்தின் நிர்வாகத்தினர் தெரிவித்தனர்.

தூபியை முழுமைப்படுத்தல்,10 அங்குலம் வரை உயர்த்துதல் என்பன முறையற்ற செயற்பாடு. அதனை நாம் ஏற்கமாட்டோம். அத்துடன் சொற்பிரயோகங்களில் வேறுபாடுகள் ஏற்படின் சிங்கள மொழிக்கே முன்னுரிமை என்று கூறப்பட்டுள்ளது.

அத்துடன் இரு மொழிகளிலும் குறித்த கடிதம் எமக்கு தரப்பட்டுள்ளது. எனவே சிங்கள மொழியில் எவ்வாறு எழுதப்பட்டுள்ளது என்பது தொடர்பாக நாம் ஆராயவேண்டியுள்ளது.அதனை ஆராய்ந்த பின்னர் குறித்த கடிதத்தில் உள்ள அதிருப்திகள் தொடர்பாக தொல்பொருட் திணைக்களத்திற்கு தெரியப்படுத்த உள்ளதாக தெரிவித்தனர்.

வவுனியா நகரசபையின் 2019 ஆம் ஆண்டுக்கான வரவு செலவுத் திட்டம் உறுப்பினர்களால் ஏகமனதாக நிறைவேற்றப்பட்டுள்ளது.

வவுனியா நகரசபையில் இன்று(21.12.2018) இடம்பெற்ற அமர்வின் போது வரவு செலவுத் திட்டம் மீதான விவாதம் இடம்பெற்றது.

இதன்போது கூட்டமைப்பு உறுப்பினர் க.சந்திரகுலசிங்கம் வட்டார ரீதியாக ஒதுக்கப்பட்ட நிதியில் பாரபட்சம் காட்டப்பட்டுள்ளதாகவும், தவிசாளருக்கு ஆதரவளித்த உறுப்பினர்களின் வட்டாரங்களுக்கு அதிக நிதி ஓதுக்கப்பட்டுள்ளதாகவும், உண்மையில் உறுப்பினர்களுக்கு நிதி ஓதுக்காது ஒவ்வொரு வட்டாரத்தின் தேவைக்கேற்ப சரியாக நிதியை பாதீடு செய்ய வேண்டும் என்றும் தெரிவித்தார்.

இதன்போது கூட்டமைப்பின் நகரசபை உறுப்பினர்களான சு.காண்டீபன், ரி.கே.இராஜலிங்கம், க.சுமந்திரன், ந.சேனாதிராஜா, எஸ்.ரூபன் ஆகியோரும் இக் கருத்தை வரவேற்று தமது வட்டாரங்களுக்கும் பாகுபாடு காட்டப்பட்டுள்ளதாகவும், வருமானம் கூடிய வட்டாரங்களுக்கு குறைவான நிதியும், வருமானம் குறைந்த வட்டாரங்களுக்கு கூடிய நிதியும் ஒதுக்கப்பட்டுள்ளதாக குற்றம் சாட்டினர்.

இந்நிலையில் ஐக்கிய தேசியக் கட்சி உறுப்பினர்களான பாரி மற்றம் லரீப் தமது வட்டாரங்களில் இரு சமூகங்களைச் சேர்ந்த மக்கள் வசிப்பதாகவும் அங்குள்ள தேவைப்பாடுகள் தொடர்பிலும் தெரிவித்தனர்.

தமிழர் விடுதலைக் கூட்டணி உறுப்பினர் செபநேசராணி தமது வட்டாரத்தில் அதிக உறுப்பினர்கள் உள்ளதால் நிதி ஒதுக்கீடு சரி எனத் தெரிவித்தார். இதனையடுத்து சபையில் குழப்ப நிலை ஏற்பட்டது.

இறுதியில் நகரசபை பாதீடு கூட்டமைப்பு உறுப்பினர்களின் கோரிக்கைக்கு அமைவாக தவிசாளரால் பொது வேலைகளுக்கு ஒதுக்கப்பட்ட நிதிகளிலிருந்து மீளப்பெற்று வட்டார அபிவிருத்திக்கான ஒதுக்கீடுகள் அதிகரிக்கப்பட்டது.

இதனையடுத்து வவுனியா நகரசபையின் 2019 ஆம் ஆண்டுக்கான பாதீடு ஏகமனதாக அனைத்து உறுப்பினர்களின் ஆதரவுடன் நிறைவேற்றப்பட்டது.

வவுனியா நீதிமன்றத்திற்கு முன்பாக நீதிமன்ற வழக்கில் உள்ள வாகனங்களை அவ்விடத்திலிருந்து அப்புறப்படுத்தி வவுனியா நகரத்தினை அழகுபடுத்தும் முயற்சியினை மேற்கொண்டுள்ளதாக வவுனியா நகரசபையின் தவிசாளர் இ.கௌதமன் ஊடகங்களுக்கு தெரிவித்தார்.

வவுனியா நகரத்தினை அழகுபடுத்தும் முயற்சிகள் மேற்கொண்டு வரும் நிலையில் அதற்கு வலுசேர்க்கும் முகமாக நகரசபை தவிசாளரினால் வவுனியா மாவட்ட நீதிமன்ற நீதவானுக்கு விடுத்த விடுத்த கோரிக்கையினையடுத்து வவுனியா நீதிமன்றத்திற்கு முன்பாக காணப்படும் வாகனங்களை (வழக்கு நிலுவையில் உள்ள வாகனங்கள்) அவ்விடத்திலிருந்து அகற்றி நகரசபை வளாகத்தினுள் தரிப்பதற்கு அனுமதியளிக்கப்பட்டுள்ளது எனவும் வாகனங்களை தரிப்பதற்கு நிரந்தர இடம் ஒன்று கிடைக்கும் வரையே நகரசபை வளாகத்தினுள் வாகனங்கள் தரித்து நிற்பதற்கு அனுமதியளித்துள்ளதாக மேலும் தெரிவித்தார்.

வவுனியா வெங்கல செட்டிகுளம் பிரதேச சபையில் செயலாளராக கடமையாற்றிய அரச ஊழியர் ஒருவர் ஓய்வு பெற்று ஒருவருடம் கடந்த நிலையிலும் தமது ஓய்வூதியத்தினை வழங்க வடமாகாண பிரதிப் பிரதம செயலகம் பின்னடித்து வருவதாகவும் இதனால் அரச ஊழியராக நான் மிகவும் மன முடைந்து உளப்பாதிப்படைந்துள்ளதாகவும் இதற்கான ஒரு தீர்வினைப் பெற்றுத்தருமாறு வவுனியா மனித உரிமை அலுவலகத்தில முறைப்பாட்டினை மேற்கொண்டுள்ளார். இவ்விடம் குறித்து மேலும் தெரியவருகையில்,

வவுனியா வெங்கல செட்டிகுளத்தில் 2012, 2013 கடந்த இரண்டு வருடங்களாக பிரதேச சபை செயலாளராக கடமையாற்றிய அரச ஊழியர் ஒருவருக்கு 2013ஆம் ஆண்டு உள்ளுராட்சி திணைக்களம் யாழ்ப்பாணத்திற்கு இடமாற்றம் வழங்கியுள்ளது. இரண்டு வருடங்கள் பணியாற்றிய பின்னர் கடந்த 2015ஆம் ஆண்டு வவுனியா சுகாதாரத் திணைக்களத்திற்கு திரும்பவும் இடமாற்றம் செய்யப்பட்டு இரண்டு வருடங்கள் பணியாற்றிய நிலையில் கடந்த 20.02.2018 தினத்திலிருந்து ஓய்வு பெற்றுள்ளார்.

குறித்த அரச ஊழியருக்கு எதிராக வெங்கல செட்டிகுளத்தில் பிரதேச சபை தவிசாளர் மக்களால் தெரிவு செய்யப்பட்டவருக்கு மதிப்பளிக்காமல் நடந்துகொண்டுள்ளதாகவும் அவரது உத்தரவுகளை பின்பற்றவில்லை என்றும் குற்றச்சாட்டுக்கள் முன்வைக்கப்பட்டுள்ளதுடன் ஒருவருடத்தின் பின்னர் ஆதாரமற்ற நிதி மோசடிக்குற்றச்சாட்டுக்களும் முன்வைக்கப்பட்டிருந்தன.

எனினும் முன்னாள் தவிசாளரின் தவறான விடயங்களை நான் எவ்வாறு நடைமுறைப்படுத்துவது அதற்கு நான் எவ்வாறு துணைபோவது என்று ஓய்வு பெற்ற முன்னாள் பிரதேச சபை செயலாளர் கேள்வி எழுப்பியுள்ளார்.

இது குறித்து பல்வேறு விசாரணைகளின் பின்னர் நீண்ட காலமாக அரச சேவையிலுள்ளவர்களுக்கு இவ்வாறான சம்பவம் மிகவும் பாதிப்படையச் செய்துள்ளது.

எனவே எனது ஓய்வூதியத்தினைப் பெற்றுத்தர நடவடிக்கை மேற்கொள்ளுமாறும் பிரதிப் பிரதம செயலகத்தின் நடவடிக்கையினால் மிகவும் உளப்பாதிப்படைந்து மன உழைச்சல் ஏற்பட்டுள்ளதாக வவுனியா மனித உரிமை ஆணைக்குழுவில் முறைப்பாட்டினை மேற்கொண்டுள்ளார்.

மாகாணப் பொதுச்சபை ஆணைக்குழுவின் தீர்மானத்தை மதிக்காத நிலை ஏற்பட்டுள்ளது. பொதுச்சபை ஆணைக்குழுவினரால் வழங்கப்பட்டுள்ள தீர்மானத்தை நடைமுறைப்படுத்தவில்லை குறித்த அரச ஊழியரான முன்னாள் பிரதேச சபைச் செயலாளருக்கு எதிராக எவ்வித குற்றச்சாட்டுக்களையும் முன்வைக்கவில்லை ஏற்கனவே இடம்பெற்ற விசாரணைகள் அனைத்தும் தவறு என்று தெரிவிக்கப்பட்டுள்ளது.

அனைத்துக் குற்றச்சாட்டுக்களிலிருந்தும் அரச ஊழியரை விடுவிக்குமாறு பணிக்கப்பட்டுள்ளது. நிதி மோசடி இடம்பெற்றிருப்பின் குறித்த அரச ஊழியருக்கு எதிராக பொலிசாரால் நடவடிக்கை எடுக்கப்பட்டிருக்கவேண்டும்.

ஆனால் எவ்வித முறைப்பாடுகளும் மேற்கொள்ளப்படவில்லை. எமது நடவடிக்கைகள் தொடாந்து இடம் பெற்றுக்கொண்டிருக்கின்றன. என்று மனித உரிமைகள் ஆணைக்குழுவின் வவுனியா பிராந்திய அதிகாரி தெரிவித்துள்ளார்.

வவுனியாவில் அரச பேருந்தில் ஏறுவதற்கு முன் சாரதி பேருந்தினை செலுத்தியமையினால் வயோதிபர் ஒருவர் காயமடைந்துள்ளார்.

குறித்த பகுதியில் கடமையில் ஈடுபட்டுக்கொண்டிருந்த போக்குவரத்து பொலிஸ் உத்தியோகத்தர் இது குறித்து அசமந்தமாக செயற்பட்டமை தொடர்பில் பலரும் விசனம் தெரிவித்துள்ளனர். சம்பவம் தொடர்பாக தெரியவருவதாவது,

வவுனியா புதிய பேருந்து நிலையத்திற்கு முன்பாக பொலிஸாரினால் அமைக்கப்பட்டுள்ள பேருந்து நிழற்குடையிலிருந்து அரச பேருந்தில் ஏறுவதற்கு முற்பட்ட நிலையில் சாரதி பேருந்தினை செலுத்தியுள்ளார். இதன் காரணமாக குறித்த வயோதிபர் நிலை தடுமாறி வீதியில் வீழ்ந்துள்ளார்.

இந்நிலையில் குறித்த வீதியால் சென்று கொண்டிருந்தவர்கள் பேருந்தை தடுத்து நிறுத்தி அப்பகுதியில் கடமையில் ஈடுபட்டிருந்த போக்குவரத்து பொலிஸாருக்கு தெரியப்படுத்தியுள்ளார்.

குறித்த சாரதியும், நடத்துனரும் வயோதிபரிடம் தாம் பிழையாக நடக்கவில்லை என அநாகரிகமான வார்த்தைகளை பயன்படுத்தியுள்ளனர்.

குறித்த சம்பவ இடத்திற்கு வருகை தந்த போக்குவரத்து பொலிஸ் உத்தியோகத்தர் சம்பவத்தை கேட்டறிந்த நிலையில், வயோதிபரை குறித்த பேருந்தில் ஏற்றிச் செல்லுமாறு தெரிவித்ததுடன் சம்பவம் தொடர்பில் எந்தவித நடவடிக்கைகளும் மேற்கொள்ளாது அங்கிருந்து செல்ல அனுமதித்துள்ளமையும் தெரியவந்துள்ளது.

குறித்த பொலிஸ் உத்தியோகத்தரின் செயற்பாட்டை அங்கிருந்தவர்கள் விமர்சித்ததுடன் ,இது குறித்து ஏன் நடவடிக்கை எடுக்கப்படவில்லை எனவும் கேள்வி எழுப்பியுள்ளனர்.

வவுனியாவை மையமாகக்கொண்டு வடமாகாணத்திலுள்ள பெண்களுக்கு எதிரான வன்முறைகளுக்கு குரல் கொடுப்பதற்கான வடமாகாண மகளிர் முன்னேற்றக் கழகம் அமைப்பு ஒன்றின் உருவாக்கமும் அலுவலகத் திறப்பும் இன்று(21.12) காலை 9.30 மணியளவில் தாண்டிக்குளம் பிரதான கண்டி வீதியில் விவசாயக் கல்லூரிக்கு முன்பாக அங்குரார்ப்பணம் செய்துவைக்கப்பட்டுள்ளது.

பெண்களுக்கு எதிரான வன்முறைகளைத் தடுக்கவும் அதற்கு எதிராக குரல் கொடுக்கவும் வடமாகாண மகளிர் முன்னேற்றக் கழகத்தில் வடக்கிலிருந்தும் 36 கிராமங்களிலுள்ள பெண்களை இணைத்தும், வசதியற்ற மாணவர்களுக்கு உதவிகள், போதைப்பாவணை, பெண்கள் சிறுவர் துஸ்பிரயோகம், பாலியல் இறுவட்டு, போன்றவற்றிற்கு எதிராகவும் ஒவ்வொரு கிராமங்களிலிருந்தும் இரண்டு பெண்களை உள்ளடக்கிய செயற்பாடுகளுடன் ஆரம்பிக்கப்பட்டு அங்குரார்ப்பணம் செய்து வைக்கப்பட்டுள்ளது.

இந்நிகழ்வில் வடமாகாண மகளிர் முன்னேற்றக்கழகத்தின் தலைவி காமராஜ் இராஜகுமாரி, ஈச்சங்குளம் பொலிஸ் நிலைய பதில் பொறுப்பதிகாரி, வவுனியா தமிழ் தெற்கு பிரதேச சபை உறுப்பினர் பத்மநாதன் சத்தியநாதன், வவுனியா பிரதேச செயலகப் பெண்கள் அபிவிருத்தி உத்தியோகத்தர் திருமதி சிவதர்சன் சுபாஜினி மற்றும் பெண்கள் அமைப்புக்கள், பொதுமக்கள் எனப்பலரும் கலந்துகொண்டனர்.